Read Sangir RAROLOHANG 14 Bible Online

RAROLOHANG 14 - Sangir bible

RAROLOHANG 14

¹I Paulus dẹ̌duan Barnabas mal᷊aing kinahombangeng u hal᷊ẹ̌ mẹ̌sul᷊ung su Ikonium. I rẹ̌dua mal᷊aing nahunsuẹ̌ su kanisan Yahudi kụ němpẹ̌bisara sěngapang botonge sene hakịu mal᷊awọ tau Yahudi ringangu wal᷊ine tau Yahudi němpangimang su Mawu Yesus.

²Arawe tau Yahudi apan ta mangangimang e měmpạnahowong suapang bal᷊ine tau Yahudi, hakịu makạkaral᷊akị naung i sire kụ mạběnsing u apan mạngimang su Mawu Yesus.

³Ual᷊ingu ene i Paulus dẹ̌duan Barnabas němpẹ̌tanạ marěngụ sene. Kụ měngkai kakạbahanine i sire mạhumbisarang hal᷊ẹ̌ u Mawu. Tangu Mawu e mal᷊aing mapakal᷊ahẹ u pal᷊ahumbisaran sire mạanun tatal᷊ěntụʼE tangu mambeng kahěngang; i Sie mạngonggọu kawasa si sire waụgu mẹ̌koạ haghin tanda ringangu haghing hal᷊ẹ̌ makạdal᷊inaụ tạ sihinge.

⁴Kaiso ral᷊ohon soa ene měgẹ̌gul᷊ewasẹ̌ sěmbaụ dingangu wal᷊ine; piạbeng mạnumběka wọu tau Yahudi ringangu piạbeng mạnumběka wọu manga rarolohang ene.

⁵Bọu e tau Yahudi ringangu těmbonang e sěnsunduang dingangu taumata wal᷊ine tau Yahudi kụ manigěsạ dingangu měmpěngěntungu watu su manga rarolohang ene.

⁶Kaiso manga rarolohang ene nakaěnna kakakoạ e, kụ nělingkạ sol᷊ong Listra ringangu Derbe mangạ e soa su Likaonia ringangkewen banua mạngělikụ soa ene.

⁷Kụ sene i rẹ̌dua e mal᷊aing měmpělẹ̌habarʼu Injilẹ̌ e.

⁸Kutẹu su Listra e kai piạ tau esẹ laede ruambẹ̌ka e nipeose reng dokeng bọu gandongang, hakịu reng ta nakạdal᷊eng, batụu laede kawe tumanịu lome.

⁹Tau ene mạiang sene rụdaringihẹ̌ si Paulus měbẹ̌bisara. I Paulus nakasahidi u tau ene mạngimang, kụ ual᷊ingu ene tangu i sie wotonge maul᷊e wọu sakị e. Kụ i Paulus e němandạ e si sie,

¹⁰kụ dingangu tingihe maihạ, i Paulus nẹ̌bera, ”Endai e rarisị pakatei!” Tau ene měngkatewe rimarisị piạ linsọ e kụ bọu ene rimal᷊eng.

¹¹Ene Piạ e taumata l᷊awọ e nakasilo apang kụ nikoạ i Paulus, i sire měngkatewe sěngkapěluntingihẹ̌ su werang Likaonia, ”Manga ruata e seng němpẹ̌lintụ sol᷊ong dunia e němpẹ̌bawadang u wadangu taumata.”

¹²Bọu ene i Barnabas nisěbạ i sire si Zeus, dingangu i Paulus nisěbạ i sire si Hermes, batụu kai i sie mẹ̌bawerane.

¹³Ampuang i Zeus, pangkunange su těngon soa, diměnta nangěntudu manga sapi esẹ dingangu manga bungang dal᷊ěgahu pasěllangengu soa. I sie mapulu tumol᷊e ringangu taumata l᷊awọ e měmpěnarakang u sasěmba su manga rarolohang ene.

¹⁴Piạ i Barnabas dẹ̌duan Paulus nakaringihe kapulun sire koatengu taumata l᷊awọ ene i rẹ̌dua měngkatewe němpananingkasẹ̌ pakeang i rẹ̌dua e apidu kạtal᷊ange sol᷊ong anun taumata l᷊awọ e bọu e němpẹ̌buheang,

¹⁵ ”E, kawe unụe i kamene nẹ̌koạ kere ini? I kami e mal᷊aing taumata mẹ̌sul᷊ung i kamene! I kandua ene tamai sini e kai waugu měhabaru Injilẹ̌ si kamene tadeạu i kamene měmpaněntangu kal᷊awọu sabarang tawẹ humpạ e ini e kụ duměnta sol᷊ong anun Duata kụ biahẹ̌, něndiadi langị dingangu dunia ringangu l᷊audẹ̌ dingangu kěbị apan su ral᷊unge.

¹⁶Su tempo tamai nal᷊iu Mawu Ruata e napakawalan kal᷊awọu taumata apang měmpẹ̌bẹ̌biahẹ̌ tụtol᷊e kapulun sire sěngkatau-sěngkatau.

¹⁷Arawe i Sie tawe niwul᷊e nangonggọ u manga tatialan batangengʼE kụ ual᷊ingu pẹ̌kakoạ mapia. I Sie něngonggọ u tahiti wọu l᷊angị dingangu pẹ̌bawawua su musunge si kamene. I Sie mạpakaěng i kamene ringangu mạpakal᷊uasẹ̌ naung i kamene.”

¹⁸Kaiso ringangkewen manga wawera tamai ene mal᷊aing bědang mawěhạ baugʼi rẹ̌dua e mẹ̌sědingu taumata l᷊awọ e měmpanarakang u sasěmba si rẹ̌dua e.

¹⁹Manga pirang katau wọu taumatan Yahudi e apan diměnta su Listra wọu Antiokia su Pisidia ringangu wọu Ikonium mamọdaị taumata l᷊awọ e hakịu taumata l᷊awọ e měmpạnumběka wọʼi sire. I sire němpangěntungu watu si Paulus, mase něhiudẹ̌ sol᷊ong l᷊ikudʼu soa. I sire mạngiral᷊ing u i sie kai seng nate,

²⁰kaiso sarạeng i sie pinẹ̌tatal᷊iwungang u apan taumata mạngimang sene, tangu nẹ̌bangungke i sie ringangu simuẹ̌ kapia sol᷊ong soa. Sěngkarịěllone i sie něbuạ sol᷊on Derbe sěngkapẹ̌buạ dingang i Barnabas.

²¹Su Derbe, i Paulus dẹ̌duan Barnabas něhabaru Injilẹ̌ e kụ mal᷊awọ taumata němpangimang su Mawu Yesus. Bọu ene i sire nẹ̌sul᷊e sol᷊ong Listra, tuhụ e sol᷊ong Ikonium, mase sol᷊ong Antiokia su Pisidia.

²²Su apan soa ene, i sire mạnoghasẹ̌ naungu manga muritʼi Yesus dingangu měmpěnẹ̌nasa si sire tadeạu pakatatanạbe su pangangimang su Mawu Yesus. ”I kitẹ e harusẹ̌ masau mẹ̌tatahangu sigěsạ kal᷊imona, buhụ e i kitẹ makapěndang karal᷊unsemahu Runian Duata Wuhu e,” kerene kakakoạ e manga rarolohang ene měmpạněntiro su manga muritʼi Yesus su apan soa ene.

²³Dingangu su apan jemaatẹ̌ e, i Paulus dẹ̌duan Barnabas něhengkẹ měngangahạ jamaatẹ̌ e. Bọu ene kahian pẹ̌kakal᷊iomaneng dingangu pẹ̌papuasa, i rẹ̌dua e měmpanarakangken měngangahạ jamaatẹ̌ e su Mawu pạngimangeng i sire e.

²⁴Bọu ene i Paulus dẹ̌duan Barnabas nanẹ̌paseng daral᷊eng i sire lumiu wanuan Pisidia dingangu sarang Pampilia.

²⁵Kụ bọuten i rẹ̌dua něhabaru hengetang u Mawu Ruata su Perga, i sire nakoạ sol᷊ong Atalia.

²⁶Bọu ene i sire mẹ̌saụ mẹ̌sakaeng sol᷊ong Antiokia. Ene e kai soa tampạ i sire kal᷊imona nisarakang su tatal᷊ěntụ u Mawu Ruata e, tadeạu i sire měmpẹ̌koạ munara kụ seng lẹ̌ěnsueěng i sire.

²⁷Sarạeng nahumpạ u Antiokia, i sire něngomol᷊eng taumata wọu jamaatẹ̌ e, bọu ene nẹ̌běkẹeng patikụ apang nikoạ u Ruata limiun sire e. I sire mal᷊aing němpẹ̌běkeng kereapa kakakoạ u Ruata seng němuka ral᷊eng tadeạu i sire apang bal᷊ine tau Yahudi e mangimang si Yesus.

²⁸Su soa ene i Paulus dẹ̌duan Barnabas e nẹ̌tanạ marěngụ dingangu apan taumata mạngimang e.