Read Sangir RAROLOHANG 27 Bible Online

RAROLOHANG 27 - Sangir bible

RAROLOHANG 27

¹Lěpasewen naputusẹ̌ u i kami e mẹ̌buạ sol᷊ong Italia, i Paulus dingangu pirang katau taumatan tahungkụewe lai wal᷊ine e nisarakang si Yulius, těmbonang u sordadong Roma kụ isẹ̌sěbạ, ”Resimeng u kaisarẹ̌”.

²I kami e simake kapal᷊ẹ̌ kụ narěnta wọu Adramitium, bọu ene nẹ̌buạ dingangu kapal᷊ẹ̌ ene kụ hatede seng kate mẹ̌buạ sol᷊ong kewe manga pěmamal᷊angoěng su raruruhang u propinsing Asia. I Aristarkhus, tau Makedonia e riměnta wọu Tesalonika, nẹ̌buạ l᷊ai ringang i kami e.

³Sěngkariọěllone i kami e nahumpạen Sidon. I Paulus měngkatewe kẹ̌kapiaěng i Yulius. I sie niapakawala nẹ̌tiwo manga hapị e tadeạu i sire makaonggọbeng apang kụ gẹ̌gausang e.

⁴Bọu ene i kami e naněpaseng pẹ̌mamamundal᷊ʼi kami e. Ual᷊ingu anging kawe pinẹ̌somahẹ̌ ute i kami e rimuruheng apeng u tahanusang Siprus kụ diọ mal᷊ěmpị bọu anging.

⁵Bọu ene i kami e namihětong taghal᷊oang su l᷊antehʼu Kilikia ringangu Pampilia e, kụ nawunạ u Mira su Likia.

⁶Sene tangu pěrwira ene nakareạ e kapal᷊ẹ̌ bọu Aleksandria mẹ̌tẹ̌timona sol᷊ong Italia. Tangu i sie napěngal᷊ing i kami su kapal᷊ẹ̌ ene.

⁷Gěnnang u manga pira ěllo karěngụ e kapal᷊ʼi kami e měngkate tụtondo mal᷊ongge-longge kụ katewe ringangu tětehẹ̌ i kami e nakaratingu soang Knidus. Bọu ene ual᷊ingu anging kawe wẹ̌dang tawe nangindunụ, tangu i kami e tawe nakapaněpasu raral᷊eng i kami e sol᷊ong pẹ̌tatimonaěng i kami e kal᷊amona. Ene i kami e nẹ̌senggọ e nẹ̌timona sěmběkang timuhẹ̌ bọu tahanusang Kreta simahe tonggeng Salmone kụ tadeạu sene i kami e mal᷊ěmpị bọu anging.

⁸Kụ kate lai sarang tětehẹ̌ i kami nakapẹ̌senggọ dimuruhẹ̌ apengʼu tahanusa ene, kụ pěngěnsueěnge nasahampị e su tampạ sěmbaụ isẹ̌sẹ̌bạ Belengange Maholẹ, mahampingu soan Lasea.

⁹Su tempo ene, Ěllong Kawawantugu Pẹ̌daramen[36] tau Yahudi e seng napal᷊usẹ̌. I kami e seng nikailangengu tempo l᷊awọ hakịu sembelaing bal᷊inewe tempone makapẹ̌senggọ matul᷊ende. Kai ual᷊ingu ene hakịu i Paulusẹ̌ e něngonggọ u těgu ini e si sire,

¹⁰”Manga anạ u sěmbaụ, su pěndangengku e kai apạ e masaria hombange kereu i kitẹ e mẹ̌senggọ turusẹ̌. I kitẹ e kai sarung marugi ghẹ̌guwạ, bal᷊inewe kětạeng su lurang i kitẹ dingangu kapal᷊ʼi kitẹ, kaiso kawe lai niawang kitẹ e mailang.”

¹¹Arawe pěrwira ene ěndọben nahimang su pilotọ dingangu su nangkodang kapal᷊ẹ̌ sul᷊ungu su manga wawerang Paulus.

¹²Pěmamal᷊angoěng sene e mambeng dal᷊akị su musungu dunia matěho. Ual᷊ingu ene hakịu sasakeng kapal᷊ẹ̌ e kal᷊awokange němpaněgu mapiawe měsenggọ kapia maněntangu pěmamal᷊angoěng ene ual᷊ingu i sire mapulu měnsang deng makaratingu Feniks, kụ matanạ sene karěngụewen musungu matěho. Feniks ute kai sawange pěmamal᷊angoěng su Kreta kụ tụtatěngo tahangeng dingangu pol᷊oěng.[37]

¹³Su tempo ene angingu timuhẹ̌ e kai tụtiụ masikome. Tangu manga sasakeng kapal᷊ẹ̌ e mạngiral᷊ingu i sire e seng botonge saụ makapẹ̌senggọ kapia. Tangu i sire němpamatungke wal᷊ango e kụ bọu ene nẹ̌senggọ dimuruhe apengu tananusang Kreta.

¹⁴Kaiso tawe nararěnnạ wọu ene timiụ e anging maihạ-ihạ isẹ̌sěbạ anging u laesuikị kụ měngkate apa nẹ̌kalulu wọu rul᷊unge,

¹⁵kụ němukul᷊ewe kapal᷊ʼi kami e. Ual᷊ịeweng kapal᷊ẹ̌ e seng tawe makasomahẹ̌ tangu měngkate seng nịbawalang kami e kapal᷊ẹ̌ e walạewe kal᷊aonode iwawang anging.

¹⁶I kami e reng diọ nal᷊indung kadodọ, piạ i kami nasahe wọu sěmběkang timuhẹ̌ bọu tahanusang Kauda kadodọ ene. Sene tangu i kami e měngkatewe ringangu sigěsạ nakaal᷊ạ bolotung kapal᷊i kami e.

¹⁷Sarangke bolotu ene nawatungke su kapal᷊ẹ̌, tangu kapal᷊ẹ̌ ene měngkatewe nipahěkutangu tal᷊i papahěkụ pinělikụ bal᷊unangu kapal᷊ẹ̌ e. Ual᷊ingkewelain mạtakụ u masiladẹ̌ kụ iěndụe su napong Sirtis mawawo ene, tangu senggọ e nirul᷊ungke, kụ kapal᷊ẹ̌ e měngkate niwala kararerehe su anging.

¹⁸Tangu anginge mangkeng mětẹ̌těngkaihạ, hakịeweng su sěngkariọěllone lurangu kapal᷊ẹ̌ e nanětạ e irẹ̌děmme su l᷊audẹ̌.

¹⁹Sěngkakarumahinge manga masanaeng kapal᷊ẹ̌ e saụewe němpẹ̌hipe manga apal᷊iwụ u kapal᷊ẹ̌ e, ringangu l᷊iman sire hala e.

²⁰Ene, sarang manga karěngụ u pira ěllo e i kami tawe makasasilo matangěllo arau wituing, dingangu anginge měngkate tatapẹ̌ mětẹ̌tungkihạ. Tangu nadehọ nikasueěngken harapẹ̌ u i kami masal᷊amatẹ̌.

²¹Měngkai apa pira ěllo karěngụ e taumata e tawe kumakaěng. Tangu i Paulusẹ̌ e měngkai rimarisị sutal᷊oaran sire kụ nẹ̌bera, ”Manga anạ u sěmbaụ! Kereu i kamene seng timuhụ těguku e kụ tawe nẹ̌sakaeng bọu Kreta, ute angkeěng i kitẹ e tawe kinahombangengu kěbị silakạ dingangu kararugi ini e.

²²Kai ini e tangu iạ mal᷊aing mědẹ̌dorong sěngapang botonge tadeạu naung i kamene e pakaral᷊oahẹ̌ bue. Tawẹu sarang sěngkatau wọu i kamene kụ sarung mate; kai i kitẹ e kětạengbeng kailangengu kapal᷊ẹ̌ ini e samatang.

²³Batụ u mẹ̌kěllaenge kai piạ malạekatẹ̌ bọu anun Mawu Ruata e takụ tẹ̌tahamawuang, kụ kai Ruata mạnaghuang si siạ, kụ diměnta su anuku.

²⁴Malạekatẹ̌ ene nẹ̌bera si siạ angkuěng, ’Abe katakụ, Paulus! U i kau e sarung mẹ̌těngong kaisar. Kụ ual᷊ingu kapian naungu Ruata e si kamene, kěbị taumata kụ apang su kapal᷊ẹ̌ sěnggěsa e ringangu e sarung masal᷊amatẹ̌ ual᷊ingu i kau.’

²⁵Ual᷊ingu ene, manga anạ u sěmbaụ, naung i kamene e pakaral᷊oahẹ̌ bue! Batụ u iạ e mangimang su Mawu Ruata u, kěbị e sarung mariadi kere seng nipěhengetangʼE si siạ.

²⁶Kai i kitẹ e sarung masampelẹ̌ su apeng u tahanusane sěmbaụ.”

²⁷Ene su kapul᷊o ěpạ u hěbine, i kami e mang dụdal᷊ěto su Laudʼu Adria. Mangạ e kẹ̌kal᷊oarane masanaeng kapal᷊ẹ̌ e měpẹ̌pěndang u kai sal᷊ạ e kakạdaninen dul᷊unge.

²⁸Tangu i sire něngul᷊uhen tal᷊i kụ nịlaikitangu watu sasukạ dal᷊ungu sasị. Sěngkakasukạ e ute kai maraning ěpạ u pul᷊o su metere karal᷊unge. Tawẹ kararěngụ e wọu ene saụewe nisukạ ute kinareakeng dal᷊unge tangu maraning těllun pul᷊o su metere.

²⁹I sire kai ghụgěnggang u kapal᷊ẹ̌ e mạdiring masiladẹ̌ su himang, kụ i sire němpaměntul᷊u wal᷊ango ěpạ u waụ bọu petone, kapěkẹ̌kahumange mal᷊owọko lighạ maěllo.

³⁰Kutẹu manga masanaeng kapal᷊ẹ̌ e kai měmpělikosẹ̌ tumal᷊ang bọu kapal᷊ẹ̌. Kụ i sire něngul᷊uheng bolotu su sasị měllewe mẹ̌měntul᷊u wal᷊ango wọu monang kapal᷊ẹ̌.

³¹Kai i Paulusẹ̌ e nẹ̌berạ e su pěrwira ringangu manga sordado su kapal᷊ẹ̌, ungkuěng, ”Kereu masanaeng kapal᷊ẹ̌ ini e tawe matanạ su kapal᷊ẹ̌ e ute i kamene kěbị e tawe maambang.”

³²Ual᷊ingu ene manga sordado ene němpěhěsạ e tal᷊ing laikị bolotu e, kụ bolotu ene nionode.

³³Deng bědang masal᷊ěnibẹ̌ i Paulusẹ̌ e mạngansang si sire kěbị u pěmpẹ̌kaěng bue. I Paulus nẹ̌bera u, ”Seng kapul᷊o ěpạ e su ěllone i kamene měngkate měmpěngẹ̌ngampal᷊ẹ̌ su kaghaghěngganeng dingangu měmpẹ̌tẹ̌tingkědang tawe kumaěng sarang manga apạ e.

³⁴Iạ e maněgu si kamene pěmpěngětọ bue maning kadodọ. Ene kai mapia waugʼi kamene tadeạu i kamene saụbe měngkatoghasẹ̌. Kụ i kamene kěbị e sarungbe maambang dingangu tawẹ kurange apa.”

³⁵Bọuten nẹ̌berang ene, i Paulus měngkatewe něngal᷊ạ borotẹ̌ kụ bọu ene napatarimakasẹ su Mawu e su těngon sire kěbị. Bọu ene i sie něngangempangke borotẹ̌ pinahiạ si sire kụ nahungkaěng.

³⁶Tangu i sire kěbị e nawahansangke kapia ringangu nahungkaěng.

³⁷Kakěpal᷊u taumata su kapal᷊ẹ̌ e kai rua hasụ pitum pul᷊o ěnnung[38] su kataune.

³⁸Sarạeng kěbị seng něngkal᷊aedẹ̌, i sire něhipẹen lurang i sire manga gandung e su sasị tadeạu kapal᷊ẹ̌ e mahaěng.

³⁹Ene sarangke naěllo e, masanaeng kapal᷊ẹ̌ e nakasilọ e katanaěng, kai i sire wěgawue měnsang kai tahanusang apa. I sire nakasilọ e wěngạ e sěmbaụ dingangu apenge. Tangu i sire kai mapulu měnonsol᷊u kapal᷊ʼi sire sene kereu wotonge.

⁴⁰Tangu manga tal᷊ing bal᷊ango e nasuẹen hěsạ e si sire pinakiwul᷊usẹ̌ su sasị. Manga tal᷊ịewe lahosẹ ul᷊inge mal᷊aing nịkakoạ kerene. Bọu ene i sire němpěmewẹen senggọ kilewerẹ̌ e tadeạu kereu anging tumiụ tangu kapal᷊ẹ̌ e seng tumondo mẹ̌timonạewe apeng.

⁴¹Arawe kapal᷊ẹ̌ kawe nasiladẹ̌ su towọe, monane tangu měngkatewe mạtatětelẹ̌ kụ tawe kadiongeng kumanoạ, arawe kawe petone ute měngkatewe naghagholangu kawawẹ̌seng luạ gaghaghuwạ e.

⁴²Manga sordado su kapal᷊ẹ̌ e piạ ol᷊ange měmpěmate kěbị apang taumatan tahungkụ e, ual᷊ingu i sire matakụ kibasị u piạ u kumalang mědeạ dul᷊unge kụ mahuntal᷊ang.

⁴³Kai arawe pěrwira e nametọ u ol᷊ang i sire batụu i sie kai mapulu mangambang si Paulus. I sie něngoro apan tahakalange niapatumpa kal᷊imona kụ niapakalang sol᷊ong apeng;

⁴⁴kụ i sire wal᷊ine ute hědowe apatol᷊e kụ apěhumbang u pěpal᷊ẹ̌ arau manga wěkang kapal᷊ẹ̌ e. Kětạengbeng kerene ral᷊enge tadeạu i kami kěbị e maambang sol᷊ong dul᷊unge.