Read Sangir RAROLOHANG 25 Bible Online

RAROLOHANG 25 - Sangir bible

RAROLOHANG 25

¹Těllu ěllo samurin Festus natumpa su wanua ene, i sie nataraị sol᷊ong Yerusalem bọu Kaisarea.

²Sene manga imang těmbonange ringangu manga těmbonang u tau Yahudi e měbẹ̌bawạ e pangaduhang i sire mạanun Paulus. I sire měngkate měmpělẹ̌loke si Festus,

³tadeạu ual᷊ingu kapian naunge si sire, i sie mapulu měndolohu taumata apẹ̌bawa si Paulus sol᷊ong Yerusalem; batụu i sire kai seng sěngkapẹ̌dal᷊ahingidu mẹ̌těgạ měmate si sie suraral᷊engang.

⁴Kai i Festus simimbangu, ”Paulus kai reng mạl᷊aaresẹ̌ su Kaisarea; kutẹu iạ sẹ̌saku e mal᷊aing tawẹ kararěngụ e sarung mẹ̌sul᷊e kạpia sene.

⁵Kụ balạete apạewen těmbonange sutal᷊oarang kamene aparẹ̌sungke ringangku e sol᷊ong Kaisarea kụ mapẹ̌daratẹ̌ i sie sene, kereu mambeng kahěngang i sie seng bọu nẹ̌koạ sěmbaụ pẹ̌sasal᷊a.”

⁶Bọuten nẹ̌tanạ su Yerusalem mangạ e reng bědang ual᷊u arau mapul᷊o ěllo, i Festus mẹ̌sul᷊e sol᷊ong Kaisarea. Sěngkariọěllone i sie naiangke su kal᷊aianengu měnggaghuta e kụ něngoro tadeạu i Paulus e pakịpẹ̌tẹ̌těngon sie.

⁷Ene piạ i Paulus e nasongọ e, tau Yahudi kụ apan seng narěnta wọu Yerusalem němpẹ̌darisị něliwung siạ, kụ nanětạ e nẹ̌pangaduhangu manga laěnsilẹ̌ mawawěhạ si sie. Kaiso i sire tawe makatahutěngadẹ̌ pangaduhang tamai ene.

⁸Su ral᷊ungu pẹ̌tatahutěndạ e, i Paulus nẹ̌bera, ”Iạ e tawe nẹ̌kẹ̌koạ pẹ̌sasal᷊a sarang sěmbaụ mạanun Toratʼi Musa arau su Wal᷊em Mawu arau l᷊ai su kaisaru Roma e.”

⁹Kaiso i Festus e mapulu mangal᷊ạ naungu tau Yahudi. Tangu i sie nakiwal᷊ọ e si Paulus, ”I kau mapulu sol᷊ong Yerusalem mědeạu pakighuta sene su těngoku mạanun manga pangaduhang ene?”

¹⁰I Paulus simimbang, ”Iạ e orasẹ̌ ini rụdarisị mětẹ̌těngon měndaratẹ̌ u kaisaru Roma; kụ kai sene hinone iạ e ghutaěng u pěrkaraku e. I tuang sẹ̌sane masingkạ u iạ tawẹ sal᷊aku su těngon tau Yahudi.

¹¹Kereu iạ e seng limawang tita e ringangu piạ kakanoạku kụ hinong pahangengu papate, ute iạ e sembeng tawe mẹ̌kurate pateěng. Kai kereu manga laaduhang i sire kawe tawẹ katěngade, ute tawẹ u sarang sěngkatau wotonge měnarakangu iạ e si sire. Iạ e mẹ̌dorong makighuta su pěnggaghutaěngu kaisarẹ̌!”

¹²Bọuten nẹ̌dal᷊ahintau ringangu manga měnaněgune, i Festus nẹ̌bera, ”I kau e mědẹ̌dorong makighuta su pěnggaghutaěngu kaisarẹ̌, kụ i kau hinong mẹ̌těngong kaisarẹ̌.”

¹³Ta nararěnnạ wọu ene Datu i Agripa rẹ̌duan Bernike nahunděnta su Kaisarea mědeạu mẹ̌beran sal᷊amatẹ̌ si Festus.

¹⁴Sarạeng i sire seng mangạe pira ěllo sene i Festus něnualagu pěrkarang Paulus su ratu i Agripa. Ungkuěng i Festus, ”Sini kai piạ sěngkatau tiněntang i Feliks, taumatan tahungkụ.

¹⁵Piạ iạ nạung ene su Yerusalem, manga imang těmbonange ringangu manga těmbonangu tau Yahudi e němpẹ̌bawa pangaduhang i sire su tau ene ringangu mědẹ̌dorong tadeạu iạ měměllọ u ponesẹ̌ si sie.

¹⁶Kai iạ e simimbang u tau Roma e tawe wotonge měngkate měnarakang kerene sěngkatau lẹ̌ěnsilang e pakihukung, kereu i sie bědaweng tawe nětẹ̌těngon měngangalakẹ̌ i sie ringangu onggotangu l᷊oahe maul᷊ị u hinone.

¹⁷Kụ piạ e i sire ramahi němpẹ̌děnta e, iạ e tawe něngampal᷊ẹ̌ marěngụ. Sěngkariọěllone iạ měngkatewe apidu naiang su kaderan pěnggaghaghutaěng kụ nangoro tadeạu tau ene pakịbawa pẹ̌těngo.

¹⁸Ene manga měngangalakẹ̌ rimarisị e něhabaru pangaduhang i sire, kai i sire tawe němpěngalakẹ̌ u kakanoạ dal᷊akị sarang kadiongeng sembaụ, kerẹewe iạ mạngiral᷊ing u sarung i kalakẹ̌ i sire.

¹⁹I sire kětạbeng nẹ̌gul᷊ewasu tiněnna ringange su hal᷊ẹ̌ u agamang sire hala ringangu mạanun sěngkatau arenge i Yesus. Tau ene seng napohong, kaiso i Paulusẹ̌ e mang matoghasẹ̌ mělẹ̌habaru tau ene wiahẹ̌.

²⁰Ual᷊ingu iạ e tawe nakareạ hěngangku měnsang iạ e makahombangbe tatualagu hal᷊ẹ̌ ene, kụ iạ e nakiwal᷊o si Paulus měnsang i sie mapulu sol᷊ong Yerusalem kụ pakighuta sene hal᷊ẹ̌ u pěrkara ene.

²¹Arawe i Paulusẹ̌ kawe nẹ̌dorong něngapelẹ̌ tadeạu i sie těbe mạtanạ su tahungkụ sarang pěrkarane i putusu Kaisarẹ̌. Ual᷊ingu ene iạ nẹ̌parenta tadeạu i sie měngkateko kal᷊aarese turusẹ̌, sarang iạ makareạ loahe měndolohi sie sol᷊ong anung kaisarẹ̌.”

²²Mase i Agripa nẹ̌bera si Festus, ”Iạ sẹ̌saku e mal᷊aing mapulu rumaringihẹ̌ tau ene.” ”Diọěllo i tuang makaringihẹ̌ si sie,” ungkuěng i Festus.

²³Tangu sěngkariọěllone i Agripa rẹ̌duan Bernike riměnta ringangu kawantugẹ̌ masaria. I sire nahunsuẹ̌ su ral᷊ungu huangu pẹ̌gaghaghutaěnge sěngkapahunsuẹ̌ dingangkewen manga těmbonangu wuntuangu mẹ̌sasekẹ dingangkewen manga matatebonen soa ene. Ual᷊ingu parentang Festus, tangu i Paulusẹ̌ e pakịsuẹ̌.

²⁴Mase i Festus nẹ̌bera, ”Tuangku Agripa, ringangkewen apang nakomol᷊ẹ̌ kěbị e! Tau ini e seng bọu nikalakẹ̌ siạ kahiang kal᷊awọu tau Yahudi baẹ su Yerusalem arau l᷊ai sini. I sire měmpạmansagẹ̌ měpẹ̌patodiangu i sie tawe wotonge pakawala wiahẹ̌.

²⁵Kaiso iạ e tawe nakasilo měnsang piạ apa nikoạ e kụ makakahukung i sie ringangu hukumangu papate. Dingangu ual᷊ingu i sie sẹ̌sane nẹ̌dorong tadeạu pěrkarane pakighuta su pěnggaghutaěngu kaisarẹ̌, kụ iạ e seng němutusu mědeạu měndolohʼi sie sol᷊ong anun kaisarẹ̌.

²⁶Arawe iạ e wẹ̌dang ta nakạumpaedẹ̌ kasasahẹ u i sie takụ surateng sol᷊ong anung kaisarẹ̌. Kai ual᷊ingu ene hakịu iạ nakiwawan sie nipẹ̌těngong kamene manga mawu e, něngalembo kate si Tuan Datu Agripa lẹ̌adateng! Timonaku e ute tadeạu samurin pananẹ̌sui ini e piạbe ikasuratẹ̌ si sie.

²⁷Batụ u tumuhụ pěndangku e, bal᷊inewe su tampạ e měndingọ u sěngkatau taumatan tahungkụ e tawe nal᷊ahẹ měnsang kai apạ e sal᷊ane.”