Read Sangir RAROLOHANG 11 Bible Online

RAROLOHANG 11 - Sangir bible

RAROLOHANG 11

¹Manga rarolohang dingangu taumata mạngimang su kaguwạu Yudea e nakaringihẹ̌ u taumata apan bal᷊ine su agamang Yahudi e mal᷊aing makạtarimạ u hengetangu Mawu e.

²Ene piạ i Petrus nakoạ sol᷊ong Yerusalem, tau Yahudi apang mạngimang e nanongkeang si Petrus.

³I sire nẹ̌bera, ”Kawe unụe i kau nakoạbe sol᷊ong bal᷊eng sire ta nịsasunatẹ̌? O kawe lai kimaěng sěngkakaěng dingang i sire!”

⁴Ual᷊ingu ene i Petrus něnualagẹ̌ si sire, kěbịewe apan seng nariadi si sire, nanětạ bọu panẹ̌takenge. I Petrus nẹ̌bera,

⁵”Iạ e kai kapẹ̌kẹ̌kal᷊iomanenge su soan Yope, kutẹu iạ e nakasiloko sěmbaụ papasilo. Iạ e nakasilo piạ apa kere hekạ mawěnahẹ̌ naẹ naul᷊uhẹ̌ bọu l᷊angị, mạbawiting su wukune ěpạ, bọu e naẹ̌dung su sěmběkaku.

⁶Piạ iạ e kạpẹ̌kakěllane sol᷊ong dal᷊unge iạ nakasilo manga binatang laede ěpạ, manga binatang dul᷊u, manga binatang tụtondo, dingangu manga manụ u kinoaěng maghaghaěng.

⁷Mase iạ nakaringihẹ̌ piạ tingihẹ̌ nẹ̌bera si siạ, ’Pẹ̌bangungko Petrus! Pěmotọ e kụ kinạ e!’

⁸Kai iạ e simimbang, ’Tala Mawu! Haeng badangku iạ e tawe měndarotong biahẹ̌ kụ ipěpẹ̌pělli e ringangu mal᷊amuhụ e.’

⁹Arawe tingihẹ̌ ene saụewe něluntingihẹ̌ bọu l᷊angị, ’Apang kụ seng niwerang Mawu Ruata e tawe ipẹ̌tatělling ute, kumbahang bue iwerang kamene u pělli.’

¹⁰Iạ mambeng nakasilo hal᷊ẹ̌ ene sarang katěllun sul᷊ene, kụ pěngěnsueěnge tangu kěbị e nasapuạ kapia sol᷊ong sorga.

¹¹Nẹ̌sarětạ u su tempo ene lai i sire těllu wọu Kaisarea, kụ nirolohẹ̌ sol᷊ong anuku,[14] nasongọ e su wal᷊e pětẹ̌tanakengku.

¹²Mase Rohkẹ̌ u Ruata e něndolohʼu iạ apạdal᷊eng dingang i sire ringangu tawẹ goẹ̌ e. I sire ěnnung anạ u sěngkatau ini e mal᷊aing timol᷊e ringangku sol᷊ong Kaisarea, kụ i kami kěbị e nasuẹ̌ su ral᷊ungu wal᷊eng Kornelius.

¹³Bọu e i Korneliusẹ̌ e nẹ̌běke si kami kereapa i sie nakasilo malạekatẹ̌ sěngkatau rụdarisị su wal᷊ene ringangu nẹ̌bera, ’Pěndolohẹ̌kon taumata sol᷊ong Yope pẹ̌kuiko sěngkatau esẹ arenge i Simon Petrus.

¹⁴I sie sarung maul᷊ị si kau hengetang kụ sarung makasal᷊amatẹ̌ si kau ringangu kěbị dal᷊ohon bal᷊enu.’

¹⁵Kụ su tempong iạ nanětạ nẹ̌bera kerene,” angkuěng i Petrus kapẹ̌nẹ̌paseng běkene, ”Rohkẹ̌ u Ruata e natěntung si sire kerẹewe nạung nariadi si kitẹ su tětạ e kal᷊amona.

¹⁶ Mase iạ e nakatahěndung, Mawu e nạung bọu něhengetang, ’i Yohanesẹ̌ e nạung něnahani ringangu akẹ, arawe i kamene sarung sahaniang dingangu Rohkẹ̌ u Ruata e.’

¹⁷Kụ nal᷊ahẹ u Mawu Ruata e mal᷊aing měgẹ̌gěllị l᷊ai su taumata wal᷊ine su agamang Yahudi e, gaghěllị mẹ̌sul᷊ungu ighẹ̌gěllị e si kitẹ su tempong i kitẹ nangimang su Mawu Yesus Kristus. Ual᷊ingu ene, tawe masowa su akal᷊ẹ̌ iạ kawe mẹ̌sěding Mawu Ruata e!”

¹⁸Sarạeng nakaringihẹ̌ ene tangu i sire sembeng tawe lai rimendehẹ̌. Kụ bọu ene, i sire nědalọ e Mawu Ruata. I sire nẹ̌bera, ”Kamageng kerene, i sire wal᷊ine taumatan Yahudi e mal᷊aing nighěllirangu l᷊oahe kahian Duata e tadeạu pẹ̌tobatẹ̌ bọu kal᷊awọu rosane kụ makateěng pẹ̌bawiahẹ̌ tutune.”

¹⁹ Sarạeng i Stefanus nịpapate, taumata mạngimang su Mawu Yesus e nanětạ e sẹ̌sahusuang, hakịu i sire nasawuhẹ̌ su apan tampạ. Piạ u nahuntal᷊ang sol᷊ong Fenisia, piạko l᷊ai nahumpạ u Siprus dingangu Antiokia. I sire měmpělẹ̌habaru hengetangu Mawu tumbạeng su taumatan Yahudi samatang.

²⁰Kụ bọu tal᷊oarang taumata mangimang ene wọu Siprus dingangu Kirene, piạbe lai taumata apang něngkakoạ sol᷊ong Antiokia kụ měmpělẹ̌habaru Injilẹ̌ mạanun Yesus e su apan taumata kụ bal᷊ine su agamang Yahudi[15] e lai.

²¹Kawasang Mawu e, ene si sire hakịu kai mal᷊awọ taumata němpangimang dingangu měnarakangu watangeng i sire su Mawu.

²²Manga wěke mạanun hal᷊ẹ̌ tamai ini e kinaringihẹ̌ lai su jamaatẹ̌ su Yerusalem. Tangu i sire něndolohen Barnabas sol᷊ong Antiokia.

²³Kụ sarạeng i Barnabas nahumpạ sene, ringangu nakasilo kereapa Mawu Ruata e něngal᷊amatẹ̌ si sire ene, i sie měngkate apa nikahaluaseng. Bọu ene i sie nẹ̌dorong tadeạu i sire kahěnga-hěngang masatia ringangu kạguwạ u naung su Mawu.

²⁴I Barnabas ini e kai taumata naunge mapia ringangu pinẹ̌kawasaěng u Rohkẹ̌ u Ruata tapengu l᷊ai mạngimang masěgadẹ̌ su Mawu hakịu mal᷊awọ taumata tụtol᷊e Mawu.

²⁵Bọu ene i Barnabas nakoạ sol᷊ong Tarsus mědẹ̌deạ si Saulus.

²⁶Sarạeng nẹ̌sombang i Saulus, i sie němaringang i Saulus nakoạ sol᷊ong Antiokia kụ sěntaung tinalung i sire měmpẹ̌tẹ̌tampung dingangu jamaatẹ̌ sene apidu kạpaněntirone taumata l᷊awọ. Seng su Antiokia ene taumata apang mạngimang su Mawu Yesus e kakal᷊imonaěng e nisěbạ taumatan Sahani.

²⁷Su tempo ene piạ manga nabi pirang katau diměnta wọu Yerusalem sol᷊ong Antiokia.

²⁸ Wọu tal᷊oaran sire ute piạ sěngkatau arenge i Agabus. Ual᷊ingu kakanoạ u Rohkẹ̌ u Ruata e i sie měnẹ̌něbal᷊ẹ̌ u su kaguwạu dunia e sarung kahombangengu tempong karal᷊unusẹ̌ masaria. (Kụ hal᷊ẹ̌ ene mambeng lai mariadi su tempong pẹ̌paparentang Kaisar Klaudius.)

²⁹Tangu kěbị apan tumatol᷊e si Yesus e sěngkanaung měndingọ u tatongka su manga anạ u sěmbaụ kụ mětẹ̌tanạ su Yudea; sěngkatau-sěngkatau e něndingọ tuhụewe kaumal᷊enge.

³⁰Pẹ̌kakakire ene mal᷊aing kinoạ, kụ bọu ene i Barnabas dẹ̌duan Saulus nirolohẹ̌ pinanonda tatongka (roitẹ̌) ene su manga těmbonangu jamaatẹ̌.