Read Sangir RAROLOHANG 26 Bible Online

RAROLOHANG 26 - Sangir bible

RAROLOHANG 26

¹I Agripa e nẹ̌bera si Paulus, ”I kau e seng botonge mẹ̌bisara manondan tul᷊idu watangeng.” Tangu i Paulus něhengkẹen limane kụ něhabaru tul᷊ide kere ini,

²”I Tuan Datu Agripa lẹ̌adateng! Iạ e su pěndangengku mambeng nẹ̌barauntu nakapanondan tul᷊idẹ̌ku kụ su těngon Mawu Ratu, mạanụeng kěbị pangaduhang ilẹ̌ěnsilu tau Yahudi e si siạ;

³kahumotong-motongange ual᷊ingu Mawu Ratu e masingkạ-singkạ u adatẹ̌ dingangu kakakoạ u tau Yahudi e. Ual᷊ingu ene, iạ mědẹ̌dorong mal᷊owọko i Tuang deng dumaringihẹ̌ tatualagẹ̌ku e pakapia-pia.

⁴Patikụ taumatan Yahudi e masingkạ u pěbawiahẹ̌ku e reng dokeng mangudạ. I sire masingkạ u rokeng iạ deng mangudạ e, iạ seng nẹ̌biahẹ̌ sutal᷊oarang kawanuaku e su Yerusalem.

⁵ Seng marěngụ i sire masingkạ u iạ. Kụ kereu i sire mapulu, ute i sire wotonge makapangonggọ u sasahidi u rokeng kal᷊imona iạ seng nẹ̌biahẹ̌ mẹ̌sul᷊ungu tau Farisi kụ tutuhụ patikụ atorang kal᷊ahětiwange su ral᷊ungu agamang kami.

⁶Kụ ini e iạ dụdarisị sini mědeạu pakighuta ual᷊ingu iạ mạngimang u pẹ̌kakakědo nikoạ u Ruata e su manga i upung i kami.

⁷Pẹ̌kakakědo ene lai lẹ̌antiwang u hěnton sire mapul᷊o dua wọu kawanuang Israel hakịu i sire měngkate měmpẹ̌tẹ̌tahamawu Ruata e ěllo hěbi. Kụ ual᷊ingkewe lai seng nẹ̌tatapengu iạ e mangimang u pẹ̌kakakědo ene, mawu ratu, iạ e pạnokeěng u pẹ̌sasal᷊a kahian tau Yahudi e.

⁸Unụe wue manga anạ u sěmbaụ taumatan Yahudi e tawe makapangimang u Mawu Ruata e mapẹ̌biahu taumata nate?

⁹ Nạung iạ sẹ̌saku mal᷊aing mạngěnna u iạ harusẹ̌ mẹ̌koạ patikụ kakanoạ ipěndokạ si Yesus tau Nazaret ene.

¹⁰Kụ kai seng ěndaị ene takụ nikoạ su Yerusalem. Tangu piạ e suratu kawasa wọu manga imang těmbonange, iạ e seng něnahungkụ u taumata l᷊awọ apan masatia su Mawu Ruata. Iạ e mal᷊aing sěnsunduang u i sire ihukung pateěng.

¹¹Kasauange iạ manigěsạ si sire su manga kanisa, tadeạu měnihasa si sire mẹ̌sunial᷊u apang lẹ̌imangeng i sire. Karạu katẹ̌tịu naungku e si sire, hakịeweng mědẹ̌datingu manga soa wal᷊ine e iạ tamai měnahusu si sire tamai sene.”

¹²”Ual᷊ingken timona ene lai tangu iạ e nẹ̌bawa suratu kawasa wọu manga imang těmbonange kụ nakoạ sol᷊ong Damsyik.

¹³Kụ su tempong iạ kạdal᷊enge ěllo rangẹ, Tuang Mawantugẹ̌ e, iạ nakasiloko tualagẹ̌ bọu l᷊angị namal᷊iu tualagu matangěllo. Tualagẹ̌ ene simarang nělikụ si siạ dingangu manga ringangku.

¹⁴I kami kěbị e nasue něngkawatang su ěntana. Mase iạ e nakaringihẹ̌ tingihẹ̌ nẹ̌kui si siạ su werang Ibrani, ’Saulus, Saulus! Kawe unụe i kau měngkate sěntiniạ mẹ̌děndariha si Siạ? I kau sẹ̌sanu sarungbe makapěndang masakị, kereu i kau e měngkate hanesẹ̌ dụdokạ těntiron Mawunu e.’

¹⁵Tangu iạ nakiwal᷊ọ e, ’Kai i sai i Kau e Mawu?’ Kutẹu Mawu e simimbahẹ̌, ’Iạ e kai i Yesus kụ nạung dẹ̌darihangu.

¹⁶Pẹ̌bangungke kụ darisị! Iạ e mẹ̌těngkatodẹ u watangengku si kau mẹ̌deạu měhengkẹ i kau makoạ mẹ̌tatangkiang si Siạ. I kau harusẹ̌be pěhabarẹ̌ su taumata wal᷊ine apang kinasilonu sahěllo ini mạanung Iạ[35] dingangu apang sarung Takụ ilahẹ si kau su tempo ramahi kạděntane.

¹⁷Iạ e sarung měnggeang i kau wọu kawanuang Israel dingangu wọu manga kawanua wal᷊ine kụ bal᷊inewe tau Yahudi. Iạ e sarung měndolohʼi kau kakoạ sol᷊ong anun sire kụ pěmekesẹ̌ matang sire,

¹⁸tadeạu i sire měmpẹ̌sěbang bọu kararěndung kụ sumuẹ̌ su ral᷊ungu tualagẹ̌; tadeạu i sire makapěllọ bọu kawasang setang, kụ bọu ene pẹ̌kawasaěngu Mawu Ruata. Tangu ual᷊ingken pangangimang si Siạ e, kal᷊awọu rosan sire sarung i kaampung dingangu i sire sarung makoạ kawanuan Duata nikapile.’ ”

¹⁹”Ual᷊ingu ene i Tuan Datu Agripa, iạ e mambeng su papasilo kụ seng takụ kinatarimạ bọu Mawu Ruata ene.

²⁰ Hatede iạ e mělẹ̌habaru ini su taumata e, tadeạu i sire němpẹ̌tobatẹ̌ bọu kal᷊awọu rosan sire kụ manarakangu watangeng i sire su Mawu Ruata ringangkewen mapatodẹ su ral᷊ungu pẹ̌bawiahʼi sire u i sire seng němpẹ̌tobatẹ̌ bọu kal᷊awọu rosan sire. Iạ e mělẹ̌habaru ene, kahumotongange su Damsyik, bọu ene su Yerusalem dingangu su kạguwạu Yudea, ringangu sutal᷊oaran sire wal᷊ine tau Yahudi.

²¹Tangu ual᷊ingu ene tau Yahudi e měnamẹ si siạ su Wal᷊em Mawu ringangu mědeạu měmate si siạ.

²²Kai sarang orasẹ̌ ini e iạ tẹ̌těntanudang u Ruata, hakịu iạ nakararisị sini mẹ̌sẹ̌sahidi su těngon patikụ taumata baẹbe ghaghuwạ arau l᷊ai rarodọ. Apan takụ niwera ini e tạ u wal᷊ine wọu apan seng nitěbal᷊u manga nabi ringang i Musa e;

²³ kụ kai Ratu Mananal᷊amatẹ̌ kụ nạung seng nikědon Duata e kai harusẹ̌ mẹ̌tatahang u sunsara, ringangu makoạ taumata kahumotongange mẹ̌bangung kapia wọu kapapohongʼE; tadeạu ual᷊ingu ene i Sie makapěhabaru tualagẹ̌, mạanung kasasal᷊amatẹ̌ baẹ su taumatan Yahudi arau waẹbe lai su wal᷊ine tau Yahudi e.”

²⁴Ene i Paulusẹ̌ e kạpanondane tul᷊ide ene, i Festus e namansage, ”Paulus, i kau kai seng nẹ̌pulu! Kasingkạ u mal᷊awọ ene ute kai seng nakapẹ̌pulu si kau!”

²⁵Arawe i Paulus simimbangu, ”Iạ e wal᷊inewe pulu, Tuang. Manga waweraku takụ pinẹ̌bera e mambeng těngadẹ̌, dingangu simẹ̌bangbe wọu tiněnna mapia.

²⁶I Tuangku Agripa sẹ̌sane e masingkạ-singkạ u hal᷊ẹ̌ ene. Kụ kai ual᷊ingu ene hakịu iạ e wahani makapẹ̌bera mahatedẹ̌ su těngon Tuang su tualage. Su pěndangengku tawẹu sarang sěmbaụ bọu patikụ ene kụ tawe su kasingkạ i Tuang, batụu kěbị ene wal᷊inewe nariadi su manga wěllẹ e kụ mạbawuni.

²⁷I Tuan Datu Agripa lẹ̌adateng; i Tuang mangimang u apang kụ sarung ihabaru manga nabi? Su pěndangengku e i Tuang mangimang!”

²⁸Mase i Agripa e něhengetang si Paulus, ”Su ěnnanu e gampang tangú mapakariading iạ e Sahani su ral᷊ungʼu tempo kadodọ ini e?”

²⁹”Mal᷊ighạ arau marěngụ,” angkuěng i Paulus, ”iạ e mẹ̌kal᷊iomaneng su Mawu Ruata, tadeạu i Tuang dingangu manga mawu patikụ e kụ apang dimaringihẹ̌ si siạ sahěllo ini e makoạbe kere iạ — kamageng bal᷊ine, měnsang katewe lahapusẹ̌ ini e tantu!”

³⁰Pěngěnsueěnge i tuang datu, guběrnurẹ̌ dingang i Bernike, ringangkewelain kěbị apang bal᷊ine němpẹ̌darisị.

³¹Sarạeng seng sul᷊ikude, i sire nahumbisara sěmbaụ dingangu wal᷊ine, ”Tau ini e tawe nẹ̌koạ manga apa sạbarang kụ hinong makahombang hukumang papate arau itahungkụ.”

³²Mase i Agripa nẹ̌bera si Festus, ”Tau ini e seng botonge i pěllọ, kereu i sie tawe měnuntụ měngapelẹ̌ su pěnggaghutaěngu kaisarẹ̌.”