Read Sangir RAROLOHANG 8 Bible Online

RAROLOHANG 8 - Sangir bible

RAROLOHANG 8

¹Kụ i Saulus lụl᷊ahimpuluang u pamamate ene. Su sahěllo ene lai jamaatẹ̌ su Yerusalem e nanětạ e sẹ̌sahusuang, hakịu kěbị apang mạngimang e, su l᷊ikudu manga rarolohang nasue němpẹ̌kal᷊iasẹ̌ su kạguwạu wanuan Yudea ringangu Samaria.

²I sire apang mạtakụ u Ruata e němpělěbing i Stefanus dingangu sụsangị i sie ringangu měngkai lụl᷊ahunsusa tạ sihinge.

³ Arawe i Saulus ute měngkate sěntiniạ tatapẹ̌ mědẹ̌deạ aị u měnggoghahẹ̌ jamaatẹ̌. I sie měngkate mal᷊intụ marangeng bọu wal᷊e sarang bal᷊e ringangu mělẹ̌hiudẹ̌ apan taumata mạngimang e sarang likude wọu ene pakisuẹ̌ su ral᷊ungu tahungkụ.

⁴Apan taumata mạngimang kụ seng nakeke ene mělẹ̌habarʼu Injilẹ̌ bọu anun Mawu e su apan tampạ.

⁵I Filipus e nakoạ sol᷊ong soan[9] Samaria kụ něhabarẹ̌ si sire paị sene mạanun Datu Mananal᷊amatẹ̌ e kụ seng nikědon Duata.

⁶Ene manga taumata e nakaringihẹ̌ si Filipus měbẹ̌bisara ringangu i sire nakasilọ e manga tanda-tanda makạdal᷊inaụ kinoạ e, ute mal᷊awọ bọu i sire měmpẹ̌sẹ̌sěmpị u apan niwerang Filipus.

⁷Batụ u kal᷊awọu apan taumata kinasakeěngu setang e, seng nempẹ̌sěbang apidu kạpahunsikine. Taumata peosẹ̌ dingangu kempal᷊ẹ̌ e mal᷊aing lawọ niapakaul᷊e.

⁸Tangu apang taumata su soan Samaria e měngkate apa maral᷊uasẹ̌ tạ sihinge.

⁹Su soa ene e piạ sěngkatau esẹ arenge i Simon, kụ i sie seng apa riọ nararěnnạ nakakoạ tau Samaria e rimal᷊inaụ u wawal᷊ikụ mata ikẹ̌koạ e. I sie naul᷊ị si sire u i sie kai taumata wotonge.

¹⁰Tangu kěbị taumata su soa ene wọu patikụ běhị u kawanua e bọu kasanakeng e sarang karangetange měngkai měmpẹ̌sẹ̌sěmpị si sie. ”Tau ini e kai katatoghasu Ruata kụ timeleng al᷊ingkai ’Katatoghesẹ̌ Masěllahe’ ene,” angkuěng i sire.

¹¹Seng marěngụ-děngụ i sie měmẹ̌moghe taumata ringangu wawal᷊ikụ matane, hakịu i sire měngkai apạe mararingihẹ̌ si sie.

¹²Kai arawe i Filipus e mělẹ̌habarẹ̌ si sire Injilẹ̌ mạanun kereapa Mawu Ruata sarung mẹ̌parenta kere sěngkatau ratu, ringangu, mạanun Yesus Kristus, Datu Měnanal᷊amatẹ̌ e. Tangu i sire e němpangimangu habarẹ̌ iwẹ̌běken Filipus, kụ i sire nakisahanị e baẹ esẹ arau lai wawine.

¹³I Simon sẹ̌sane mal᷊aing nangimang. Kutẹu sarangke nisahani, i sie měngkatewe timol᷊e si Filipus. Kal᷊awọu manga tanda makạdal᷊inaụ kụ apang nariadi e, nakal᷊aherangkewe si Simong e.

¹⁴Manga rarolohang su Yerusalem nakaringihẹ̌ e kal᷊awọu tau Samaria e seng něnarimạ u hengetang u Mawu. Ual᷊ingu ene ute, i sire něndolohen Petrus dẹ̌duan Yohanes sol᷊ong tampạ ene.

¹⁵Ene i Petrus dẹ̌duan Yohanes nawunạ e, i sire nẹ̌kal᷊iomanengken tau Samaria ene tadeạu i sire makahombang Rohkẹ̌ u Ruata e,

¹⁶batụu Rohkẹ̌ u Ruata e wẹ̌dang ta rimẹ̌děnta si sire sarang sěngkatau; i sire wuhụ e nisahani su ral᷊ungu areng i Yesus Kristus samatang.

¹⁷Mase i Petrus dẹ̌duan Yohanes nanělliden liman dẹ̌dua su tau Samaria e, kụ i sire nakatarimạ e Rohkẹ̌ u Ruata e.

¹⁸I Simon nakasahidi u kawe ual᷊ingu pěnaněllidu l᷊iman manga rarolohange si sire, hakịu Rohkẹ̌ u Ruata e natěntung si sire ene. Ual᷊ingu ene i Simon nangěntuden doitẹ̌ si Petrus dẹ̌duan Yohanes,

¹⁹mase nẹ̌bera, ”Onggọ e lai kawasa ene, tadeạu kamageng limaku e itělidẹ̌ si sai-sai tangu i sie sarung manarimạ u Rohkẹ̌ u Ruata.”

²⁰Arawe i Petrus e simimbang, ”Mawinasa i kau sěngkawinasa ringangu roitu! Katihokang u gaghěllị u Mawu Ruata e kai kawaehang u roitẹ̌?

²¹I kau e tawẹ buạ u makatol᷊e su ral᷊ungu pěmamunarang kami e, watụ u naungu e tawẹ katul᷊ide su Mawu Ruata.

²²Batụ u ene pamalangkong kapulunu ral᷊akisẹ̌ e, kụ pẹ̌kal᷊iomanengko su Mawu tadeạu i Sie mangampungbe tiněnnanu ral᷊akisẹ̌ e!

²³U iạ kai masingkạ u i kau e napenẹ u sasasingking dingangu nakoạ ěllangu kararal᷊akisẹ̌ e.”

²⁴Mase i Simon nẹ̌berạ e si Petrus dẹ̌duan Yohanes, ”Tul᷊ungko kal᷊iomanengen dua su Mawu, tadeạu tawẹu sarang sěmpědi wọu manga waweran dua e, humombang si siạ.”

²⁵Sarangke i sire wọuten nẹ̌sahidi ringangu němpẹ̌habaru hengetangu Mawu e, tangu i Petrus dẹ̌duan Yohanes nẹ̌sul᷊e kapia sol᷊ong Yerusalem. Kụ suraral᷊engang tangu i sire mělẹ̌habaru Injilẹ̌ ene su apan soa su Samaria.

²⁶Ene kai piạ sěngkatau malạekatʼu Mawu e něhengetang si Filipus, ”Hotede pẹ̌buạko! Kakoạko sol᷊ong sěmběkan timuhẹ̌,[10] pẹ̌batụko rarẹ̌sungang bọu Yerusalem sol᷊ong Gasa.” Dal᷊eng ene kai mahal᷊i rumal᷊ěngange.[11]

²⁷Tangu i Filipus měngkatewe nẹ̌dariahi rimal᷊eng. Tempo ene piạko sěngkatau wẹ̌baton istanang Etiopia kạdal᷊enge mapul᷊ẹ sol᷊ong banuane. Tau ene ute kai sěngkatau wẹ̌bato marangẹ mananahimata patikụ darotong u tau wawine i Kandake, ratun Etiopia. Tau ene seng nakoạ sol᷊ong Yerusalem mẹ̌kal᷊iomaneng su Mawu Ruata, kụ ini e seng kạkapul᷊ẹ e ringangu karetane. Kạkaiange su ral᷊ungu sasakeěnge i sie kạbasane Bukẹ̌ u Nabi i Yesaya.

²⁹Rohkẹ̌ u Ruata e něhengetang si Filipus, ”Dakọko pẹ̌těngkaraning kareta ene.”

³⁰Tangu i Filipus tamaị e nẹ̌těngkaraning kareta e, bọu e i sie nakaringihẹ̌ tau ene měbẹ̌basa bukẹ̌ u Yesaya. I Filipus nakiwal᷊o si sie, ”I Tuang makạěnna wue iwẹ̌basang Tuang e?”

³¹Tau ene simimbang, ”Makaěnnawe kereapa iạ e kereu tawẹu manul᷊ada si siạ?” Mase i sie němaringangke si Filipus simake kareta kụ naiangke sěngkakaiang dingange.

³² Kai ini e manga ayetẹ̌ bẹ̌basaěnge ene, ”I sie kai mẹ̌sul᷊ungu domba niahạ mědeạu potokang, kere anạ u domba kụ tawe lumaěmbẹ pěngguntingang dukụ e, kerene i Sie tawẹ bisarane baewe sarang manga sěmpědi e.

³³I Sie lẹ̌heghesang dingangu lẹ̌akal᷊eng. SingongonʼE nisawụ bọu wowon dunia e hakịu tawẹu sarang sěngkatau makapẹ̌běkeng manga hitenʼE.”

³⁴Bẹ̌baton Etiopia ene nẹ̌berạ e si Filipus, ”Kěnangko paul᷊ị si siạ, kai i sai tangu ipẹ̌paul᷊ị u nabi ini e? I sie sẹ̌sane ngae arau kai taumata wal᷊ine?”

³⁵Tangu i Filipus e mal᷊aing nanětạ nẹ̌bisara; i sie mẹ̌pẹ̌pakẹ u manga ayetẹ̌ ene nikoạ panẹ̌takengu měhabaru Injilẹ̌ měbẹ̌běkeng Yesus su wẹ̌bato marangẹ ene.

³⁶Kạpahundal᷊enge, i sire nahumpạen tampạ sěmbaụ kụ sene kai piạ akẹ. Bẹ̌bato ene nẹ̌berạe, ”Ene pai piạ akẹ! Kụ kai apạ e lai sungkal᷊ene měnahani si siạ?” [

³⁷I Filipus nẹ̌bera, ”Kereu i Tuang mambeng mangimang dingangu kaguwạu naung, ute i Tuang botonge sahaniang.” ”Iạ mangimang u i Yesus Kristus e kai Ahusʼu Ruata,” angkuěng u wẹ̌baton Etiopia ene.]

³⁸Mase i sie napěngědungke karetane; kụ i rẹ̌dua, i Filipus dingangu wẹ̌bato ene limintụ e nẹ̌deạ dal᷊ungu akẹ e kụ i Filipus něnahani si sie.

³⁹Piạ e i rẹ̌dua nasěpụ bọu akẹ, tangu Rohkẹ̌ u Ruata e sěngkianu namuạ i sie napakaghěngging bọu ene. Tangu wẹ̌bato wọu Etiopia semben tawe saụ nakasilo si sie. Dingangu ral᷊uasẹ̌ e wẹ̌bato ene naněpaseng daral᷊enge.

⁴⁰Běgawen nạung i Filipusẹ̌ e kai seng ene su Asdod. Kụ i sie naněpaseng daral᷊enge, i sie mělẹ̌habarʼu Injilẹ̌ mạanun Mawu Yesus su kaguwạu soa sarạeweng i sie nahumpạ su Kaisarea.