Read Sangir RAROLOHANG 4 Bible Online

RAROLOHANG 4 - Sangir bible

RAROLOHANG 4

¹Kutẹu i Petrus dẹ̌duan Yohanes bẹ̌dang měbẹ̌bisara ringangu manga taumata ene, manga imang těmbonang e[5] dingangu pangatasengu měndariagạ Bal᷊em Mawu ringangkewe manga tau Saduki nahunděnta su anun Petrus dẹ̌duan Yohanes.

²I sire limangehẹ̌ batụu i Petrus dingangi Yohanes nẹ̌bera su apan taumata u i Yesus seng nẹ̌biahẹ̌ kapia wọu papatenʼE. Kụ ene mělẹ̌lahẹ u taumata nate e sarung mẹ̌biahẹ̌ kapia.

³Tangu i sire něnamẹ darolohang darua ene kụ niapasuẹ̌ su ral᷊ungu tahungkụ. Kụ ual᷊ingu kai seng hěbi, tangu i Petrus dẹ̌duan Yohanes nitahangeng sene sarang sěngkariọěllone.

⁴Arawe i sai sain seng nakaringihẹ̌ těntiron manga rarolohang ene, lawọ němpangimang. Tangu kakẹ̌pal᷊u taumata mạngimang e mang kạtambane sarang mạngal᷊ạ manga l᷊ima hiwu su kataune.

⁵Sěngkariọěllone masasingkạ u Měnggaghuta Agama, kal᷊awọu těmbonang u tau Yahudi ringangu manga mananěntirong agama e němpẹ̌komol᷊ẹ̌ su Yerusalem.

⁶I sire němpẹ̌sombang u Imang Mawantugẹ̌ i Hanas, dingangu i Kayafas, i Yohanes, i Aleksander, dingangu kěbị apan narekeng gal᷊ipohong manga imang mawantugẹ̌.

⁷I Petrus dẹ̌duan Yohanes niapẹ̌těngon sire, mase nipakiwal᷊oěng i sire, ”Kai kereapa ral᷊enge hakịu i kamene nakaul᷊e peosʼu tau ene? Kai ual᷊ingu katoghasu apa arau kawasan sai? Kụ i kamene e nẹ̌koạ ene?”

⁸I Petrus, kụ nipẹ̌kawasaěngʼu Rohkẹ̌ u Ruata e, simimbang, ”Manga mawu těmbonangu kawanua ringangu manga mawu měmamunarang pěnggaghutaěng!

⁹I kami e ghẹ̌gutaěng su ěllo ini e ual᷊ingu nẹ̌koạ mapia, nẹ̌tul᷊ungu sěngkatau peosẹ̌ dingangu manga mawu e mědẹ̌deạ u mapulu masingkạ u měnsang kai kerea kakakoạ u tau ene sarang i sie napia.

¹⁰Ho, manga mawu sěngapang kakẹ̌pal᷊e harusẹ̌be masingkạ, mase lai kěbị tau Israel mal᷊aing harusẹ̌ masingkạ u tau ini e rụdarisị orasẹ̌ ini, wadange seng mahuweka su těngon manga mawu ual᷊ingu katatoghasẹ̌ dingangu kawasa wọu i Yesus Kristus tau Nazaret ene. Manga mawu e seng něnguruisʼi Yesus e, kai arawe Mawu Ruata e seng napẹ̌biahʼi Sie kapia.

¹¹ Seng Mawu Yesus ini e tẹ̌timonang u ayetẹ̌ su ral᷊ungu Winohẹ Susi, ’Batu kụ tawe nipakẹ i kamene manga mẹ̌kakoạ bal᷊e, kai nạung nakoạ batu pinẹ̌bukuang.’

¹²Kětạbeng su ral᷊ung i Yesus sěmatang, taumata e ipakasal᷊amatẹ̌ e. Batụ u su kaguwạu dunia su tal᷊oarang taumata e tawẹu sarang sěngkatau wal᷊ine makahombang kawasang Duata mapakasal᷊amatʼi kitẹ.”

¹³Manga měnggaghuta e rụdal᷊inaụ u makasilo si Petrus dẹ̌duan Yohanes e tawẹ goẹ̌ e, kutẹu kawe lai i sire masingkạ u i rẹ̌dua e kai taumata tawẹ sikol᷊ane. Tangu i sire nakaěnnạ e u rarolohang darua ene ute kai nạung dingangu Mawu Yesus.

¹⁴Arawe i sire tawe makawerang apa-apa, batụu tau seng napia e seng ene rụdarisị su těngon sire ringangi Petrus dẹ̌duan Yohanes.

¹⁵Tangu i sire nangoro manga rarolohang darua e niapasẹ̌bang bọu huangu pěnggaghutaěng e, kụ i sire němpẹ̌kakereapa.

¹⁶I sire nẹ̌bera u, ”Kai pẹ̌kapuraneng i kitẹ, i sire ini e? Patikụ taumata apang měmpẹ̌tẹ̌tanạ su Yerusalem sembeng masingkạ u karal᷊inaụ tạ sihinge ini e kai nịkakoạ i rẹ̌dua. I kitẹ e tawe makapẹ̌děndilu ene.

¹⁷Kai tadeạu hal᷊ẹ̌ ini e kumbahangbe sauneng mawombeng su taumata l᷊awọ e, ute i kitẹ mạpiangbe mẹ̌sěding piạ kindorẹ e si rẹ̌dua, u kumbahang i rẹ̌dua mẹ̌koạ bisara si sai-sai su arengi Yesus.”

¹⁸Tangu i sire saụ nẹ̌kui si rẹ̌dua nipasuẹ̌ nipaul᷊ikang u kumbahang-kumbahang i rẹ̌dua makakasěbạ areng i Yesus, arau maněntiro ringangu areng i Yesus.

¹⁹Kai i Petrus dẹ̌duang Yohanes simimbang, ”Lẹ̌ěnnaiko hala apang kụ kahěngang su těngon Duata: tumuhụ parentang manga mawu arau tumuhụ parentan Duata.

²⁰U i kami e tawe wotonge měngirul᷊e mẹ̌bisarang apa seng nikasilo ringangu nikaringihʼi kami hala e.”

²¹Manga měnggaghuta e tawe makareạ dal᷊engu makapěmahang si Petrus dẹ̌duan Yohanes. Ene i sire saunengke němpangindorẹ si rẹ̌dua, mase irẹ̌dua e nipěllọ sěngkapěllọ batụu kěbị taumata e mang měmpẹ̌dẹ̌dalo Mawu ual᷊ingu hal᷊ẹ̌ nariadi ene.

²²Kutẹu tau nạung napia kụ nakaral᷊inaụ e kai seng piạ kal᷊imang pul᷊one su taunge umure.

²³Sarạeng i Petrus dẹ̌duan Yohanes nipěllọ, ute němpẹ̌sul᷊ẹ e sol᷊ong anun manga ringang i rẹ̌dua e kụ nẹ̌běkeng kěbị apang nịbawerang manga imang gagherẹ, dingangu manga těmbonang u tau Yahudi ene si sire.

²⁴ Sarạeng manga ringang i rẹ̌dua e nakaringihẹ̌ hal᷊ẹ̌ ene, ute i sire nẹ̌kal᷊iomanengke sěngkapẹ̌kal᷊iomaneng su Mawu Ruata. Ungkuěng i sire, ”Mawu, seng i Kau e něndiadi langị dingangu dunia e ringangu l᷊audẹ̌ ore lai kěbị dal᷊ohone.

²⁵ Kụ dingangu Rohkẹ̌ u Ruata e, i Kau wọu mělẹ̌hengetang, nẹ̌pakẹ u mohong i upung i kami, i Daud ěllang e; ungkuěngu, ’Kawe unụe taumata we wěgang Mawu e němpẹ̌bawal᷊uang; kawe unụe kal᷊awọu wansa mědẹ̌dal᷊ahingidʼu karaki tawẹ gunane?

²⁶Manga ratun dunia e měmpẹ̌dẹ̌dariahi měsekẹ, dingangu manga těmbonang e sěngkanaung dumokạ Mawu ringangu Ratu Měnanal᷊amatẹ̌ e.’

²⁷ Batụ u mambeng těngadẹ̌ i Herodes dẹ̌duan Pontius Pilatus seng bọu němpẹ̌tampung dingangu manga tau kapirẹ̌ e ringangu kal᷊awọu tau Israel apan su soa ini. I sire měmpẹ̌kẹ̌komol᷊ẹ̌ mědeạu rumokạ si Yesus ěllangʼU susi ene, kụ seng nilanisangu nakoạ Datu Měnanal᷊amatẹ̌.

²⁸I sire mětẹ̌těngkasěmbaụ mědeạu mẹ̌koạ patikụ e, apạeweng seng tinantunu e kal᷊imona, u ene e kai sarung mariadi. Dingangu i Kau něnantu ene su kawasa ringangu kapulunʼU hala e.

²⁹Tangu ini Mawu! Kakěllaiko kereapa i sire mạngindorẹ si kami. Kụ onggotengkon kawawahani si kami manga ěllangʼU ini e, tadeạu makapěhabaru hengetangu e tawẹ goẹ̌ e.

³⁰Tul᷊ungko, tadeạu apạeweng masakị e rembeng ipakaul᷊e dingangkeweng apang makạdal᷊inaụ tạ sihinge e deng mariadi ual᷊ingu kawasa ringangu katatoghasẹ̌ bọu areng i Yesus, ĚllangʼU susi ene.”

³¹Ene i sire nasuẹeng kal᷊iomanenge, tampạ pinẹ̌tampungang ene e kimiọe. Ene kěbị e nikanoakeng u Rohkẹ̌ u Ruata; kụ nanětạ e nawahani nahumbisarang hengetangu Mawu.

³² Patikụ taumata mạngimang e měbẹ̌biahẹ̌ sěngkanaung dingangu sěndal᷊engu tiněnna. Tawẹu sarang sěngkatau wọʼi sire mạngiral᷊ingu apang tẹ̌taghuanenge, ute ene kawe rarotonge hala. Kai patikụ sabarang kụ apang piạ si sire e, ute ene kai pakẹ i sire pẹ̌tambaěng.

³³Dingangu kawasa masěllahẹ̌, manga rarolohang e měsẹ̌sahidi Mawu Yesus seng nẹ̌biahẹ̌ kapia. Tangu Mawu Ruata e měngkai mapẹ̌dal᷊embong al᷊amate si sire.

³⁴Kụ tawẹu sarang sěngkatau wọʼi sire e kakawusang u apa. Batụ u i sire apạeweng piạ ěntanane arau wal᷊ene e, měbẹ̌bal᷊ụ u ěntana arau wal᷊en sire e, bọu ene roite wawaěng i sire,

³⁵kụ isarakang i sire su manga rarolohang e. Kụ bọu ene roite iwẹ̌bal᷊awuhewe su sěngkatau-sěngkatau tuhụewe pandungangu wiahe.

³⁶Kerene lai i Yusup, i sie mal᷊aing měbẹ̌bal᷊ụ u ěntanane mase roite wawaěng e kụ ighěllịe su manga rarolohang. I Yusup e kai sěngkatau hiten Lewi kụ piněhanạ su tahanusang Siprus; manga rarolohange kai mạnunggahị i sie lai si Barnabas (itungkang mangal᷊ene, i Makạhiborẹ̌).