Read Sangir ROMA 11 Bible Online

ROMA 11 - Sangir bible

ROMA 11

¹ Iạ makiwal᷊o: Apa Ruata seng něnděmmẹu kawanuanʼE sẹ̌sane? Tantu tala! Iạ sẹ̌saku e tau Israel hěnton Abraham, dingangu wọu asal᷊i Benyamin.

²Tala! Mawu Ruata tawe měnděmmẹ u kawanuanʼE kụ seng nipilenʼE rokeng bọu tětạe. Manga anạ u sěmbaụ masingkạ apa mạbawohẹ su ral᷊ungu Winohẹ Susi e mạanun Elia, piạ i sie nangaduhang u tau Israel su Mawu Ruata. I Elia nẹ̌bera,

³ ”Mawu, taumata e seng němpamate manga nabinʼU ringangu němpěnggoghahẹ̌ manga tampạ pananěmbaěng si Kau. Kate iạ sẹ̌saku ringangu i sire mapulu měmpamate si siạ.”

⁴ Apạe sasimbahu Ruata si Elia? Ruata simimbangu, ”Iạ seng naněntangu pitu hiwu su kataune waugu watangeng-Ku sẹ̌saku. I sire wẹ̌dang tawe naněmba awẹ u Baal.”

⁵Kerene lai tempo ini: Piạ manga pirang katau apan nipilen Duata ual᷊ingu tatal᷊ěntụʼE.

⁶I Sie němile si sire tinuhụewe tatal᷊ěntụʼE kụ bal᷊ine timuhụ kakanoạ i sire. U kamageng u pinilen Duata e kai kahian kakanoạu taumata e ute tatal᷊ěntụ u Ruata e wal᷊inewe tatal᷊ěntụ patutune.

⁷Kụ kai kereapạe tangu? Kawanuan Israel tawe nakaěbạ apang kụ dẹ̌deakeng i sire. Kụ nakaěbạe kětạeweng i sire mahal᷊i apạewen pinilen Duata. Apam bal᷊ine e kal᷊awokang e nẹ̌tungkětịu těmbọ i sire su kakuin Mawu Ruata.

⁸ Batụu su ral᷊ungu Winohẹ Susi e mạbawohẹ kere ini, ”Mawu Ruata e napẹ̌tungkětịu naung dingangu tiněnnan sire; kụ sarang orasẹ̌ ini matan sire tawe makasasilo ringangu tul᷊in sire tawe makararingihẹ̌.”

⁹ I Daud mal᷊aing nẹ̌berau, ”Balạe manga sal᷊iwang i sire nakoạbe sedẹ baugʼi sire hala, ringangu nakoạbe wangka, kawawunsal᷊eng i sire ringangu mawinasa!

¹⁰Milumbạu matan sire marěndung tadeạu i sire tawe makasilo; ringangu milumbạko i sire měmpẹ̌bětụ sarang karěngụe.”

¹¹Iạ makiwal᷊o lai: Piạ tau Yahudi nanawo, apa ene nariadi tadeạu i sire mawinasa? Mambeng tala wue! Kaiso ual᷊ingu i sire němpẹ̌dosa ute, ěndọbe wansa wal᷊ine nipakasal᷊amatẹ̌, hakịu tau Yahudi e měmpẹ̌sẹ̌singking su wansa wal᷊ine.

¹²Ual᷊ingu tau Yahudi e němpẹ̌sal᷊a kụ tawe tumatuhụ kapulun Mawu Ruata, ute manga wansa wal᷊ine nial᷊amateng u Ruata. Něngalembo kate pẹ̌kakauhu taumatan Yahudi ringangu Mawu e saụbe nakoạ mapia, nal᷊ahẹu al᷊amatʼu Mawu e sarung ipẹ̌dal᷊embo.

¹³Kụ ini e mapiawe mẹ̌bisara su manga anạ u sěmbaụ kụ bal᷊ine Yahudi! Karěngụe ini, kere sěngkatau rarolohang baugu manga bansa wal᷊ine Yahudi, iạ e sěngapang botonge mang mẹ̌mewẹu pangkatẹ̌ku.

¹⁴Iạ mělẹ̌harapẹ̌u měnsang iạ deng makasingking su wansaku e hala, mědeạu ringangu ral᷊eng ene iạ e makasal᷊amatẹ̌be sěmbahageang bọʼi sire.

¹⁵Ual᷊ingu i sire kai nirěmmẹ u Ruata, ute pẹ̌kakauhu dunia ringangu Ruata e saụbe nakoạ mapia; kerene lai kamagengu i sire itarimạ u Ruata! Nal᷊ahẹu ene mẹ̌sul᷊ungu kere tau nate nẹ̌bangung kapia!

¹⁶Kereu kempang u borotẹ̌ kahumotongange seng nịgaghěllị su Ruata ene mangal᷊ene kasěllahu borotẹ̌ kěbị e mal᷊aing nighěllị su Mawu Ruata e lai. Kụ kereu hamụ u kalu e kai tataghuaneng u Ruata, ene mangal᷊ene manga lelang e mal᷊aing tataghuanengʼE.

¹⁷Sěmbahageang bọu manga lelang u kalun zaitun e — kụ kai kal᷊awọu tau Yahudi e — seng nitěnto. Kụ su ěnnạ u piněněntoěng ene sinuang lelang u mahang zaitun, kụ kai manga anạ u sěmbaụ apan bal᷊ine Yahudi. I kau nisuang sene mědeạu i kau makatemang patikụ apan mapia wọu pẹ̌bawiahẹ̌ marohkẹ̌ bọu apan tau Yahudi.

¹⁸Ual᷊ingu ene kumbahangbe i kamene měmpamalan sire apan seng nịsasape kere lelange ene. I kamene harusẹ̌ pẹ̌tahěndung u i kamene kětạeng lelange lai. Kụ bal᷊inewe lelange kụ mangonggọu kaěng su hamụe, kaiso kawe hamụe mangonggọu kaěng su lelang e.

¹⁹Kutẹu i kau sarung mẹ̌bera u, ”Ore, kai manga lelange ene nịpapotọ mědeạu iạ masuang su kalune!”

²⁰Ene kahěngang bue. Kai i sire nirěmmẹ ual᷊ingu i sire kai tawe nangimang, arawe i kau e nitarimạ, ual᷊ingu i kau nangimang. Kụ kumbahangbe měngobotẹ̌, ual᷊ingu ene; kaiso ěndokangbe i kau katakụ.

²¹Kai kereu Ruata e tawe tumal᷊ěntụ měnděmmẹu tau Yahudi mẹ̌sul᷊ungu manga lelang e tutune ene ute abe panikạu i Sie sarung makapěndang tumal᷊ěntụ kụ měnděmmẹ i kau!

²²Kụ sini e i kitẹ makasilo kai kereapa kapiane Ruata ringangu kai nạung lai kerene kahẹ̌gise lai i Sie. I Sie mahěgisẹ̌ si sire apan němpẹ̌dosa, kaiso i Sie mapia naunge si kau — asal᷊u i kau tatapẹ̌ měbẹ̌biahẹ̌ ual᷊ingu kapianʼE. Mạeng tala, ute i kau mal᷊aing sarung irěmmẹ.

²³Kụ mạanun manga tau Yahudi ene, kereu i sire měmpěngědo měmpẹ̌tumanạ tawe měmpangimang, ute i sire sarung itarimạ saụ; batụu Ruata e kawasa měnarimạ i sire kapia.

²⁴I kamene kụ apan asal᷊e wal᷊ine wọu Yahudi, ute kai kere lelang u kalun zaitun dul᷊u. Kụ kereu i kamene kawe tawe nẹ̌sěndal᷊engu kakakoạ i kamene kerene ute wotonge isuang su zaitun kahěngang rumakeleng kate tau Yahudi kụ isẹ̌sihing su lelang u zaitun kahěngang ene. Limembo laing kal᷊awọe su Ruata mapẹ̌sul᷊en sire su kalun zaitun kahěngang.

²⁵Manga anạ u sěmbaụ! Iạ mělẹ̌harapẹ̌ i kamene kumbahang mẹ̌pěndang seng masingkạu kěbị-kěbị. Batụu piạ hal᷊ẹ̌ sěmbaụ kụ ikẹ̌kapulun Duata, kụ deng tawe nikẹ̌kasingkateng u taumata. Kụ kapuluku e tangu mědeạu i kamene masingkạ u ini: Sěnggạ bọu taumatan Yahudi e mẹ̌tẹ̌tungkětịu těmbọ i sire, kaiso kakakoạ i sire kerene e kětạeng sarang kal᷊awọu taumata apam bal᷊ine Yahudi masue mahunděnta sol᷊ong anun Duata.

²⁶ Ual᷊ingu kawe kerene ute kěbị taumatan Yahudi e sarung masal᷊amatẹ̌. Batụu su ral᷊ungu Winohẹ Susi e mạbawohẹ kere ini, ”Datu Mananal᷊amatẹ̌ e sarung duměnta wọu Sion; i Sie sarung mangěmmụ patikụ karal᷊aị bọu hiten Yakub.

²⁷ Iạ sarung mangikị pẹ̌kakẹ̌do ene ringang i sire, su tempong Iạ mangampung manga rosan sire.”

²⁸Ual᷊ingu tau Yahudi mạdiri manarimạ u Injilẹ̌ bọu Ruata tangu i sire nakoạ sědụ u Ruata; kụ ene kai mariadi kal᷊auntung su manga anạ u sěmbaụ apan bal᷊ine Yahudi. Kaiso ual᷊ingu pinilen Duata, ute manga tau Yahudi ene mang ikẹ̌kěndagu Mawu Ruata baugu i upung i sire.

²⁹Batụu kereu Ruata e namile taumata ringangu nangal᷊amatẹ̌ tau ene, Ruata e tawe mangul᷊e apang kụ seng nịkakoạʼE.

³⁰Nạung kangerẹ i kamene tawe tumatuhụ Duata. Arawe ini e Ruata seng nělahẹ u i kamene seng nal᷊iwirẹ̌ bọu pẹ̌sasal᷊a, u tau Yahudi tawe tumatuhụ.

³¹Kerene lai kal᷊awọu tau Yahudi ene. Orasẹ̌ ini e i sire tawe tumatuhụ su Ruata, mẹ̌deạu i kamene mal᷊ahẹ bue mal᷊iwirẹ̌ bọu pẹ̌sasal᷊a. Kai i sire sarung lai[15] iapakal᷊ahẹ batụu nal᷊iwirẹ̌ bọu pẹ̌sasal᷊a.

³²Batụu Ruata seng namalan patikụ taumata nipẹ̌kawasaěng u ral᷊awang, mědeạu i Sie makapělahẹ kakěndagʼE si sire kěbị.

³³ Kai apạ e kawantugẹ̌ kakakalạ u Ruata! Mambeng masěllahẹ̌ katatahuěnna ringangu kasingkạʼE! I sai wue makasẹ̌sui manga putusangʼE! I sai wue makaěnna manga kakakoạ u munaranʼE?

³⁴ Su ral᷊ungu Winohẹ Susi e mạbawohẹ kere ini, ”I sai wue nakaěnna tingirang u Mawu? I sai wue makatẹ̌gu si Sie?

³⁵ I sai wue wọu nangonggọu u apa-apa su Mawu hakịu makapanuntụ bawal᷊isʼE?”

³⁶ Kai Ruata e něndiadi patikụ sabarang. Patikụ ene asal᷊e kai wọu anun Duata kụ kai waugu Ruata. Dalo su Ruata sarang kakalẹ̌! Aming.