Read Sangir YOHANES 16 Bible Online

YOHANES 16 - Sangir bible

YOHANES 16

¹Kěbị e seng Takụ ipẹ̌paul᷊ị si kamene tadeạu i kamene tawe mẹ̌sunial᷊ẹ̌.

²I kamene e sarung iapasẹ̌bang bọu ral᷊ungu wal᷊em pẹ̌kakal᷊iomanengang. Dingangu sarung duměnta tempone u i sai měmate si kamene e kai měmpạngěnna u i sie kai měkẹ̌koạ pal᷊ahamawu su Ruata.

³I sire měmpẹ̌kẹ̌koạ kerene si kamene, ual᷊ingu i sire bědaweng bẹ̌gan Duata ringangu wěgawe lain Iạ.

⁴Arawe ini Iạ e mẹ̌bẹ̌berang ene si kamene, tadeạu kamageng ene mang mariadi, i kamene pěmpẹ̌tahěndung bue u Iạ e seng bọu naul᷊ị si kamene.” ”Hal᷊ẹ̌ ini e tawe Takụ nipaul᷊ị si kamene kěbị dokeng bọu tětạe, u Iạ deng bẹ̌dang dingangi kamene.

⁵Arawe ini Iạ e reng mapul᷊e sol᷊ong anun Sie kụ dimolohʼu Iạ; kụ tawẹu sarang sěngkatau wọʼi kamene makiwal᷊o kai sol᷊ong apa Iạ e.

⁶Kai ini e mal᷊ahẹ naung i kamene něngkasusa, ual᷊ingu Iạ naul᷊ị u hal᷊ẹ̌ ene si kamene.

⁷Kai Iạ e maul᷊ịu katěngadẹ̌ si kamene: Něngalembong kapiane e waugi kamene, kereu Iạ mapul᷊ẹ; batụu kereu Iạ e tawe mapul᷊e, Mẹ̌tatul᷊ung e tawe ruměnta su anung kamene. Arawe kamageng Iạ e seng mapul᷊ẹ ute Iạ e sarung měndolohʼi Sie sol᷊ong anung kamene.

⁸Kereu i Sie ruměnta, ute i Sie sarung mapakal᷊ahẹ su dunia u tumuhụ hinone kai apa mangal᷊en dosa e, wọu apang katěngadẹ̌, dingangu wọu hukumangu Ruata.

⁹I Sie sarung mělahẹ, u tawe mangimang si Siạ ute kai rosa;

¹⁰u Iạ e kai matul᷊idẹ̌, kụ ual᷊ingu Iạ e kai makoạ sol᷊ong anun Amang, kụ i kamene sarung lai tawe makasilo si Siạ;

¹¹dingangu kai Ruata e seng nanětạ něhukung, batụu měngangawasa dunia ini e seng nịlahukung.

¹²Lawọ lai hinong Takụ iwera si kamene, kai orasẹ̌ ini i kamene reng tawe makaumal᷊ẹ̌ měnarimạ u ene.

¹³Kai kereu Rohkẹ̌ e seng diměnta, mangal᷊ene i Sie kụ mělẹ̌lahẹu katul᷊idẹ̌ mạanun Duata, i kamene sarung ahakenge tadeạu makakasingkạ u patikụ katul᷊idẹ̌ e. I Sie tawe mẹ̌bisara wọu watangengʼE hala kaiso kawe mạul᷊ịu apan seng kinaringihʼE, dingangu i Sie sarung maul᷊ịu apan sarung mariadi si kamene suěllo samuri.

¹⁴I Sie sarung mapakawantugu Iạ e, u kěbị apan i habare si kamene e kai nitarimạ e wọu Iạ.

¹⁵Patikụ apạewen si Amang e ute kai tataghuanengku. Hakịu ene Iạ makapẹ̌bera u apan nihabarʼu Rohkẹ̌ si kamene, kai nitarimạ e wọu Iạ.”

¹⁶”Kate kadodọ tempo i kamene seng tawe makasilo si Siạ, dingangu kate kadodọ tempo i kamene sarung makasilo si Siạ.”

¹⁷Pirang katau wọu manga muritʼu Mawu Yesus e nanětạe nẹ̌kakiwal᷊o sěmbaụ su wal᷊ine, ”Apa wue timonane i Sie nẹ̌bera si kitẹ: ’Kate kadodọ tempo i kamene seng tawe lai makasilo si Siạ, dingangu mal᷊aing kate kadodọ tempo i kamene sarung makasilo si Siạ?’ Apa lai timonam bawera: ’Iạ e makoạ sol᷊ong anung Amang e’?”

¹⁸I sire měngkate makịbal᷊o, ”Apa mangal᷊ene, ’kadodọ tempo’? I kitẹ tawe nakahěngang měnsang i Sie mạanung apa!”

¹⁹Mawu Yesus masingkạ u i sire mapulu makiwal᷊o si Sie. Tangu i Sie něhengetang, ”Kanini Takụ niwera, ’Kate kadodọ tempo, i kamene sarung tawe makasilo si Siạ, dingangu lai kate kadodọ tempo i kamene sarung makasilo si Siạ.’ Kai ene ipěkẹ̌kakiwal᷊o sutal᷊oarang kamene?

²⁰Pěmpangimangke, i kamene sarung sumangị dingangu lumungkang, arawe dunia e kai sarung lumuasẹ̌. Naung i kamene sarung měngkasusa, kai susa naung i kamene sarungbe mẹ̌bal᷊ui mariadi ral᷊uasẹ̌.

²¹Kereu sěngkatau wawine maraning měhěnding, masusa naunge, batụu seng tempone i sie mẹ̌tingkědang u sigěsạ. Kai lěpasewe anạ e seng sul᷊ikude i ninange miwul᷊em patikụ kasasigěsạ e ual᷊ingu ral᷊uase watụ u rariọ e seng simongo su dunia.

²²Kerene lai si kamene; Tempo ini naung i kamene mạsusa, kai Iạ e sarung mẹ̌sombang kạpia ringangi kamene, kụ i kamene sarung mahul᷊uasẹ̌; kụ tawẹu sarang sěngkatau makaaho ral᷊uasẹ̌ ene wọu naung i kamene.

²³Su sahěllo ene, i kamene seng tawẹu lai makiwal᷊ong apa-apa si Siạ e. Pěmpangimangke: Balạewe měnsang apa rorongang i kamene si Amang su ral᷊ungu areng-Ku, ene sarung ionggọ i Amang si kamene.[35]

²⁴Sarang orasẹ̌ ini i kamene wẹ̌dang tawe nědẹ̌dorong apa-apa su ral᷊ungu areng-Ku. Pěmpẹ̌dorongke, kụ i kamene sarung měmpěnarimạ, tadeạu ral᷊uasʼi kamene mauadipẹ̌.”

²⁵”Kěbị ini e Takụ piněhengetang si kamene su ral᷊ungu papinintu. Kai sarungbe piạ tempone kụ Iạ e seng tawe mẹ̌papinintu, kaiso kawe seng mẹ̌bisara mal᷊ahẹ si kamene mạanung Amang.

²⁶Su tempo ene i kamene sarung měmpẹ̌dorong si Amang su ral᷊ungu areng-Ku; kěngkasingkạko, Iạ e tawe mẹ̌dorong bọʼi Amang baugʼi kamene,

²⁷ual᷊ingu i Amang sẹ̌sane kai kụkěndagʼi kamene. I Sie kụkěndagʼi kamene ual᷊ingu i kamene kụkěndagu Iạ, dingangu mạngimang u Iạ e kai wọu Ruata asal᷊e.

²⁸Mambeng asal᷊ẹ̌-Ku e bọu i Amang, kụ seng diměnta su ral᷊ungu dunia. Kai orasẹ̌ ini e Iạ mạněntang u dunia tadeạu mẹ̌sul᷊e sol᷊ong anun Amang.”

²⁹Mase manga muritʼu Mawu Yesus e němpẹ̌bera si Sie, ”Su tempo ini Mawu e mělẹ̌hengetang mal᷊ahẹ kụ tawe mẹ̌papapinintu,

³⁰dingangu i kami e masingkạ u Mawu e masingkạ u patikụ e. Tawe wahal᷊uasẹ̌ piạ u sěngkatau makiwal᷊ong apa-apa su Mawu e. Batụu i kami mạngimang u Mawu e rarěntane kai wọu anun Duata.”

³¹Mawu Yesus e simimbang si sire, ”Kụ i kamene nangimang su orasẹ̌ ini?

³²Pẹ̌tahěndung! Tempone sarung duměnta, ore seng narěnta, i kamene sarung ipẹ̌kal᷊iaesẹ̌. I kamene sarung mapul᷊ẹ sarang bal᷊en sěngkatau-sěngkatau kụ měmpaněntangu Iạ sẹ̌saku. Kaiso Iạ e bal᷊inewe sẹ̌saku batụu i Amang kawe ringang-Ku e.

³³Patikụ ini e Takụ iwẹ̌bera tadeạu i kamene makahombang karal᷊unsemahẹ̌ batụu nẹ̌těngkasěmbaụ dingang-Ku. Su dunia e i kamene sarung mẹ̌tatahangu sigěsạ. Kaiso pakatul᷊ende wue naung i kamene! Iạ e kai seng nakawatạ dunia!”