Read Sangir YOHANES 19 Bible Online

YOHANES 19 - Sangir bible

YOHANES 19

¹Su samurine i Pilatus simuẹ̌ e kụ nangoro si sire nakilimadʼu Mawu Yesus.

²Manga sordado e němpẹ̌koạ e makota wọu manga hakonda piạ larange, mase nipakẹ su těmbọ u Mawu Yesus. Bọu ene i sire němpẹ̌luhẹen lakụ manandụ awạe kamumụ,

³mase taghal᷊ẹ̌ měkẹ̌kakuwal᷊ị mạhunděnta su anunʼE kụ měmpěbẹ̌bera u, ”Karaluhẹ̌ datun tau Yahudi!” Bọu e i sire němpameru si Sie.

⁴Bọu ene i Pilatus saụ simẹ̌bang sěnsul᷊e kụ nẹ̌bera su taumata l᷊awọ e, ”Kakěllako! Iạ manondan Sie sul᷊ikude anung kamene, tadeạu i kamene masingkạ u iạ tawe nakareạ pẹ̌sasal᷊a sarang kadidị-didị si Sie.”

⁵Tangu Mawu Yesus simẹ̌bang kụ nẹ̌pakẹ u paporong makota piạ l᷊arange ringangu kakingkaenge kamumụ. Tangu i Pilatus nẹ̌berạ e si sire, ”Kakěllako tau ěndaị.”

⁶Ene sarangke manga imang těmbonange ringangu měndariagạ e nakasilọe Mawu Yesus, i sire němpamansagẹ̌ u, ”Kuruise i Sie! Kuruise i Sie!” I Pilatus nẹ̌bera si sire, ”Al᷊ạ e i Sie, kụ kuruiseng kamene hala, u iạ e tawe nakaěbạ pẹ̌sasal᷊a sarang sěmbaụ si Sie.”

⁷Tau Yahudi e němpẹ̌simbangu, ”Tumuhụ toratʼi kami e, i Sie harusẹ̌ kahinoěngu hukumang papate, batụu i Sie mạngakun batangeng e Ahusʼu Ruata.”

⁸Ene i Pilatus nakaringihe si sire němpẹ̌bera kerene, ute i sie saunengke lai natakụ.

⁹Tangu i sie simuẹ̌ e kạpia sol᷊ong dal᷊ungu istana kụ sarạeng Mawu Yesus niapasuẹ̌, tangu i Pilatusẹ̌ e nakiwal᷊ọ si Sie, ”I Kau e asal᷊e kai wọu a?” Mawu Yesus e tawe simimbang.

¹⁰Tangu i Pilatus nẹ̌bera kapia, ”Kai madiri i Kau mẹ̌bisara ringangku? Kasingkạko iạ kai kawasa měliwirʼi Kau ringangu kawasa měnguruisʼi Kau.”

¹¹Mawu Yesus simimbang, ”Kereu Ruata e tawe mangonggọ u kawasa ene si kau, ute mamben těngadẹ̌ i kau e tawe makapěngawasa sarang kadodọ su watangeng-Ku e. Ual᷊ingu ene taumata kụ něnarakang u Iạ si kau e, limembong kasěllahe rosane wọu rosanu.”

¹²Sarangke i Pilatus nakaringihẹ̌ ene, i sie mědẹ̌deạ dal᷊engu měliwiru Mawu Yesus. Kai taumatan Yahudi e měmpẹ̌bẹ̌buheang u, ”Kereu i Tuang měliwirʼi Sie, ute i Tuang bal᷊inewe ringangu Kaisarẹ̌! Taumata kụ mangakun batangenge ratu, kai rụdokạ Kaisarẹ̌!”

¹³Ene i Pilatus nakaringihẹ̌ manga wawera ene, i sie nẹ̌bawạ e Mawu Yesus sarang l᷊ikude mase naiangke su kaderan pẹ̌gaghutaěng e su tampạ isěsẹ̌ba Ěmpahẹ̌ Batu. (Su werang Ibrani isěsẹ̌bạ Gabata.)

¹⁴Tempo ene maraning pukul᷊ẹ̌ mapul᷊o dua ěllo rangẹ, su ěllo kal᷊amonang Ěllon Sal᷊imbangu Paskah. I Pilatusẹ̌ e nẹ̌bera si sire ene, ”Ini e ratung kamene!”

¹⁵I sire měmpẹ̌bẹ̌buheang u, ”Patẹ e i Sie! Patẹ e i Sie! Kuruise i Sie!” I Pilatus nakiwal᷊o, ”Mihino wue iạ manguruisẹ̌ datung kamene?” Manga imang těmbonange simimbang u, ”Kětạeng Kaisarẹ̌ e samatang datung kami e!”

¹⁶Tangu i Pilatus e nanarakangken Mawu Yesus si sire, mědeạu ipakikuruisẹ̌. I sire němpěngal᷊ạe Mawu Yesus e, kụ niwawạen sire.

¹⁷Mawu Yesus simẹ̌bangke kạpẹ̌masaěnge kalung kuruisẹ̌ sẹ̌sane sol᷊ong tampạ isẹ̌sẹ̌ba ”Tampạ u Raran Těmbọ”. (Su werang Ibrani isẹ̌sěba Golgota.)

¹⁸Su tampạ ene i Sie nikuruisẹ̌. Piạko l᷊ai ruang katau wal᷊ine nikuruisẹ̌; sěngkatau su sěmbẹ̌ka kaihi, sěngkatau e lai su sěmbẹ̌ka koaneng arawe Mawu Yesus e sutal᷊oarane.

¹⁹Su kalung kuruisʼu Mawu Yesus tangu i Pilatus nangorongkon pẹ̌tataingu wohẹ kerei: ”Yesus bọu Nazaret, Datun Tau Yahudi”.

²⁰Lawọ taumatan Yahudi e němpẹ̌basa wohẹ ene, batụu tampạ u Mawu Yesus e nikuruisẹ̌ tawẹ karaune wọu soa e. Bohẹ ene su ral᷊ungu werang Ibrani, Latin, dingangu Yunani.

²¹Manga imang těmbonange němpẹ̌bera si Pilatus, ”Abe pamohẹ u ’Ratun tau Yahudi’, kaiso wohẹko, ’Tau ini e nẹ̌bera, Iạ e Ratun tau Yahudi.’ ”

²²Arawe i Pilatusẹ̌ e simimbang u, ”Apan seng takụ niwohẹ e, tatapẹ̌ kạbawohẹ.”

²³Bọuten manga sordado e němpěnguruisẹ̌ Mawu Yesus e, i sire němpangal᷊ạ e pakeangʼE. Pakeang ene nipahiạ i sire ěpạ: kụ sěngkatau-sěngkatau e nakaěbạ e pẹ̌sěmbahageang. I sire němpěngal᷊ạ lai kakingkaengʼE. Kakingkaeng ene tawẹ gepẹ e, nikahiwu tinalung bọu rasị sarang bawa.

²⁴ Manga sordado ene němpẹ̌bisarạe sěmbaụ su wal᷊ine, ”Abe papotọ i kitẹ e kakingkaeng ini. Mahịe i kitẹ mẹ̌koạ lahurị tadeạu měnsang i sai wue kahombangeng.” Hal᷊ẹ̌ ene nariadi tadeạu misěhụe apan seng mạbawohẹ su ral᷊ungu Winohẹ Susi, u: ”I sire e němpẹ̌papahiạu pakeang-Ku, dingangu němpẹ̌dal᷊ahurị baugu kakingkaeng-Ku.” Kụ i sire sordado e mang němpẹ̌koạ kerene.

²⁵Marěduhu kuruisʼu Mawu Yesus e mạhundarisị i ninangu Mawu Yesus, tuaring i ninangʼE, Maria kawingi Kleopas, dingangi Maria Magdalena.

²⁶Ene Mawu Yesus nakasilọ e si ninangʼE ringangu muritʼE kẹ̌kapiaěnge rụdarisị sene, i Sie nẹ̌bera si ninangʼE, ”Inang, ěndaị anạ i Ninang.”

²⁷Bọu ene Mawu Yesus něhengetang su muritʼE ene, ”Ěndaị i ninangu.” Nanětạ bọu ene muritẹ̌ ene, něnarimạ i ninangu Mawu Yesus nẹ̌tanạ su wal᷊ene.

²⁸ Mawu Yesus masingkạ u patikụ e seng nasueng koạ e, mědeạu apan seng kạbawohẹ su ral᷊ungu Winohẹ Susi e mariadi, i Sie něhengetangke, ”Iạ e kai narou.”

²⁹Su tampạ ene piạko lainumang napenẹ u anggorẹ̌ mahaesẹ̌. Tangu wungang saghẹ e nilaehẹ̌ su anggorẹ̌ e, kụ nituhẹ u pondol᷊u kalun hisop, bọu e niogorẹ̌ su wiwihu Mawu Yesus.

³⁰Mawu Yesus e naněsụ e akẹ u anggorẹ̌ e, kụ něhengetangu, ”Seng naghanapẹ̌!” Mase i Sie nẹ̌těngkal᷊ein těmbọe kụ napohong.

³¹Kal᷊awọu měngangawasang Yahudi e tawe mapulu wal᷊unangu taumata apan nighantonge měngkai tatapẹ̌ kạgaghantong su kalu pinẹ̌kěhusẹ̌ e su ěllon Sabatẹ̌, limemboete lai Sabatẹ̌ sěnsul᷊e ini e kai Ěllo Mawantugẹ̌ naněntani. Batụu ěllon Mawu Yesus nighantonge nihino sahěllo nakal᷊imona wọu Sabatẹ̌ ene, tau Yahudi e mědẹ̌dorong si Pilatus měnsang botonge i sire mamědi laedu taumata apan seng nighantong, dingangu mělintụ u manga maietẹ̌ e wọu kalu kuruisẹ̌.

³²Tangu manga sordado e nahunděnta kụ němpamamědi laedʼi rẹ̌dua mạgaghantong dingangu Mawu Yesus.

³³Piạ i sire nahumpạ u anun Mawu Yesus e, tangu i sire nakasahidị e u i Sie seng napohong. Hatede i sire tawe nisěhụ namědi laedʼE.

³⁴Arawe sěndihangu Mawu Yesus e nisusụ u wěngko kahian sěngkatau wọu manga sordado ene; kụ nẹ̌boangke raha laụ u akẹ.

³⁵Taumata kụ nakasilo hala su kararariadin hal᷊ẹ̌ ene, ute kai i sie mẹ̌sahidin hal᷊ẹ̌ ene, tadeạu i kamene mal᷊aing mangimang.[38] Tangu sasahidine e mambeng kahěngang, dingangu i sie masingkạu ene kahěngang.

³⁶ Hal᷊ẹ̌ ene nariadị e tadeạu maghanapẹ̌ apang mạbawohẹ su ral᷊ungu Winohẹ Susi, u ”Tawẹ u manga sarang kạdiongeng sěmbua wọu ruhinʼE sarung papẹ̌diang”.

³⁷ Su ral᷊ungu Winohẹ Susi e mal᷊aing kạbawohẹ: ”I sire tangu sarung měmpěmanda si Sie kụ seng tiněkạ i sire”.

³⁸Bọu ene i Yusup bọu Arimatea mẹ̌dẹ̌dorong si Pilatus tadeạu i sie iapakawala měngal᷊ạ bal᷊unangu wadang u Mawu Yesus. (I Yusup ute kai muritʼu Mawu Yesus ipẹ̌bẹ̌bawuni, batụu mạtakụ u manga měngangawasang Yahudi.) I Pilatus napakawalan sie, kụ tamaị e i sie něngal᷊ạ bal᷊unangu wadang u Mawu Yesus.

³⁹ I Nikodemus kụ nạung kal᷊imona wọu riměnta su anun Mawu Yesus su tempong hẹ̌bi, kụ dimal᷊eng sěngkaral᷊eng dingangi Yusup. I Nikodemus kai měbẹ̌bawa mur laụ u gaharu — piạ u manga těllum pul᷊o sukilone kawěhạ e.

⁴⁰I rẹ̌dua e němpangal᷊ạ e wal᷊unang u Mawu Yesus e kụ mase nipikunge ringangu hekạ papikunge sěngkawěkisẹ̌ dingangu manga wěngi e timuhụ e tundung pělal᷊ěbingu tau Yahudi e.

⁴¹Su sěmpalangke piněnggantongang u Mawu Yesus piạko winal᷊aeng sěmbaụ. Su ral᷊ungu winal᷊aeng ene piạko kubul᷊ẹ̌ buhu sěmbaụ tawe nipẹ̌pakẹ baugu pěnampakeng taumata.

⁴²Ual᷊ingu kawe masandigẹ̌ kubul᷊ẹ̌ ene ringangu kawe seng maraning pěnanětạ u ěllon Sabatẹ̌ e ute Mawu Yesus e nitampạen dẹ̌dua sene.