Read Sangir PANGANGONGGỌ U TORATẸ̌ KAPIA 8 Bible Online

PANGANGONGGỌ U TORATẸ̌ KAPIA 8 - Sangir bible

PANGANGONGGỌ U TORATẸ̌ KAPIA 8

¹”Patikụ toratẹ̌ kụ takụ nionggọ si kamene sěhěllo ini e harusẹ̌be koạ i kamene ringangu kasasatia, tadeạu i kamene e tatapẹ̌be wiahẹ̌, mahuntinambang kal᷊awọe ringangu mẹ̌tanạ su ěntana kụ niriandiʼm MAWU e su manga i upungu e.

²Pẹ̌tahěndungko! Ěpạ u pul᷊o su taunge karěngụ e MAWU Ruatanu e něngahạ i kamene su raral᷊engang kụ marau e limiu wanua l᷊inggi. Daral᷊eng ene tẹ̌timonaěngu MAWU e waugu pěnal᷊ukateng si kamene, tadeạu i Sie makasilo kai apa kạl᷊aunidẹ̌ su ral᷊ungu naungu, dingangu měnsang i kamene e tutuhụ bue kal᷊awọu tita-Ne.

³ I Sie napakawalang kamene kinal᷊unusang, kụ bọu ene i Sie něngonggọu manna nakoạ kaěng. I kamene ringangu manga i upung i kamene e tawe nẹ̌gěllịu kaěng kanengang ene e kal᷊imona. MAWU e mẹ̌kẹ̌koạ kerene mědeạu měněntiro si kamene u taumata e wal᷊inewe mẹ̌bẹ̌biahẹ̌ bọu kaěng samatang, kaiso kawe wọu patikụ hengetangu MAWU.

⁴Karěngụ u ěpạ u pul᷊o su taunge ini e pakeangu e tawe naghaghonaị dingangu laedu e tawe simahěnụ.

⁵Pẹ̌tahěndungko u MAWU Ruatanu e mạněntiro si kamene al᷊ingkai sěngkatau i amang mạněntiro manga anạ e.

⁶Kụ, koạko kal᷊awọu apaʼn nioroʼm MAWU Ruatanu. Pẹ̌biahẹ̌ko tuhụ manga toratʼE ringangu pěngadatẹ̌ko si Sie.

⁷MAWU Ruatanu e nẹ̌bawa si kamene e sarang banua kụ matawa; banua e kụ mal᷊awọ sal᷊ụ e dingangu simbul᷊e, dingangu akẹ měnẹ̌nokol᷊ẹ̌ bọu ral᷊ungu ěntana kụ měmẹ̌měsị sarang manga wal᷊ane ringangu wěntihe.

⁸Banua ene mẹ̌gẹ̌gěllịu ghẹ̌sine haghing gandung, anggorẹ̌, buang ara, dělima, kalun zaitun dingangu madu.

⁹Sene i kamene tawe kal᷊unusang arau kakawusange. Batu hanibẹ̌ piạ unide uase, ringangu wọu manga wukide i kamene makawangkawe tambaga.

¹⁰I kamene sarungbe mahungkaěng mẹ̌batụ kapulung kamene, ringangu pakitarimakasẹ su MAWU Ruatanu e ual᷊ingu ěntana matawa kụ nionggọ e si kamene.”

¹¹ ”Riagatewe pakapia-pia kumbahang sarang i kamene e miwul᷊eng MAWU Ruatanu; kumbahangbe mapakawala sarang sěmbaụ bọu kal᷊awọu toratʼE kụ nionggọku e si kamene sěhěllo ini.

¹²Kamagengu i kamene seng bọu kimaěng tuhụ kapulung kamene ringangu seng němangung manga wal᷊e maral᷊ěnggihẹ̌ e waugu pẹ̌tanakeng i kamene,

¹³ringangu kereu seng nahuntinamba sapi ringangu kambing ore lai manga dombanu e, sal᷊aka ringangu wul᷊aeng e ore lai kal᷊awọu arětạ tataghuanengu e wal᷊ine e,

¹⁴riagateko pakapia-pia, tadeạu i kamene e tawe maobotẹ̌ e ringangu tawe miwul᷊eʼm MAWU Ruatanu e kụ seng něliwiri kamene wọu Misirẹ̌ e, tampạ i kamene nipẹ̌tahuěllang.

¹⁵MAWU e něngahạ i kamene limiu wanua l᷊inggi kụ mal᷊oahẹ̌ e ringangu makạtatakụ, lawọ těmpune mawawisa ringangu iněngen lipange. Su ěntana mamara kụ tawẹ akene i Sie napakariading akẹ e nelehẹ̌ bọu watu, tadeạu i kamene e makapěnginung tuhụ kapulu e.

¹⁶Su wanua l᷊inggi e i Sie nẹ̌gěllịu manna makoạ kaěngu, kaěng kụ tawe ikakiral᷊ang manga i upungu. MAWU e mẹ̌kẹ̌koạ ene waugu pěnal᷊ukateng si kamene, ringangu mapakasanạu naung i kamene, tadeạu pěngěnsueěnge i Sie makapẹ̌koạbe mapia si kamene.

¹⁷Kụ, kumbahang-bahang kawe mạngěnna u kawe ual᷊ingu tawakal᷊i arau katoghasu hala kụ i kamene e nakalạ.

¹⁸Pẹ̌tahěndung u kawe MAWU Ruatanu e něngonggọu kakakalạ ene e si kamene. Hal᷊ẹ̌ ene e nịkakoạʼE ual᷊ingu sarang ěllo ini e i Sie wědang satia su riandine seng nịkakoạʼE su manga i upung i kamene.

¹⁹Kumbahang miwul᷊eng MAWU Ruatanu ringangu kumbahang mẹ̌sul᷊e su manga ruata wal᷊ine waugu měngadatẹ̌ arau mẹ̌tahamawu si sire. Ěllo ini iạ e maul᷊ị si kamene u kamageng u i kamene e mang měmpẹ̌koạ ene lai, nal᷊ahẹ u i kamene ipakawinasaʼm MAWU e.

²⁰Kereu i kamene e tawe rumaringihẹ̌ su MAWU Ruatanu e, i kamene mal᷊aing sarung ipakawinasa-Ne, mẹ̌sul᷊ungu manga wansa kụ nipakaupu-Ne su těngoʼm matang kamene.”