Read Sangir ROMA 1 Bible Online

ROMA 1 - Sangir bible

ROMA 1

¹Patikụ manga anạ u sěmbaụ ikẹ̌kěndagu Mawu Ruata su Roma, dingangu apan seng nikuiangu Mawu Ruata mědeạu makoạ umatʼE. Mawu Ruata seng namile ringangu něhengkẹ u iạ těntani mědeạu měhabarʼu Injilẹ̌ bọu Mawu Ruata.

²Injilẹ̌ ene seng niriandin Duata su tempong kal᷊amona wọu manga nabinʼE ringangu seng mạbawohẹ su ral᷊ungu Winohẹ Susi.

³Injilẹ̌ ene mělẹ̌habarʼu Ahusu Ruata, Mawung kitẹ i Yesus Kristus. Tuhụ mạtaumata, i Sie ute kai hěnton Daud,

⁴arawe kereu mạduata e ute i Sie kai Ahusu Ruata. Ene ute nilahẹ u munarang kawasa tạ sihinge lumium pẹ̌bawangungʼE wọu papatene.

⁵Lumiun Sie lai Mawu Ruata něgěllịu al᷊amatẹ̌ si siạ mẹ̌deạu makoạ darolohang, tadeạu iạ — mangadatẹ̌ si Kristus — manata apan taumata wọu patikụ banua tadeạu mangimang dingangu tumuhụ.

⁶Kụ timonang bawera wọu patikụ banua e ute i kamene lai apang su Roma e seng nikuiang mědeạu mariadi umatʼi Yesus Kristus.

⁷Ual᷊ingu ene iạ namohẹ u suratẹ̌ ini su manga anạ u sěmbaụ. Karimạko Mawu Ruata i Amang i kitẹ e ringangu Mawu Yesus Kristus mangonggọu al᷊amatẹ̌ dingangu karal᷊unsemahẹ̌ su manga anạ u sěmbaụ.

⁸Kahumotongange su ral᷊ungu areng i Yesus Kristus iạ makitarimakasẹ su Mawu Ruata ual᷊ingu i kamene kěbị manga anạ u sěmbaụ; batụu patikụ dunia seng nakaringihẹ̌ u manga anạ u sěmbaụ e nangimang kahěngang si Kristus.

⁹Iạ hanesẹ̌ mẹ̌tẹ̌tahěndung su manga anạ u sěmbaụ kereu iạ mẹ̌kal᷊iomaneng. Mawu Ruata e nakoạ sahidine u apan takụ niwera ene mang kahěngang. Seng i Sie e Mawu Ruata kụ takụ tẹ̌tangkianeng u kaguwạu naung dingangu mamombengu Injilẹ̌ mạanun AhusʼE.

¹⁰Iạ mẹ̌dẹ̌dorong sěngapam botonge su Mawu Ruata, mal᷊owọko i Sie mapakawalang iạ orasẹ̌ ini e mẹ̌tiwo si kamene.

¹¹U iạ mambeng mapulu mẹ̌sombang i kamene tadeạu iạ makapěmahiạ u al᷊amatẹ̌ bọu Rohkẹ̌ u Ruata e makapěnoghasẹ̌ si kamene.

¹²Timonaku e kai ual᷊ingu i kitẹ kai seng sěngkapěngimang su Mawu Yesus Kristus, ute i kitẹ e makapanoghasẹ̌ sěngkatau su wal᷊ine.

¹³ Manga anạ u sěmbaụ! Iạ lụěnningu tadeạu i kamene masingkạ u seng masau susul᷊ene iạ mẹ̌kẹ̌karaki mẹ̌tiwo si kamene, kai měngkai hanesẹ̌ tạ kasěhukange. Iạ lụěnningu tadeạu sutal᷊oarang kamene e munaraku reng piạ lětạe kerẹewe lai nạung munaraku sutal᷊oaram bal᷊ine taumatan Yahudi su tampạ bal᷊ine e.

¹⁴U iạ kai hinong mapẹ̌darumatingu injilẹ̌ su patikụ bansa, suapam makạěnna ringangu tamakal᷊aěnna, suapam piạ sikol᷊ane ringangu apan tawẹ nẹ̌sẹ̌sikol᷊a.

¹⁵Ual᷊ingu ene iạ měngkatewe lụěnning u mamombeng u Injilẹ̌ ene si kamene manga anạ u sěmbaụ kụ mạtanạ su Roma e lai.

¹⁶ Iạ měngkai mạngimang kahěngang su Injilẹ̌ e ual᷊ingu injilẹ̌ e kai kawasan Duata makasal᷊amatẹ̌ kěbị taumata mangimang; kahumotongange su tau Yahudi, ringangu wansa wal᷊inẹʼewe lai.

¹⁷ U kai ual᷊ingu Injilẹ̌ ene, Mawu Ruata e nanodẹ u kereapa ral᷊enge tadeạu pẹ̌kakauhu taumata ringangu Mawu Ruata e maul᷊ị kapia; dal᷊enge ute kětạeng ual᷊ingu mangimang su Mawu Ruata, wọu panẹ̌takenge sarang pěngěnsueěnge. Ene mẹ̌sul᷊ungu kere mạbawohẹ su ral᷊ungu Winohẹ Susi, ”Taumata kụ mangimang su Mawu Ruata sarang pẹ̌kakauhe ringangu Mawu Ruata e měngkai saụbe makoạ mapia e, taumata ene sarung mẹ̌biahẹ̌!”[1]

¹⁸Bọu sorga e Mawu Ruata nanodẹu ral᷊angehe su patikụ dosa ringangu karal᷊akisu taumata, batụu karal᷊akisẹ̌ e kai makạsahaghe taumata ta mẹ̌kiral᷊a těntiron Mawu Ruata kahěngang.

¹⁹Apang kinasingkateng u taumata mạanun Mawu Ruata e seng nal᷊ahẹ su ral᷊ungu naung u taumata, u Ruata hala e seng nělahẹ u ene su taumata.

²⁰U ren dokeng Mawu Ruata něndiadi dunia, manga kakakoạu Mawu Ruata kụ tawe ikasasilo e ute kai kararuatanʼE ringangu kawasanʼE seng nikahěnganeng u taumata wọu patikụ apang kinoạ e. Hakịu taumata e seng tawẹ banggilu ikapangěmping su pẹ̌sasal᷊an sire.

²¹ Taumata e masingkạu Mawu Ruata katewe taumata e tawe měngangadatʼi Sie kawe sěngkatau Ruata ringangu tawe makitatarimakasẹ si Sie. Ral᷊iune taumata e měmpạngěnnawe apan tạ kěhase; u sipirang i sire seng něngkarěndung.

²²I sire měpẹ̌pěndangu watangeng i sire e seng tạ u wẹ̌gane, kutẹu i sire kawe longong.

²³ Bal᷊inewe Ruata kakalẹ̌ sẹ̌sěmbaěng i sire, kaiso kawe manga patong mạngawẹ diadikang mẹ̌tate, kụ kai taumata, manga manụ u winalangeng, manga binatang laede ěpạ, dingangu binatang tụtondo.

²⁴Ual᷊ingu ene Mawu Ruata e napakawalan sire nipakahimatụ u kapulun naung i sire mědeạu mẹ̌koạ hal᷊ẹ̌ daral᷊aị, hakịu i sire měngkate měmpẹ̌kẹ̌koạ haghin lamuhụ lawọ i sire.

²⁵Mawu Ruata tutune e, niawengang i sire ringangu sěmbaụ konti. Bal᷊inewe Měndariadi e, kaiso kawe riadikang ene e mundangu sẹ̌sẹ̌mbaěng dingangu tětangkianeng i sire. Sěmbal᷊iau kawe Měndariadi ene e hinon daloěng sarang marěngụ-děngụ! Aming.

²⁶Ual᷊ingu taumata němpẹ̌koạ kerene, ute Mawu Ruata e němalan sire napẹ̌batụ u abul᷊in sire raral᷊aị. Manga wawinen sire selain tawe mawawuluʼn manga esẹ kerẹʼewe tundune su taumata, kaiso kawe mạbulun lawọ manga wawine.

²⁷Manga esẹ e mal᷊aing kerene; i sire němpamalan tundun esẹ su wawine tuhụ kakakoạ e tutune, kutẹu kawe kẹ̌kasahigangʼu lawọ esẹ. Manga esẹ e měmpẹ̌kẹ̌koạbe apa makạsamedẹ̌ su l᷊awọ esẹ, hakịu i sire makahombangke wawal᷊ise tuhụewe kakanoạ i sire e.

²⁸Ual᷊ingu taumata e makạpěndang u seng tawahal᷊uasu masingkạ u Ruata, tangu Ruata e měngkatewe namalan tiněnnan sire hala nipakaghoghahẹ̌, hakịu i sire měngkawe měmpẹ̌kẹ̌koạ apan tawe wotonge koateng.

²⁹Naung i sire napenẹu kěbị kararal᷊akisẹ̌, tạ katul᷊ide, napenẹu anggang, karal᷊amuhụ, panananoi, kapulu mamate, mẹ̌dal᷊ia, měngakal᷊ẹ̌, dingangu měndesọʼu une. I sire papuluang mẹ̌sampuhu taumata wal᷊ine,

³⁰měndal᷊aị arengu wal᷊ine; maobotẹ̌ dingangu tawẹ atorange, mạběnsingu Ruata[2] ringangu matataghunalang u mohong. Pelesa mẹ̌koạ dal᷊akisẹ̌. I sire rụdokạ matatimadẹ̌; i sire

³¹mạdiri katěguang; tawẹ satiane, ringangu wẹ̌gawe mẹ̌tatal᷊ěntụ u lawọ taumata.

³²I sire masingkạ u tumuhụ titan Mawu Ruata, i sain mẹ̌kẹ̌koạ patikụ ene e hinom pateěng. Maning kerene i sire mal᷊aing měmpẹ̌kẹ̌koạ lai manga hal᷊ẹ̌ ene dingangu lẹ̌lahimpuluang kereu piạ u wal᷊ine měmpẹ̌koạ kerene.