Read Sangir YOHANES 2 Bible Online

YOHANES 2 - Sangir bible

YOHANES 2

¹Dua ěllo tuhụ e piạko sal᷊iwangu pẹ̌kakawing su soang Kana su ěntanang Galilea, kụ i ninangu Mawu Yesus mal᷊aing ene sene.

²Mawu Yesus dingangu manga muritʼE nighausang lai su sal᷊iwang ene.

³Sarạeng anggorẹ̌ e nasuẹ e, i ninangʼE nẹ̌berạe su Mawu Yesus, ”I sire nikasueěngu anggorẹ̌.”

⁴Mawu Yesus simimbang, ”Inang, abe pěngoro si Siạ e. Deng bal᷊ine tempone Iạ mělahẹ u watangeng-Ku.”

⁵Kaiso i ninangu Mawu Yesus nẹ̌bera su manga kokị, ”Měngkate koạ apan nioronʼE si kamene.”

⁶Ene kai nạung piạ běnsadu akẹ ěnnungu waụ mạpapěllọ sene, baugu panganguhaseng tuhụewe tundung tau Yahudi. Běnsadẹ̌ ene pẹ̌sěmbaụ mangawe lohong mahasụ su litere.

⁷Mawu Yesus něhengetang su manga kokị ene, ”Lohoingkong akẹ běnsadẹ̌ ene kěbị.” Tangu i sire nělohọe niapakapenẹ.

⁸Bọu ene Mawu Yesus něhengetang si sire, ”Pěnggaingko kadodọ akẹ ene kụ bawako su anung těmbonangu sal᷊iwang.” I sire nẹ̌bawạe akẹ ene sarang anung těmbonangu sal᷊iwang e,

⁹ringangu i sie nẹ̌temangke akẹ kụ seng nẹ̌bal᷊ụ nakoạ anggorẹ̌. (I sie wẹ̌ga wue měnsang bọu apa asal᷊e anggorẹ̌ ene, u tumbạeweng kokị apang němpěndal᷊ingu akẹ ene e masingkạ.) Tangu těmbonangu sal᷊iwang ene himaungke su kaghiang esẹ,

¹⁰mase nẹ̌bera si sie, ”Tuhụ tundune, taumata e mẹ̌siliwirẹ̌ u anggorẹ̌ mapapia kal᷊imona, dingangu mạengbeng sake semben naundang doune, buhụewe anggorẹ̌ bal᷊ine. Arawe i kau e kawe něndesọ u anggorẹ̌ kapiaěnge sarang orasẹ̌ ini!”

¹¹Kai ene hal᷊ẹ̌ nakaral᷊inaụ kahumotongange kinoạu Mawu Yesus. I Sie někoạ hal᷊ẹ̌ ene su soang Kana su Galilea. Su hal᷊ẹ̌ ene e i Sie nělahẹu kasasěllahʼE. Tangu manga muritʼE němpangimang si Sie.

¹² Bọu ene Mawu Yesus riměsung sol᷊ong Kapernaum i siren ninangʼE, manga anạ u sěmbaụʼE ringangu manga muritʼE. I sire němpẹ̌tanạ sene mangawe pira ěllo karěngụe.

¹³ Sarạeng Ěllon Paskang tau Yahudi seng masandigẹ̌, Mawu Yesus nakoạ e sol᷊ong Yerusalem.

¹⁴Su Wal᷊em Mawu su Yerusalem i Sie nakaěbạe mal᷊ahumbal᷊ụ u sapi, domba, ringangu manụ paluma; ringangu manga měnanal᷊iu roitẹ̌ mạhungkaiang sene.

¹⁵Mawu Yesus nẹ̌koạ gagheserẹ̌ bọu tal᷊i kụ něliwuahẹ̌ kal᷊awọu manga binatange bạe domba arau sapi, wọu ral᷊ungu Wal᷊em Mawu. Manga medang měnanal᷊iu roitẹ̌ e niwal᷊intụiʼE hakịu roitẹ̌ e měngkatewe nẹ̌sal᷊iawuhẹ̌ tamai ramahi.

¹⁶Bọu e i Sie něhengetang su manga měbawal᷊ụ u manụ paluma, ”Pakasuẹ e hengkẹ bọu ini apa tamai ene. Bal᷊eng Amang-Ku abe koạ tampạ u pal᷊ahumbal᷊ukang!”

¹⁷ Tangu manga muritʼE nakatahěndungke ayetʼu Winohẹ Susi ini, ”Kakěndagẹ̌-Ku baugʼu Wal᷊enʼU, o Ruata-Ku, makạtutung naung-Ku.”

¹⁸Manga těmbonangu tau Yahudi e kai rimokạ Mawu Yesus, angkuěng i sire, ”Kěnang pěnodẹu hal᷊ẹ̌ makạdal᷊inaụ su těngong kami e tadeạu i kami makahěngangu su tampạ e wue i Kau mẹ̌koạ kere ini.”

¹⁹ Mawu Yesus simimbang, ”Goghahe Bal᷊e ini, kụ su ral᷊ungu těllu ěllo Takụ pětikang kạpia.”

²⁰Bọu e i sire němpẹ̌bera, ”Epạ u pul᷊o ěnnung su taunge karěngụe nipamětikang ini. Bọu e i Kau mamětị kạpia su ral᷊ungu těllu ěllo?”

²¹Arawe Bal᷊em Mawu su timonan Mawu Yesus ute kai watangengʼE sẹ̌sane.

²²Kụ tangu susamurine, sarạeng Mawu Yesus niapẹ̌bangung kapia wọu kapapohong, nakatahěndungke manga muritʼE u hal᷊ẹ̌ ene kai seng bọu nipěhengetangʼE. Tangu němpangimangke i sire su apan mạbawohẹ su ral᷊ungu Winohẹ Susi e ringangu su apan iwẹ̌berang Yesus.

²³Těntal᷊ang Mawu Yesus deng ene su Yerusalem su tempon pěmamantugu Ěllon Paskah, lawọ taumata mạngimang si Sie ual᷊ingu hal᷊ẹ̌ kẹ̌koatengʼE.

²⁴Kaiso Mawu Yesus sẹ̌sane tawe nahimang si sire, watụ u i Sie masingkạben sire kěbị.

²⁵Tawe wahal᷊uasẹ̌ taumata manualagʼu kakanoạ i sai-sai si Sie, batụu i Sie sẹ̌sane seng masingkạu ral᷊ungu naungu taumata.