Read Sangir YOHANES 14 Bible Online

YOHANES 14 - Sangir bible

YOHANES 14

¹”Naung i kamene abe taghiawahẹ̌,” ungkuěng u Mawu Yesus si sire. ”Pangimangko[30] su Mawu Ruata, ringangu pangimangbe lai si Siạ.

²Su wal᷊eng Amang-Ku e lawọ katatanakeng. Iạ e kai rumal᷊eng měndiahing tampạ baugʼi kamene. Iạ e tawe mẹ̌bera kerene si kamene, andene wal᷊inẹbe kerene.[31]

³Samurin Iạ tamai měnạdian tampạ baugʼi kamene, Iạ e sarung mẹ̌bal᷊ị kụ maněnsomahẹ̌ si kamene, tadeạu suapan Iạ ene, i kamene mal᷊aing sene.

⁴Su tampạ Takụ dal᷊engange i kamene masingkạben dal᷊enge.”

⁵Mase i Tomasẹ̌ nẹ̌berạ e su Mawu Yesus, ”Mawu, i kami e wẹ̌gawen dal᷊engangu e, kụ makakasingkạben dal᷊enge kereapa i kami?”

⁶Mawu Yesus simimbang, ”Iạ e kai ral᷊eng mẹ̌deạu makakiral᷊a Mawu Ruata ringangu makahombang pẹ̌bawiahẹ̌. Tawẹu sarang sěngkatau makarěnta su anung Amang-Ku, kereu wal᷊inewe wọu Anu-Ku.

⁷Kereu i kamene masingkạ u Iạ, ute i kamene mal᷊aing masingkạ[32] i Amang-Ku. Ini e i kamene seng masingkạ i Sie, dingangu seng nakasilo si Sie.”

⁸Tangu i Filipusẹ̌ e nẹ̌bera su Mawu Yesus, ”Mawu, todẹko i Amang si kami, tadeạu i kami mawul᷊ugẹ̌.”

⁹Arawe Mawu Yesus simimbang, ”Seng kerẹeng karěngụe Iạ dingang i kamene, kụ i kau e mang bẹ̌gang Iạ e Filipusẹ̌? I saing kụ seng nakasilo si Siạ e, ute mal᷊aing bọu nakasilo si Amang. Kụ kereapa wue i kau nakawera u, ’Todẹko i Amang si kami’?

¹⁰Filipus! I kau kai ta mangimang, u Iạ e kai nasěmbaụ dingang i Amang ringangu i Amang e nasěmbaụ dingang-Ku? Apang kụ Takụ niwera si kau e, tawe Takụ niwera wọu watangeng-Ku hala. I Amang kụ těbe nasěmbaụ dingang-Ku e, kai i Sie nẹ̌karadiahangu patikụ ene.

¹¹Pangimangke si Siạ, u Iạ e kai nasěmbaụ dingangi Amang kapia, ringangu i Amang e nasěmbaụ dingang-Ku. Arau mạeng tawe kerene pěmpangimangke wọu apang kụ seng Takụ kinoạ.

¹²Mambeng kahěngang bawera-Ku ini: I sai mangimang si Siạ, sarung mẹ̌koạ apan seng Takụ kẹ̌koateng, — ore lai i sie sarung mẹ̌koạ kụ limembon kasěllahe wědang — batụu Iạ e kai reng makoạ sol᷊ong anung Amang.

¹³Kụ balạewe apan dorongang i kamene su ral᷊ungu areng-Ku e, ene Takụ koateng baugi kamene, tadeạu i Amang e iapakawantugẹ̌ e ual᷊ingu Ahusẹ̌ e.

¹⁴Kụ balạewe apa rorongang i kamene[33] su ral᷊ungu areng-Ku e, ute sarung Takụ koateng,”

¹⁵”Kereu i kamene kụkěndagu Iạ e ute i kamene sarungbe mẹ̌děndal᷊engu manga parenta-Ku.

¹⁶Iạ e sarung mẹ̌gausẹ̌ si Amang, kụ i Sie sarung mangonggọ u Mẹ̌tatul᷊ung bal᷊ine kụ sarung mẹ̌tumanạ dingangi kamene sarang marěngụ-děngụ.

¹⁷I Sie ute kai Rohkẹ̌ u Ruata kụ sarung mělahẹ u kaadilʼu Mawu Ruata. Dunia e tawe makatarimạ i Sie, ual᷊ingu ta makasilo arau ta nakakiral᷊a. Arawe i kamene masingkạben Sie, u i Sie kai mạtanạ dingangi kamene dingangu i Sie sarung masěmbaụ[34] dingangi kamene.

¹⁸I kamene tawe Takụ itěntang hala kere kasisi ěndusẹ̌. Iạ e sarung mẹ̌bal᷊i su anung kamene.

¹⁹Kate kạdodọ tempo dunia e seng tawe saụ makasilo si Siạ. Arawe i kamene ute sarungbe makasilo si Siạ. Kụ ual᷊ingu Iạ biahẹ̌, i kamene e mal᷊aing biahẹ̌ sarung.

²⁰Kereu seng su ěllone ene, ute i kamene sarung makakasingkạ u Iạ e kawe nasěmbaụ dingangi Amang, i kamene nasěmbaụ dingang-Ku, mase Iạ e kawe lai nasěmbaụ dingangi kamene.

²¹I sain dụdaẹ manga tita-Ku e ringangu mẹ̌sẹ̌sěmpị ene, ute i sie kụkěndagʼu Iạ e. I Amang-Ku e sarung kuměndagi saing kụkěndagʼu Iạ. Iạ e lai sarung kuměndagi sie ringangu měnodẹ u watangeng-Ku e si sie.”

²²I Yudas (bal᷊ine i Yudas Iskariot) nakiwal᷊o su Mawu Yesus, ”Mawu, unụe Mawu e mapulu manodẹu watangengu si kami kụ bal᷊inewe waụgu dunia?”

²³Mawu Yesus simimbang, ”I saing kụkěndagu Iạ e, ute sarung tumuhụ těntiro-Ku. I kanduang Amang-Ku e sarung duměnta su anune matanạ dingange.

²⁴I sain tawe kuměndagu Iạ e tawe tumatuhụ těntiro-Ku. Těntiro kụ seng kinaringihʼi kamene wal᷊inewe wọu anu-Ku, kaiso kawe wọu i Amang kụ dimolohʼu Iạ e.

²⁵Kěbị ene Takụ ipẹ̌paul᷊ị si kamene karěngụewen Iạ deng dingangi kamene.

²⁶Arawe Rohkẹ̌ u Ruata e, mẹ̌tatul᷊ung sarung irolohi Amang su ral᷊ungu areng-Ku, kụ kai i Sie sarung maněntiron patikụ e si kamene ringangu mapẹ̌tahěndung i kamene kapia su kěbị apan seng Takụ nipaul᷊ị si kamene.

²⁷Karal᷊unsemahẹ̌ Takụ itěntang baugʼi kamene. Karal᷊unsemahẹ̌ Takụ ionggọ si kamene. Takụ nilaonggọ e wal᷊inewe kere nilaonggọ u dunia e si kamene. Abe pěmpẹ̌taghiawahẹ̌ dingangu abe kěngkatakụ.

²⁸I kamene seng nakaringihẹ̌ Siạ něhabarẹ̌ u, ’Iạ e sarung dumal᷊eng, kai Iạ e saụbe mẹ̌sul᷊e su anung kamene.’ Kereu i kamene kụkěndagu Iạ e, i kamene sarung lumuasʼu Iạ makoạ sol᷊ong anung Amang-Ku e, batụu i Amang-Ku e kai limembong kasěllahe wọu Iạ e.

²⁹Iạ e maul᷊ịu ene si kamene su orasẹ̌ ini, těntal᷊ang kěbị e ta nạdiadi, tadeạu mạeng seng sukarariadine, ute i kamene sarungbe měmpangimang.

³⁰Iạ e seng tawe mẹ̌bisara mal᷊awọ dingangi kamene, u kai seng tempone měngangawasa dunia e ruměnta. Kai i sie tawẹ kawasane su watangeng-Ku e.

³¹Kai kěbị mang harusẹ̌ mariadi tadeạu dunia e makahěngang u Iạ e kụkěndagi Amang e mase Iạ e mẹ̌děndal᷊engben patikụ apan niparentang Amang-Ku e si Siạ. Kụ mahịe i kitẹ mẹ̌buạ bọu ini.”