Read Sangir ROMA 13 Bible Online

ROMA 13 - Sangir bible

ROMA 13

¹Pẹ̌sěngkatau hinone matuhụ su těmbonang e, batụu tawẹ apa těmbonang u kawanua e kụ ta nakaěbạ kawasane wọu Ruata. Dingangu pěmerenta orasẹ̌ ini e mẹ̌děndal᷊engu kawasane ual᷊ingu parentan Duata.

²Kai ene hakịu taumata kụ lụlawang pěměrenta e iwerạe u mẹ̌sul᷊ungu lụlawang apang kụ seng ilẹ̌atoru Mawu Ruata. Kụ i saing mẹ̌kẹ̌koạ kerene sarung makahombang hukumang.

³Batụu i saing kụ mẹ̌koạ mapia e tawahal᷊uasu matakụ su pěměrenta. Kětạeng i saing kụ mẹ̌koạ dal᷊aị e kawe hinong matakụ. Kereu i kamene mapulu tadeạu i kamene tawe matakụ su pěměrenta ute i kamene pẹ̌koạe mapia, kụ i kamene sarung daloěng.

⁴U pěměrenta e kai ěllang u Ruata kụ měmunara mạpakapiang kamene. Kai kamageng u i kamene měmpẹ̌koạ dal᷊aị, ute hinone i kamene matakụ si sie, u wal᷊inewe měngkai sia-sia kawasane měhukungu taumata. I sie kai ěllang u Ruata, kụ mapakạnawong hukumang u Ruata su manga taumata apang mẹ̌kẹ̌koạ dal᷊aị.

⁵Kai ene hakịu i kamene hinong sumasuměllung su pěměrenta — wal᷊inewe kětạeng ual᷊ingu i kamene mạdiring ihukung, kaiso kai ual᷊ingken pěndangu ral᷊ungu naung i kamene.

⁶ Kụ kai ene mal᷊aing banggilu kawe unụe i kamene mạmaehẹ̌ pajakẹ̌, batụu pěměrenta e kai sawohị u Ruata kụ mẹ̌děndal᷊eng u munara ini natuntụ.

⁷Kụ pěmpěmaehẹ̌ bue apang hinong baehang i kamene e su pěměrenta. Kụ pěmpěmaehẹ̌be pajakẹ̌, kereu i kamene hinong i pěmaehẹ̌ pajakẹ̌, dingangu pěmpěmaehẹ̌be bea kereu i kamene hinong i pěmaehẹ̌ bea. Pakahunggeẹ̌ bue si sire apang ilẹ̌lahunggeẹ̌, dingangu pěngadatẹ̌ bue si sire apang hinong lẹ̌adateng.

⁸Kumbahang bue měmpangutang manga apa si sai-sai, sul᷊ikudu mẹ̌tahěndung kakěndagẹ̌ sěmbaụ su wal᷊ine. Kụ i saing kuměndagu kasanggidange, seng nakasukụ kal᷊awọu toratʼi Musa.

⁹ Batụu toratʼu Yahudi e, kai: Kumbahang mawuang, kumbahang mamate, kumbahang mẹ̌tako, kumbahang měnning u rarotong u kasanggidangu. Patikụ ene seng nasahiangkung dingangu toratẹ̌ bal᷊ine seng nakomol᷊ẹ̌ nakoạ sěmbaụ, ”Kěndagʼu kasanggidangu kere i kau kuměndagu watangengu.”

¹⁰I saing kuměndagʼu taumata wal᷊ine e, tawe mẹ̌kakoạ dal᷊akị su tau ene. Kụ i saing kuměndagu kasanggidange ute kai taumata kụ seng nakasukụ patikụ titang agama.

¹¹Sul᷊ikudeweng kěbị ene i kamene masingkạ u tempo ini kai orasu i kamene hinong měngkapuko wọu pẹ̌tatikị. Batụu tempone mědeạu i kitẹ iapakasal᷊amatẹ̌ e seng limembong kasanggide orasẹ̌ ini wọu tempong i kitẹ buhụe mạngimang.

¹²Hěbi e seng kạkal᷊iune; kụ seng marani lai mạěllo. Kụ mapiawe i kitẹ měmpangẹ̌dọ mẹ̌koạ manga kakanoạ marěndung. I kitẹ e hinong měmpẹ̌papangaghidu watangeng i kitẹ dingangu aghidu tualagẹ̌.

¹³I kitẹ hinong měmpẹ̌koạ manga hal᷊ẹ̌ mawantugẹ̌ kere kẹ̌koateng u taumata su ěllo mal᷊ětu; abe kawe mạhěmpal᷊iu měmpẹ̌sal᷊iwang, arau měmpẹ̌těngkiwukang. Abe pěmpẹ̌sahigẹ̌ arau tawẹ adate. Abe pěmpẹ̌kakoka, arau lai abe pěmpẹ̌dal᷊ahirị.

¹⁴Balạe Mawu Yesus Kristus pěnantu apa hinong koateng i kamene. Ringangu kumbahang tumuhụ tabietʼu taumata marosa makạsahowong pẹ̌bawatụ kapulung ěnningu sahigẹ̌.