Read Sangir YOHANES 18 Bible Online

YOHANES 18 - Sangir bible

YOHANES 18

¹Sarạeng Mawu Yesus bọu nẹ̌kal᷊iomaneng kerene, i Sie ringangu manga muritʼE nakoạ sol᷊ong sěmbẹ̌kang Sal᷊ụ u Kidron. Sene piạ bawaelang sěmbaụ, ku Mawu Yesus dingangu manga muritʼE simuẹ̌ su wawaelang ene.

²I Yudas tau e měbẹ̌bal᷊ụ e masingkạ u tampạ ene; batụu Mawu Yesus e masau mẹ̌komol᷊ẹ̌ dingangu manga muritʼE sene.

³Tangu i Yudas tamaị e sol᷊ong tampạ ene kụ nẹ̌bawa wuntuang u sordadong Romawi ringangu manga měndariagạ Bal᷊em Mawu pirang katau apan nirolohu manga imang těmbonange ringangu i sire tau Farisi. I sire němpẹ̌bawa aghidẹ̌, lěntera, ringangu oborẹ̌.

⁴Mawu Yesus masingkạ u patikụ apan sarung mariadi su watangengʼE. Tangu i Sie rimani si sire kụ nakiwal᷊o, ”I kamene kai mědẹ̌deạ si sai?”

⁵”Yesus, tau Nazaret,” ungkuěng i sire. ”Seng Iạ e i Sie,” ungkuěng u Mawu Yesus. I Yudas tahapẹ̌sunial᷊ẹ̌ e rụdarisị sene ringang i sire.

⁶Piạ e Mawu Yesus něhengetang si sire u, ”Seng Iạ e i Sie,” ute kěbị e němpẹ̌sohọ kụ apidu něngkawatang su ěntana.

⁷Saụ kạpia Mawu Yesus nakiwal᷊o si sire, ”I kamene kai mědẹ̌deạ si sai?” ”Mědẹ̌deạ si Yesus tau Nazaret,” angkuěng i sire.

⁸”Seng Takụ niwera u, seng Iạ e i Sie,” ungkuěngu Mawu Yesus. ”Kụ kereu mambeng Iạ e rẹ̌deakeng i kamene, ute walạekere i sire wal᷊ine ini e aparal᷊eng.” (

⁹Dingangu něhengetang kerene, nariadị e apa kụ seng nipẹ̌hengetang u Mawu Yesus nạung: ”Amang, bọu i sire apan nisarakang i Amang si Siạ e, tawẹu sarang sěngkatau nailang.”)

¹⁰I Simon Petrus měngkatewe nanawụ pẹda niwawane kụ namilị darolohangu imang gagherẹ hakịu nahěnsị tul᷊ine koaneng. Arengu ěllang ene ute kai i Malkus.

¹¹ Tangu Mawu Yesus něhengetang si Petrus, ”Suhị e saụ pedanu e su homane! Unụe i kau mạngěnnau Iạ e tawe sarung měnginung bọu lainumangu kasasigěsạ e kụ seng nionggọ i Amang si Siạ e?”

¹²Mase manga sordadong Roma ringangu manga těmbonange ringangu manga měndariagạ Yahudi e nanamẹ e ringangu něhapusẹ̌ Mawu Yesus.

¹³Humotong i sire nangěntudʼu Mawu Yesus niapẹ̌těngon Hanas, i amang i Kayafas kinaratingang. I Kayafas e kai imang mawantugẹ̌ su taung ene.

¹⁴ Kụ kai i sie nạung seng naněgu manga měngangawasang Yahudi e ěndokangbe sěngkatau mate ipěngal᷊uang sěngkawanuaěnge.

¹⁵I Simon Petrus dingangu muritẹ̌ lai sěngkatau timol᷊e Mawu Yesus. Manga muritẹ̌ bal᷊ine ini e kai sěngkanarangu imang mawantugẹ̌, hakịewen i sie simuẹ̌ sěngkakasuẹ̌ dingangu Mawu Yesus sol᷊ong děllahu wal᷊eng imang mawantugẹ̌ e,

¹⁶arawe i Petrus e mạngampal᷊ẹ̌ sul᷊ikude, sutukadẹ̌. Susamurine manga muritẹ̌ bal᷊ine e simẹ̌bang ku nẹ̌bisara ringangu mẹ̌tatangkiang bawine měndariagạ tukadẹ̌, mase nẹ̌bawa si Petrus simuẹ̌ sol᷊ong dal᷊unge.

¹⁷Tau wawine mẹ̌tatangkiang mělahapa tukadẹ̌ ene e nẹ̌bera si Petrus, ”Ei, bal᷊inewe i kau lai sěmbaụ bọu timol᷊e tau rasị e?” ”Bal᷊ine,” ungkuěng i Petrus.

¹⁸Su tempo ene mawal᷊ěnguhẹ̌, kụ manga mẹ̌tatangkiang dingangu manga měndariagạ e seng němpěhunụ u putung su woheng kụ němpěndarangke sene. I Petrus himaungke tamai kụ dimarisị něndarang dingangi sire.

¹⁹Imang mawantugẹ̌ e mạnaněsui su Mawu Yesus e mạanun manga muritʼE ringangu kakakoạ u těntironʼE.

²⁰Mawu Yesus simimbang, ”Iạ e měngkate hanesẹ̌ měbẹ̌bisara matul᷊idẹ̌ su těngon l᷊awọ. Iạ e hanesẹ̌ mạněntiro su manga wal᷊eng pẹ̌kakal᷊iomanengang dingangu su ral᷊ungu Wal᷊em Mawu, tampạeng pẹ̌kakomol᷊angu tau Yahudi e. Iạ e tawẹ sarang sěnsul᷊e piạ apa niwisara pěkẹ̌kal᷊irung.

²¹Kụ kawe unụe i Tuang mananẹ̌sui si Siạ? Pakiwal᷊ọe si sire apan seng nakaringihẹ̌ si Siạ mạněntiro. Nal᷊ahẹ u i sire masingkạ u apan Takụ niwera.”

²²Piạ i Yesus kạpělehengetange kerene, sěngkatau wọu měndariagạ sene nameru si Sie ringangu nẹ̌bera, ”Kai kawahani i Kau mẹ̌bisara kerene su těngon imang mawantugẹ̌!”

²³Mawu Yesus simimbang, ”Kereu Iạ maul᷊ị u apang kụ nẹ̌sal᷊a, ute paul᷊ikọ kaia sal᷊ane! Kai kereu wawera-Ku e kawe nihino, kawe unụe i kau nameru si Siạ?”

²⁴Su samurine i Hanas nangorọ e taumata niapangěntudẹ̌ Mawu Yesus mạl᷊ahante sol᷊ong anun Imang Mawantugẹ̌ i Kayafas.

²⁵I Simon Petrus bědangbe lain dụdarisị mẹ̌děndarang sene. I sire němpẹ̌berạ e si sie, ”Bal᷊inewe i kau l᷊ai tụtol᷊e tau ene?” Arawe i Petrus e mang nẹ̌sunial᷊ẹ̌ u, ”Wal᷊ine!”

²⁶Sěngkatau rarolohangu imang mawantugẹ̌, anạ u sěmbaụ i anu tul᷊ine nisahing i Petrus e nẹ̌bera, ”Bal᷊inẹbe iạ nakasilo si kau su wawaelang ene mědẹ̌dingang i Sie?”

²⁷Mase i Petrus nẹ̌sunial᷊ʼi Sie kạpia, ”Tala,” — kụ nẹ̌kětạ u orasẹ̌ ene manụ kimukụ e.

²⁸Ěllo e seng mẹ̌běmbanaho i sire nangěntudʼu Mawu Yesus bọu wal᷊eng Kayafas sol᷊ong istanang guběrnurẹ̌. I sire tau Yahudi e tawe nahunsuẹ̌ sol᷊ong dal᷊ungu istana, mạdiring makasal᷊amạ si sire tuhụ dal᷊engu agama, batụu i sire mapulu l᷊ai měmpangidopu simokol᷊u Paskah.

²⁹Ual᷊ingu ene i Pilatus simẹ̌bang nakoạ sol᷊ong anun sire kụ nakiwal᷊o, ”Kai apa pẹ̌sasal᷊an tau ěndaị e iwẹ̌bawang kamene?”

³⁰I sire němpẹ̌simbang u, ”Mangawe i Sie tawẹ sal᷊ane, ute i kami e tawe manondan Sie su anun Tuang Guběrnurẹ̌.”

³¹I Pilatus nẹ̌bera si sire, ”Al᷊ạe i Sie kụ hukungke tuhụewe toratʼi kamene hala!” Kai tau Yahudi e simimbang u, ”I kami e tawe wotonge měnawong hukumangu papate su taumata.” (

³² Ini nariadị e tadeạu naghanapẹ̌ kere seng nipěhengetang u Mawu Yesus mạanung kakakoạ u i Sie sarung mapohong.)

³³I Pilatus simuẹ̌ kạpia su istana kụ nẹ̌kui Mawu Yesus, kụ nakiwal᷊o u, ”I Kau e ratung tau Yahudi e?”

³⁴Mawu Yesus simimbang, ”Apa kakiwal᷊o ini e wọu watangeng hala arau kai piạ u wal᷊ine kụ seng něhabaru Iạ e si Tuang?”

³⁵I Pilatus simimbang, ”Iạ kawe tau Yahudi tangu? Taumata kụ něnarakang i Kau si siạ e kai kawanuanʼU hala ringangu manga imang těmbonange. Kụ apạe seng nikakoạ u e?”

³⁶Ungkuěngu Mawu Yesus, ”Kararatuang-Ku e wal᷊inewe wọu dunia ini. Kai manga kararatuang-Ku e wọu dunia ini, ute angkeěng apan taumata-Ku e sarung mẹ̌tahutěndạ u Iạ e, tadeạu tawe isarakang su manga měngangawasan Yahudi. Kaiso mambeng kahěngang u kararatuang-Ku e asal᷊e wal᷊inewe wọu dunia ini!”

³⁷Tangu i Pilatus nakiwal᷊o si Sie, ”Mạeng kerene Datu i Kau tangu?” Mawu Yesus simimbang, ”I kau nẹ̌bera u Iạ kai ratu. Iạ e nawantelẹ̌ dingangu riměnta su dunia e kětạeng baugu timona sěmbaụ, tadeạu kai mẹ̌sahiding katěngadẹ̌. I saing kụ asal᷊e wọu katěngadẹ̌ e, mambeng dụdaringihẹ̌ si Siạ.”

³⁸I Pilatus nakiwal᷊o si Sie, ”Kai a mangal᷊ene katěngadẹ̌ e?” Mase i Pilatus simẹ̌bang kạpia wọu istana kụ nẹ̌bera su tau Yahudi, ”Iạ e tawe nakareạ pẹ̌sasal᷊a sarang sěmbaụ si Sie.

³⁹Kai tumuhụ tundung kamene, iạ e sěntiniạ makapẹ̌liwirʼu sěngkatau wọu taumatan hukumang su Ěllon Sal᷊imbangu Paskah e. I kamene mapulu iạ mapakal᷊iwirʼu ratun tau Yahudi e waugʼi kamene?”

⁴⁰I sire simimbang němpamansagẹ̌ u, ”Tala, kumbahang i Sie, paměllọen Barabas!” (I Barabasẹ̌ ute kai sěngkatau tahapěhampasẹ̌ sahiun tahapěmate.)