Read Sangir RAROLOHANG 10 Bible Online

RAROLOHANG 10 - Sangir bible

RAROLOHANG 10

¹Su Kaisarea tangu piạ sěngkatau esẹ arenge i Kornelius. I sie kai sěngkatau kapitengʼu ”Wuntuangʼu Italia”.

²I sie mạtakụ u Mawu Ruata, ringangu kěbị anạ u sěngkataune e mal᷊aagama ringangu masatia su Mawu Ruata. I sie masau mẹ̌tul᷊ungʼu tau Yahudi masasusa e, ringangu i sie makěhagẹ̌ mẹ̌kal᷊iomaneng su Ruata.

³Piạ sahěllo, mangạ e pukul᷊ẹ̌ tatěllu ěllo i sie nakasilo mal᷊ahẹ su ral᷊ungʼu sěmbaụ papasilo, sěngkatau malạekatʼu Mawu Ruata e riměnta mẹ̌kẹ̌kui si sie, ”Kornelius!”

⁴I Kornelius němandạ e mataedẹ̌ su malạekatẹ̌ e ringangu mangkewen natakụ takụ kụ nẹ̌bera, ”Kai piạ apa Tuang?” Malạekatẹ̌ e simimbang, ”Kakal᷊iomanengu ringangu kapian naungu seng nitarimạ u Mawu Ruata e ringangu Mawu Ruata e mẹ̌tahěndung si kau.

⁵Kụ pěndolohen taumata sol᷊ong Yope pẹ̌kui si Simong isẹ̌sẹ̌ba mahatedẹ̌ si Simon Petrus.

⁶I sie kai makịkawal᷊e su wal᷊eng sěngkatau měnaname pising kalu arenge i Simon kụ mẹ̌tẹ̌tanạ su wiwihu apeng.”

⁷Kụ sarangke malạekatẹ̌ měbẹ̌bisarang Kornelius e napal᷊usẹ̌, i Kornelius e nẹ̌kuị e ruang katau mẹ̌tatangkiang bal᷊e ene ringangu sěngkatau sordado wọu manga l᷊ukade tau maagimatẹ̌.

⁸I Kornelius nẹ̌běke si sire apang kụ seng nariadi wọu e něndolohʼi sire sol᷊ong Yope.

⁹Sěngkariọěllone, těntal᷊ang i sire kạpahundal᷊enge kụ masandigen Yope, i Petrus e kai rimangeng su wal᷊e mẹ̌kal᷊iomaneng.

¹⁰Mase i sie nikal᷊unusang marasai kụ mapulụ e kumaěng. Ene těntal᷊angke i sire kapěměllọeng kaěng, i sie nakahombangke papasilo.

¹¹I sie nakasilo l᷊angị natope ringangu piạ apa mẹ̌sul᷊ungu hekạ mawěnahẹ̌ naul᷊uhẹ̌ sol᷊ong dunia mạbawiting su wukune ěpạ.

¹²Su ral᷊unge piạ lohone haghing binatang laede ěpạ, haghing binatang lụhomang dingangu manụ u kinoaěng maghaghaěng.

¹³Mase piạ e tingihẹ̌ nẹ̌bera si sie, ”Petrus, pẹ̌bangungko! Pěmotọe ringangu wọu ene kinạ!”

¹⁴I Petrus simimbang, ”Tala wue, Mawu! Iạ e wědang tawe kimẹ̌kaěng manga apa kụ pělli arau kotorẹ̌.”

¹⁵Kaiso tingihẹ̌ ene nẹ̌berạete kapia si sie, ”Apang kụ seng nilahẹ u Mawu e wotonge rotongang, ute abe pangiral᷊ing u ene kawe pělli.”

¹⁶Papasilo ene seng nẹ̌kakuwal᷊ị sarang katěllun sul᷊ene, bọu ene hekạ ene nawatungke sol᷊ong sorga.

¹⁷I Petrus niwimbonge měngẹ̌ngěnna kaia mangal᷊ene papasilo ene. Těntal᷊ang i Petrus kạpangěnnane, taumata apang nirolohʼi Kornelius apẹ̌dẹ̌deạ bal᷊en Simon, kutẹu i sire seng ene sutěngon tukadẹ̌.

¹⁸Mase i sire němpẹ̌kuị e taumata ringangu nakiwal᷊o, ”Apa sini e piạ sake mětẹ̌tanạ, kụ arenge i Simon Petrus?”

¹⁹Kutẹu i Petrus manga wědang mětẹ̌tiněnna makakasingkạ u mangal᷊ene papasilo ene, tangu Rohkẹ̌ u Ruata e něhengetang si sie, ”Ei Petrus, kai piạ těllung katau[12] kapědẹ̌deạ e si kau.

²⁰Hotede lighạko tanaẹ lintụ sol᷊ong bawa ringangu kumbahang gumoẹ̌ tumol᷊e si sire, u kai Iạ dimolohʼi sire.”

²¹Tangu i Petrus limintụ e kụ nẹ̌bera si sire, ”Seng iạ ini e rẹ̌deakeng i kamene. I kamene kai ruměnta mẹ̌kapura?”

²²I sire simimbang, ”Kapiteng Kornelius e rimolohʼi kami e niaparamahi. I sie kai taumata mapia, ringangu mạtakụ u Mawu Ruata, ringangu lẹ̌adatengu patikụ tau Yahudi. Malạekatu Mawu sěngkatau něndolohʼi sie, měmẹ̌matuhung i Tuang apạděnta su wal᷊ene, watụ u makoạ kere sasimbahẹ̌ kakal᷊iomaneng e, i sie apạdaringihẹ̌ apang kụ sarung i werang Tuang si sie.”

²³Tangu i Petrus něhaěngke si sire niapasuẹ̌ mědeạu pẹ̌tanạ sene. Sěngkariọěllone i Petrus nẹ̌bangung kụ dimal᷊eng sěngkaral᷊eng dingang i sire. Pirang katau manga anạ u sěmbaụ mạngimang bọu Yope e mal᷊aing timol᷊e ringange.

²⁴Su sěngkariọěllone i sire e nahumpạen Kaisarea. Sene i sire seng lẹ̌ampal᷊eng i Kornelius dingangu manga anạ u sěngkataune ringangu l᷊ai manga hapị e kapapiaěng e apangkeweng nighausange.

²⁵Piạ i Petrus nahumpạ e, tangu i Kornelius tamaị e naněnsomahẹ̌ si sie kụ nẹ̌tumpěkuhẹ̌ su těngone.

²⁶Arawe i Petrus e nẹ̌tul᷊ung i sie niapararisị, kụ bọu ene nẹ̌bera, ”Pěbangungke! Iạ sẹ̌saku e mal᷊aing taumata.”

²⁷Ene kapẹ̌bẹ̌bisarane ringang i Kornelius, i Petrus simuẹ̌ sol᷊ong dal᷊ungu wal᷊e. Sene i sie nakasilọe taumata l᷊awọ kạtatampung.

²⁸Bọu ene i sie nẹ̌berạe si sire, ”I kamene hala e seng masingkạ u tau Yahudi isẹ̌sěding u agamane mẹ̌tiwo ringangu mẹ̌dal᷊ahapị u taumata wọu kawanua wal᷊ine. Kai Ruata e seng bọu nělahẹ si siạ u iạ tawe wotonge manoke si sai-sai u i sie kai ral᷊akisẹ̌ arau ipẹ̌tẹ̌tělling.

²⁹Kai ual᷊ingu ene hakịu piạ i Tuang měgẹ̌gausẹ̌ tadeạu iạ duměnta, iạ e tawẹ kụdirine ruměnta. Kụ ini e iạ kai mapulu masingkạ u kawe unụe i Tuang měgẹ̌gausẹ̌be si siạ duměnta.”

³⁰I Kornelius simimbang, ”Těllu ěllo nal᷊iu, mangawe orasẹ̌ kere ini, iạ e kapẹ̌kẹ̌kal᷊iomanenge[13] su wal᷊e pukul᷊ẹ̌ tatěllu wawěllo e. Sěngkianụ e piạ sěngkatau esẹ dụdarisị su těngoku.

³¹Pakeangu tau ene měngkate apa kụkerong. I sie nẹ̌bera, ’Kornelius! Mawu e seng dimaringihẹ̌ kakal᷊iomanengu ringangu mětẹ̌tahěndung kapian naungu.

³²Kụ pěndolohẹ̌kon tau Yope pẹ̌kui tau arenge i Simon Petrus. I sie kai mětẹ̌tanạ su anun sěngkatau tahapěnamẹ pising binatang arenge i Simon; bal᷊ene su wiwihu apeng.’

³³Kai ual᷊ingu ene hakịu iạ lighạ něndolohu taumata e tamai pẹ̌kui si Tuang. Tangu i Tuang e mang mal᷊oahẹ̌ naunge mẹ̌deạu makaramahi. Kụ ini e i kami kěbị mẹ̌tampung sini su těngon Duata mẹ̌deạu mẹ̌daringihẹ̌ parentan Mawu e ipakịul᷊ị i Tuang si kami e.”

³⁴ Mase i Petrus nẹ̌bera, ”Ini e mang kahěnga-hěngang nakaěnna u Mawu Ruata e mang tawe měmamamile ghahịu taumata e.

³⁵I saing kụ matakụ u Ruata e ringangu měkẹ̌koạbe katul᷊idẹ̌ e, taumata ene itarimạ u Mawu, tawe měmamanda u i sie kai tau apa.

³⁶Manga anạ u sěmbaụ seng masingkạ u lohong hengetang ipẹ̌paul᷊ị u Mawu Ruata su tau Israel. Habarẹ̌ ene ute kai mạul᷊ị u Injilẹ̌ mạanun pẹ̌darame wọu i Yesus Kristus e Mawun patikụ umatẹ̌ e.

³⁷I kamene e masingkạ u apa nariadi su kạguwạ u Yudea, nanětạ bọu Galilea samurin pẹ̌sasahani iwẹ̌bohang i Yohanes.

³⁸I kamene seng masingkạ u Mawu Ruata e seng němile si Yesus tau Nazaret dingangu něngonggọu Rohkẹ̌ u Ruata e ringangu kawasa. I kamene mal᷊aing masingkạ u i Yesus e mạměpidẹ̌ banua měkẹ̌koạ mapia; i Sie mạpakapian patikụ taumata apang pẹ̌kẹ̌kawasaěng u setang, u Ruata e kawe mạněntanudẹ̌ si Sie.

³⁹Seng i kami ini e taumata nakasilo hala patikụ apang kẹ̌koateng su wanuan tau Yahudi ringangu su Yerusalem. Kai maning kerene, mang i sire e něnguruisẹ̌ dingangu němate si Sie.

⁴⁰Arawe su ěllo katěllune Ruata e napẹ̌biahʼi Sie kapia wọu papatenʼE ringangu něnodẹ i Sie su taumata;

⁴¹bal᷊inewe su kěbị taumata, kai kětạbeng si kami kụ seng nipilen Duata kal᷊imona nakoạ mẹ̌sasahidine: I kami e kụkaěng dingangu mạnginung dingangʼE sarangkeng i Sie nipẹ̌biahẹ̌ kapia wọu papate.

⁴²Kụ i Sie něngoro si kami pělẹ̌habaru Injilẹ̌ e su taumata ringangu pěngẹ̌ngonggọu sasahidi u i Sie ilẹ̌hengkẹ u Mawu Ruata e makoạ měnggaghuta waugu taumata wiahẹ̌ dingangu nate.

⁴³Patikụ nabi e měsẹ̌sahidi mạanun Sie. I sire měbẹ̌bera u patikụ taumata apang mạngimang su Mawu Yesus, sarung ampungang dosane kahiang kawasa wọu i Yesus.”

⁴⁴Těntal᷊ang i Petrus deng kapẹ̌bẹ̌bisarane, Rohkẹ̌ u Ruata e natěntung kụ nẹ̌karadiahang su patikụ taumata apan nakaringihẹ̌ habarẹ̌ ene.

⁴⁵Taumatan Yahudi apang mạngimang si Yesus dingangu tụtol᷊e si Petrus bọu Yope, kěbị e rụdal᷊inaụ u makạsilo Mawu Ruata e mal᷊aing napakatěntung u Rohkẹ̌ʼE si sire wal᷊ine tau Yahudi e.

⁴⁶Batụ u i sire makạdingihewe si sire měmpẹ̌bẹ̌berang haghing bera ringangu měmpẹ̌dẹ̌dalọ e kasěllahʼu Ruata. Mase i Petrus nẹ̌bera,

⁴⁷”Kakěllạ e, i sire ini e seng nakahombang Rohkẹ̌ u Ruata e mẹ̌sul᷊ungu i kitẹ. Kụ delaing piạ u makasahaghe si sire sahaniang u akẹ e?”

⁴⁸Tangu i Petrus nangoro si sire pakịsahani su areng i Yesus Kristus. Bọu ene i sire měgẹ̌gausẹ̌ tadeạu i Petrus pẹ̌tẹ̌tanạ dingang i sire manga pira ěllo karěngụe.