Read Sangir PANGANGONGGỌ U TORATẸ̌ KAPIA 7 Bible Online

PANGANGONGGỌ U TORATẸ̌ KAPIA 7 - Sangir bible

PANGANGONGGỌ U TORATẸ̌ KAPIA 7

¹ ”MAWU Ruatanu e sarung mẹ̌bawa si kamene sarang banua kụ sarung pẹ̌tanakeng i kamene, dingangu mal᷊awọ kawanua sarung itokol᷊ʼE wọu ene. Su těngom matanu e i Sie sarung měnokol᷊u wansa pitu kụ limembong kasěllahe ringangu limembong katoghase wọʼi kamene, kụ kai tau Het, Girgasi, Amori, Kanaan, Feris, Hewi ringangu Yebus.

²Kereu MAWU Ruatanu měnarakangu apaʼm bansa ene su ral᷊ungu kawasanu ringangu i kamene e makawatạ si sire e, patẹ e i sire kěbị. Kumbahang kuměndagʼi sire arau mẹ̌koạ pẹ̌dariandi ringang i sire.

³I kamene tawe wotonge mẹ̌kawing dingang i sire, ringangu abe pakawala manga anạu e mẹ̌kawing i sire,

⁴tadeạu i sire e kumbahangbe mẹ̌těngkaraung manga anạ i kamene e wọu anuʼm MAWU kụ měněmba manga ruata wal᷊ine. Kereu i kamene kawe měněmba manga ruata wal᷊ine e, MAWU e lumangehẹ̌ kụ i kamene sarung tạ kararěnnane ipakawinasa-Ne.

⁵ Ual᷊ingu ene, lenggẹ e kal᷊awọu manga pananěmbaěngu manga wansa ene e, golangke kal᷊awọu manga rihi watu kụ lẹ̌ěnaěng i sire kěramatẹ̌, lẹ̌i e kal᷊awọu awẹ u tatialang Asyera, ringangu tutungke kal᷊awọu manga tul᷊adang mahang duata e kụ sẹ̌sěmbaěng i sire.

⁶ Koạko kěbị ene e ual᷊ingu i kamene kawe tataghuanengu MAWU Ruatanu. Bọu kal᷊awọu wansa su wowoʼn dunia ini e, seng i kamene pinileʼm MAWU Ruatanu e mědeạu makoạ umatʼE kụ kapiaěnge.

⁷I kamene lẹ̌lawokang dingangu nipileʼm MAWU wal᷊inewe ual᷊ingu i kamene e něngalembong kasariane wọu manga wansa wal᷊ine; kai hatede i kamene kai kawanua kakạdodokange su wowon dunia.

⁸Kaiso MAWU e němile si kamene ual᷊ingu i Sie kụkěndagʼi kamene ringangu mẹ̌měnningu mapakasěhụ u riandi nipato-Ne ringangu manga i upungu. Kai ual᷊ingu ene i Sie seng něngambang si kamene ringangu kawasa masěllahẹ̌ dingangu něliwiri kamene wọu pẹ̌tatahamawu su ratuʼm Misirẹ̌ e.

⁹ Pẹ̌tahěndungko u MAWU Ruatanu e kai Ruata man sěmbaụ, dingangu i Sie e kai Ruata satia. MAWU e napakasěhụ u kědonʼE ringangu napakatodẹ u kakěndagʼE kụ tatapẹ̌ sarang pal᷊ahite sěhiwu su hawenge su taumata apang kụkěndagʼi Sie ringangu mararingihẹ̌ su apang kal᷊awọu tita-Ne.

¹⁰Kai tawẹ sěnsahabe i Sie e měhukung i sire kụ mạběnsing i Sie.

¹¹Kụ tuhukeko patikụ toratẹ̌ apan takụ nihabarẹ̌ si kamene sěhěllo ini e.”

¹² ”Kereu i kamene tumingang manga tita ene, ringangu mẹ̌koạ ene su ral᷊ungu kasasatia, tangú MAWU Ruatanu e mal᷊aing sarung masatia su pẹ̌dariandi nạung kinoạʼE ringang i kamene. I Sie sarung měnodẹu kakěndagʼE kụ tatapẹ̌ si kamene, kere nạung nikědo-Ne su manga i upungu.

¹³Iạ e sarung kuměndagẹ̌ dingangu měngal᷊amatẹ̌ si kamene hakịu anạu e mal᷊awọ dingangu kakěpal᷊e mahuntinamba. I Sie sarung měngal᷊amatẹ̌ manga sasuangu, kụ makaual᷊i gandung, anggorẹ̌ dingangu lanan zaitun. I Sie sarung měngal᷊amatẹ̌ si kamene hakịu sapi e mal᷊awọ dingangu kambing ore lai dombanu e. Kal᷊awọu al᷊amatẹ̌ ene e sarung ikatarimạ i kamene su wanua kụ nionggọu MAWU e si kamene, natuhụewe kere su riandi-Ne su manga i upung i kamene.

¹⁴Bọu kěbị bansa su dunia e, tawẹ u sarang sěmbaụ e makaěbạ al᷊amatẹ̌ mạhěmpal᷊iu kerẹewe i kamene. Bọʼi kamene kěbị e ringangu wọu kal᷊awọu binatangu e tawẹ u sarang sěmbaụ kụ kawe wantọ.

¹⁵I kamene sarung těntanudang u MAWU bọu haghin sakị dingangu ipakarau bọu haghin hombang kụ nisahidiang i kamene e su Misirẹ̌ e, kaiso manga hombang ene e sarung ipakaěnsạʼE su manga sědụ u e.

¹⁶Apam bansa kụ isarakang u MAWU Ruatanu e su ral᷊ungu kawasanu e harusẹ̌be winasang i kamene; kumbahang mapatodẹ u kakěndagẹ̌ e si sire. Kumbahang maněmba manga ruatan sire e, u kakanoạ kerene e makạkaděntang silakạ si kamene.

¹⁷Aramanung i kamene e mạngěnna u manga wansa ene e něngalembong kal᷊awọe hakịu i kamene e tawe makatokol᷊i sire e.

¹⁸Kaiso kumbahang matakụ i sire e; pẹ̌tahěndungko apa nạung nikoạ u MAWU Ruatanu e su ratuʼm Misirẹ̌ e ringangu kal᷊awọu kawanuane.

¹⁹Pẹ̌tahěndungko kal᷊awọu hombang masasaria e kụ nisahiding kamene hala e, apang karal᷊inaụ, dingangu katoghasẹ̌ masaria e kụ ipẹ̌pakẹ u MAWU Ruatanu e waugu mapakal᷊iwirʼi kamene. Kerene lai MAWU Ruatanu e sarung mẹ̌karadiahang baugu patikụ bansa kụ ikẹ̌katakụ i kamene.

²⁰Sarang MAWU Ruatanu e sarung makapẹ̌gěgahẹ̌[9] sutal᷊oaran sire e, hakịu taumata apang kụ tumal᷊ang u watangeng dingangu mẹ̌kěmbuni e lai sarung mawinasa.

²¹Kụ kumbahang matakụ su manga wansa ene. MAWU Ruatanu e maněntanudẹ̌ si kamene. I Sie kai Ruata kụ masěllahẹ̌ dingangu mahuagatẹ̌.

²²Manga wansa ene e sarung itokol᷊ʼE kadiọ-kadịo bọu těngonu. I kamene e tawe wotonge mapakaupun sire e pakahanggosẹ̌ e, tadeạu apaʼm binatang dul᷊u e kumbahangbe mahuntinambang kal᷊awọe ringangu makoạ katatakụ si kamene.

²³Kerene MAWU Ruatanu e sarung měnarakangu manga sědụ u e si kamene. I Sie sarung mapẹ̌kal᷊emboghang i sire e sarang i sire e měngkawinasa.

²⁴I Sie sarung měnarakangu manga ratuʼn sire e si kau. I sire sarung pateěng i kamene, ringangu areng i sire e sarung kawul᷊enang. Tawẹu sarang sěngkatau e lai kụ makakědang tumatěngo si kamene; i sire kěbị e sarung ipakawihuang kamene.

²⁵Tutungko manga tul᷊adaʼm mahan duata kụ sẹ̌sěmbaěng i sire e. Kumbahang měnningu sal᷊aka arau wul᷊aeng kụ marěkạ dingange mase kumbahangbe měngal᷊ạ ene waugu watangengu e hala. Kereu i kamene lumampa tita ene i kamene e sarung mate, u MAWU Ruatanu e mẹ̌bẹ̌binsị u pananěmba tul᷊adaʼm mahan duata e.

²⁶Kumbahang měměllọu tul᷊adaʼm mahan duata su ral᷊ungu wal᷊enu, tadeạu laane kụ tumuhung si sie e kumbahangbe tumuhung si kamene e lai. Hal᷊ẹ̌ ene e harusẹ̌be pẹ̌binsị i kamene e ringangu pandaing kamene pakasanạ ual᷊ingu kawe nianen MAWU e.”