Read Sangir YOHANES 15 Bible Online

YOHANES 15 - Sangir bible

YOHANES 15

¹Angkuěng u Mawu Yesus kapia, ”Iạ e puěngu anggorẹ̌ tutune, kụ i Amang-Ku e mẹ̌sasuange.

²Apan lelange si Siạ ta mẹ̌bawua, těntoěngʼE, ringangu apan lelange měbẹ̌bua e, tẹ̌tal᷊uahengʼE tadeạu sauneng mahuntinamba wuane.

³I kamene sembeng burẹ̌si ual᷊ingu těntiro seng nitěntiro-Ku si kamene.

⁴Kụ hanesẹ̌be kạsasěmbaụ dingang-Ku e kụ Iạ e hanesẹ̌ masěmbaụ dingangi kamene. Lelange sẹ̌sane tawe mẹ̌bua kereu tawe mạdarěkạ su kalune. Kerene lai i kamene tumbạeng mẹ̌bua kereu tatapẹ̌be dingang-Ku.

⁵Kai Iạ e kalun anggorẹ̌ e, kụ i kamene e manga lelange. I sain kạtatanạ sěmbaụ dingang-Ku e, kụ Iạ dingangi sie, ute mẹ̌bua mal᷊awọ; kereu tawẹ Iạ e ute i kamene tawe makakoạ manga apa.

⁶I sain tawe matanạ mạsasěmbaụ dingang-Ku, sarung irěmmẹ kere lelange, kụ i sie mahẹ̌gu. Apan lelange kerene ute tampungang i ěndụ su putung mase tutungang.

⁷Kereu i kamene kạtatanạ sěmbaụ dingang-Ku, mase wawera-Ku e mạtatanạbe su ral᷊ungu naung i kamene, pẹ̌gause si Amang walạewe apa ghausang i kamene mang gělirang.

⁸Kereu i kamene měmpẹ̌bua mal᷊awọ, i Amang-Ku e iapakawantugẹ̌, dingangu ual᷊ingu ene i kamene mambeng kahěngang makoạ muritẹ̌-Ku.

⁹Kerẹewe i Amang kụkěndagu Iạ ute kerene lai Iạ kuměndagi kamene. Kěngkatanạko i kamene sěntiniạ měmpẹ̌bẹ̌biahẹ̌ kere taumata Takụ ikẹ̌kěndagẹ̌.

¹⁰Kereu i kamene mẹ̌děndal᷊engben kal᷊awọu manga tita-Ku e, ute i kamene tatapẹ̌be satia su kakěndagẹ̌-Ku, kerẹewe Iạ tatapẹ̌ satia su kakěndagi Amang batụu mẹ̌děndal᷊engben kal᷊awọu titanʼE.

¹¹Kěbị ini e Takụ ilẹ̌habarẹ̌ si kamene, tadeạu ral᷊uasẹ̌-Ku e ene su ral᷊ungu naung i kamene, ringangu ral᷊uasu e matinalung.

¹² Kai ini tita-Ku e: Pẹ̌kakakěndagẹ̌ko sěmbaụ su wal᷊ine, kerẹewe Iạ kụkěndagi kamene.

¹³I sain něngalembon kakěndage su manga hapịe ute kai taumata kụ manarakangu pẹ̌bawiahe waugʼi sire.

¹⁴I kamene kai manga hapị-Ku, kereu i kamene měmpẹ̌koạ apan Takụ ilẹ̌oro si kamene.

¹⁵I kamene sembeng tawe Takụ kuiang ěllang, batụu ěllang e wẹ̌ga wue apang kẹ̌koateng u mawune e. I kamene Takụ kẹ̌kuiang hapị, batụu kěbị apang kẹ̌karingihẹ̌-Ku bọu i Amang, seng Takụ nipaul᷊i si kamene.

¹⁶Bal᷊inewe i kamene namile si Siạ. Kai Iạ e namile si kamene, ringangu něndolohʼi kamene apědẹ̌daral᷊eng kụ apěbẹ̌bua mal᷊awọ kụ buạen ta mawawinasa. Tangu i Amang e sarung mangonggọu kěbị apan dorongang i kamene si Sie su ral᷊ungu areng-Ku.

¹⁷Kụ kai ini tita-Ku si kamene: Pěmpẹ̌kakěndagẹ̌ sěmbaụ su wal᷊ine.”

¹⁸”Kereu dunia e mẹ̌binsị i kamene, pẹ̌tahěndungke u Iạ seng kal᷊imona nipẹ̌binsị u dunia e.

¹⁹Kereu i kamene kawe tataghuaneng u dunia e ute i kamene ikẹ̌kěndagẹ̌ben dunia e kere tataghuanenge, Kai Iạ e seng namile si kamene wọu dunia ini, kụ i kamene e wal᷊inewe lai tataghuanengu dunia. Kai ene hakịu dunia e měbẹ̌binsị i kamene.

²⁰ Pẹ̌tahěndungke apan seng Takụ niwera si kamene. ’Ěllang e tawe limembo wọu mawune.’ Kereu i sire seng nanigěsạ si Siạ, i sire sarung lai manigẹ̌sa si kamene. Kereu i sire tụtuhụ těntiro-Ku, ute i sire tumuhụ l᷊ai těntirong kamene.

²¹Patikụ ene sarung koateng i sire si kamene, ual᷊ingu i kamene kai muritẹ̌-Ku, u i sire wẹ̌gawen Sie rimolohʼu Iạ e.

²²Mangawe Iạ e tawe riměnta ringangu tawe něhengetangu kěbị ene si sire, ute i sire tawẹ dosane. Kai ini e si sire seng tawẹ apa tatupị e lai waugu rosan sire.

²³I sai mẹ̌binsịu Iạ e, měbẹ̌binsị i Amang-Ku.

²⁴Kai manga sutal᷊oaran sire Iạ e tawe mẹ̌kakoạ patikụ munara kụ tawẹ tau wal᷊ine nẹ̌kẹ̌koạ e, ute i sire tawẹ dosane. Arawe ini e i sire seng nakasilo apan Takụ nikoạ, kụ i sire němpẹ̌binsị u Iạ ore lai něbinsị i Amang-Ku.

²⁵ Kai tangu semben harusẹ̌ kerene, tadeạu mariadi wue apan mạbawohẹ su bukẹ̌ u Toratʼi sire u: ’I sire mẹ̌binsị u Iạ e tawẹu nikaianenge.’

²⁶Iạ e sarung měndolohu Mẹ̌tatul᷊ung kụ asal᷊e wọu anun Amang-Ku e si kamene. I Sie kai Rohkẹ̌ kụ sarung mělahẹ u katul᷊idẹ̌ mạanun Duata. Kereu i Sie ruměnta, i Sie sarung mẹ̌sahidin Iạ.

²⁷Dingangu i kamene lai harusẹ̌ mẹ̌sahidin Iạ, batụu i kamene e seng mědẹ̌dingang u Iạ dokeng bọu tětạ e.