Read Sangir YOHANES 5 Bible Online

YOHANES 5 - Sangir bible

YOHANES 5

¹Bọu ene piạko sal᷊imbangu tau Yahudi, tangu Mawu Yesus e natamaị e sol᷊ong Yerusalem.

²Su Yerusalem marěduhu ”Tukadʼu Domba” piạko l᷊iwuạ e sěmbaụ,[10] kụ suweran Ibrani isẹ̌sẹ̌bạ Betesda.[11] Sene piạ panonggene lima kal᷊awọe.

³Suapan panonggene tangu měngkate mal᷊awọ masasakị e mạhundal᷊oka; piạ u wuta, piạ u kempal᷊ẹ̌, dingangu lai peosẹ̌. [I sire kěbị e mẹ̌ngampal᷊ẹ̌ pẹ̌gagholangu akẹ e.

⁴Batụu malạekatʼu Mawu e kai kạdingạ lụl᷊intụ su ral᷊ungu talagạ e mapẹ̌gẹ̌golangu akẹ e. Kụ masasakị kahumotongange matumpa su pẹ̌gagholangu akẹ e, i sie mapia wọu sakị, balạewe měnsang sakị apa tẹ̌tal᷊udange.]

⁵Su tampạ ene kai piạ tau esẹ kụ seng těllum pul᷊o ual᷊u su taunge karěngụe masakị.

⁶Mawu Yesus nakasilo si sie rụdal᷊oka sene ringangu masingkạ u i sie seng marěngụ-děngụ masakị; tangu Mawu Yesus nakiwal᷊ọe si sie, ”Mapulu i kau e mapia?”

⁷Tau masakịe simimbang, ”Tuang, sini tawẹu makasowang iạ su ral᷊ungu talagạ su pẹ̌gagholangu akẹ e. Kụ těntal᷊ang iạ buhụ e kạtamaine sol᷊ong talagạ e, seng piạ taumata wal᷊ine měngal᷊imona sumuẹ̌ e.”

⁸Tangu Mawu Yesus něhengetangke si sie, ”Pẹ̌bangungke, hengkẹ e těpihu mase ral᷊engke.”

⁹Tangu su tempo ene lai tau e napia. I sie něhengkẹ e těpihe kụ bọu e rimal᷊eng. Hal᷊ẹ̌ ene nariadi su ěllon Sabatẹ̌.

¹⁰ Ual᷊ingu ene manga těmbonangu tau Yahudi němpẹ̌berạ e su tau wuhu kapapia wọu sakị e, ”Sahěllo ini e kai ěllon Sabatẹ̌. I kau tawe wotonge měhengke těpihu.”

¹¹Arawe tau ene simimbangu, ”Tau napakapian iạ kanini e, něngoro si siạ apělẹ̌hengkẹ těpihẹ̌ku ringangu apạdal᷊enge.”

¹²”Kụ kai i sai tangu nangoro si kau e apělẹ̌hengkẹ těpihu mase apạdal᷊eng?” ungkuěng i sire.

¹³Kai tau ěndaị buhu napia e wẹ̌ga wue měnsang i sai taumatane, u Mawu Yesus e seng nẹ̌těngkaghěngging sutal᷊oaran taumata l᷊awọ e.

¹⁴Su samurine Mawu Yesus e nẹ̌sombangu tau ene su ral᷊ungu Wal᷊em Mawu ringangu něhengetang si sie, ”Ini i kau e seng napia. Kụ kuhạe saụ mẹ̌dosa, tadeạu tawe saụ hombangengu limembon karal᷊akise.”

¹⁵Mase natamaị e tau ene něhabarẹ̌ su manga těmbonangu kawanuang Yahudi u kai Mawu Yesus nakakapia.

¹⁶Kụ ual᷊ingu ene i sire nanětạe mapakasusan Mawu Yesus, batụu i Sie mạpakapian masasakị su ěllon Sabatẹ̌.

¹⁷Arawe Mawu Yesus e něhengetang si sire, ”I Amang-Ku e mang kạhalẹ̌ e sarang orasẹ̌ ini, dingangu Iạ e mal᷊aing mělẹ̌hal᷊ẹ̌.”

¹⁸Manga wawera ene makadiadi naungu manga těmbonangu tau Yahudi e sauneng mědeạu měmate si Sie. I sire měmpẹ̌kẹ̌koạ kerene wal᷊inewe kětạu ual᷊ingu i Sie lụlampa atorangu agama mạanun ěllon Sabatẹ̌, kaiso kai lai ual᷊ingu i Sie nẹ̌bera u Ruata kai i AmangʼE; mangal᷊ene i Sie mětẹ̌těngkasul᷊ungu watangengʼE ringangu Ruata.

¹⁹Mawu Yesus simimbang si sire ene kerei, ”Pangimangke Ahusẹ̌ e tawe makakoạ apa-apa ringangu kawasanʼE sẹ̌sane. I Sie kětạeng měkẹ̌koạ apang ikẹ̌kasilonʼE kẹ̌koateng i AmangʼE. U apang kẹ̌koateng i Amang e ene lai kẹ̌koateng u Ahusẹ̌ e.

²⁰Batụu i Amang kụkěndagu Ahusẹ̌ dingangu mělẹ̌lahẹ u kěbị apang kẹ̌koatengʼE hala. Sude wue i Amang sarung lai mělahẹ u munara limembong kasěllahe hakịewen i kamene měmpẹ̌dal᷊inaụ.

²¹I Amange mapẹ̌bẹ̌bangung u taumata nate ringangu měgěllịu pẹ̌bawiahẹ̌ tutune ringangu kakalẹ̌; kerene lai Ahusẹ̌ e mẹ̌gěllịu pẹ̌bawiahẹ̌ kakalẹ̌ su taumata kụ mapulu ghělikangʼE pẹ̌bawiahẹ̌!

²²I Amange tawe měhukung si sai-sai. Kěbị kawasa waugʼu měhukung e seng nisarakangʼE su AhusʼE.

²³I Amang nẹ̌koạ ene tadeạu kal᷊awọu taumata měngadatẹ̌ Ahusẹ̌ e kerẹewe lai i sire měngadatẹ̌ si Amang. Taumata kụ ta měngangadatẹ̌ Ahusẹ̌ e mal᷊aing ta měngangadatẹ̌ si Amang něndolohu Ahusẹ̌ e.

²⁴Mambeng těngadẹ̌ manga wawera-Ku ini e: I sain dụdaringihẹ̌ hengetang-Ku ringangu mạngimang si Sie něndolohʼu Iạ e, mạnaghuang pẹ̌bawiahẹ̌ kakalẹ̌. I sie tawe sarung ihukung; batụu i sie kai seng nal᷊iwirẹ̌ bọu papate ringangu makahombang pẹ̌bawiahẹ̌.

²⁵Pangimangke: Sarung duměnta tempone — arau sembeng tempone — taumata nate sarung makaringihẹ̌ tingihʼu Ahusʼu Ruata. Kụ i sain nakaringihẹ̌ e sarung mẹ̌biahẹ̌.

²⁶Kerẹewe i Amang kawe puěngu pẹ̌bawiahẹ̌, i Sie napakariadin AhusʼE lai puěngu pẹ̌bawiahẹ̌.

²⁷I Sie seng nangonggọ su AhusʼE kawasa waugu mẹ̌hukung, u i Sie kai Ahusʼu Taumata.

²⁸I kamene abe ral᷊inaụ makaringihẹ̌ hal᷊ẹ̌ ini e, batụu sarung duměnta tempone u patikụ taumata nate makaringihẹ̌ tingihʼE.

²⁹ Mase sumẹ̌bang bọu kubul᷊ẹ̌. Taumata kụ nạung měkẹ̌koạ mapia e sarung mẹ̌bangung kụ mẹ̌biahẹ̌. Arawe taumata kụ nạung měkẹ̌koạ dal᷊akị e sarung mẹ̌bangung tadeạu ihukung.”

³⁰”Iạ e tawe makakoạ apa tuhụ kapulu-Ku hala. Iạ kětạeng mělẹ̌hukung tuhụewe ilẹ̌orong Duata. Kụ putusang-Ku e adilẹ̌, u Iạ e tawe mẹ̌kakoạ kapulu-Ku sẹ̌saku, kaiso kai kapulung Amang kụ něndolohʼu Iạ.

³¹Kereu Iạ e kai mẹ̌sẹ̌sahidim batangeng-Ku hala, sasahidi-Ku e tawe hinong pangimangeng.

³²Kai piạbe taumata wal᷊ine mẹ̌sẹ̌sahidim batangeng-Ku, kụ Iạ masingkạ u sasahidine e mambeng těngadẹ̌.

³³ I kamene seng něndolohu rarolohang sol᷊ong anung Yohanes kụ i sie seng nẹ̌sahidi kahěngang mạul᷊ịu watangeng-Ku.

³⁴Hal᷊ẹ̌ ini e Takụ ihabarẹ̌, bal᷊inewe tadeạu Iạ e piạ u mẹ̌sahidi, kaiso kawe mědeạu i kamene iapakasal᷊amatẹ̌.

³⁵I Yohanes e kai tabidạu sol᷊o rụděllị kụ mapạsěnnangu tualagẹ̌. Kụ kětạeng kadodọ tempo e i kamene mal᷊uasẹ̌ manarimạ tualagẹ̌ ene.

³⁶Arawe sasahidi-Ku e kai limembong kasěllahe wọu sasahiding Yohanes. Apang kẹ̌koateng-Ku orasẹ̌ ini e, ute kai munara nitilakehʼi Amang si Siạ, mělẹ̌lahẹ i Amange seng něndolohʼu Iạ.

³⁷ Dingangu i Amang kụ seng něndolohu Iạ e mal᷊aing apẹ̌sẹ̌sahidin Iạ e. I kamene mambeng bẹ̌dang ta nakạdingihẹ̌ tingihʼE arau nakasilo ghahịʼE.

³⁸Manga hengetangʼE tawe naresọ su naung i kamene batụu i kamene tawe nangimang si Siạ e kụ seng nịdarolohʼE.

³⁹I kamene měmpạngěndung Binohẹ Susi batụu i kamene mẹ̌ngiral᷊ingu ringangu kakakoạ kerene i kamene mạnaghuang pẹ̌bawiahẹ̌ tutune ringangu kakalẹ̌. Kụ Binohẹ Susi e sẹ̌sane mẹ̌sẹ̌sahidin Iạ e.

⁴⁰Arawe i kamene tawe mapulu ruměnta su anu-Ku tadeạu makahombang pẹ̌bawiahẹ̌ kakalẹ̌.

⁴¹Iạ e tawe mẹ̌dareạ daralo wọu taumata.

⁴²Iạ e makạkiral᷊a si kamene. Iạ masingkạ i kamene tawe kumakěndagu Ruata su ral᷊ungu naung i kamene.

⁴³Iạ e riměnta ringangu kawasang Amang-Ku, kaiso i kamene tawe něnarimạu Iạ. Arawe kereu taumata wal᷊ine duměnta ringangu kawasane hala, ute i kamene měnarimạben sie.

⁴⁴Kereapa i kamene makapangimang kamagengu i kamene kawe mědeạu makiralo su sěndinganengu, kụ tawe mapulu mẹ̌gausẹ̌ daralo asal᷊e wọu Ruata mang Sěmbaụ?

⁴⁵Abe pěngěnnau Iạ sarung mapẹ̌sal᷊ang kamene su těngon Amang. U mapẹ̌sal᷊ang kamene e kai i Musa, i sie ěndaị pělẹ̌harapeng i kamene.

⁴⁶Kereu i kamene mangimang si Musa, ute i kamene sarung mangimang si Siạ, u apan nịbawohẹ e ute mạanun Iạ.

⁴⁷Arawe kamageng i kamene tawe mangimang su apang kụ bẹ̌bohekang i Musa e, ute kereapa wue i kamene mangimang apang Takụ ipěbẹ̌bera si kamene?”