Read Sangir YOHANES 1 Bible Online

YOHANES 1 - Sangir bible

YOHANES 1

¹Su tětạ-tětạ e kal᷊imonan dunia e niriadi, Hengetang e seng ene. Hengetang e kai ringangu Ruata, kụ Hengetang e mẹ̌sul᷊ung dingangu Ruata.

²Dokeng su tětạe i Sie ringangu Ruata.

³Kěbị e niriadi wọʼi Sie, ringangu wọu kěbị apang seng ene, tawẹu sarang sěmbaụ niriadi tạ i Sie.

⁴Hengetang e kai simbul᷊u pẹ̌bawiahẹ̌,[1] dingangu pẹ̌bawiahẹ̌ e měgẹ̌gěllịu tualagẹ̌ su taumata.

⁵Tualagẹ̌ e sụsarang su kararěndung, dingangu kararěndung e tawe makawatạ e.

⁶ Narěntạe sěngkatau rarolohangu Ruata, arenge i Yohanes.

⁷I sie riměnta měhabarʼu tualagẹ̌ ene, tadeạu kěbị taumata e mangimang.

⁸I sie sẹ̌sane wal᷊inewe tualagẹ̌ ene, kai i sie kětạbeng mělahabare.

⁹Tualagẹ̌ tutune makạtualagẹ̌ kěbị taumata e, riměnta su dunia.

¹⁰Hengetang ene su dunia, dunia e niriadi wọʼi Sie, kaiso dunia e tawe makakiral᷊a.

¹¹I Sie riměnta su soanʼE sẹ̌sane, kaiso taumatanʼE tawe něnarimạ i Sie.

¹²Kaiso piạbe lai taumata kụ němpěnarimạ i Sie ringangu nangimang si Sie; i sire nionggotangʼE hakẹ̌ makoạ anạ u Ruata,

¹³kụ niwantelẹ̌ bal᷊inewe wọu taumata, u pẹ̌bawiahẹ̌ buhu e kai wọu anum Mawu e rarěntane.

¹⁴Hengetang e seng nariadi taumata, kụ nẹ̌tanạ sutal᷊oarang kitẹ, dingangu i kitẹ seng nakasahidi kawawantugʼE. Kawawantugẹ̌ ene seng nitarimạʼE tabidạu Ahusʼi Amang mang sěmbaụ. Wọʼi Sie i kitẹ makasilo Ruata ringangu kakěndagʼE si kitẹ.

¹⁵I Yohanes diměnta kere sahidinʼE, kụ i sie mělẹ̌habaru: ”Seng i Sie ini e nạung takụ ipẹ̌paul᷊ị: I Sie sarung duměnta samurin iạ e, kai limembong kasěllahe wọu iạ, u kal᷊amonan iạ ene, i Sie seng těbe ene.”

¹⁶I Sie napenẹu kakěndagẹ̌; kụ tawẹ ědone, i Sie měngal᷊amatẹ̌ si kitẹ.

¹⁷Toratʼu Mawu e kai nitarimạ i kitẹ bọu i Musa. Arawe kakěndagẹ̌ dingangu kasasatian Duata e nilahẹ si Yesus Kristus.

¹⁸Tawẹu nakasilo Mawu Ruata, sul᷊iun Ahusẹ̌ mang sěmbaụ, kụ mẹ̌sul᷊ung i Amang kụ kạsasěmbaụ dingangʼE. Kai i Sie nělahẹu Ruata i Amang si kitẹ e.

¹⁹Mangangawasang Yahudi su Yerusalem něndolohu manga imang dingangu taumatan Lewi apạkakoạ sol᷊ong anung Yohanes kụ iapakịbal᷊o si sie, ”Kai i sai i kau?”

²⁰I Yohanes něngaku mal᷊ahẹ, ”U iạ e wal᷊inewe Ratu Měnanal᷊amatẹ̌.”

²¹ ”Mạeng kerene, i kau kai i sai?” angkuěng i sire, ”I Elia ngae?” ”Bal᷊ine,” angkuěng i Yohanes. ”Nabi i kau e?”[2] kakiwal᷊on sire kapia. ”Bal᷊ine,” angkuěnge.

²²”Mạeng kerene, pẹ̌berạe si kami měnsang i sai i kau, tadeạu i kami makawawawe sasimbange baugʼi sire kụ dimolohʼi kami. Apạ e ipaul᷊ị u mạanun batangengu e?”

²³ I Yohanes nẹ̌berạe u, ”Seng iạ e ipẹ̌paul᷊ị u Nabi i Yesaya: ’Tau mạmohang su wanua l᷊inggi: Teneko daral᷊engangu Mawu.’ ”

²⁴Kal᷊awọu taumata apan nirolohʼu tau Farisi e[3]

²⁵nakiwal᷊o, ”Kereu i kau wal᷊inewe Ratu Mananal᷊amatẹ̌, arau wal᷊inewe i Elia, arau wal᷊inewe lai nabi, kawe unụe i kau měnahani?”

²⁶I Yohanes simimbang, ”Iạ e měnahani ringangu akẹ. Arawe su tal᷊oarang kamene ute kai piạ tau ta nikahěnganeng i kamene.

²⁷I Sie ruměnta samurin iạ e, kal᷊ingung měluka tal᷊ing sapatunʼE e, iạ e tawe wotonge.”

²⁸Kěbị ini e nariadi su Betania, su sěmbẹ̌kan daki wọu Sal᷊ụ u Yordan tampạ pěnẹ̌nahaniang i Yohanes.

²⁹Su sěngkariọěllone, i Yohanes nakasilọe Mawu Yesus dụděnta su anune. Tangu i Yohanes nẹ̌bera, ”Kakělla ěndaị, Ahusʼu Domban Duata nangěmmụ dosan dunia e.

³⁰Kai i Sie nạung takụ ipẹ̌paul᷊ịu sarung duměnta samurin iạ, kaiso kawe limembong kasěllahe wọu iạ, batụu těntal᷊ang iạ deng tawe nipěhanạe, i Sie seng těbe ene.

³¹Kal᷊imonan ene, iạ e wẹ̌gan Sie e. Sěmbal᷊iau iạ diměnta měnahani ringangu akẹ tadeạu tau Israel e masingkạben Sie.”

³²I Yohanes mal᷊aing nẹ̌sahidi u, ”Iạ nakasilo Rohkẹ̌ u Ruata natěntung kere manụ paluma ěnaẹ bọu l᷊angị kụ dimorọ su pusigʼE.

³³Tempo ene iạ bědawen bẹ̌ga i sai i Sie. Kaiso Ruata něndolohʼu iạ e apěnẹ̌nahaning akẹ e, kai seng nẹ̌bera si siạ, ’Mạeng i kau makasilo Rohkẹ̌ u Ruata e rumorọ, kụ mẹ̌tumanạ su sěngkatau, ute kai i Sie sarung měnahani ringangu Rohkẹ̌ u Ruata.’

³⁴Iạ e seng nakasilọʼE sẹ̌saku,” angkuěng i Yohanes, ”kụ iạ e nẹ̌sahidi u seng i Sie e Ahusʼu Ruata e.”

³⁵Sěngkariọěllone i Yohanes ene kạpia su tampạ ene e ringangu murite ruang katau.

³⁶Piạ e i sie nakasilo Mawu Yesus simahe, i sie nẹ̌bera, ”Kakěllạ e! Pai Ahusʼu Domban Duata.”

³⁷I rẹ̌dua nạung muritʼi Yohanes e nakaringihe manga wawera ene, tamai timol᷊ẹ e Mawu Yesus.

³⁸Mawu Yesus nẹ̌bihu sarang l᷊ikude kụ nakasilo si sire kạpahuntol᷊ene si Sie. I Sie nakiwal᷊o, ”I kamene kai mědẹ̌deạ apa?” Angkuěng i sire, ”Guru, i Tuang kai mạtanạ suapa?” (Guru arau ’Rabi’ mangal᷊ene mananěntiro.)

³⁹”Mahịe pěmandạe hala,” angkuěngu Mawu Yesus. I rẹ̌dua nahuntol᷊e si Sie, kụ nakasilọe katatanakengʼE. Orasẹ̌ ene seng pukulẹ̌ ěpạ bawěllo. Ěllo ene i rẹ̌dua e něngkatanạ dingangʼE.

⁴⁰Sěngkatau wọʼi rẹ̌dua kụ seng nakaringihẹ̌ bawerang Yohanes kụ mase timol᷊e Mawu Yesus, ute kai i Andreas, anạ u sěmbaụ i Simon Petrus.

⁴¹I Andreas e měngkatewe lighạ nẹ̌deạ si Simon, anạ u sěmbaụ e, mase nẹ̌bera si sie, ”I kami e seng bọu nẹ̌sombangu Mesias!” (Mesias ute mẹ̌sul᷊ungu i Kristus kụ kai: Ratu Mananal᷊amatẹ̌.)[4]

⁴²I Andreas e nangěntudʼi Simon sol᷊ong anun Mawu Yesus. Mawu Yesus e timaedẹ̌ si Simon, mase něhengetang, ”I kau e i Simon anạ i Yona. I kau sarungbe isěbạ si Kefas.” (Kefas mẹ̌sul᷊ung dingangu Petrus, mangal᷊ene: i wukidẹ̌ batu.)

⁴³Sẹ̌ngkariọěllone Mawu Yesus kai napulu makoạ sol᷊ong Galilea. I Sie kai nẹ̌sombang i Filipus kụ něhengetang si sie, ”Mahịe tol᷊e Siạ!”

⁴⁴I Filipusẹ̌ e kai tau Betsaida, pẹ̌tatanakeng i Andreas dẹ̌duang Petrus.

⁴⁵Filipusẹ̌ e nẹ̌sombang i Natanael kụ nẹ̌bera si sie, ”I kami e seng bọu nẹ̌sombangu tau ipẹ̌paul᷊ị i Musa su ral᷊ungu bukẹ̌ u Toratʼu Mawu, dingangu lai seng nihabaru manga nabi. I Sie kai i Yesus tau Nazaret, anạ i Yusup.”

⁴⁶Arawe i Natanael simimbang, ”Mariadi wue ngae hal᷊ẹ̌ mapapia suměpụ bọu Nazaret?” ”Pěmandạe sẹ̌sanu,” nisimbang i Filipus.

⁴⁷Mawu Yesus mạmanda si Natanael kạděntane, kụ měbẹ̌bisaran kakakoạ i sie, ”Tingangke, ene sěbạ e tau Israel patutune. Tawẹ apa hal᷊ẹ̌ mělle si sie.”

⁴⁸”Kereapa wue i Tuang nakakiral᷊a si siạ?” kerene kakiwal᷊on Natanael su Mawu Yesus. Mawu Yesus simimbang, ”I Filipus deng ta někẹ̌kui si kau e, Iạ seng těbe mạmanda si kau su al᷊ungu kalun ara e.”

⁴⁹”Tuang Guru,” angkuěng i Natanael, ”I Tuang e kai Ahusʼu Ruata! I Tuang e kai Ratun tau Israel!”

⁵⁰Mawu Yesus něhengetang, ”I kau mangimangu kětaben ual᷊ingu Iạ nẹ̌bera u Iạ seng nakasilo si kau su al᷊ungu kalun ara e? Patikụ hal᷊ẹ̌ kụ nangělembong kasěllahe wọu ene e sarungbe ikasilonu!”

⁵¹ Mawu Yesus něhengetang kapia, ”Mambeng kahěngang, pangimangke, i kau sarung makasilo l᷊angị e matope, ringangu manga malaekatʼu Mawu mal᷊intụ marangeng su l᷊antehu Ahusʼu Taumata e.”