Read Sangir YOHANES 20 Bible Online

YOHANES 20 - Sangir bible

YOHANES 20

¹Su kaloěngen Misa, kụ deng bẹ̌dang marěndung, i Maria Magdalena e nakoạ sol᷊ong kubul᷊ẹ̌. Ene i sie nakasilọ e watu l᷊ahěpinge kai seng naensọ bọu lohangu kubul᷊ẹ̌ e.

²Tangu i sie timal᷊angke nẹ̌deạ si Simon Petrus dingangu muritẹ̌ kẹ̌kapiangu Mawu Yesus, kụ nẹ̌bera si sire, ”Mawu e seng nial᷊ạ i sire wọu kubul᷊ẹ̌, kụ iạ e wẹ̌ga měnsang i Sie nipěllọ suapa.”

³Bọu e i Petrus dingangu muritẹ̌ bal᷊ine e natamaị e sol᷊ong kubul᷊ẹ̌.

⁴I rẹ̌dua e nahuntal᷊ang, kai muritẹ̌ sěngkatau e kai limembon kahawese wọu i Petrusẹ̌, hakịewen i sie nahumpạ kakal᷊imonaěnge su kubul᷊ẹ̌.

⁵I sie naral᷊ingẹ e su ral᷊ungu kubulẹ̌ e ringangu nakasilọ e hekạ kakěngkainge kạpapěllọ sene, kai i sie tawe kadionge simuẹ̌.

⁶I Simon Petrusẹ̌ e nakatol᷊ẹ e wọu l᷊ikude, apidewe nasuẹ̌ sol᷊ong dal᷊ungu kubulẹ̌ e. I sie nakasilo hekạ kakěngkainge mạpapěllọ sene,

⁷Arawe hekạ bawẹ̌kisẹ̌ těmbọ u Mawu Yesus e tawẹdise surẹ̌duhe, batụu kai kạdarul᷊ung natěntani.

⁸Bọu e muritẹ̌ kụ nakal᷊imona nahumpạ u kubulẹ̌ e mal᷊aing nasuẹ̌ dingang. I sie nakasilo ringangu nangimang. (

⁹Sarang tempo ene i sire reng bẹ̌dang ta nakaěnna apan mạbawohẹ su ral᷊ungu Winohẹ Susi u i Sie harusẹ̌ mẹ̌bangung bọu papate.)

¹⁰Bọu ene manga tumatol᷊e si Yesus ene něngkapul᷊ẹ.

¹¹I Maria Magdalena e rụdarisị su těngon kubul᷊ẹ̌ e kạsangị e. Piạ i sie sụsangị e, i sie rimal᷊ingeko sol᷊ong dal᷊ungu kubul᷊ẹ̌,

¹²mase i sie nakasilo malạekatẹ̌ duang katau pakeange mawira. I rẹ̌dua mạhungkaiang su piạ ěnnạu tampạ u wal᷊unangu Mawu Yesus, sěngkatau su piạ těmbọe, arawe sěngkatau l᷊ai ute su piạ l᷊aede.

¹³Manga malạekatẹ̌ e nakiwal᷊ọ e, ”Inang, kawe sụsangị unụe i kau e?” I Maria simimbang, ”Kai piạ u němpěngal᷊ạ Mawuku e, dingangu iạ bẹ̌ga měnsang i Sie kai nipěllọ suapa.”

¹⁴Bọuten nẹ̌bera kerene, i sie nẹ̌bihụe sol᷊ong l᷊ikude kutẹu kawe nakasilo Mawu Yesus rụdarisị sene. Kai i sie wẹ̌ga wue u ene kai nạung Mawu Yesus.

¹⁵Mawu Yesus nakiwal᷊o si sie, ”Inang, kawe sụsangị unụe i kau e? Kai i sai rẹ̌deakengu e?” I Maria e mạngiral᷊ing u tau ene kai mělahěnsinuang kụ i sie nẹ̌berạ e si Sie, ”Opọ, kamageng u kai i Opọ něngal᷊ing i Sie wọu ini e, ute tul᷊ungko paul᷊ị si siạ, kai nipěllọ i Opọ suapa i Sie tadeạu iạ makaal᷊ạ bue.”

¹⁶Mawu Yesus něhengetang si sie, ”Maria!” I Maria nẹ̌bihu sol᷊ong anun Mawu Yesus kụ nẹ̌bera su werang Ibrani, ”Rabuni!” (Mangal᷊ene ”Mananěntiro”.)

¹⁷”Abe pěnenggehẹ̌ si Siạ,” ungkuěngu Mawu Yesus si sie, ”ual᷊ingu Iạ e kai wẹ̌daweng tawe nạtaraị sol᷊ong anung Amang. Kaiso rakọe kakoạ sol᷊ong anun manga anạ u sěmbaụ-Ku, kụ pěhabarẹ̌ko si sire u Iạ kai reng mataraị sol᷊ong anung Amang-Ku dingangu i Amang i kamene, Duata-Ku ringangu Duatang kamene.”

¹⁸Tangu i Maria e rimal᷊engke něhabarẹ̌ su manga muritʼu Mawu Yesus u i sie kai seng nakasilo Mawu ringangu Mawu e seng něhengetang u kěbị ene si sie.

¹⁹Su ěllon Misa l᷊ai ene, kụ nahěbịe, ute manga muritʼu Mawu Yesus němpẹ̌komol᷊ẹ̌ su wal᷊e sěmbaụ kụ manga tukade kạpapal᷊e, batụu i sire kai matakụ u manga mangangawasang Yahudi. Sěngkal᷊ěndịu Mawu Yesus narěntạe kụ dimarisị su tal᷊oaran sire apidu něhengetang, ”Karal᷊unsemahẹ̌ si kamene.”

²⁰Bọuten něhengetang kerene, i Sie nanodẹen limanʼE ringangu sěndihangʼE. Su tempọen i sire nakasilo Mawu e měngkate apa maral᷊uasẹ̌.

²¹Mase Mawu Yesus saụewe něhengetang sěnsul᷊e, ”Karal᷊unsěmahẹ̌ si kamene. Kerẹewe i Amang dimolohʼu Iạ, ute kerene lai Iạ e dumolohʼi kamene.”

²²Bọu ene i Sie něniụ u singongonʼE si sire ringangu něhengetang, ”Pěmpěnarimạe Rohkẹ̌ u Ruata.

²³ Kereu i kamene měmpangampungbe rosan pẹ̌sěngkatau e, Mawu Ruata e mal᷊aing mẹ̌gěllịu ampunge. Kereu i kamene tawe měgěllịu ampungu rosaʼn pẹ̌sěngkatau e ute Ruata e mal᷊aing tawe měgěllịu ampunge.”

²⁴I Tomas (nisěbạ si ”Hindua”), sěngkatau wọu i sire mapul᷊o dua muritʼu Mawu Yesus, tawẹ dise sutal᷊oaran muritʼE wal᷊ine su tempon Mawu Yesus diměnta.

²⁵Tangu manga muritʼu Mawu Yesus bal᷊ine e němpẹ̌bera si Tomasẹ̌ e, ”I kami e seng nakasilo Mawu!” Arawe i Tomasẹ̌ e simimbang, ”Kereu iạ e wẹ̌dang tawe nakạsilo ěnnạu paku su l᷊imanʼE, ringangu tawe nakạpěnuhing tal᷊imědoku su ěnnạ u lesẹ u paku e ringangu tawe nakạpěnenggehu l᷊imaku su sěndihangʼE, ute iạ mang bẹ̌dang tawe mangimang.”

²⁶Sěngkamisa tuhụ e manga muritʼu Mawu Yesus natampung kạpia su tampạ ene, dingangu i Tomasẹ̌ e mal᷊aing ene. Kal᷊awọu tukadẹ̌ e mạpapal᷊e. Kai Mawu Yesus e natěntung kụ dimarisị sutal᷊oarang sire, mase něhengetang, ”Karal᷊unsemahẹ̌ si kamene.”

²⁷Bọu e Mawu Yesus něhengetang si Tomasẹ̌, ”Kakěllạ e lima-Ku, kụ suhị e tal᷊imědonu e sini. Ogore l᷊imanu kụ pěnaghipo sěndihang-Ku. Kuhạe měndapatẹ̌, kai pangimangke!”

²⁸I Tomasẹ̌ e nẹ̌bera su Mawu Yesus, ”Mawuku, ore Ruataku!”

²⁹Tangu Mawu Yesus něhengetang si sie, ”I kau e nangimang batụu seng nakasilo si Siạ, arau ěng? Kariangkamang taumata kụ mangimang manilaing tawe nakạsilo si Siạ e!”

³⁰Lawọ l᷊ai wẹ̌dang tanda makạl᷊aherang bal᷊ine e kinoạ u Mawu Yesus su těngon manga muritʼE, kai tawe niwẹ̌bohẹ su ral᷊ungu bukẹ̌ ini.

³¹Kaiso patikụ ini e niwohẹ, tadeạu i kamene mangimang[39] u Mawu Yesus e kai Ratu Měnanal᷊amatẹ̌, Ahusʼu Ruata, kụ ual᷊ingu mạngimang si Sie, ute i kamene makahombang pẹ̌bawiahẹ̌.