Read Sangir RAROLOHANG 17 Bible Online

RAROLOHANG 17 - Sangir bible

RAROLOHANG 17

¹I Paulus dẹ̌duan Silas naněpaseng daral᷊eng i sire nisaheng Ampipolis dingangu Apolonia bọu e nahumpạ u Tesalonika. Sene kai piạ kanisan Tau Yahudi e.

²Tangu i Paulus mal᷊aing nakoạ sol᷊ong kanisa ene — mẹ̌sul᷊ungkewe tundune kẹ̌koatenge kereu piạ kanisaʼn tau Yahudi sěmbaụ e — wọu e měmpẹ̌dẹ̌dal᷊ahintau ringangu apạeweng sene e mạhumbisarang hal᷊ẹ̌ u manga ayetẹ̌ su Winohẹ Susi e. I sie nẹ̌koạ ene e karengụewen těllung ka Sabatẹ̌ mẹ̌tẹ̌tatuhụ.

³Su ral᷊ungu ayetʼu Winohẹ Susi e i sie měnẹ̌nualagẹ̌ dingangu mělẹ̌lahẹ u Ratu Mananal᷊amatẹ̌ kụ seng nikědon Mawu Ruata e hinong mẹ̌dararagu sigěsạ dingangu mẹ̌biahẹ̌ kapia wọu kapapohongʼE. ”I Yesus takụ ilẹ̌habarẹ̌ si kamene e, i Sie kai Ratu Mananal᷊amatẹ̌ kụ seng nikědo e,” angkuěng i Paulus.

⁴Pirang katau němpangimang mase timol᷊e si Paulus děduan Silas; kerene lai kal᷊awokange wọu tau Yunani kụ mạtakụ u Ruata, dingangu l᷊awọ lai manga wawine lẹ̌adateng.

⁵Arawe tau Yahudi e kawe sụsingking. I sire měmpẹ̌kẹ̌kui taumata apang lụliongahẹ̌ su apan dal᷊eng kụ nẹ̌koạ komol᷊ang u ghanohạ. Tangu i sire něnggohaengke su kạguwạu soa e, mase němpěngalọ e wal᷊en sěngkatau mạngimang isẹ̌sěbạ si Yason pědẹ̌deakeng si Paulus dẹ̌duan Silas, u i sire kai mapulu makisěbang i Paulus dẹ̌duan Silas ipẹ̌těngon taumata l᷊awọ.

⁶Ual᷊ingu piạ i sire kawe ta nakaěbạ si Paulus dẹ̌duan Silas ute, něhiude si Yason dingangkewelain taumata mạngimang bal᷊ine e manga pirang katau sol᷊ong těngon manga mapapangkatẹ̌ apang piạ kawasane su soa ene. I sire němpẹ̌heang u, ”I rẹ̌dua ini e kai měmpẹ̌gěnggohaeng suapan tampạ! Orasẹ̌ ini e soang kitẹ e mal᷊aing seng nirěntaěng i rẹ̌dua,

⁷kụ i Yason seng něnarimạ i rẹ̌dua su wal᷊ene. I sire kěbị e tangu lụl᷊ampa kal᷊awọu titang kaisarʼu Roma, batụu i sire kai měbẹ̌bera u piạbe lai ratu wal᷊ine kụ arenge i Yesus.”

⁸Dingangu manga wawera ene tangu nakapẹ̌gěgahẹ̌ taumata l᷊awọ e ringangu apạeweng mangangawasa e su soa ene.

⁹Mase manga mangangawasa e nangoro si Yason dingangu taumata mạngimang bal᷊ine e pěgẹ̌gěllịu wawaehe. Bọu ene wuhụewe i rẹ̌dua e pakipěllọ.

¹⁰Su hěbi ene taumata mạngimang su soa ene něndolohʼi Paulus děduan Silas apakạkoạ sol᷊ong Berea. Nahumpạ e sene, i Paulus děduan Silas nakoạ sol᷊ong kanisang tau Yahudi.

¹¹Taumata su Berea e něngalembong mạbawuka naunge wọu i sire apang su Tesalonika. Měngkate apa mal᷊uasẹ̌ naung i sire nakaringihẹ̌ běkeng habaru Mawu Yesus, kụ bọu e ěllo-ěllo i sire měmpạnaněsui Winohẹ Susi mědeạu makạkasingkạ u měnsang kahěngang bue těntiron Paulus.

¹²Lawọ bọu tal᷊oaran sire mạngimang su Mawu Yesus, ringangu wal᷊inewe lai mahal᷊i tau Yunani mapapia e němpangimang; baẹ bawine ringangu waẹbe lai esẹ e.

¹³Piạ e tau Yahudi su Tesalonika nakaringihẹ̌ u i Paulus selaing mělẹ̌habaru hengetangu Mawu su Berea, tangu i sire mal᷊aing nahunděnta su Berea kụ měmpěnẹ̌nahowong dingangu mapěbẹ̌bimbong u apang taumata sene.

¹⁴Dingangu masahawụ-sahawụ manga anạ u sěmbaụ su Berea e něnonda si Paulus sol᷊ong apeng, arawe i Silas dẹ̌duan Timotius měngkate těbe měmpẹ̌tẹ̌tanạ su soa ene.

¹⁵Bọuten nanonda si Paulus sol᷊ong Atena, manga anạ u sěmbaụ ene e nẹ̌sul᷊e sol᷊ong Berea něhabaru tatanatang Paulus tadeạu i Silas dẹ̌duan Timotius apẹ̌tẹ̌tuhụ si sie sěngapang kal᷊ighạ e.

¹⁶Ene i Paulus kạpẹ̌ngẹ̌ngampal᷊e si Silas děduan Timotius su Atena, naunge měngkate apa kiměndụ u nakasilọ e soa e měngkatewe napenẹ u pakal᷊uang.

¹⁷Ual᷊ingu ene tangu i Paulus měngkate mědẹ̌dal᷊ahintau ringangu tau Yahudi ringangkewen taumata wal᷊ine apang mạněmba Mawu su tampạ ene, su kanisa e. Kerene lai su manga pasarẹ̌, ěllo-ěllo i sie měngkate měkẹ̌kakereapa ringangu apạeweng taumata sene.

¹⁸Manga mananěntiro wọu ghal᷊ipohon Epikuros dingangu ghal᷊ipohon Stoa měmpẹ̌dẹ̌darendehẹ̌ lai ringange. Pirang katau wọʼi sire nẹ̌bera, ”Tau ini e masingkạ u a? Kasingkạ e kětạbeng kadodọ, kai arawe mohonge matanantadẹ̌!” Sěnggạ ete wue ute nẹ̌bera u, ”Luhude i sie kai mělẹ̌habaru mahang duata wọu wansa wal᷊ine.” I sire němpẹ̌bera kerene, ual᷊ingu i Paulus mělěhabaru kakakoạ u Mawu Yesus ringangu mạanun pẹ̌bawangungʼE kapia wọu kapapohongʼE.[24]

¹⁹Mase i sire němaringang i Paulus sol᷊ong pẹ̌sasasombang su Wul᷊udʼu Areopagus. Kụ sene i sire němpẹ̌berạ e si sie, ”I kami e mapulu masingkạ u těntiro wuhu ilẹ̌habaru ene.

²⁰Batụ u i kau kai mělẹ̌habaru hal᷊ẹ̌ buhu ikẹ̌karingihu tul᷊ing kami e. Kụ ual᷊ingu ene tangu i kami e reng mapulu masingkạ u měnsang kai apa mangal᷊ene.” (

²¹Batụ u tau Atena kěbị-kěbị e ringangu taumata raghị apang měmpẹ̌tẹ̌tanạ sene e měngkai papuluang měngěnsuẹewe tempon sire su l᷊oahe ipědẹ̌daringihẹ̌ dingangu měmpahumbisarang hal᷊ẹ̌ buhu ikẹ̌karingihẹ̌ e.)

²²Su tempong i Paulus dụdarisị su těngon taumata apang měmpẹ̌tẹ̌tampung su Areopagus e, i Paulus nẹ̌bera, ”E i kamene tau Atena! Iạ makạsahidi u su ral᷊ungu patikụ munara e i kamene manga anạ u sěmbaụ měngkate mal᷊aagama.

²³Batụ u piạ iạ kapẹ̌daral᷊enge mạngělikụ soang kamene e ringangu tụtatingangke manga tampạ u pẹ̌kakal᷊iomanengang i kamene, ute iạ nakasilo l᷊ai tampạ u pěmaměllokang sasěmba sěmbaụ, kụ sene piạ kạbawohẹ, ’Su Ruata kụ ta nikẹ̌kahěnganeng.’ Kụ kai su Ruata sẹ̌sěmbaěng i kamene, katewe i kamene wěga wue, u kai seng i Sie takụ ilẹ̌habarẹ̌ si kamene.

²⁴ Duata e něndiadi dunia ini ringangu patikụ dal᷊ohone, ute kai Mawun langị dingangu dunia e. I Sie mal᷊aing tawe mẹ̌tatanạ su ral᷊ungu wal᷊en mahang duata koạ u l᷊iman taumata.

²⁵I Sie mal᷊aing tawe mẹ̌gaghausẹ̌ manga apa wọu taumata, u kai i Sie mạngonggọu pẹ̌bawiahẹ̌ dingangu singongo ringangkewelain patikụ sạbarang su taumata e.

²⁶Bọuten sěngkatau taumata e, i Sie napakariading patikụ bansa ringangu nangoro si sire ipělẹ̌loho kạguwạu dunia e. I Sie lai něnilakehẹ̌ deng dokeng bọu tětạ e měnsang su tempo sude arau su tampạ sude i sire wotonge makapẹ̌biahẹ̌.

²⁷Mawu Ruata e nẹ̌koạ ene tadeạu i sire mědeạ si Sie. Mal᷊owọko i sire mẹ̌sombang dingangʼE su tempong i sire kapědẹ̌deạ e. Kai tumuhụ hinone Ruata e tawẹ kararaune wọu anung kitẹ sěngkatau-sěngkatau e.

²⁸Kerẹewe ipẹ̌paul᷊ị u taumata e, ’I kitẹ e ipěbẹ̌biahẹ̌ dingangu kụkanoạ dingangu měbẹ̌biahẹ̌ su dunia ini e kai ual᷊ingu kawasanʼE.’ Mẹ̌sul᷊ungu lai ilẹ̌habaru tahaanang berang kamene. ’I sire němpẹ̌bera u, i kitẹ kěbị e kai manga anạʼE.’

²⁹Ho, ual᷊ingu i kitẹ e kawe manga pal᷊ahanạ u Mawu e, ute i kitẹ tawe wotonge mangěnnau Ruata e kawe tabidạu mẹ̌sul᷊ungu tul᷊ada wọu wul᷊aeng arau sal᷊aka arau watu nikoạ tuhụ kapandeng taumata.

³⁰Tempong kawawodoki kitẹ e seng nipakawěgan Duata, arawe orasẹ̌ ini e i Sie něndolohu patikụ taumata su kạguwạu dunia e pětẹ̌tobatẹ̌ bọu manga rosan sire e.

³¹Batụ u i Sie kai seng namoěngu ěllo sahěllo waugu mapẹ̌gutang kasěllahu dunia e tuhụ kạadile. Hal᷊ẹ̌ ene sarung koateng u sěngkatau pinilen Duata e samatang baugu hal᷊ẹ̌ ene. Ringangu l᷊ai tadeạu patikụ taumata e maiaking u hal᷊ẹ̌ ene, u Ruata e seng napẹ̌biahẹ̌ kapia tau ene wọu kapapohongʼE!”

³²Sarạeng i sire nakaringihẹ̌ u nakasasẹ̌bạeng pẹ̌bawiahẹ̌ kapia wọu papate, tangu piạ u wọu i sire nahul᷊ěgẹeng Paulus. Piạ u l᷊ai nẹ̌bera, ”I kami e mapulu mẹ̌daringihẹ̌ si kau e mẹ̌bisarang hal᷊ẹ̌ ini.”

³³Mase i Paulus naněntangkeng komol᷊ang ene.

³⁴Kutẹu piạ u sutal᷊oaran sire mạnumbẹ̌ka wọʼi Paulus dingangu mạngimang su Mawu Yesus, kere i: Dionisius sěngkatau wọu ral᷊ohon majelisẹ̌ u Areopagus, ringangu sěngkatau wawine arenge i Damaris, dingangu l᷊ai manga pirang katau.