Read Sangir YOHANES 11 Bible Online

YOHANES 11 - Sangir bible

YOHANES 11

¹ Tau arenge i Lazarus mạtanạ su Betania dingangu manga wawinene i Maria rẹ̌duan Marta.

² I Maria e kai tau wawine naněbohu l᷊ana mawěngi su l᷊aedu Mawu, mase niěmmụ u utạ e. Piạ su sěnsul᷊e i Lazarus nasakị.

³Bawinene rarua e něhabarẹ̌ su Mawu Yesus, ”Mawu, mahuaneng kandua kẹ̌kapiaěngu e nasakị.”

⁴Sarạeng Mawu Yesus nakaringihẹ̌ habarẹ̌ ene, i Sie něhengetang, ”Sakị ini e tawe makapate. Ini e nariadi mẹ̌deạu Mawu Ruata e bantughang, dingangu ual᷊ingu ene tangu Ahusʼu Ruata e mal᷊aing bantughang.”

⁵Mawu Yesus e kụkěndagi Marta, i Maria, ringangi Lazarus.

⁶Kai piạ e Mawu Yesus nakahombangke habarẹ̌ u i Lazarus masakị, i Sie nẹ̌tatudẹ natanạ sene rua ěllo wẹ̌dang!

⁷Bọu ene wuhụ e i Sie něhengetang su manga muritʼE, ”Bọete i kitẹ mẹ̌sul᷊e sol᷊ong Yudea.”

⁸I sire němpẹ̌simbang, ”Tuang Guru, bẹ̌dang ta nạdarěna tau Yahudi e mạngěntungu watu si Tuang, bọu e ini i Tuang e seng saụ mẹ̌bal᷊ị tamai?”

⁹”Karạ kawe mapul᷊o dua su kaorasẹ̌ sahěllo?” angkuěngu Mawu Yesus. ”I sain dụdal᷊eng su tempong ěllo e tawe masangkong, batụu i sie makạsilowe tualagu dunia ini.

¹⁰Arawe i sain dụdal᷊eng hěbi e mạsangkong; batụu tawẹ apa tualagẹ̌ si sie.”

¹¹Kerene ungkuěngu Mawu Yesus. Bọu ene i Sie saụewe lai nẹ̌bera, ”Hapị i kitẹ i Lazarus e seng nẹ̌tikị kai Iạ e reng tamai měmuko si sie.”

¹²Manga muritʼu Mawu Yesus e němpẹ̌bera, ”Mawu, mạeng i Lazarus kawe mětẹ̌tikị, ute i sie sarungbe mapia.”

¹³Timonan Mawu Yesus ute kai i Lazarus seng nate. Arawe su ěnnan sire ute Mawu Yesus kai maul᷊ị u i Lazarus měngkate mětẹ̌tikị matagẹ̌.

¹⁴Ual᷊ingu ene Mawu Yesus e naul᷊ị mahatedẹ̌ si sire u, ”I Lazarus e seng nate.

¹⁵Kaiso Iạ mal᷊uasẹ̌ lai Iạ e tadịe paịse, batụu kai limembong kapiane si kamene, tadeạu i kamene makapangimang. Bọete i kitẹ tamai sarang anun Lazarus.”

¹⁶I Tomas isẹ̌sěbạ, ”si Hindua” nẹ̌bera su manga hapị e manga muritʼu Mawu Yesus, ”Mahịe i kitẹ tumol᷊e, balạ e sěngkakate i kitẹ dingangʼE!”

¹⁷Piạ e Mawu Yesus narěntạ e su tampạ ene, i Lazarus seng ěpạ u ěllo karěngụe su kubul᷊ẹ̌.

¹⁸Soan Betania e maraning Yerusalem, kụ mangawe těllung kilo meterẹ̌ karaune.

¹⁹Mal᷊awọ tau Yahudi seng nahunděnta nẹ̌tiwo si Marta rẹ̌duan Maria e měmpẹ̌hiborẹ̌ si rẹ̌dua ual᷊ingu kinapateěngu mahuaneng dẹ̌dua.

²⁰Sarạeng i Marta nakaringihẹ̌ u Mawu Yesus e narěnta, i sie simẹ̌bang kụ naněnsomahẹ̌ Mawu Yesus, arawe i Maria e natanạ su wal᷊e.

²¹Angkuěng i Marta su Mawu Yesus, ”Mawu, kai mangạewe Mawu ene sini su tempo ene, ute nal᷊ahẹ u mahuaneku e wiahẹ̌ bue.

²²Manilaing kerene, iạ e masingkạ u orasẹ̌ ini e Ruata mal᷊aing sarung měgěllịu patikụ apan dẹ̌dorongang i Kau Mawu e si Sie.”

²³”Mahuanenu e sarungbe saụ mẹ̌biahẹ̌,” ungkuěngu Mawu Yesus si Marta.

²⁴I Marta e simimbang, ”Iạ e masingkạu i Lazarus sarungbe saụ mẹ̌biahẹ̌ su tempon taumata nate e apẹ̌bangung kapia su Ěllong Kiamatẹ̌ e.”

²⁵”Kai Iạ e mangonggọu pẹ̌bawiahẹ̌ dingangu mapẹ̌bangung u taumata nate,” angkuěngu Mawu Yesus si Marta. ”I saing kụ mangimang si Siạ e sarung mẹ̌biahẹ̌, maninglai i sie seng nate.

²⁶Dingangu taumata wiahẹ̌ apang mạngimang si Siạ e sarang karěngụe tawe mate. Mangimang bue i kau su hal᷊ẹ̌ ini e?”

²⁷”Mawu,” ungkuěng i Marta, ”iạ mangimang su Mawu Ahusʼu Ruata, Datu Mananal᷊amatẹ̌ e kụ sarung duměnta su dunia ini e.”

²⁸Sarạeng i Marta nẹ̌bera kerene, i sie tamai nẹ̌kui si Maria tuarine, kụ simiang si sie, ”Tuang Guru ene sini; i Sie e makịbal᷊ong kau.”

²⁹Nakaringihẹ̌ kerene ute, i Maria měngkatewe masahawụ nẹ̌bangung, kụ naněnsomahẹ̌ Mawu Yesus.

³⁰Su tempo ene, Mawu Yesus bẹ̌dangben tawe nạsuẹ̌ u soane. I Sie wẹ̌dang su tampạ nipẹ̌sombangeng i Marta.

³¹Tau Yahudi apan kapělẹ̌hibore si Maria su wal᷊e, nakasilo si Maria nẹ̌bangung, dingangu masahawụ simẹ̌bang; kụ i sire tamai timol᷊e si sie, u katihọ i sire, i sie kai sarang l᷊ěbing sumangị.

³²Piạ e i Maria nahumpạ su tampạ u Mawu Yesus kụ nakasilo si Sie, i Maria měngkatewe nẹ̌tumpěkuhẹ̌ su těngonʼE ringangu nẹ̌bera, ”Mawu, kai manga Mawu e ene sini su tempo ene, ute mahuaneku e tawe nate.”

³³Piạ e Mawu Yesus nakasilo si Maria sụsangị, dingangu tau Yahudi apan mạhunděnta ringangi Maria e mal᷊aing mạhunsangị, naungʼE měngkate masusa, kụ i Sie kakěllaěng e měngkate apa lụl᷊ahunsusa.

³⁴Tangu i Sie nakiwal᷊ọe si sire, ”Kai suapa i sie nilẹ̌bing i kamene?” ”Mahịe pěmanda, Tuang!” ungkuěng i sire.

³⁵Mase Mawu Yesus simangịe.

³⁶Tangu tau Yahudi e němpẹ̌berạe, ”Kakěllạe, wal᷊inewe mal᷊ongkọ kakěndagʼE si Lazarus!”

³⁷Kai piạ bọu tal᷊oaran sire kụ němpẹ̌bera u, ”I Sie makapẹ̌kěllawen taumata wuta e, kai unụe wue i Sie tawe makatahuntěndạ i Lazarus tadeạu kumbahang mate?”

³⁸Mawu Yesus saụewe nasusa-susa naunge, kụ i Sie natamai sol᷊ong pěndal᷊ẹ̌bingang. Pěndal᷊ěbingang ene e nạung kai liang sěmbaụ piạ lahěpinge watu gẹ̌guwạ.

³⁹”Al᷊ingko watu ěndaị e,” ungkuěngu Mawu Yesus. I Marta, wawineng tau nate ene simimbang, ”Mawu, i sie kai seng ěpạ u ěllo su kubul᷊ẹ̌, kụ kai seng dimaruru!”

⁴⁰Mawu Yesus něhengetang si Marta, ”Karạ kawe seng Takụ niwera si kau; kereu i kau mangimang, i kau sarung makasilo kasěllahu kawasang Duata e!”

⁴¹Tangu i sire němpělunggịen batu ene. Bọu ene Mawu Yesus dimal᷊ingara sol᷊ong l᷊angị kụ nẹ̌bera u, ”Tarimakasẹ Amang, u i Kau e seng dimaringihẹ̌ si Siạ.

⁴²Iạ masingkạ u i Kau měngkate hanesẹ̌ dụdaringihẹ̌ si Siạ, arawe Iạ měbẹ̌bera kere ini e, baugu taumata apan ene sini, tadeạu i sire mangimang u kai i Kau něndolohʼu Iạ e.”

⁴³Bọeten nẹ̌bera kerene, Mawu Yesus nẹ̌bansagẹ̌ tingihe maihạ, ”Lazarus sẹ̌bangke!”

⁴⁴Tangu simẹ̌bangke taumata nạung seng nate ene. Limane ringangu laede wẹ̌dang kạpapikungu hekạ kakěngkaing dingangu ghatine wẹ̌dang mạtatakạ u hekạ tatukusʼẹ̌ gati. ”Ol᷊ohẹ̌ko kakěngkainge, tadeạu i sie tawe masahaghe rumal᷊eng,” ungkuěng u Mawu Yesus su taumata l᷊awọ apan sene.

⁴⁵Lawọ bọu taumatan Yahudi e němpẹ̌děnta nẹ̌tiwo si Maria, němpangimang su Mawu Yesus piạ i sire nakasilo hal᷊ẹ̌ nariadi ene.

⁴⁶Arawe pirang katau wọʼi sire něngkakoạ sol᷊ong anun tau Farisi kụ němpaul᷊ị u apang kinoạ u Mawu Yesus.

⁴⁷Ual᷊ingu ene tau Farisi ringangu manga imang těmbonange nẹ̌tampung němpẹ̌kakereapa ringangu manga kasasěllahengu Ratẹ̌ u Agama. Ungkuěng i sire, ”I kitẹ e kai hinon mẹ̌kapu? Tau ini kai seng nẹ̌koạ karal᷊inaụ mal᷊awọ!

⁴⁸Mạeng i kitẹ měngkate mapakawalan Sie kere ini ute kěbị taumata masue měmpangimang si Sie. Kụ pěngěnsueěnge mangangawasa Roma e katewe ruměnta měnggoghahẹ̌ Bal᷊em Mawu, dingangu kěbị kawanuang kitẹ e!”

⁴⁹Sěngkatau wọi sire isẹ̌sěbạ si Kayafas, imang mawantugẹ̌ su taung ene nẹ̌bera, ”I kamene wẹ̌gawen apa-apa.

⁵⁰Kai tanakạěnna i kamene u waugu kasasal᷊amatʼu anạ u kawanua e, ěndokangbe sěngkatau mate sul᷊ungu kawe kěbị kawanua e mawinasa?”

⁵¹Tuhụ hinone i Kayafas nělahẹ u ene, bal᷊inewe wọu tiněnnane sẹ̌sane. Kaiso kawe kere sěngkatau imang mawantugẹ̌ su taung ene, naněbal᷊ẹ̌ u Mawu Yesus e sarung mapohong baugu tau Yahudi.

⁵²Kụ bal᷊inewe kětạu waugu tau Yahudi sěmatang, kaiso mal᷊aing baugu měngomol᷊ẹ̌ dingangu mapakasěmbaụ u manga anạ u Ruata kụ seng němpẹ̌kal᷊iaesẹ̌ e.

⁵³Nanětạ bọu sahěllo ene i sire těmbonangu Yahudi e sěngkanaung měmate Mawu Yesus.

⁵⁴Ual᷊ingu ene Mawu Yesus e seng tawe nẹ̌těngkatodẹ su těngon l᷊awọ sutal᷊oaran tau Yahudi. I Sie naněntangu Yudea wọu ene nakoạ sol᷊ong soa arenge Efraim maraning banua l᷊inggi. Kụ sene i Sie sěngkapẹ̌tana dingangu manga muritʼE.

⁵⁵Su tempo ene Sal᷊imbangu Paskang Yahudi e seng masandigẹ̌. Lawọ taumatan soa rarodọ e seng němpẹ̌saka sol᷊ong Yerusalem měmpěndal᷊engu tundun pěmamurẹ̌si watangenge měngantibẹ̌ pěmamantugu ěllo ene.

⁵⁶I sire měmpẹ̌dědeạ Mawu Yesus, kụ su tempọen mạtatampung su Wal᷊em Mawu e ute i sire němpẹ̌berạe sěmbaụ su wal᷊ine, ”Kereapạe su tiněnnang kamene? Aramanung i Sie tawe sumongo susal᷊imbang ini.”

⁵⁷I sire němpẹ̌berang ene u manga imang gagherẹ dingangu tau Farisi e seng nanẹ̌bangu parenta u i sai masingkạ měnsang suapa Mawu Yesus e, harusẹ̌ měhabaru ene, tadeạu i Sie ikasamẹ.