Read Sangir YOHANES 21 Bible Online

YOHANES 21 - Sangir bible

YOHANES 21

¹Bọu ene Mawu Yesus napasilon batangengʼE kạpia su Ranong Tiberias su těngon manga muritʼE. Kere ini katatainge:

²Su sahěllo, i Simon Petrus, i Tomas nisěbạ si Hindua, i Natanael bọu Kana su Galilea, manga anạ i Zebedeus, dingangu muritʼE rarua wal᷊ine kapětẹ̌tampunge.

³ Ungkuěng i Simon Petrus su manga ringange, ”Iạ e kai mapulu sasaẹ mẹ̌pakisaghẹ.” ”I kami e tumol᷊e,” ungkuěng i sire si sie. Tangu sasaẹ e i sire němpẹ̌sake sakaeng. Kutẹu kanandụewen hěbi ene i sire tawe nakasomạ apa-apa.

⁴Ene sarạeng matangěllo e kạsěbange, Mawu Yesus e rimarisị su apeng, kaiso i sire wẹ̌gawue u ene kawe Mawu Yesus e.

⁵Mawu Yesus něhengetang si sire, ”E, manga anạ, piạbe kinạ i kamene?” ”Tala,” ungkuěng i sire.

⁶ Mawu Yesus něhengetang si sire, ”Těntangko somang kamene su koaneng u sakaeng, kụ i kamene sarungbe makaěbạ kinạ.” Tangu somạ e nitěntangken sire, kai tawe nakaumal᷊ẹ̌ saụ němol᷊eng ual᷊ingu kal᷊awọu kinạ su ral᷊unge.

⁷Muritẹ̌ ikẹ̌kěndagu Mawu Yesus e nẹ̌bera si Petrus, ”E pai Mawu!” Piạ e i Simon Petrus nakaringihẹ̌ u pai ene kai Mawu, ute i sie něluhẹen pakeange (batụu i sie kai těntol᷊e) mase timumpạ e su akẹ.

⁸Muritẹ̌ bal᷊ine e němpẹ̌tol᷊e sarang dul᷊unge ringangu sakaeng kạpěmol᷊enge soma napenẹ u kinạ. I sire tawe tumanịu marau wọu rul᷊unge lẹ̌ěnnaěng mangawe kětạu mahasụ su metere karaune.

⁹Ene i sire natumpạe wọu sakaeng, tangu i sire nakasilọe tětuhu putung kụ piạ kinạ mạdal᷊ěngkang su wowone ringangu borotẹ̌.

¹⁰Mawu Yesus něhengetang, si sire, ”Kěnangko ramahi pẹ̌bawa manga pirambua kinạ buhu nisamẹ i kamene.”

¹¹I Simon Petrus tangu simakẹ e su sakaeng, kụ němol᷊engke soma sarang dul᷊unge. Soma e měngkatewe napenẹ u kinạ gaghaghuwạ; kěbị e mahasụ l᷊imam pul᷊o těllu su wuane. Kụ maning kinạ mal᷊awọ kerene, kai somạ e tawe naghědẹ.

¹²Mawu Yesus e něhengetang si sire, ”Mahịe i kitẹ mẹ̌simokol᷊ẹ̌.” Kai mang tawẹ u sěngkatau wọu i sire manga muritʼE wahani makiwal᷊o u, ”I Tuang kai i sai?” Batụu i sire masingkạ u i Sie kai Mawu.

¹³Tangu Mawu Yesus himaungke si sire kụ něngal᷊ạ e borotẹ̌ ene, bọu e něngonggọ si sire. Kụ i Sie mal᷊aing nẹ̌koạ kerene su kinạ ene.

¹⁴Ini e kai katěllun sul᷊ene Mawu Yesus napatodẹ u watangengʼE su manga muritʼE samurin i Sie niapẹ̌bangung bọu papate.

¹⁵Bọuten i sire nahungkaěng, tangu Mawu Yesus něhengetang si Simon Petrus, ”Simon, anạ i Yona, i kau kụkěndagẹ̌ben Iạ limembo wọu i sire ěndaị e?” ”Těngadẹ̌ Mawu,” ungkuěng i Petrus, ”Mawu e masingkạ u iạ kụkěndagẹ̌ben Mawu e.” Mawu Yesus něhengetang si sie, ”Tangkianeko manga domba-Ku.”

¹⁶Su karuan sul᷊ene Mawu Yesus nakiwal᷊o si sie, ”Simon anạ i Yona, i kau kụkěndagẹ̌ben Iạ e?” ”Těngadẹ̌, Mawu,” ungkuěng i Petrus, ”Mawu e masingkạ u iạ kụkěndagẹ̌ben Mawu e.” Mawu Yesus něhengetang si sie, ”Tangkianeko manga domba-Ku.”

¹⁷Katěllun sul᷊ene Mawu Yesus nakiwal᷊o si sie, ”Simon anạ i Yona, i kau kụkěndagẹ̌ben Iạ e?” I Petrus měngkate masusa naunge u Mawu Yesus kawe nakiwal᷊o si sie sarang katěllun sul᷊ene. Tangu i Petrus nẹ̌saụewe simimbang, ”Mawu, Mawu e masingkạ u kal᷊awọu kěbị. Mawu e masingkạben iạ e kụkěndagʼu Mawu e!” Bọu e Mawu Yesus něhengetang si sie, ”Tangkianeko manga domba-Ku.

¹⁸Těnga-těngadẹ̌ bawera-Ku ini: Su tempon i kau reng umbaseng, i kau sẹ̌sanu měngkate mạmẹ̌gong kal᷊uwaengu, kụ měngkawe mědẹ̌daral᷊eng balạewe sol᷊ong tampạ sude tuhụewe kapulunu. Arawe kamageng i kau seng maghurang ute, i kau měngogoru l᷊imanu kụ taumata wal᷊ine mamẹ̌gong i kau ringangu mẹ̌bawa si kau sol᷊ong tampạ ikẹ̌kadirinu.”

¹⁹(Dingangu manga wawera ene Mawu Yesus mělẹ̌lahẹu kereapa i Petrus sarung mate ual᷊ingu pěmamantugẹ̌ Duata e.) Bọu ene Mawu Yesus něhengetang si Petrus, ”Tol᷊ẹ e si Siạ!”

²⁰ Su tempong i Petrus nẹ̌bihu sol᷊ong l᷊ikude, i sie nakasilo muritẹ̌ ikẹ̌kěndagʼu Mawu Yesus. (Seng i sie kụkaiang su rẹ̌duhʼu Mawu Yesus kapẹ̌sẹ̌simokol᷊e kụ nakiwal᷊o si Sie, ”Mawu, kai i sai sarung mẹ̌bal᷊ụ u Mawu e?”)

²¹Nakasilo si sie, i Petrus nakiwal᷊o su Mawu Yesus, ”Mawu, kai kereapa wue i sie ini e?”

²²Mawu Yesus e simimbang, ”Andene Iạ mapulu tadeạu i sie kạtatanạ biahẹ̌ sarang Iạ marěnta, ene e wal᷊inewe hal᷊ẹ̌ u. Kai i kau e, tol᷊ẹ e si Siạ!”

²³Tangu nakekẹ e habarẹ̌ su tal᷊oaran manga muritʼu Mawu Yesus, u muritẹ̌ ene e tawe mate. Sěmbal᷊iau Mawu Yesus e tawe nẹ̌bera u muritẹ̌ ene tawe mate, kaiso kai: ”Andene Iạ mapulu i sie kạtatanạ biahẹ̌ sarang Iạ marěnta e, ene wal᷊inewe hal᷊ẹ̌ u.”

²⁴Muritẹ̌ ene e měsẹ̌sahidi mạanung kěbị hal᷊ẹ̌ ini e. Mal᷊aing i sie seng namohẹ u ene. Dingangu i kitẹ kěbị masingkạ u apan seng nipahumbisarane ene mambeng těngadẹ̌.

²⁵Bẹ̌dangbe lawọ lai hal᷊ẹ̌ bal᷊ine kinoạ u Mawu Yesus. Andene kěbị e mang bohekang e sěmbaụ-sěmbaụ, ute takụ lẹ̌ěnnaěng u maningbelain dunia sěmbaụ e kai tawe kapẹ̌kionangu kal᷊awọu bukẹ̌ kụ sarung bohekang e.