Read Sangir PANGANGONGGỌ U TORATẸ̌ KAPIA 9 Bible Online

PANGANGONGGỌ U TORATẸ̌ KAPIA 9 - Sangir bible

PANGANGONGGỌ U TORATẸ̌ KAPIA 9

¹”Daringihẹ̌ko manga anạ u sěmbaụ! Ěllo ini e i kamene limiu Sal᷊ụ u Yordan baugu mẹ̌kawasa wanuang manga wansa kụ limembong kasěllahe ringangu limembong katoghase wọʼi kamene. Manga soan sire e gaghaghuwạ dingangu mesele kụ tụtindagẹ̌ sěnaung karangẹ u langị.

²Taumatane e gaghaghuwạ dingangu matatoghasẹ̌ bal᷊akane; i sire e kai ansuang, ringangu i kamene seng nakaringihẹ̌ u tawẹu sarang sěngkatau l᷊ai makarokạ si sire e.

³Kaiso, orasẹ̌ ini e, i kamene sarung makasahidi hala kereapa MAWU Ruatanu e rimal᷊eng su těngong kamene kere putung kụ makahěngisẹ̌ e. I Sie sarung měmatạ si sire e su těngoʼm matang kamene e hakịu i kamene e tạ kararěnane makapěnokol᷊ẹ̌ dingangu makapěminasa si sire kere nạung niriandiʼm MAWU e.

⁴Samuring MAWU Ruatanu e něnokol᷊i sire waugi kamene e, abe pěngěnna u kawe i kamene niwawa-Ne sarang paị ene mědeạu makapěnaghuang ěntana ene e kawe ual᷊ingu kapiang kamene e ringangu nẹ̌koạ kapuluʼm MAWU Ruatanu e hakịu hinone wue makatarimạ u ene. Mamben těngadẹ̌ tala wue! MAWU e něnokol᷊u manga wansa ene e waugʼi kamene ual᷊ingu i sire e ral᷊akisẹ̌. MAWU e napakawalang kamene e něngal᷊ạ ěntanan sire e, ual᷊ingu i Sie e mapulu mapakasěhụu riandi-Ne su manga i upung i kamene i Abraham, Ishak dingang i Yakub.

⁶Pěngiakingke, watụ u MAWU Ruatanu e tawe měnarakangu ěntana mahuntawa ene si kamene ual᷊ingu i kamene kawe hinone makatarimạ u ene. Tala! I kamene ini e kai taumata těmbọ e makětị.

⁷Pẹ̌tahěndungko kereapa i kamene nakakariadiʼm MAWU e limangehẹ̌ su wanua l᷊inggi. Nanětạ bọu i kamene něněntangu Misirẹ̌ sarang i kamene nahumpạ sini, i kamene e rụdokạ MAWU.

⁸Sarang l᷊ai su Wul᷊udu Sinai i kamene e nakakal᷊angehẹ̌ MAWU e marasai, hakịu i Sie mapulu mapakawinasang kamene.

⁹ Iạ simaka wul᷊ude ene tadeạu makatarimạ u watu pẹ̌dariandi kụ nikoạ u MAWU e si kamene. Ěpạ u pul᷊o su ěllone ringangu ěpạ u pul᷊o su hěbine karěngụ e iạ natanạ su wowom bul᷊ude ene tawe kumakaěng dingangu tawe měnganginung.

¹⁰Bọu ene MAWU e něngonggọu watu rarua kụ seng niwohẹ u Mawu Ruata sẹ̌sane. Su watu ene kạbawohẹ apang bawera kụ nipěhengetangʼE wọu tal᷊oarang putunge si kamene, piạ i kamene mạtatampung su pentọ u wul᷊ude.

¹¹Kụ sarangke nal᷊iu ěpạ u pul᷊o su ěllone ringangu ěpạ u pul᷊o su hěbine, MAWU e něngonggọu watuʼm pẹ̌dariandi rarua ene e si siạ.

¹²Bọu e MAWU něhengetang si siạ, ’Lighạ e lintụ, batụu wansanu kụ niapasěbangu wọu Misirẹ̌ e seng němpẹ̌koạ dal᷊akisẹ̌. I sire e seng němpělenga wọu manga tita-Ku, ringangu němpẹ̌koạ tul᷊ada waugu pěněmbaěng i sire.’

¹³MAWU e mal᷊aing nẹ̌bera si siạ, ’Iạ masingkạ u wansa ene e kai makakětị těmbọ i sire.

¹⁴Kumbahangbe kạdingạ měnahaghe si Siạ. Iạ e kai mapakawinasan sire hakịu i sire e sen tawe lai tahěndungang. Arawe i kau e sarung Takụ koateng i amangu wansa sěmbaụ kụ limembong kasariane ringangu limembong katoghase wọʼi sire.’

¹⁵Bọu e iạ nẹ̌bihu, apidu kapẹ̌bẹ̌bawane batu pẹ̌dariandi rarua ene ringangu lima ruam běka e, takụ nirẹ̌sungang bul᷊ude kụ kạděllị e.

¹⁶Su siloku i kamene seng limampa titaʼm MAWU Ruatanu e. I kamene seng nẹ̌dosa su těngoʼm MAWU kahiang pẹ̌kakoạ i kamene tul᷊adaʼn sapi sěmbaụ bọu wul᷊aenge waugʼi kamene.

¹⁷Tangú su těngoʼm matang kamene e batuʼm pẹ̌dariandi rarua ene takụ nipěpạ sarang nakakorọ.

¹⁸Bọu e sěnsul᷊ẹko l᷊ai iạ nẹ̌tumpěkuhẹ̌ su těngom MAWU su wowom bul᷊ude karěngụ u ěpạ u pul᷊o su ěllone ringangu ěpạ u pul᷊o su hěbine, tawe kumakaěng dingangu tawe měnganginung. Ene takụ kẹ̌koateng ual᷊ingu i kamene seng nẹ̌dosa su MAWU ual᷊ingu pẹ̌kakoạ apa kụ su naungʼE kawe ral᷊akisẹ̌ e hakịu i Sie limangehẹ̌.

¹⁹ Iạ e matakụ u ral᷊angehu MAWU kụ mẹ̌dẹ̌daraẹ ual᷊ingu i kamene, hakịu i kamene kawe winasaěngʼE tuhụ kapulu-Ne, kaiso sěnsul᷊e ini e MAWU rụdaringihẹ̌ si siạ.

²⁰MAWU e mal᷊aing limangehẹ̌ tạ sihinge si Harun, hakịu i Sie mapulu měmate si sie, tangú iạ e nẹ̌kal᷊iomaneng baugʼi sie lai.

²¹Tul᷊adan sapi uada nikoạ u e, takụ nirěmmẹ su ral᷊ungu putung. Bọu e takụ nipẹ̌dal᷊ahěmpung dingangu nịdal᷊utạ sarang naal᷊usẹ̌ kere awul᷊ẹ̌, dingangu awul᷊ẹ̌ ene takụ nipẹ̌sawuhẹ̌ sarang dal᷊ungu songe kụ nelehẹ̌ bọu wul᷊ude ene.

²² Kerene lai su Tabera, Masa ringangu Kibrot-Taawa, i kamene kawe nakakariadi MAWU e limangehẹ̌.

²³ Bọu e su tempong kamene niorom MAWU apẹ̌nẹ̌něntangu Kades-Barnea mědeạu apasěpụ dingangu apẹ̌tẹ̌tanạ su wanua kụ sarung ionggọʼE si kamene, kaiso i kamene kawe rụdokạ titaʼm MAWU Ruatanu e; i kamene tawe mapulu mangimang arau rumaringihẹ̌ si Sie.

²⁴Den dokeng iạ e nasingkạ i kamene kai i kamene mang hanesẹ̌ dụdokạ MAWU.

²⁵Iạ masingkạ u MAWU e piạ kapulu-Ne mapakawinasang kamene. Tangú karěngụu ěpạ u pul᷊o su ěllone ringangu ěpạ u pul᷊o su hěbine iạ e mẹ̌tẹ̌tumpěkuhẹ̌ su těngoʼm MAWU

²⁶ringangu mẹ̌kal᷊iomaneng kere ini: O MAWU Kụ Limembong Karangetange, abe pakawinasa umatẹ̌ tataghuanengʼU ini e, wansa kụ nipakal᷊iwirʼU ringangu nitondanʼU pinakasěbang bọu Misirẹ̌ ual᷊ingu katoghasẹ̌ dingangu kawasa-Nu kụ masaria e.

²⁷Pẹ̌tahěndungko manga ěllangʼU e i Abraham, Ishak dingangi Yakub, dingangu kumbahang měmanda lulung pẹ̌tatungkětịu těmbọ, karal᷊akisẹ̌ dingangu rosang bansa ini.

²⁸Kereu umatʼU e ipakasue-Nu lai, tangú tau Misirẹ̌ e sarung mẹ̌bera u i Kau e tawe makaumal᷊ẹ̌ mẹ̌bawa taumata-Nu e sarang banua kụ niriandi-Nu e si sire, ringangu i Kau mẹ̌bawa si sire sarang banua l᷊inggi, mědeạu měmate si sire, ual᷊ingu i Kau e kawe mạběnsing i sire.

²⁹Katewe tahěndungeko, MAWU, u i sire ini e kai wansa kụ pinile-Nu nakoạ umatʼU, ringangu niwawa-Nu wọu Misirẹ̌ e ringangu katoghasẹ̌, ore lai kawasa-Nu e masaria.”