Read Sangir YOHANES 3 Bible Online

YOHANES 3 - Sangir bible

YOHANES 3

¹Piạ sěngkatau těmbonangu agama wọu ghal᷊ipohong tau Farisi kụ arenge i Nikodemus.

²Piạ sěhěbi i sie riměnta su anum Mawu Yesus dingangu nẹ̌bera, ”Tuang Guru, i kami masingkạu i Tuang kai nirolohʼu Ruata. Batụu kai tawẹu sarang sěngkatau makakoạ hal᷊ẹ̌ makạdal᷊inaụ kere kẹ̌koateng i Tuang, kereu Mawu Ruata tawe ruměndingang i sie.”

³Mawu Yesus simimbang, ”Pangimangke, tawẹu sarang sěngkatau makoạ kawanuan Duata kereu i sie tawe ipěhanạ kapia.”[5]

⁴”Makoạbe kereapa taumata seng matěllang kụ saụ ipěhanạ kạpia?” angkuěng i Nikodemus su Mawu Yesus. ”Lahạu i sie saụbe makasuẹ̌ su ral᷊ungu gandongang i ninange mase ipẹ̌hanạ karuan sul᷊ene?”

⁵Mawu Yesus simimbang, ”Mambeng těngadẹ̌ bawera-Ku ini: Kereu taumata tawe ipěhanạ bọu akẹ dingangu wọu Rohkẹ̌ u Ruata e, taumata ene tawe masowa su kararatuangu Mawu.

⁶Taumata tuhụ gẹ̌si ute nipěhanạ u matimadẹ̌, arawe tuhụ marohkẹ̌ e ute kai nipěhanạ u Rohkẹ̌ u Ruata.

⁷Abe ral᷊inaụ u Iạ nẹ̌bera u: i kamene harusẹ̌ ipěhanạ kapia.[6]

⁸Anging tumiụ suapạeweng kapulune, i kitẹ e makaringihẹ̌ sal᷊induhunge: kai i kau wěga wue měnsang diměntawe wọu a ringangu měnsang makoạbe sol᷊ong a i sie. Kerene lai apan taumata kụ piněhanạ bọu Rohkẹ̌ u Ruata e.”

⁹”Kereapa ene mariadi?” angkuěng i Nikodemus.

¹⁰Mawu Yesus simimbang, ”I kau e mananěntiro su Israel; unụe i kau wẹ̌ga wue?

¹¹Pangimangke: i kami mạulịu apang kasingkạ i kami, dingangu i kami e kětạbeng měsẹ̌sahiding apang seng kinasilong kami; kai i kamene tawe mapulu mangimang sasahiding kami.

¹²I kamene tawe mangimang kereu Iạ e mẹ̌běkeng kakakoạ u dunia ini; kereapa i kamene mangimang, kereu Iạ mẹ̌běkeng kakakoạ u sorga e si kamene?

¹³Tawẹu sarang sěngkatau nakạdangeng su sorga e samatang i Sie kụ seng nẹ̌těngkatěntung su dunia, kụ kai Ahusʼu Taumata e.

¹⁴Kerẹewe i Musa napakarangẹ u těmpu witụ su kalu sěmbua su wanua l᷊inggi e, kerene lai Ahusʼu Taumata e hinong iapakarange,

¹⁵tadeạu kěbị taumata e mangimang si Sie, makahombang pẹ̌bawiahẹ̌ tutune ringangu kakalẹ̌.”

¹⁶Ual᷊ingu Mawu Ruata kerenẹeng kakěndage su ral᷊ohon dunia e, hakịu i Sie něnarakangu AhusʼE mang sěmbaụ tadeạu apan taumata kụ mangimang si Sie tawe mawinasa, kaiso kawe makahombang pẹ̌bawiahẹ̌ kakalẹ̌.

¹⁷Batụu Mawu Ruata e něndolohʼu AhusʼE wal᷊inewe měhukungu dunia e kaiso kawe měngambang dunia e.

¹⁸Taumata kụ mangimang si Sie tawe ihukung. Arawe taumata kụ tawe mangimang ute seng nihukungu Mawu, puhinengu i sie tawe mangimang su Ahusʼu Ruata e mang sěmbaụ.

¹⁹I sie tẹ̌tuntukang ual᷊ingu hal᷊ẹ̌ ini: Tualagẹ̌ e seng diměnta su dunia, kai taumata e ěndọu kawe mapulung marěndunge sul᷊ungu tualagẹ̌, u kakanoạ i sire kai raral᷊akị.

²⁰I sai-saiewen měkẹ̌koạ daral᷊akị, kai měbẹ̌binsịu tualagẹ̌; kụ tawe mapulu humaung su tualagẹ̌ e, mạdiring kakanoạ i sire raral᷊akisẹ̌ e ikasilo.

²¹Arawe i saing kawe tutuhụ kapulun Duata e ute lụhaung su tualagẹ̌ e mẹ̌deạu mal᷊ahẹ apan seng nikakoạe timuhụ kapulun Duata.

²²Samurin ene Mawu Yesus dingangu manga muritʼE něngkakoạ sol᷊ong banuang Yudea. I Sie reng nẹ̌tanạ kadodọ tempo ringangi sire kụ něnahani.

²³ Su tempo ene i Yohanes deng tawe nạtahungkụ. I sie něnahani su Ainon, masandigu Salim, batụu sene kai piạ mal᷊awọ akẹ. Taumata e měmpạhunděnta su anune, mase i sie měnẹ̌nahani si sire.

²⁵Manga tumatol᷊e si Yohanes nanětạe němpẹ̌darendehẹ̌ dingangu tau Yahudi[7] su hal᷊ẹ̌ u pamamurẹ̌si e.

²⁶I sire nakoạ sol᷊ong anun Yohanes kụ nẹ̌bera, ”Guru, i Tuang bẹ̌dang makạtahěndung tau ringangi Tuang su sěmběkan Sal᷊ụ u Yordan ene, kụ itẹ̌těbọu si kami kạngerẹ? Orasẹ̌ ini i Sie mal᷊aing měnẹ̌nahani kụ kěbị taumata e rụděnta su anunʼE!”

²⁷I Yohanes simimbang, ”Taumata e tawẹ pusakạe kereu tawe ghělirangu Mawu si sie.

²⁸I kamene hala seng nakaringihẹ̌ si siạ nẹ̌bera, ’Iạ bal᷊inewe Ratu Měnanal᷊amatẹ̌. Iạ kai nirolohẹ̌ ipạngal᷊imona si Sie.’

²⁹Kaghiang bawine e kai tẹ̌taghuanengu kaghiang esẹ. Arawe hapịu kaghiang esẹ e kětạben měnananggelẹ̌ dingangu kapědẹ̌daringihe, kụ mal᷊uasẹ̌ naunge kereu makaringihẹ̌ tingihʼu kaghiang esẹ. Iạ mal᷊aing kerene. Kụ orasẹ̌ ini e ral᷊uasẹ̌ku e nasukụ kahěngang.

³⁰Kai i Sie hinon kạkasěllahe, arawe iạ e kai hinong kạkạdodọ e.”

³¹I saing kụ bọu rasịe kai su wowong kěbị e. I saing kụ bọu dunia e kai nasowa taumatan dunia ringangu mạhumbisarang hal᷊ẹ̌ u mạdunia. I Sie e kụ darěntane wọu rasị e kai su wowong kěbị.

³²I Sie měbẹ̌bisaran apang kụ seng kinasilonʼE ringangu kinaringihʼE, kaiso mang tawẹu sarang sěngkatau mangimang su apan sasahidinʼE.

³³I sai mạngimang su sasahidinʼE ene ute, měngaku wue u Ruata e mambeng těngadẹ̌.

³⁴Batụu taumata rarolohangu Mawu mělẹ̌habarẹ̌ manga baweran Duata, ual᷊ingu Rohkẹ̌ u Ruata seng nipal᷊oho si Sie masukụ.

³⁵I Amange makěndagẹ̌ su AhusʼE, kụ seng něnarakangu kěbị kawasa si Sie.

³⁶I saing kụ mangimang su Ahusẹ̌ ene sarung makahombang pẹ̌bawiahẹ̌ tutune ringangu kakalẹ̌. Arawe i saing kụ tawẹ satiane su Ahusẹ̌ ene e tawe makahombang pẹ̌bawiahẹ̌. I sie ihukungu Mawu sarang karěngụe.