Read Sangir RAROLOHANG 16 Bible Online

RAROLOHANG 16 - Sangir bible

RAROLOHANG 16

¹I Paulus naněpasu raral᷊enge sol᷊ong Derbe, bọu e sol᷊ong Listra. Sene tangu piạ sěngkatau muritʼi Yesus, arenge i Timotius. I ninange tau Yahudi, kụ seng mạngimang su Mawu Yesus; arawe i amange ute kai tau Yunani.

²Bọu tal᷊oarang taumata mạngimang kụ mạtanạ su Listra ringangu Ikonium, i Timotius timeleng kere sěngkatau mapia.

³I Paulus mapulu tadeạu i Timotius tumol᷊e ringange; ual᷊ingu ene i sie něnunatẹ̌ si Timotius. I sie nẹ̌koạ ene, batụu taumatan Yahudi su wanua ene kěbị e masingkạ u i amang i Timotius e kai sěngkatau taumatang Yunani.

⁴Suapạewen soa kụ tẹ̌tiwoěng i sire e, i sire mělẹ̌habarẹ̌ suapan taumata mạngimang, apang putusang kụ sen tinantung manga rarolohang dingangu manga pangahạ e su Yerusalem. I sire měmpěnẹ̌nasa manga anạ u sěmbaụ apang mạngimang e mědeạu tumuhụ kal᷊awọu atorang ene.

⁵Tangu apạeweng jamaatẹ̌ e mạhuntinambang katoghase pangangimange, kụ apang kal᷊aěllo e mang mạhuntinambang kakěpal᷊e.

⁶Rohkẹ̌ u Ruata e tawe mapakawalan Paulus dẹ̌duan Silas měhabaru hengetang u Mawu e su propinsi Asia. Kụ daral᷊eng i sire e nipakatěpasẹ̌ sol᷊ong banuan Prigia ringangu Galatia.

⁷Ene nahumpạeng pẹ̌saraěng su Misia, i sire něnal᷊ukạ e simuẹ̌ sol᷊ong propinsing Bitinia, kaiso Rohkẹ̌ u Mawu Yesus e němetọ si sire sol᷊ong ene.

⁸Kụ i sire něhẹ̌puse[22] Misia e apidu nakoạ sol᷊ong Troas.

⁹Sěhěbi ene su Troas, i Paulus nakasilo sěmbaụ papasilo. Su papasilo ene, i sie nakasilo tau Makedonia sěngkatau rụdarisị su těngone apidu mědẹ̌dorong sěngapang botonge tadeạu i sie makoạ sol᷊ong Makedonia mědeạu mẹ̌tul᷊ung i sire.

¹⁰Sarangke i Paulus nakahombang papasilo ene, i kami měngkatewe ringangu nẹ̌dariahi makoạ sol᷊ong Makedonia. Batụ u mambeng natahutěngadẹ̌ su naung i kami němurụ e ghẹ̌sine u Mawu Ruata e rimolohʼi kami pělẹ̌habaru Injilẹ̌ e su patikụ taumata apang sene.

¹¹I kami e něbuạ e wọu Troas, kụ apidu němundal᷊ẹ̌ sol᷊ong Samotrake, ringangu sěngkariọěllone nakoạ sol᷊ong Neapolis.

¹²Bọu ene i kami sol᷊ong Filipi, soa sěmbaụ su distriku Makedonia kahumotongange.[23] Filipi e kai su paparentaěngu kararatuangu Roma. Sene tangu i kami e nẹ̌tanạ manga pira ěllo karěngụ e.

¹³Su ěllọeng Sabatẹ̌ i kami nakoạ sol᷊ong biwihu sal᷊ụ su l᷊ikudu pasěllangengu soa, u su pěndangeng i kami e sene kai piạ tampạ u pẹ̌kakal᷊iomanengang u tau Yahudi. Bọu e i kami naiang dingangu mạhumbisara ringangu manga wawine apang němpẹ̌komol᷊ẹ̌ sene.

¹⁴Sěngkatau wọu tal᷊oarang sire kai tahawal᷊ụ u hekạ kamumụ, arenge i Lidia, tau wọu soan Tiatira. I sie kụkěndagʼu Mawu Ruata, kụ Mawu e měngẹ̌nganoạ dal᷊ungu naunge tadeạu i sie měnarimạ bue apang itẹ̌těntirong Paulusẹ̌ e si sie.

¹⁵I Lidia ringangu ral᷊ohong bal᷊ene e nisahani. Bọuten nisahani e i sie něhaěngke si kami e. I sie nẹ̌bera, ”Kereu manga anạ u sěmbaụ makapěndang u iạ e kahěnga-hěngang seng mạngimang su Mawu Yesus, ute pahundangengke su wal᷊eku.” Mase i sie měnẹ̌nihasạ e si kami mědeạu pakịtuhuke roronge.

¹⁶Su sahěllo i kami e kạpahundal᷊enge sol᷊ong tampạ u pẹ̌kakal᷊iomanengang, i kami e nẹ̌sombangke ringangu sěngkatau wawine; e kai ěllang. Tau wawine ene kai nipẹ̌kawasaěngu rohkẹ̌ dal᷊akisẹ̌ e kụ makạtěbal᷊u kakakoạ u sarung mariadi. Kahian pěnanighadu pal᷊edu l᷊imang sěmbaụ-sěmbaụ tangu tau wawine ene makạonggọ u untune maral᷊awọ su manga mawune.

¹⁷Tau wawine ene měngkate tatapẹ̌ tụtol᷊e si Paulus dingangi kami e kạpěmẹ̌mansage, ”I sire ini e kai ěllangu Mawu Kasěllahenge! I sire riměnta tadeạu měhabarẹ̌ su manga anạ u sěmbaụ kereapa ral᷊enge tadeạu i kamene masal᷊amatẹ̌!”

¹⁸Kụ gěnnangu manga pira ěllo karěngụe tau wawine ene měngkate hanesẹ̌ mamansagẹ̌ kerene. I Paulusẹ̌ e kai natakehẹ̌, hakịu i sie nẹ̌bihu kụ nẹ̌bera su rohkẹ̌ ene, ”Su arengʼi Yesus Kristus e iạ mangoro si kau sěbangke wọu wawine ini!” Tangu su tempo ene lai e rohkẹ̌ e naněntang u wawine ěndaị e.

¹⁹Ene sarangke manga mawune nakahěngangke u i sire seng tawẹ lěsabu makaěbạ doitẹ̌ e, i sire měngkatewe něnamẹ si Paulus dẹ̌duan Silas bọu e něhiudʼi rẹ̌dua sol᷊ong dělahẹ̌ niapẹ̌těngon manga těmbonange.

²⁰I sire napẹ̌těngon Paulus dẹ̌duan Silas, su manga těmbonang u kawanua su Roma e, wọu e nẹ̌bera, ”I sire ini e taumatan Yahudi e. I sire kai něnggaghohaeng su soang kitẹ e.

²¹I sire kai němpěnahowong taumata apẹ̌kẹ̌koạ tundu kụ tawe sěndal᷊engu atorang i kitẹ taumatan Roma. I kitẹ e tawe makatarimạ arau makakatol᷊e tundun sire ene!”

²²Taumata l᷊awọ e mal᷊aing sěngkapẹ̌tatibulu rimokạ si Paulus dẹ̌duan Silas; dingangu apạeweng manga mawu těmbonang u kawanua němpěhěngkasewe pakeang bọu awạ irẹ̌dua manga rarolohang ene, bọu e nangoro taumata pinělimadẹ̌ si rẹ̌dua.

²³Bọuten i rẹ̌dua nilimadẹ̌ pinakatědụ-tědụ e, mase i rẹ̌dua nitaho su tahungkụ. Těmbonangu wal᷊eng tahungkụ e nioro pinělukadẹ̌ si sire pakapia-pia.

²⁴Ual᷊ingu kawe parenta e tangu těmbonangu wal᷊eng tahungkụ e něngaresẹ̌ si rẹ̌dua e su huangu tahungkụ karal᷊ungang e, bọu e naměntung l᷊aedʼi rẹ̌dua e su balakẹ̌.

²⁵Mangạ e kẹ̌kal᷊oarane, i Paulus dẹ̌duan Silas kapẹ̌kẹ̌kal᷊ioamanenge ringangu kạpẹ̌kẹ̌kantarịeng kakantarị daralo su Mawu Ruata. Taumatang tahungkụewe lai wal᷊ine e mal᷊aing kapědẹ̌daringihe si sire mẹ̌kẹ̌kantarị.

²⁶Sěngkělěndịu nělinuhẹ̌ maihạ-ihạ, hakịu pinamanggilangu tahungkụ e mal᷊aing giminuẹ̌. Kal᷊awọewen manga tukadʼu tahungkụ e nasue něngkatope ringangu mangạewe hante piněhapusẹ̌ kal᷊awọu taumatang tahungkụ e mal᷊aing naral᷊uka.

²⁷Těmbonang u tahungkụ ene himẹ̌kose kụ napuko. Sarangke i sie nakasilo manga tukadu tahungkụ e něngkatope, tangu i sie měngkatewe něngasa pedane kụ němatẹ e wadange, watụ u i sie mạngiral᷊ing u taumatan tahungkụ e kai seng nasue němpahuntal᷊ang.

²⁸Kai i Paulus e měngkatewe nẹ̌kiạ maihạ-ihạ, ”Abe pẹ̌tumpate! I kami kěbị e ěndaung bue ene sini!”

²⁹Těmbonangu tahungkụ e nẹ̌dorongke sol᷊o, kụ bọu ene timal᷊ang sol᷊ong dal᷊unge, kụ apidu kạkendene, i sie naěnsạ su těngon Paulus dẹ̌duan Silas.

³⁰Bọu e i sie nangahạen dẹ̌dua niapasěbang kụ nẹ̌bera, ”Manga Mawu, kai apạ e hinong takụ koateng tadeạu iạ e masal᷊amatẹ̌?”

³¹I Paulus dẹ̌duan Silas simimbang, ”Pangimangke su Mawu Yesus! I kau sarung masal᷊amatẹ̌ — i kau ringangu kěbị taumata su ral᷊ungu wal᷊enu!”

³²Mase i Paulus děduan Silas něnualagu waweran Mawu su těmbonang u tahungkụ e ringangu su patikụ taumata apang ene su wal᷊ene.

³³Su hěbi ene lai kẹ̌kal᷊oarane tangu těmbonang u tahungkụ e něngahạ i sire kụ němpamurěsi manga lesẹ i sire. Tangu i sie ringangkewen patikụ taumata apang su wal᷊ene e apidu nisahani.

³⁴Bọu ene i sie něngahạen Paulus dẹ̌duan Silas sol᷊ong bal᷊ene kụ něnadiang kaěng si sire. I sie ringangkewen kěbị dal᷊ohong bal᷊ene měngkate mal᷊ua-l᷊uasẹ̌ batụu orasẹ̌ ini e i sie kai mạngimang su Mawu Ruata.

³⁵Sěngkariọěllone mal᷊ukadẹ̌, manga mapapangkatẹ̌ těmbonang u kawanuan Roma e něndolohʼu polisi sol᷊ong tahungkụ mědeạu pělẹ̌habaru parenta tadeạu i Paulus dẹ̌duan Silas pakịpěllọ.

³⁶Těmbonang u tahungkụ e něhabaru hal᷊ẹ̌ ene si Paulus. I sie nẹ̌bera, ”Manga mawu mapapangkatu těmbonangu kawanua e seng nẹ̌parenta pěmẹ̌měllọ i Tuang dědua. Kụ ini e tangu i Tuang dědua e seng botonge mapul᷊ẹ. Kụ sal᷊amatẹ̌ měmpahundal᷊eng!”

³⁷Kai i Paulus nẹ̌bera su manga mawu polisi ene, ”I kami e kai kawanuang něgarang Roma. Tawe nipẹ̌parikẹ̌saěng, kutẹu i kami kawe seng nịdal᷊imadẹ̌ su těngon lawọ dingangu nitahungkụ. Kụ ini e i sire mẹ̌děndolohʼi kandua pakạpul᷊ẹ pakapěnnisẹ̌? I kandua e madiri! Pěngorọ e manga mapapangkatẹ̌ apan těmbonangʼu kawanua e aparěnta hala sol᷊ong ini apělěsọ i kandua e.”

³⁸Manga aghaghaheng u polisi e něhabaru ene su těmbonang u kawanuan Roma. Piạ e i sire mapapangkatu těmbonang u kawanua e nakaringihẹ̌ u i Paulus dẹ̌duan Silas kawe tau Roma, ute i sire něngkatakụ e.

³⁹Mase i sire nẹ̌dorongke ampung si Paulus dẹ̌duan Silas, kụ bọu ene i sire němpanondang dẹ̌dua simẹ̌bang bọu tahungkụ apidu kạdoronge i rẹ̌dua e pạněntangu soa ene.

⁴⁰I Paulus dẹ̌duan Silas naněntangken tahungkụ e kụ nakoạ sol᷊ong bal᷊eng Lidia. Bọuten nẹ̌sombang u jamaatẹ̌ sene, apidu měgẹ̌gěllị u wawahansang si sire e, i Paulus dẹ̌duang Silas tangu nẹ̌buạ e.