Read Sangir YOHANES 8 Bible Online

YOHANES 8 - Sangir bible

YOHANES 8

¹Arawe Mawu Yesus e nataraị sol᷊ong Bukidʼu Zaitun.

²Sěngkariọěllone mal᷊uka-l᷊ukadẹ̌ i Sie simuẹ̌ su Wal᷊em Mawu, kụ mal᷊awọ taumata riměnta sol᷊ong anun Sie. Mawu Yesus tangu naiangke, mase nanětạe naněntiro si sire.

³Kạpaněntirone e, manga mananěntirong agama ringangu manga tau Farisi e nẹ̌bawako tau wawine nikatangkạ nawuang. I sire nangoro tau wawine ene niapararisị sutal᷊oarane,

⁴mase nẹ̌bera su Mawu Yesus, ”Tuang Guru, bawine ini nikaẹ̌bakeng kapẹ̌baradosane.

⁵ Su ral᷊ungu titam Musa e kai piạ atorang u kamageng manga wawine kakakoạe kere ini ute harusẹ̌ bahungangu watu sarang pakapate. Kụ su tempo ini e kereapa su tiněnnang Tuang?”

⁶I sire makịbal᷊o kerene mědeạu i sire měnangkạ si Sie. Tadeạu i sire makatokeng sal᷊a si Sie. Arawe Mawu Yesus e mang kụkakurung mạmohẹ u tal᷊imědone su ěntana.

⁷Sarạeng i sire měngkate měnẹ̌nahonsang, i Sie nẹ̌pětịe kụ nẹ̌bera si sire u, ”Kereu sutal᷊oarang kamene piạ u tawẹ dosane ute, i sie kakal᷊imonaěnge pamereng u watu su tau wawine ěndaị e.”

⁸Bọu ene Mawu Yesus kimakurung kapia kụ saụewe namohẹ su ěntana.

⁹Sarạeng i sire nakaringihẹ̌ Mawu Yesus něhengetang kerene, namehọe i sire němpaněntangu tampạ ene sěngkatau-sěngkatau nanětạ bọu kaghurangenge. Naral᷊e kate Mawu Yesus sẹ̌sane natěntang sene ringangu tau wawine e, kụ bẹ̌dang ene su rarisikang e.

¹⁰Mase Mawu Yesus něpẹ̌tịe kụ nẹ̌bera su tau wawine ene, ”Suapạe i sire kěbị e? Tawẹu něhukung si kau e?”

¹¹”Tala, Tuang,” nisimbange. ”Kerene e,” angkuěng u Mawu Yesus, ”Iạ e mal᷊aing tawe měhukung i kau, kụ kuhạe mẹ̌dosa kapia.”][20]

¹² Mawu Yesus saụ e něhengetang su taumata l᷊awọ, ungkuěngʼE, ”Kai Iạ e tualagʼu dunia. I sain tumol᷊e si Siạ e tawe rumal᷊eng su kararěndung, kaiso i sie kai managhuang tualagʼu pẹ̌bawiahẹ̌.”

¹³ ”Ini e i Kau nẹ̌sahiding batangengu e”, ungkuěng u tau Farisi si Sie, ”sasahidinʼU e tawẹ katěngade.”

¹⁴Mawu Yesus simimbang, ”Manilaing Iạ mẹ̌sahidin batangeng-Ku e kai hal᷊ẹ̌ ini e mambeng kahěngang; u Iạ e masingkạ bọu apa rarěnta-Ku, ringangu sol᷊ong apa timona-Ku. I kamene wẹ̌ga wue měnsang Iạ e wọu a ringangu sol᷊ong a.

¹⁵I kamene mělẹ̌hukung taumata tuhụ tabiatʼu taumata; arawe Iạ e tawe mělahukung i sai-sai.

¹⁶Kereu Iạ e měhukung taumata ute, putusangku ene e matul᷊idẹ̌, batụu Iạ e wal᷊inewe sẹ̌saku; I Amang kụ něndolohʼu Iạ e rụděndingang Siạ.

¹⁷Su ral᷊ungu toratʼi Musa e mạbawohẹ kere ini: Sasahidi kahěngang ute kai sasahidi wọu ruang katau.

¹⁸Kụ mẹ̌gẹ̌gěllịu sasahidi waugu watangeng-Ku e ute kai rarua — Iạ dingangu i Amang kụ něndolohʼu Iạ e.”

¹⁹”I AmangʼU ene kai suapa?” ungkuěng i sire. Mawu Yesus simimbang, ”I kamene tawe makakiral᷊a si Siạ, kerene lai si Amang-Ku. Mangạewe i kamene makakiral᷊a si Siạ, ute i kamene mal᷊aing makakiral᷊a si Amang-Ku e.”

²⁰Kěbị ene seng nipěhengetang u Mawu Yesus su tempong i Sie mạněntiro su Wal᷊em Mawu su rẹ̌duhu manga kasẹ̌ tampạ u papěllọ. Kai tawẹu sarang sěngkatau něnamẹ si Sie, batụu bẹ̌daweng bal᷊ine tempone.

²¹Tangu Mawu Yesus saụewe něhengetang si sire, ungkuěnge, ”Iạ e sarung dumal᷊eng, kụ i kamene sarung mẹ̌deạ si Siạ, kaiso i kamene sarung mate su ral᷊ungu rosang kamene. Su tampạ tamaiang-Ku e, i kamene tawe makakarěnta.”

²²Tangu manga měngangawasan tau Yahudi němpẹ̌berạe u, ”Aramanung i Sie kai mapulu mẹ̌tumpate, u i Sie kai nẹ̌bera u, ’Su tampạ tamaiang-Ku e, i kamene tawe makakarěnta.’ ”

²³Mase Mawu Yesus e něhengetang si sire, ”I kamene e kai riměnta wọu wawa; arawe Iạ e kawe wọu rasị. I kamene kai wọu dunia, arawe Iạ e wal᷊inewe wọu dunia.

²⁴Hakịu ene Iạ nẹ̌bera si kamene u i kamene sarung mate su ral᷊ungu rosang kamene. Kụ mamben těngadẹ̌ i kamene sarung mate su ral᷊ungu rosang kamene, mạengu i kamene kawe tawe mangimang u kai ’Iạ e i Sie kụ isẹ̌sěbạ IẠ ENE’.”[21]

²⁵”Kụ kai i sai tangu i Kau e?” ungkuěng i sire. Mawu Yesus simimbang, ”Unụ e lai wẹ̌dang mẹ̌bisarang kamene![22]

²⁶Mal᷊awọ l᷊ai Takụ ipaul᷊ị mạanun kamene ringangu pẹ̌sasal᷊ang kamene. Arawe i Sie kụ dimolohʼu Iạ e kapangimangeng. Kụ Iạ e měhabarẹ̌ su dunia e apang kụ seng Takụ kinaringihẹ̌ bọʼi Sie.”

²⁷I sire tawe nakaěnna u i Sie kai kapẹ̌bisarane si sire mạanung i Amang.

²⁸Ual᷊ingu ene Mawu Yesus něhengetang si sire, ”Hědo kereu i kamene seng napakarangẹ u Ahusʼu Taumata e, i kamene sarung makasingkạu kai ’Iạ e i Sie kụ isẹ̌sěbạ IẠ ENE’, dingangu i kamene sarung makasingkạ u tawẹu sarang sěmbaụ kẹ̌koateng-Ku kụ bọu batangeng-Ku sẹ̌saku. Iạ e kětạeng maul᷊ị u apang kụ itẹ̌těntirong Amang si Siạ.

²⁹Kụ i Sie rimolohʼu Iạ e rụděndingang Siạ e. I Sie tawe manga naněntangu Iạ sẹ̌saku, batụu Iạ hanesẹ̌be měkẹ̌koạ apang makạl᷊ahimpulu si Sie.”

³⁰Bọuten Mawu Yesus e něhengetangu kěbị ene, ute mal᷊awọ taumata e němpangimang si Sie.

³¹Bọu e Mawu Yesus něhengetangke su manga tau Yahudi apan seng němpangimang si Sie, ”Kereu i kamene mẹ̌biahẹ̌ tumuhụ těntiroku, ute i kamene mambeng kahěngang tumatol᷊e Siạ,

³²tangu i kamene sarung makakiral᷊a Ruata kahěngang, kụ ual᷊ingu ene tangu i kamene ipakal᷊iwirẹ̌.”

³³ ”I kami e kai hěnton Abraham,” angkuěng i sire. ”I kami e tawẹ u němpẹ̌tẹ̌tahamawu si sai-sai! Kụ kai a timonan baweranʼU, ’I kamene sarung iapakal᷊iwirẹ̌’?”

³⁴”Mamben těngadẹ̌ bawera-Ku ini,” angkuěngu Mawu Yesus si sire. ”I sai-sai měmpẹ̌kẹ̌koạ dosa e kai ěllangu rosa.

³⁵Kụ sěngkatau ěllange tawẹ tampạ natantu su ral᷊ungu sěntahanakeng, sěmbal᷊iau anạ ute kawe piạbe tampạ e sarang marěngụ-děngụ.

³⁶Ual᷊ingu ene e, tangu kereu anạ e mapakal᷊iwirʼi kamene ute i kamene mambeng mal᷊iwirẹ̌.

³⁷Těngadẹ̌ e Iạ masingkạ i kamene ini e kawe pal᷊ahěnton Abraham. Kaiso i kamene kawe mapulu měmate si Siạ, ual᷊ingu i kamene tawe rumaẹ těntiro-Ku.

³⁸Apang kụ kinasilo-Ku si Amang-Ku e, ute ene Takụ ipaul᷊ị. Arawe i kamene ute kawe měkẹ̌koạ apan itẹ̌těntirong amang i kamene si kamene.”

³⁹I sire simimbang, ”I Amang i kami e kai i Abraham.” ”Kụ kereu i kamene kahěnga-hěngang anạben Abraham,” ungkuěng u Mawu Yesus e, ”ute nal᷊ahẹ bue u i kamene měmpẹ̌koạbe[23] apang kinoạ i Abraham.

⁴⁰Iạ e mạul᷊ịu katěngadẹ̌, dingihẹ̌ku wọu Ruata, arawe i kamene kawe mapulu měmate si Siạ. I Abraham e tawe nẹ̌kẹ̌koạ kerene!

⁴¹I kamene měkẹ̌koạ apang kinoạ i amang i kamene.” Ungkuěng i sire, ”I kami e manga anạben Mawu e kahěngang. I amang i kami e mang sěmbaụ, kụ kětạben Duata samatang.”

⁴²Mase Mawu Yesus něhengetang si sire, ”Kereu Mawu Ruata e kawe i Amang i kamene ute i kamene kụkěndagẹ̌ben Iạ, u rarěnta-Ku e kai wọu anun Duata. Iạ bal᷊inewe riměnta ual᷊ingu kapulu-Ku hala e, kaiso kawe i Sie něndolohʼu Iạ.

⁴³Kawe unụe i kamene tawe makal᷊aěnna apang Takụ ipělẹ̌hengetang? U i kamene tawe makararagẹ̌ dumaringihẹ̌ těntiro-Ku.

⁴⁴Setang e kai i amang i kamene, kụ i kamene mapulu tumol᷊e kapulung amang i kamene. Dokeng su tětạe setange kai taha pěmate. I sie tawẹ bẹ̌ke kụ kai manumběka wọu katěngadẹ̌ batụu kai tawẹ katěngadẹ̌ si sie. Kereu i sie mẹ̌konti, ute ene mambeng kakakoạ e, u seng kerene lulune. I sie makonti ringangu asal᷊e kai patikụ kakontiang.

⁴⁵Arawe Iạ e kawe měbẹ̌berang katěngadẹ̌, kụ ual᷊ingu ene i kamene tawe mangimang si Siạ.

⁴⁶I sai wue wọʼi kamene mapakal᷊ahẹu kai piạ dosa e si Siạ? Kereu Iạ maul᷊ịben katěngadẹ̌ e, unụe wue i kamene tawe mangimang si Siạ?

⁴⁷I saing asal᷊e wọu anun Duata e, i sie rụdaringihẹ̌ hengetangu Ruata. Arawe i kamene kawe wal᷊inewe wọu anun Duata e, hakịu i kamene kawe tawe mapulu rumaringihẹ̌.”

⁴⁸Tau Yahudi e němpẹ̌simbahẹ̌ su Mawu Yesus, ”Bal᷊inewe nihino wawerang kami u i Kau e kai tau Samaria kụ niwal᷊iuangu setang?”

⁴⁹Mawu Yesus simimbang, ”Iạ e tawe niwal᷊iuangu setang. Iạ e měngẹ̌ngadatẹ̌ si Amang-Ku, kai arawe i kamene kawe mělẹ̌hinakang si Siạ.

⁵⁰Iạ e tawe mẹ̌dareạ kawawantugʼu watangeng-Ku. Kai piạ sěngkatau kụ mědẹ̌deạ dal᷊eng sarang mapakawantugʼu Iạ, kụ kai i Sie e mẹ̌tatatilakehẹ̌.

⁵¹Mambeng kahěngang bawera-Ku ini e, i sain tụtuhụ Hengetang-Ku e ute tawe mate sarang karěngụe.”

⁵²Mase tau Yahudi e nẹ̌berạ e su Mawu Yesus, ”Ini e i kami nakaěnna u i Kau e mambeng kahěngang nisawelangu setang! I Abraham sẹ̌sane seng nate, kụ kerene lai kal᷊awọu manga nabi. Arawe ungkuěngu kawe, ’I sain tụtuhụ bawera-Ku, tawe mate sarang karěngụe.’

⁵³Kereu i Abraham sẹ̌sane seng nate ringangu kal᷊awọu manga nabi e seng nate, kụ i Kau ini e ute i sai? Tawe nasowa suakal᷊ẹ̌ i Kau ini e kụ limembong kasěllahe wọʼi amang i kami i Abraham!”

⁵⁴Mawu Yesus simimbang, ”Mangawe Iạ mědẹ̌deạ kawawantugẹ̌ baụgu batangeng-Ku hala, ute kawawantugẹ̌ ene tawẹ mangal᷊ene. Mapakawantugʼu Iạ e kai i Amang-Ku kụ ěndaị su ěnnang kamene kai Ruatang kamene,

⁵⁵sěmbal᷊iau i kamene tawe nakakiral᷊a si Sie. Arawe Iạ masingkạ i Sie. Mangawe Iạ e nẹ̌bera u Iạ tawe nakakiral᷊a si Sie, ute tangu Iạ e sěngkatau kontiang, mẹ̌sul᷊ung i kamene. Iạ e masingkạ i Sie ringangu rụdaringihẹ̌be hengetangʼE.

⁵⁶I amangu i Abraham měngkate mal᷊uasẹ̌ u i sie sarung makasilo ěllo-Ku. I sie seng nakasilo kụ i sie mal᷊uasẹ̌!”

⁵⁷Mase tau Yahudi e němpẹ̌bera su Mawu Yesus, ”UmurʼU e wẹ̌dang tawe natimu l᷊imam pul᷊o su taunge, kụ i Kau e seng nakasilo si Abraham?”[24]

⁵⁸Mawu Yesus simimbang, ”Mambeng těngadẹ̌ Iạ mẹ̌habarẹ̌ si kamene: u kal᷊amonan i Abraham nipěhanạ, Iạ e seng těbe ene.”

⁵⁹Mase tau Yahudi e němpangal᷊ạ e watu kụ mangěntung Mawu Yesus; arawe Mawu Yesus kai nẹ̌kěmbuni mase naněntangu Wal᷊em Mawu e.