Read Sangir YOHANES 17 Bible Online

YOHANES 17 - Sangir bible

YOHANES 17

¹Sarạeng bọu něhengetang kerene, Mawu Yesus rimal᷊ingarạe sol᷊ong langị kụ něhengetang, ”Amang, ini e seng naghanapẹ̌ tempone. Pakawantugeng AhusʼU, tadeạu AhusʼU mal᷊aing mapakawantugʼi Amang.

²I Amang seng nangonggọu kawasa waụgu umate patikụ, su Ahuse, tadeạu i Sie měngonggọu pẹ̌bawiahẹ̌ tutune ringangu kakalẹ̌ su kěbị taumata apan nisarakang i Amang si Sie.

³Kai ini e pẹ̌bawiahẹ̌ tutune ringangu kakalẹ̌, tadeạu i sai masingkạ i Amang mang sěmbaụ kụ Duata kahěngang, dingangu makạkiral᷊a su Mawu Yesus Kristus kụ nirolohʼi Amang.

⁴Iạ seng napakawantugʼi Amang su wowon dunia ini su pẹ̌kakoạ munara kụ ipakikoạ i Amang si Siạ.

⁵Amang! Papakawantugeng Iạ e su anunʼU, apakawantugu kawantugẹ̌-Ku ringang i Amang dokeng dunia e reng tawe nịdiadi.

⁶Iạ e seng napakal᷊ahẹ i Amang su taumata ral᷊ohon dunia ini kụ seng nionggọ i Amang si Siạ. I sire kai tataghuaneng i Amang, dingangu i Amang seng něnarakang i sire si Siạ. I sire seng timuhụ hengetang i Amang.

⁷Ini e i sire masingkạ u patikụ apan nisarakang i Amang si Siạ e asal᷊e kai wọu i Amang.

⁸Seng bọu Takụ nihabarẹ̌ si sire hengetang i Amang kụ seng nionggọ Siạ, kutẹu sembeng kinatarimạ i sire. I sire masingkạ u Iạ e mamben těngadẹ̌ diměnta wọu anun Amang, dingangu i sire mạngimang u kawe i Amang e něndolohʼu Iạ.

⁹Iạ mẹ̌kal᷊iomaneng baugu i sire. Iạ e wal᷊inewe mẹ̌kal᷊iomaneng baugu dunia kaiso kai waugu taumata kụ seng nionggọ i Amang si Siạ, batụu i sire kai tataghuaneng i Amang.

¹⁰Kěbị tẹ̌taghuaneng-Ku e mal᷊aing tẹ̌taghuaneng i Amang; mase patikụ tẹ̌taghuaneng i Amang-Ku e mal᷊aing tẹ̌taghuaneng-Ku. Iạ wẹ̌bantugang sutal᷊oaran sire.

¹¹Ini e Iạ duměnta su anun Amang. Iạ e seng bal᷊ine mạtanạ su dunia; Arawe i sire ute kawe su dunia. Amang masusi! Sirungengkong kawasang areng i Amang si sire, arengke nạung seng nionggọ i Amang si Siạ,[36] tadeạu i sire mariadi sěmbaụ, kerẹewe i Amang dingangu Iạ e kai sěmbaụ.

¹² Piạ Iạ e nạung bědang dingang i sire, Iạ e seng naněntanudẹ̌ si sire ringangu kawasang areng i Amang, areng kụ nạung nionggọ i Amang si Siạ.[37] Iạ e seng nělukadẹ̌ si sire kụ tawẹu sarang sěngkatau wọu i sire kụ nailang tabeạu katewe ual᷊ingu i sie mambeng hinong mailang; tadeạu ual᷊ingu ene ute naghanape apang mạbawohẹ su ral᷊ungu Winohẹ Susi.

¹³Ini e Iạ kawe seng sol᷊ong anun Amang. Patikụ ini e Takụ ipẹ̌paul᷊ị e těntal᷊ang Iạ e reng bẹ̌dang su dunia; tadeạu i sire makapanaghuangbe ral᷊uasẹ̌-Ku e masukụ.

¹⁴Iạ e seng něhabaru hengetang i Amang si sire, kai dunia e němpẹ̌binsị i sire, batụu i sire wal᷊inewe tataghuanengu dunia, kerẹewe lai Iạ bal᷊inewe tataghuanengu dunia.

¹⁵Iạ e tawe mẹ̌gausẹ̌ tadeạu i Amang měngal᷊ạ si sire wọu dunia ini e, kaiso kawe měgẹ̌gausẹ̌ tadeạu i Amang e paněntanudẹ̌ si sire wọu i Ral᷊akisẹ̌.

¹⁶Kerẹewe lai Iạ e wal᷊inewe tataghuanengu dunia, i sire lai wal᷊inewe tataghuanengu dunia.

¹⁷Kakoạko i sire kětạeng tataghuaneng i Amang lumiu katěngadẹ̌; hengetang i Amang e kai katěngadẹ̌.

¹⁸Mẹ̌sul᷊ungkewen i Amang seng dimolohu Iạ su dunia e, kerene lai Iạ dimolohʼi sire sol᷊ong dunia.

¹⁹Iạ e měnarakangu watangengku kere tataghuaneng i Amang natěntani e, tadeạu i sire mal᷊aing makoạ tataghuaneng i Amang tani e limiun katul᷊idẹ̌ e, baugu kapian sire.

²⁰Bal᷊inewe samatang tumbạu waugi sire ini e, Iạ měkẹ̌kal᷊iomaneng. Iạ mal᷊aing měkẹ̌kal᷊iomaneng baugu taumata apan měmpạngimang si Siạ e ual᷊ingu pẹ̌sasahiding sire ini e.

²¹Iạ e měkẹ̌kal᷊iomaneng, Amang, mal᷊owọko i sire kěbị e masěmbaụ, kerẹewe i Amang e nasěmbaụ dingang-Ku, kerene lai Iạ dingang i Amang. Mal᷊owọko i sire masěmbaụ dingang i Kitẹ, tadeạu dunia e mangimang u i Amang e kai rimolohʼu Iạ.

²²Iạ e seng bọu napakawantugʼi sire ringangu kawawantugu Ruata kụ seng nionggọ Siạ e, tadeạu i sire masěmbaụ, kerẹewe i kitẹ mal᷊aing sěmbaụ;

²³Iạ dingangi sire, mase i Amang dingangu Iạ; tadeạu i sire mamben těngadẹ̌ sěmbaụ. Tangu dunia e makakasingkạ u kawe i Amang dimolohu Iạ e, dingangu i Amang kụkěndagʼi sire kere i Amang kụkěndagu Iạ.

²⁴Amang, Iạ kai mapulu tadeạu i sire kụ nisarakang i Amang si Siạ e, ene ringang-Ku suapan Iạ ene, tadeạu i sire makasilo kawawantugẹ̌-Ku e; kụ ene kai kawawantugi Amang nionggọ e Siạ, batụu i Amang e kụkěndagu Iạ e, rokeng dunia e ta nịdiadi.

²⁵I Amang kụ adilẹ̌ e! Dunia e wẹ̌gawen Amang, arawe Iạ e masingkạben Amang; dingangu i sire ini e mạsingkạ u i Amang e rimolohu Iạ e.

²⁶Iạ e seng bọu nělahẹu areng i Amang si sire; ringangu Iạ e sarung tawẹ umpade mẹ̌koạ kerene, tadeạu kakěndagu i Amang si Siạ e tatapẹ̌ bue su ral᷊ungu naung i sire, dingangu Iạ nasěmbaụ dingang i sire.”