Read Sangir ROMA 12 Bible Online

ROMA 12 - Sangir bible

ROMA 12

¹Manga anạ u sěmbaụ! Mawu Ruata e měngkai mapia si kitẹ. Kai ene hakịu iạ mědẹ̌dorong sěngapam botonge tadeạu i kamene měmpaněmban batangeng i kamene makoạ sěmbaụ sasěmba wiahẹ̌ kụ natěntani waugu Ruata ringangu makạl᷊uasẹ̌ naungʼE. Pal᷊ahamawung kamene su Ruata e hinone kerene.

²Kumbahang měngkai tụtol᷊e kapulun dunia. Balạe Ruata mapẹ̌bal᷊uing kamene makoạ taumata wuhu, tadeạu i kamene mẹ̌bal᷊ui. Kụ ual᷊ingu i kamene makạkasingkạu kapulun Duata apang kụ mapia ringangu makạl᷊uasẹ̌ naungʼE ringangu masukụ.

³Mawu Ruata e seng nangonggọu al᷊amate si siạ. Kai ene hakịu iạ manasa si kamene kěbị: Kumbahangbe watangeng mangěnna limembong karangẹ e wọu tiasa lẹ̌ěnaěng. Pěmpẹ̌pěndang batangenge ringangu kasanạu naung; pasịpěndang batangeng e tuhụ kuate nionggọu Ruata si sie kahiạen pangangimange si Yesus.

⁴ Badang i kitẹ e lawọ laese, apan laese piạ munarane sěngkatau-sěngkatau.

⁵Kerene lai i kitẹ. Maning i kitẹ kěbị e mal᷊awọ, kaiso i kitẹ e mạngawẹ badan sěmbaụ ual᷊ingu i kitẹ e nasěmbaụ kụ dingangi Kristus. Dingangu i kitẹ e sěngkatau-sěngkatau piạ pěral᷊ahěmpukange sěmbaụ suwal᷊ine kere manga l᷊aese wọu wadan sěmbaụ.

⁶ I kitẹ pẹ̌sěngkatau-pẹ̌sěngkatau e nahiạ u manga al᷊amatʼu pẹ̌tatangkiang kụ mẹ̌tẹ̌tatěntang. Manga al᷊amatẹ̌ ene nionggọ u Ruata si kitẹ tinuhụewe tatal᷊ěntụʼE. Batụu ene i kitẹ harusẹ̌ mẹ̌pakẹu manga al᷊amatẹ̌ ene. I saing kụ piạ al᷊amatʼu měhabarẹ̌ʼu Injilẹ̌ bọu Ruata harusẹ̌ maněpasʼu habarẹ̌ ene tinuhụewe ikaumal᷊ʼu watangeng e.

⁷I saing kụ piạ al᷊amatʼu mẹ̌tangkuang taumata wal᷊ine, harusẹ̌ sěngapam botonge mẹ̌tangkuang taumata wal᷊ine. I saing kụ piạ al᷊amatʼu maněntiro, harusẹ̌ sěngapam botonge maněntiro.

⁸I saing kụ piạ al᷊amatʼu manasa taumata wal᷊ine, harusẹ̌ sěngapam botonge manasa taumata wal᷊ine. I saim piạ al᷊amatʼu mangonggọ apa-apa tẹ̌taghuaneng e su taumata wal᷊ine e, harusẹ̌ měmpẹ̌koạ ene ringangu kasěllahu ral᷊ung u naung kere hinone. I saing kụ piạ al᷊amatʼu mangahạ, harusẹ̌ sěngapam botonge mangahạ. I saing kụ piạ al᷊amatʼu tumal᷊ěntụ u taumata wal᷊ine ute hinong mẹ̌koạ ene ringangu karal᷊uasʼu naung.

⁹Pẹ̌kakakěndagẹ̌ko tuhụ kapian naungu. Kěngkawěnsing u apan dal᷊akị, dingangu pěmpangumpaedẹ̌ su apang kụ mapia.

¹⁰Mapiangbe manga anạ u sěmbaụ pẹ̌kẹ̌kakěndagẹ̌ sěmbaụ su wal᷊ine pakapapia kerẹewe pẹ̌kakakěndagu pẹ̌sěntamahuariang su wal᷊e sěmbaụ, dingangu pěmpẹ̌kakal᷊imona měmpẹ̌papangadatẹ̌.

¹¹Pakararading měmpěhal᷊ẹ̌. Abe pěmpěmalasẹ̌. Pěmpamunara waugu Mawu ringangu kuatʼu Rohkẹ̌ u Ruata.

¹²Mapiangbe i kamene pěharapẹ̌ su Mawu ringangu ral᷊uasẹ̌, pakasasabarẹ̌ su ral᷊ungu susa ringangu pakakakědang mẹ̌kal᷊iomaneng.

¹³Pẹ̌papangontol᷊ẹ̌ su pandungang u manga taumatan Sahani wal᷊ine, ringangu pěmpanarimạ manga anạ u sěmbaụ tamba pangangimang kụ tawe nikakiral᷊ang kamene, ringangu naung mal᷊uasẹ̌ su ral᷊ungu wal᷊enu.

¹⁴ Pěmpẹ̌gause su Mawu Ruata tadeạu i Sie měngal᷊amatẹ̌ taumata apan měmpẹ̌tẹ̌tingkaị si kamene. Ore, pẹ̌dorong tadeạu Mawu mangal᷊amatẹ̌ si sire, abe pěmpěngane.

¹⁵Pahul᷊uasẹ̌ dingangu taumata apan mạhul᷊uasẹ̌, kụ pěmpahunsangị dingang i sire apan mạhunsangị.

¹⁶ Pěmpẹ̌biahẹ̌ pẹ̌sěngkanaung sěmbaụ su wal᷊ine. Abe kawe měmpanodẹu naung marangẹ, kaiso pẹ̌tarangkom batangeng u ringangu taumata masasanạ pangkate.[16] Abe sasahingkạ bọu apang hinone.

¹⁷Kereu piạu měmpẹ̌koạ dal᷊aị si kamene abeko wal᷊ise ringangu ral᷊aị. Pěmpẹ̌koạ apang kụ lẹ̌ěnnang mapia su kěbị taumata.

¹⁸Bọu sěmběkanu, pěhingidẹ̌ko sěngapam botonge mẹ̌deạu mẹ̌biahẹ̌ marame ringangu kěbị taumata.

¹⁹ Manga anạ u sěmbaụku! Kumbahang-bahang mamal᷊isẹ̌ une, balạe Mawu Ruata pěhukung. Batụu su ral᷊ungu Winohẹ Susi e mạbawohẹ, ”Kai Iạ e měmal᷊isẹ̌. Iạ e sarung mělahukung e angkuěng u Mawu.”

²⁰ Katewe kereu sẹ̌dụ u e nahutung, onggoteng beng kaěng e i sie; dingangu kereu narou, ute onggotengbeng inumang e i sie. Ual᷊ingu pẹ̌kakoạ i kamene kerene, ute i kamene mapakamean sie.

²¹Abe pěmalam batangeng u pakawatạu apan dal᷊aị, kaiso mapiangbe i kau pěmatạko ral᷊aị dingangu kapia.