Read Sangir YOHANES 12 Bible Online

YOHANES 12 - Sangir bible

YOHANES 12

¹Ěnnungu ěllo kal᷊amonan Sal᷊imbangu Paskah, Mawu Yesus e nakoạ sol᷊ong Betania. Su soa ene pẹ̌tẹ̌tanakeng i Lazarus tau e niapẹ̌bangungʼE wọu papate.

²Sene Mawu Yesus e nipẹ̌saken sire, kụ i Marta e nakoạ mẹ̌sasiliwirẹ̌ e. I Lazarus dingangu manga sake e naiang sěngkapěngidopẹ̌ dingangu Mawu Yesus.

³ Ene i Maria e nasongọe ringangu l᷊ana mawěngi narwastu mal᷊ěga-l᷊ěgadẹ̌ e mangawe maloara su litere. I sie naměmbingu l᷊ana ene su l᷊aedʼu Mawu Yesus, bọu ene niěmmụ u utạ e. Kụ kaguwạu wal᷊e ene měngkatewe rimal᷊urung běngin lana e.

⁴Arawe i Yudas Iskariot, sěngkatau wọu muritʼu Mawu Yesus — kụ samurine kawe nẹ̌sunial᷊ʼi Sie — kawe nẹ̌bera,

⁵”Unụ e lana mawěngi ene tawe nịbawal᷊ụ e ringangu roitẹ̌ sal᷊aka[27] arěgane těllu hasụ su dinare kụ doite nipẹ̌gaghěllịko su taumata apang kasiang?”

⁶I Yudas nẹ̌bera kerene wal᷊inewe ual᷊ingu i sie kawe měnẹ̌nitị taumata kasiang, kaiso kawe ual᷊ingu i sie tahatako. I sie masau mangal᷊ạ doitẹ̌ bọu tatahoěngu roitʼu l᷊awo kạdaresọ si sie.

⁷Mawu Yesus něhengetang, ”Balạ e kere sẹ̌sane wawine ěndaị e! I sie nẹ̌koạ kerene kai ěllon pěndal᷊ẹ̌bing Siạ e.

⁸ Tau kasiange mambeng hanesẹ̌be ringang i kamene, arawe Iạ e tala wue.”

⁹Mal᷊awọ tau Yahudi nakaringihẹ̌ u Mawu Yesus kai ene su Betania, kụ i sire něngkakoạ sol᷊ong tampạ ene. I sire natamai wal᷊inewe tumbạu ual᷊ingu piạ i Yesus, kaiso mal᷊aing ual᷊ingu i sire mapulu měmanda si Lazarus kụ sen niapẹ̌bangung wọu papatene kahian Sie.

¹⁰Hakịu ene manga imang těmbonange mal᷊aing mapulu měmate si Lazarus;

¹¹ual᷊ingu i sie nakawodaị tau Yahudi mal᷊awọ naněntang i sire kụ němpangimang su Mawu Yesus.

¹²Sěngkariọěllone taumata l᷊awọ kụ seng narěnta waugu měmantugẹ̌ ěllon Paskah nakaringihẹ̌ u Mawu Yesus e seng kạdal᷊enge mẹ̌timona Yerusalem.

¹³ Tangu i sire němpangal᷊ạ e manga raungu korma mase nahunsẹ̌bang naněnsomahẹ̌ si Sie, kạpěmpẹ̌gione, ”Hosana! Kaal᷊amatengko i Sie riměnta su arengu Mawu. Kaal᷊amatengko Ratun Israel!”

¹⁴Mawu Yesus nakahombangke kalide kawuhuang sěmbaụ kụ nisakeěnge. Tangu natuhụ e kerẹewe mạbawohẹ su Winohẹ Susi:

¹⁵ ”Abe katakụ, sangiangu Sion! Kakěllạ e mahi Ratunu e, mạiangke su wowon kalide kawuhuang!”

¹⁶Su tempo ene manga muritʼu Mawu Yesus bẹ̌dang ta nakaěnna kěbị ene. Kutẹu sarạeng Mawu Yesus niwantughangken kapapohongʼE, buhụ e i sire nakatahěndung apang kinoạ u taumata si Sie kai seng kạbawohẹ su ral᷊ungu Winohẹ Susi e mạanun Sie.

¹⁷Apan taumata kụ ene su tempon Mawu Yesus nẹ̌kui si Lazarus apạsěbang bọu lěbing dingangu niapẹ̌bangung i sie wọu papatene, mang měmpẹ̌sẹ̌sahiding hal᷊ẹ̌ ene.

¹⁸Hakịu ene taumata l᷊awọ e něngkakoạ sol᷊ong anun Mawu Yesus u i sire nakaringihẹ̌ u kai i Sie nẹ̌koạ kal᷊aherang ene.

¹⁹Tangu manga tau Farisi e němpahumbisara sěmbaụ su wal᷊ine, ”I kitẹ e tawe makakoạ manga apa! Kakěllạ e, sěnaung dunia e němpẹ̌tol᷊e si Sie!”

²⁰Bọu tal᷊oaran taumata něngkakoạ sol᷊ong Yerusalem měmpẹ̌kal᷊ịomaneng sutempọen pẹ̌daral᷊uasẹ̌ e kai piạ tau Yunani pirang katau.

²¹I sire himaung si Filipus kụ nẹ̌bera, ”Anu, kereu wotonge, i kami kai mapulu mẹ̌sombang u Mawu Yesus.” (I Filipus e asal᷊e kai wọu Betsaida su Galilea.)

²²Tangu i Filipus tamai mẹ̌habaru ene si Andreas, kụ bọu ene irẹ̌dua něhabarẹ̌ su Mawu Yesus.

²³Mawu Yesus něhengetang si sire, ”Seng tempone Ahusʼu Taumata ipakawantugẹ̌.

²⁴Mambeng těngadẹ̌ bawera-Ku ini: Kereu wakịu gandung sěmbaụ tawe suangeng su ěntana e kụ mate, ute i sie mang kạtatanạ sěmbaụ. Arawe kamageng u wakị u gandung ene mate, ute i sie wuhụe mẹ̌bua mal᷊awọ.

²⁵ I sai mětẹ̌těnděkạ su pẹ̌bawiahe, sarung kailangengu ene. Arawe i sai měbẹ̌binsịu pẹ̌tatumbiahe su dunia ini e, sarung makatanudẹ̌ baugu pẹ̌bawiahe tutune ringangu kakalẹ̌.

²⁶I sai mapulu mẹ̌tangkiang si Siạ e harusẹ̌ tumol᷊e Siạ; tadeạu mẹ̌tatangkiang-Ku e makataking bue si Siạ e suapạewen Iạ ene sene. I sai mẹ̌tangkiang Siạ e sarung adateng i Amang-Ku.”

²⁷”Naung-Ku e tụtaghiawahẹ̌; apạ e Takụ ipẹ̌bera su orasẹ̌ ini e? Arau Iạ mẹ̌berạeng, ’Amang, liuko Iạ bọu orasẹ̌ ini e tangu’? Kaiso paghudu mambeng kahombangeng u tempon sigẹ̌sạ ini e nakakarěnta si Siạ e.

²⁸Amang, apakawantugẹ̌ko arengʼU!” Tangu nakaringihe tingihẹ̌ bọu l᷊angị maul᷊ị u, ”Iạ seng bọu namantugẹ̌, dingangu sarung lai mamantugẹ̌ kapia.”

²⁹Taumata l᷊awọ kụ ene sene nakaringihẹ̌ bue tingihẹ̌ ene. Ungkuěng i sire u, ”Ene kai rěllụ!” Kai piạko l᷊ai nẹ̌bera u, ”Bal᷊ine! Kai malạekatẹ̌ měmẹ̌misara si Sie!”

³⁰Mase Mawu Yesus něhengetang si sire, ”Tingihẹ̌ kinaringihẹ̌ e, wal᷊inewe waugu kapian batangeng-Ku, kaiso kai waugu kapiang kamene.

³¹Ini e seng tempone dunia ihukung; kai orasẹ̌ ini e mangangawasang dunia e nipakawatang.

³²Arawe Iạ e, kereu Iạ e seng iapakarangẹ bọu dunia e, ute kěbị taumata e Takụ sarung pakasue wol᷊engang sol᷊ong anu-Ku.”

³³I Sie něhengetang kerene ute kai mělẹ̌lahẹu saheng kapapohongʼE sarung.

³⁴ Taumata l᷊awọ e nẹ̌bera si Sie, ”Tumuhụ toratẹ̌ e, Datu Měnanal᷊amatẹ̌ e sarung mẹ̌biahẹ̌ sarang karěngụ e. Kụ kereapa i Kau makapẹ̌bera u Ahusʼu Taumata e harusẹ̌ iapakarangẹ su wowon dunia e? I sai tangu Ahusʼu Taumata e?”

³⁵Mawu Yesus simimbang, ”Tumbạeng baugu kadodọ tempo tualagẹ̌ e ene sutal᷊oarang kamene. Kụ pěmpahundal᷊engke těntal᷊ang tualagẹ̌ e wědang ene, tadeạu i kamene kumbahang karěndungang. I sain dụdal᷊eng su ral᷊ungu kararěndung e bẹ̌gawen timonane měnsang sol᷊ong a.

³⁶Pěmpangimangke su tualagẹ̌ e, u karěngụewen tualagẹ̌ e wẹ̌dang ene ringang i kamene, tadeạu i kamene mariadiwe manga anạ u tualagẹ̌.” Bọuten Mawu Yesus něhengetang kerene, i Sie něngal᷊ingke wọu ene kụ tawe mapulu mẹ̌těngkatodẹ u watangengʼE si sire.

³⁷Manilaing seng mal᷊awọ hal᷊ẹ̌ makạdal᷊inaụ kinoạ u Mawu Yesus e su těngon sire, kai i sire mang tawe mangimang si Sie.

³⁸ Tangu naghanape těbal᷊u Nabi i Yesaya, ”Mawu, i sai wue mangimangu habarʼi kami? Kai si sai kawasan Mawu e ipakal᷊ahẹ?”

³⁹Kai ual᷊ingu ene i sire tawe měmpangimang, u i Yesaya seng bọu l᷊ai naněbal᷊ẹ̌ u, ”Mawu něhengetang,

⁴⁰ ’Iạ mapakawutan matang sire, ringangu mapakarapal᷊u naung i sire; tadeạu i sire tawe makasilo, ringangu mạdiring i sire makaěnna. Tadeạu i sire kumbahang mẹ̌bal᷊ị su anu-Ku, kụ mapakaul᷊en sire.’ ”

⁴¹I Yesaya něluntingihẹ̌ kerene, u i sie seng nakasahidi kasěllahu Mawu Yesus, ringangu měbẹ̌bisara mạanun Sie.

⁴²Manilaing kerene, lawọ taumata ore lai sutal᷊oarang měngangawasang Yahudi nangimang su Mawu Yesus. Kai i sire tawe wahani měngakung ene ipakal᷊ahẹ, batụu i sire matakụ kiwuạu tau Farisi e tawe mapakawalan sire sumuẹ̌ su wal᷊em pẹ̌kakal᷊iomanengang.

⁴³I sire ěndokang u mapulu makahombang daralon taumata sul᷊ungu mẹ̌tatal᷊ahino su těngom Mawu Ruata.

⁴⁴Mase Mawu Yesus něhengetang, ”I sai mangimang si Siạ e, wal᷊inewe si Siạ i sie mangimang e, kaiso kawe si Sie kụ něndolohʼu Iạ e.

⁴⁵Dingangu i sain nakasilo Siạ, ute nakasilo si Sie něndolohʼu Iạ e.

⁴⁶Iạ riměnta su dunia ini e kai kere tualagẹ̌, tadeạu kal᷊awọu taumata kụ mangimang Siạ e tawẹ u matanạ su ral᷊ungu kararěndung.

⁴⁷I sai dụdaringihẹ̌ těntiro-Ku, kụ kawe tawe tumatuhụ ene — bal᷊inewe Iạ měhukung i sie. Batụu Iạ e riměnta wal᷊inewe měhukung dunia e, kaiso kawe mangambang dunia.

⁴⁸I sai mạnuhudʼu Iạ e ringangu tawe rumaringihẹ̌ bawera-Ku e, seng piạ mělahukunge. Hengetang kụ Takụ iwẹ̌bunạ e, ute ene sarung měhukung i sie su Ěllong Kiamatẹ̌ e.

⁴⁹Batụu Iạ e tawe mẹ̌bawisara wọu kapulu-Ku sẹ̌saku; i Amang kụ něndolohʼu Iạ, ute i Sie měpẹ̌parenta si Siạ apa kụ hinon Takụ iwera ringangu Takụ iwunạ.

⁵⁰Dingangu Iạ masingkạ u titanʼE ene makạual᷊i pẹ̌bawiahẹ̌ tutune ringangu kakal᷊ẹ̌. Tangu Iạ mạanụewen kere apan nitěntiron Amang si Siạ.”