Read Sangir YOHANES 13 Bible Online

YOHANES 13 - Sangir bible

YOHANES 13

¹Sahěllo kal᷊imonan Ěllon Pěmamantugẹ̌ Paskah e, Mawu Yesus masingkạ u semben tempone i Sie maněntangu dunia ini kụ mẹ̌sul᷊e su anung AmangʼE. I Sie kụkěndagʼu taumata apan tẹ̌taghuanengʼE su dunia ringangu mang těbe kụkěndagi sire sarang pangěnsueěnge.

²Mawu Yesus dingangu manga muritʼE piạ e i sire měmpẹ̌sẹ̌simokolẹ̌ hẹ̌bi e. Setang e seng namitaugẹ̌ dal᷊ungu naung i Yudas anạ i Simon Iskariot mẹ̌bal᷊ụ u Mawu Yesus.[28]

³Mawu Yesus masingkạ u Ruata i Amang seng bọu něnarakangu kasěllahu kawasanʼE si Sie. I Sie mal᷊aing masingkạ u i Sie kai riměnta wọu anun Duata i Amang kụ sarung mẹ̌sul᷊e kapia su anun Duata.

⁴U watụ u ene tangu i Sie rimarisị kụ něluạ lahawengʼE, ringangu naměgong u handukẹ̌ su kal᷊uwaengʼE.

⁵Bọu ene i Sie něndal᷊ingu akẹ su waskom sěmbaụ, kụ nanětạ e nanguhasẹ̌ laedu manga muritʼE kụ niěmmụeng handukẹ̌ papẹ̌gong kal᷊uwaengʼE.

⁶Ene i Sie nahumpạen Simon Petrus, kụ nẹ̌bera u, ”Mawu kawe unụe Mawu e nanguhasẹ̌be laedẹ̌ku?”

⁷Mawu Yesus simimbang, ”Sini i kau e mambeng tawe makaěnna apang kụ Takụ nikoạ ini e kai i kau e sarungbe makaěnna.”

⁸”Kumbahang, Mawu,” ungkuěng i Petrus su Mawu Yesus, ”Měngkatewe kumbahang i Tuang manguhasẹ̌ laedẹ̌ku!” Kai Mawu Yesus simimbang, ”Kereu Iạ tawe makapěnguhasẹ̌ si kau e ute i kau tawẹ kal᷊ahěmpụ e ringang-Ku.”

⁹I Simon Petrus nẹ̌berạe u, ”Kamageng kerene, Mawu, abe kětạeng laedẹ̌ku uhaseng, kaiso kawe lima ringangu těmbọku l᷊ai!”

¹⁰”Taumata wọu něndenọe sembeng nawurẹ̌si kěbị badange,” ungkuěng u Mawu Yesus si Petrus. ”I sie seng tawahal᷊uasu wurẹ̌siang kapia; kětạbeng laede.[29] I kamene sembeng burẹ̌si, kaiso bal᷊inewe kěbị.” (

¹¹Mawu Yesus seng nakakasingkạ i sai sarung mẹ̌sunial᷊i Sie. U kai ene hakịu i Sie něhengetang, ”I kamene ini sembeng burẹ̌si, kaiso wal᷊inewe kěbị.”)

¹² Mawu Yesus bọuten nanguhasẹ̌ laedʼi sire, tangu i Sie saụ e něluhen pakeangʼE kụ naiangke kapia. Mase i Sie něhengetangke si sire, ”I kamene nakaěnnawe kěbị hal᷊ẹ̌ kụ buhụ e Takụ nikoạ si kamene?

¹³I kamene měkẹ̌kui si Siạ Mananěntiro ringangu Mawu. Kụ mang hinong kerene.

¹⁴Kamageng Iạ e kai Mawu ringangu Mananěntironu kụ kawe manguhasẹ̌ laedu, ute i kamene mal᷊aing hinong mẹ̌papanguhasẹ̌ laedʼi kamene sěmbaụ su wal᷊ine.

¹⁵Iạ něnul᷊ada mẹ̌kẹ̌koạ kere ini si kamene, tadeạu i kamene mal᷊aing mẹ̌těno mẹ̌koạ apan seng bọu Takụ nikoạ si kamene.

¹⁶ Mambeng kahěnga-hěngang bawera-Ku ini: Sěngkatau ěllange tawe limembo wọu mawune, ringangu sěngkatau rarolohange tawe limembong kasariane wọu měndarolohe.

¹⁷Kereu i kamene seng masingkạ u kěbị ene, ute kariangkamang i kamene kereu i kamene makakoạ kerene.

¹⁸ Apan seng Takụ niwera ini e wal᷊inewe mạanung kamene kěbị. Iạ masingkạ i sai-sai seng Takụ nịpapile. Arawe apang kụ seng kạbawohẹ su Winohẹ Susi e mang mariadi, mangal᷊ene ’Taumata kụ sěngkakaěng dingang-Ku e, sarung dumokạ si Siạ.’

¹⁹Hal᷊ẹ̌ ini e Takụ ilẹ̌habarẹ̌ si kamene orasẹ̌ ini e, těntal᷊ang tawe nạdiadi, tadeạu kamageng u hal᷊ẹ̌ ene seng mariadi, tangu mangimang bue u kai Iạ e i Sie kụ isẹ̌sěbạ IẠ ENE.

²⁰ U mambeng těngadẹ̌ bawera-Ku ini: I saing kụ manarimạ u taumata Takụ nirolohẹ̌ e ute i sie mal᷊aing manarimạ u Iạ e. Kụ i sai manarimạ u Iạ e manarimạ i Sie kụ seng dimolohʼu Iạ.”

²¹Sarạeng Mawu Yesus něhengetang kerene, naungʼE mambeng kiměndung tạ sihinge. Bọu e i Sie něhengetang, ”Těnga-těngadẹ̌ bawera-Ku ini: Sěngkatau wọʼi kamene sarung mẹ̌bal᷊ụ u Iạ e.”

²²Manga muritʼE němpẹ̌papandạ e sěmbaụ su wal᷊ine měngkạherang ual᷊ingu wěga wue měnsang kai i sai su timonanʼE.

²³Muritẹ̌ ikẹ̌kěndagʼu Mawu Yesus e mạiang su koaneng u Mawu Yesus.

²⁴Ene i Simon Petrus e něnidạ e si sie apakịbal᷊o su Mawu Yesus měnsang kai i sai tẹ̌timonaěngʼE.

²⁵Tangu muritẹ̌ ene nẹ̌těngkasěngkelẹ̌ su Mawu Yesus kụ nakiwal᷊o, ”Kai i sai ene, Mawu?”

²⁶Mawu Yesus simimbang, ”I sain Takụ pẹ̌gěllikangu borotẹ̌ bọu niuno su ral᷊ungu mangko, ute i sie taumatane.” Tangu Mawu Yesus něngal᷊ạ e borotẹ̌ sěmpědi, niunone su ral᷊ungu mangko; mase nionggọ e si Yudas anạ i Simon Iskariot.

²⁷Lẹ̌pasewe i Yudas bọu rimaẹ borotẹ̌ ene, setang e nẹ̌karadiahangke su ral᷊ungu naunge. Mase Mawu Yesus něhengetangke si sie, ”Lighạ e koạ apang sarung koatengu e.”

²⁸Tạ u sarang sěngkatau wọu i sire mạhungkaěng sene nakahěngangu kawe unụe Mawu Yesus něhengetang kerene si Yudas.

²⁹Piạ u mạngěnna u Mawu Yesus dimolohʼi Yudas apạmělli apan hinong gausang baugu sal᷊imbang ene, arau mẹ̌gěllịu roitẹ̌ pẹ̌kadodọ su taumata kasiang — batụu i Yudas kai měngangumpaedẹ̌ doitʼu l᷊awọ e.

³⁰Bọuten i Yudas něnarimạ u borotẹ̌ ene tangu i sie měngkatewe ringangu simẹ̌bang. Kụ ěllo e nahěbi e.

³¹Sarạeng i Yudas nal᷊intụ, ene Mawu Yesus něhengetangke, ”Orasẹ̌ ini Ahusʼu Taumata e seng niapakawantugẹ̌, kụ Duata e niapakawantugẹ̌ ual᷊ingu i Sie.

³²Kereu Mawu Ruata e niapakawantugẹ̌ ual᷊ingu i Sie, ute i Sie mal᷊aing sarung iapakawantugu Ruata lumiun batangengʼE sẹ̌sane. Dingangu Mawu Ruata e měngkatewe seng lighạ mapakawantugʼi Sie.

³³ Manga anạ-Ku, Iạ e sembeng tawẹ karěngụe sini ringangi kamene. I kamene sarung mẹ̌deạ Siạ, kai kerẹewe seng bọu Takụ nipaul᷊ị su manga měngangawasan tau Yahudi, kerene lai Takụ ipaul᷊ị si kamene kěbị; su tampạ Takụ tamaiang, i kamene tawe makakarěnta.

³⁴ Tita wuhu Takụ onggotang si kamene: Pẹ̌kakakěndagẹ̌ko i kamene sěmbaụ su wal᷊ine. Kerẹewe Iạ seng kiměndagʼi kamene, kerene lai i kamene hinon měmpẹ̌kakěndagẹ̌.

³⁵Kereu i kamene lawọbe měmpẹ̌kẹ̌kakěndagẹ̌ e ute kal᷊awọu taumata e sarungbe makakasingkạ u i kamene kawe muritẹ̌-Ku.”

³⁶”Mawu, Mawu kai makoạ sol᷊ong a?” kakiwal᷊on Simon Petrus su Mawu Yesus. Ungkuěng Mawu Yesus, ”Suapan Takụ dal᷊engang, i kau tawe makatol᷊e Siạ. Hẹ̌dowen mahi i kau sarung makatol᷊e Siạ e.”

³⁷”Mawu, kawe unụe iạ tawe makatol᷊e su Mawu orasẹ̌ ini?” ungkuěngkewen Petrus. ”Iạ e sadia mate waugʼu Mawu!”

³⁸Mawu Yesus simimbang, ”Kahěngang ngae i kau sadia mate waugu Iạ? Kasingkạko, manụ deng tawe kimẹ̌kukụ e i kau seng těllun sul᷊e nẹ̌sunial᷊u Iạ e.”