Read Sangir YOHANES 9 Bible Online

YOHANES 9 - Sangir bible

YOHANES 9

¹Ene, Mawu Yesus kạdal᷊enge, i Sie nakasiloko tau wuta rokẹewen i sie pinẹ̌hana.

²Kutẹu manga muritʼu Mawu Yesus e nakiwal᷊o si Sie, ”Tuang Guru, kawe unụe tau ini e pinẹ̌hanạ buta? Apa ual᷊ingu i sie nẹ̌dosa, arau kawe ual᷊ingu rosan inang dingangu i amange?”

³Mawu Yesus simimbang, ”I sie nawuta wal᷊inewe ual᷊ingu rosane arau wal᷊inewe l᷊ai ual᷊ingu rosan inang dingangu i amange, kaiso kawe tadeạu taumata makasilo kawasan Duata měkẹ̌karadiahang su ral᷊ungu watangenge.

⁴Těntal᷊ang bẹ̌dang piạ ěllone, i kitẹ e harusẹ̌ mẹ̌koạ munaran Sie rimolohʼu Iạ e. Hěbi e sarung duměnta, kụ semben takapěhal᷊ěkangu sarang sěngkatau.

⁵ Karěngụewen Iạ e su dunia ini, Iạ e kai tualagʼu dunia.”

⁶Bọuten něhengetang kerene, Mawu Yesus e nangědu su ěntana, kụ ědu e nikongke ringangu ěntana. Mase niwuhanʼE su matan tau ene,

⁷mase kapẹ̌berane si sie, ”Dakọe pěnděmusẹ̌ su liwuạ u Siloam.” (Siloam mangal᷊ene ’Nirolohẹ̌’.) Tangu tau ene tamai nanguhasẹ̌ gatine. Su tempon pẹ̌bawal᷊ị e, i sie seng nẹ̌kělla.

⁸Manga lampunge ringangu apan taumata kụ seng nạung makạsilo si sie mětẹ̌taharorong, i sire němpẹ̌bera, ”Bal᷊inewe i sie ngae sěntiniạ kụkaiang mětẹ̌taharorong?”

⁹Piạ u němpẹ̌bera, ”A kụ mang i sie.” Kai piạ l᷊ai měbẹ̌berau, ”Wal᷊ine, i sie kětạu měpẹ̌papangawẹ tau ene.” Kai tau ene sẹ̌sane nẹ̌bera u, ”Kai iạ e.”

¹⁰”Kai kereapa katatainge sarang i kau e nakasilo?” ungkuěng i sire si sie.

¹¹I sie simimbang, ”Tau arenge i Yesus e něngongke lẹ̌bo kadodọ, niwuhane su mataku kapẹ̌berane u, ’Dakọ e rěmusẹ̌ gatinu su l᷊iwuạu Siloam.’ Mase iạ e natamai. Kụ su tempon iạ mẹ̌děnděmusẹ̌ gatiku e iạ e nẹ̌kělla.”

¹²”Kai suapa tau ene?” ungkuěng i sire. I sie simimbang, ”Bẹ̌ga wue iạ.”

¹³Sahěllo ene kai ěllon Sabatẹ̌ natarangke Mawu Yesus něngongke ěntana ringangu ědunʼE mědeạu tau wuta e makasilo. Tangu tau nạung bọu nawuta ene niwawa sol᷊ong anun tau Farisi.

¹⁵I sire mal᷊aing nakiwal᷊o su tau ene kereapa katatainge sarang i sie nẹ̌kělla. I sie simimbang, ”I Sie nangunon lẹ̌bo su mataku bọu e takụ niuhasẹ̌ e mase iạ e nẹ̌kělla.”

¹⁶Pirang katau wọu tal᷊oaran manga tau Farisi e němpẹ̌bera u, ”Tau ene tawe mariadi kụ měkoạ hal᷊ẹ̌ bọu anun Duata batụu i Sie kai tawe měndarekengu ěllon Sabatẹ̌.” Angkuěngben bal᷊ine u, ”Kereapa wue kụ tau warạdosa e makakoạ karal᷊inaụ kerene?” Ene nariadịe pěrararendehẹ̌ su tal᷊oaran sire.

¹⁷Tangu tau Farisi e nakiwal᷊ọe su tau ene kạpia, ”Kereapa wue su naungu mạanụen tau nakapia si kau?” ”I Sie kai nabi,” angkuěngu tau ene.

¹⁸Kai arawe mangangawasang Yahudi e tawe mangimangu tau ene kawe wuta reng dokeng kal᷊amona, kụ ini e seng makạsilo. Ual᷊ingu ene ute i sie kimui ghaghurang e,

¹⁹kụ nakiwal᷊o, ”Kahěngang anạu ini e nipěhanạ buta? Kụ kai kerea i sie sarang nẹ̌kělla orasẹ̌ ini?”

²⁰I ninang dingangu i amangu rariọ e simimbang, ”Mambeng kahěngang ini e anạ i kami; dingangu i sie mambeng kahěngang buta rokeng nipěhanạ.

²¹Arawe kereapa sarang i sie nakasilo e, i kami e wẹ̌gawue. Dingangu i sai nakapẹ̌kělla si sie ute, i kami e mal᷊aing bẹ̌ga wue. Pakiwal᷊ọewe si sie, u i sie seng matěllang, kụ seng makasimbang hala.”

²²I ninang dingangu i amang e nẹ̌bera kerene e watụ u i sire mạtakụ u manga těmbonangu tau Yahudi; u i sire kai sěngkanaung u i sai měngakun Yesus e kai Ratu Měnanal᷊amatẹ̌, sembeng tawe ipakawala sumuẹ̌ su wal᷊en pẹ̌kakal᷊iomanengang.

²³Ual᷊ingu ene hakịu i ninang dingangu i amangu tau ene němpẹ̌bera u, ”I sie seng matěllang kụ pakiwal᷊ọe si sie.”

²⁴Mase i sire saụewe nẹ̌kui tau l᷊ěnnạu wuta e kụ nẹ̌bera si sie, ”Pẹ̌salụe u i kau mambeng měhabaru katul᷊idẹ̌. I kami e masingkạ u tau ene mambeng tau warạdosa e.”

²⁵”Apa i Sie marosa arau tala,” ungkuěngu tau ene, ”iạ e wẹ̌ga wue. Kai kětạeng piạ hal᷊ẹ̌ sěmbaụ su singkạku; kạngerẹ iạ e wuta, arawe ini e iạ seng nẹ̌kělla.”

²⁶Mase i sire saụewe nẹ̌bera si sie, ”Pinẹ̌kapuraneng i kau e kahian Sie? Nẹ̌koạ kereapa i Sie si kau, sarang nẹ̌kělla?”

²⁷Tau ene simimbang, ”Seng bọu takụ niwẹ̌ke si kamene, kai i kamene tawe mapulu rumaringihẹ̌. Unụe i kamene mapulu mẹ̌daringihẹ̌ kapia? Aramanung i kamene kai mapulu mariadi tumatol᷊enʼE ringang?”

²⁸Mase i sire němpẹ̌dohang si sie ringangu nẹ̌bera, ”O kai i kau muritʼE; i kami e wal᷊ine. I kami e kai muritʼi Musa.

²⁹I kami e masingkạ u Mawu Ruata seng něhengetang si Musa. Arawe mạanun tau ene e, i kami e wẹ̌ga wue měnsang bọu apa asal᷊ʼE.”

³⁰Tau ene simimbang, ”Nakal᷊aherang bue mạeng i kamene wẹ̌gang asal᷊ʼE, sěmbal᷊iau i Sie seng napẹ̌kěllan iạ e.

³¹I kitẹ masingkạ u Mawu Ruata e tawe rumaringihẹ̌ taumata warạdosa e, kaiso kawe su taumata mẹ̌ngadatẹ̌ Mawu ringangu měkẹ̌koạ kapulunʼE.

³²Dokeng su tětạ u dunia tawẹ běke reng nakaringihẹ̌ u piạ taumata makawekesẹ̌ matan taumata wuta wọu karariadine.

³³Kereu tau ene wal᷊ine wọu anun Duata, i Sie tawe makakoạ manga apa.”

³⁴Ungkuěng i sire, ”Apa i kau napenẹ u rosa reng dokeng pinẹ̌hanạ, maněntiro lai si kami e?” Tangu nanětạ bọu orasẹ̌ ene i sie nisẹ̌ding sumuẹ̌ su wal᷊em pẹ̌kakal᷊iomanengang.

³⁵Mawu Yesus nakaringihẹ̌ u i sire seng měsẹ̌sěding u tau ene sumuẹ̌ su wal᷊en pẹ̌kakal᷊iomanengang. I Sie nẹ̌deạ tau ene kụ něhengetang si sie, ”I kau e mangimang su Ahusʼu Taumata?”

³⁶Tau e simimbangke, ”Kai i sai i Sie Tuang? Tul᷊ungko paul᷊ị tadeạu iạ mangimang si Sie.”

³⁷”I kau e seng nakasilo si Sie,” ungkuěng u Mawu Yesus. ”I Sie kụ orasẹ̌ ini kapẹ̌bẹ̌bisarane ringangu.”

³⁸”Iạ mangimang, Mawu!” ungkuěngu tau ene, bọu e nẹ̌tumpěkuhẹ̌ su těngom Mawu Yesus.

³⁹Mawu Yesus něhengetang, ”Iạ diměnta su dunia ini e kai mědeạu mẹ̌tatilakehẹ̌ tadeạu tau wuta e makasilo, ringangu taumata makạsilo e mawuta.”

⁴⁰Tau Farisi pirang katau apan sene nakaringihẹ̌ Mawu Yesus něhengetang kerene, mase i sire němpẹ̌kibal᷊o si Sie, ”Su tiněnnanu i kami e wuta l᷊ai?”

⁴¹Mawu Yesus simimbang, ”Manga i kamene wuta, ute i kamene tawẹ dosane. Kai ual᷊ingu i kamene měmpẹ̌bẹ̌bera u, ’I kami e makạsilo,’ ene mělẹ̌lahẹu i kamene wẹ̌dang mararosa.”