Read Sangir RAROLOHANG 20 Bible Online

RAROLOHANG 20 - Sangir bible

RAROLOHANG 20

¹Sarangke pẹ̌gaghaghonggạ su Efesus e nal᷊ědạ e kapia, i Paulus e něnampungken jamạatẹ̌ e kụ deng nẹ̌gěllị u sasasa si sire. Bọu ene i sie nẹ̌katạeng sire kụ něberan sal᷊amatẹ̌be matěntang, mase naněpaseng daral᷊eng e sarang Makedonia.

²I sie naměpidẹ̌ kạguwạu wanuan Makedonia kụ seng němal᷊iansang u sasasa l᷊awọ su taumata apang mạngimang su Mawu Yesus su tampạ ene. Bọu ene i sie nakoạ sol᷊ong Yunani.

³Těllu wul᷊ang karěngụe i sie nẹ̌tanạ sene. Tangu piạ i sie kapẹ̌sasadiane měmundal᷊ẹ̌ sol᷊ong Siria e, piạko habarẹ̌ u tau Yahudi e sěngkahaung měmate si sie. Ual᷊ingu ene tangu i sie němutusu mědeạu mẹ̌sul᷊e kụ ilěngangu Makedonia.

⁴I Sopater anạ i Pirus bọu Berea nẹ̌dingang i sie; kerene lai i Aristarkhus dẹ̌duan Sekundus tau Tesalonika, ringangu i Gayus tau Derbe. Kerene lai i Timotius, i Tikhikus dingang i Trofimus, tau wọu propinsing Asia.

⁵I sire něngal᷊imona si kami kụ bọu ene něngampal᷊ẹ̌ si kami su Troas.

⁶Napal᷊useng Pěmamantugu Ěllon Borotẹ̌ Tawe Kabọ e, i kami němundal᷊ẹ̌ kụ naněntangken soan Filipi. Lima ěllo tuhụ e i kami nẹ̌tampung kapia ringang i sire su Troas. Sene i kami e nẹ̌tanạ sěngkamisa karěngụ e.

⁷Su hěbing ěllo misa[30] e i kami nẹ̌tampung mědeạu kumaěng sěngkakaěng kerẹewe kakaěngu anạ u sěmbaụ e. I Paulus kai mědẹ̌darudato ringangu taumata, watụ u sěngkariọěllone i sie kai piạ karakine měbuạ. Sarang kẹ̌kal᷊oarane i Paulus měngkate měbẹ̌bisara.

⁸Su ral᷊ungu kamarẹ̌ su wowone rasị tampạeng kami mẹ̌tampung e, měngkai natimu sol᷊one.

⁹Ene kai piạ sěngkatau umbaseng arenge i Eutikhus mạiangke su tobangeng. Ual᷊ingu i Paulus tawẹ ědunge mẹ̌bisara tangu, i anu umbaseng ene kinahuntikilangke marasai hakịu i sie kinal᷊ěnabengke su tobangeng ene, bọu e wẹ̌gaweng kinanawoěnge rasị bọu katěllu hawenge. Tangu piạ e i sire něhengkẹ si sie, kutẹu sěngkakakěllane i sie kai seng nate.

¹⁰Arawe i Paulus e tanaẹ e limintụ, kụ dimarěmmạ su tau umbaseng ene e, kụ nilahěkutang e. I Paulus nẹ̌bera angkuěng, ”Abe ghěnggang u i sie wědaweng biahẹ̌!”

¹¹Bọu ene i Paulus saụewe naawị sol᷊ong bowone, bọu ene němahiạeng borotẹ̌ dingangu kimaěng sěngkakaěng. Sarạeng seng marěngụ mạhumbisara ringangu taumata ene sarang mal᷊ukadẹ̌ tangu, i Paulus e nẹ̌buạ e.

¹²Taumata e měngkatewe němaringang napul᷊ẹ su tau umbaseng ene sol᷊ong bal᷊ene. I sire měngkatewe nakapěndang u mal᷊uasẹ̌ dingangu mahiborẹ̌.

¹³I kami e nakoạ e sol᷊ong kapal᷊ẹ̌ kụ nẹ̌buạ e něngal᷊imona sol᷊ong Asos, mědeạu měněnsomahẹ̌ si Paulus kụ mapasakeng sie su kapal᷊ẹ̌ e sene. I sie seng něngatorẹ̌ kerene ual᷊ingu i sie kai makoạ sol᷊ong tampạ ene mědeạ dal᷊engu luměngang.

¹⁴Sarạeng nẹ̌sombang su Asos, i Paulus měngkatewe lighạ simake kapal᷊ẹ̌ kụ bọu ene i kami nẹ̌buạ sol᷊ong Metilene.

¹⁵Bọu pai ene, i kami e nẹ̌bua kapia kụ sěngkariọěllone nahumpạ u tampạ kụ mětẹ̌těngong Khios. Sěngkakarumahing e i kami e nahumpạeng Samos kụ nal᷊iụen sěhěllo e tangu nahumpạen Miletus.

¹⁶I Paulus kai němutusẹ̌ u tawe motong su Efesus, tadeạu kumbahangbe mẹ̌gagholọ u tempo e su wanuan Asia. Kụ i sie kai měsẹ̌sasahawụ sěngapang botonge makoạ sol᷊ong Yerusalem su ěllon pěmamantugʼu Pentakosta.

¹⁷Bọu Miletus i Paulus něndingọ u habarẹ̌ sol᷊ong Efesus měgẹ̌gausẹ̌ apang pangahạ u jamaatẹ̌ sene e pěněnsomahẹ̌ si sie.

¹⁸Ene piạ e i sire nasongọ e i Paulus e něberạ e si sire, ”Manga anạ u sěmbaụ masingkạ u kereapa iạ měbẹ̌biahẹ̌ tempo ini sutal᷊oarang kamene nanětạ bọu ěllo humotonge iạ nasongo su Asia.

¹⁹Dingangu kasasanạ u naung, ore lai ringangu tatědọ u ěllon mata mal᷊awọ e iạ měmunara waugu Mawu su ral᷊ungu pẹ̌tatohạ u sasal᷊ukạ kẹ̌kahombangengku e ual᷊ingu kai piạ kapulu ral᷊akị bọu tau Yahudi.

²⁰I kamene masingkạ u iạ e sembeng tawe měndal᷊ěmping sarang kadidị-didị maul᷊ị si kamene apang piạ gunane si kamene. Iạ maněntiro si kamene walạewe su komol᷊angu taumata l᷊awọ dingangu su apang bal᷊e.

²¹Baewe su taumatan Yahudi arau lai su wansa wal᷊ine iạ měngkate sěntiniạ mạngarěkilẹ̌ si sire tadeạu apẹ̌tẹ̌tobatẹ̌ bọu kal᷊awọu rosan sire kụ apạkakoạ sol᷊ong anun Mawu Ruata, ringangu apạngimang su Mawu Yesus.

²²Kụ tangu mědeạu makatuhụbe laorong Rohkẹ̌ u Ruata e, ute iạ e makoạko sol᷊ong Yerusalem. Kụ iạ e wěga wue měnsang apạ e sarung mariadi si siạ paị sene.

²³Iạ e kětạengbeng masingkạ u su apan soa e, Rohkẹ̌ e mạnahuntěngadẹ̌ si siạ, u iạ e sarung sumuẹ̌ su tahungkụ dingangu sarung masigěsạ.

²⁴ Arawe iạ e tawe měndarekeng u pẹ̌bawiahẹ̌ku ini e, sěmbal᷊i kate iạ e makauadipẹ̌be munaraku e nạung seng nilěngkang u Mawu Yesus si siạ e ringangu sěmbal᷊i kate iạ e masatia sarang pěngěnsueěngu pẹ̌bawiahẹ̌ku e waugu měhabaru Injilẹ̌ e mạanun kakěndagu Mawu Ruata.

²⁵Iạ seng bọu nẹ̌tiwo si kamene anạ u sěmbaụ dingangu selaing bọu něhabaru mạanun kereapa Mawu Ruata e mẹ̌parenta kere sěngkatau Ratu. Kụ ini tangu iạ mẹ̌pẹ̌pěndang u selaing tawe saụ makapẹ̌sombang i kamene manga anạ u sěmbaụ.

²⁶Ual᷊ingu ene hatede iạ e mẹ̌bera si kamene u kamageng u piạ u sutal᷊oarang kamene kụ sarung mawihua e, ene wal᷊inewe sal᷊aku.

²⁷Iạ e tawe timẹ̌tal᷊ang bọu hal᷊ẹ̌ku e manualagu patikụ karakin Duata e si kamene.

²⁸Kụ i kamene pěndiagạbeng batangeng i kamene hala e ringangu lukarewe kěbị dal᷊ohon jamaatẹ̌ e kụ seng pinaměllokang u Rohkẹ̌ u Ruata e si kamene mědeạu pakịlukade; u i kamene kai seng bọu niruị nakoạ měnanahimata jamaatẹ̌ e. Kụ i kamene e pěmpělukadẹ̌be jamạatʼu Ruata[31] e mẹ̌sul᷊ungu sěngkatau lukadẹ̌ mělẹ̌lukadẹ̌ dombane, batụu Mawu e kai seng napakariadin jamaatẹ̌ e tataghuanengʼE tutune ual᷊ingu kapapohongu AhusʼE tutune.[32]

²⁹Su pal᷊usẹ̌ku e nal᷊ahẹ u sarung děntaěng u manga ral᷊ugẹ̌ bawahani sutal᷊oarang kamene. Kụ i sire apan dẹ̌diagateng i kamene e sarung makoạ kinaěngu manga ral᷊ugẹ̌ ene.

³⁰Saral᷊aing bọu tal᷊oarang kamene hala e sarung piạ u masal᷊insawụ měhabaru habarẹ̌ tawẹ katěngade. I sire měkẹ̌koạ kerene tadeạu apan taumata kụ seng mạngimang su Mawu Yesus e mipal᷊idẹ̌ kụ bọu e tumol᷊e si sire.

³¹Ual᷊ingu ene tangu pakaral᷊ukadẹ̌ bue! Pẹ̌tahěndung u kai těllu taung karěngụ e, ringangu kạsangị e hanesẹ̌, ěllo hěbi e tawẹ ědone iạ maněntiro su sěngkatau-sěngkatau e wọu i kamene.

³²Kụ ini e iạ měnarakang i kamene su Mawu Ruata tadeạu i Sie měhiking si kamene ringangu tadeạu i kamene měngumpaedẹ̌ bue su habaru kakěndagu Mawu Ruata. Mawu Ruata e kai kawasa waugu manoghasẹ̌ si kamene ringangu měngonggọ u kal᷊awọu al᷊amatẹ̌ si kamene kụ seng nịdariahinʼE waugu patikụ umatʼE.

³³Iạ e tawe lumaěnning u roitẹ̌ arau pakeang su sarang sěngkatau.

³⁴I kamene hala e masingkạ u kai ual᷊ingu liaghang gatiku iạ měsẹ̌sal᷊imaẹ měnukụewe pandungangku ringangkewen manga hapịku apan němpẹ̌tol᷊e ringangku.

³⁵Su ral᷊ungu patikụ munara e iạ seng něngonggọ u sansahẹ̌ si kamene u kahian pẹ̌tatěngkasaghedẹ̌ kere ini e i kitẹ e hinong mẹ̌tul᷊ung u apan seng bọu nipěhengetang u Mawu Yesus, ’Limembong makariangkamang e měngonggọ, sul᷊ungu měnarimạ e.’ ”

³⁶Ene sarạeng i Paulus nasuẹen bisarane tangu i sie němul᷊angengke ringang i sire kěbị e kụ nẹ̌kal᷊iomaneng.

³⁷Tangu i sire kěbị e měngkatewe nahunsangị kạl᷊ahěkụ e si Paulus dingangu kạpěbẹ̌berane sal᷊amatẹ̌be rumal᷊eng.

³⁸Něngalembọewe makạsusa si sire e ual᷊ingu i Paulus nẹ̌bera u i sire e sembeng ta saụ makasilo si sie. Bọu e i sire němpangěntuden sie sol᷊ong kapal᷊ẹ̌.