Read Sangir ROMA 14 Bible Online

ROMA 14 - Sangir bible

ROMA 14

¹ Taumata kụ tawe maiaking suapang hinong pangangimange harusẹ̌be tarimạ dingangu mapia sutal᷊oarang manga anạ u sěmbaụ. Kumbahang mẹ̌darendehẹ̌ dingange ual᷊ingu kapulun naunge.

²Piạbe taumata měpẹ̌pěndang u i sie wotonge kumaěng balạewe apa kanengang. Kai piạbe lai taumata wal᷊ine pangangimange lome; i sie měpẹ̌pěndang u i sie kětạeng botonge mẹ̌dukụ matagẹ̌.

³I saing kụ kaěnge waharia wue ute abe mapakasanạu taumata apang kụ kụkaěng kaěng mạtuntụ e, abekowe lai mapẹ̌sal᷊an taumata apang kaěnge waharia e watụ u Mawu Ruata e seng něnarimạ i sie.

⁴Kụ i sai wue i kau hakịeweng i kau e měhukung u ěllang u tau wal᷊ine? Měnsang ěllang ene mạbatang arau rụdarisị bue, ute kai urusangu mawune. Kụ ěllang ene mambeng sarung dumarisị matei, ual᷊ingu Mawu e kawasa mapararisị i sie apakatei.

⁵Piạ taumata makạpěndang u piạ sahěllo e limembong kapiane wọu manga ěllo wal᷊ine, arawe taumata wal᷊inẹ e wue mẹ̌pěndang u kěbị ěllo ene mang mẹ̌sul᷊ung. Balạe sěngkatau-sěngkatau e pakasahẹkon pěndangu sěmbaụ-sěmbaụ.

⁶I saing kụ mẹ̌sẹ̌sěmpị u ěllo tinantu e, tau ene měkẹ̌koạ kerene e waụgu měngěngadatẹ̌ Mawu, ual᷊ingu i sie makitarimakasẹ su Mawu Ruata waugu kaěng ene. Kerene lai i saing kětạeng kụkaěng kaěng mạtuntụ e tau ene mal᷊aing měngěngadatẹ̌ Mawu ringangu makịtarimakasẹ su Mawu Ruata.

⁷Tawẹ u sarang sěngkatau wọʼi kitẹ kụ mẹ̌bẹ̌biahẹ̌ baugu watangenge hala ringangu tawẹu sarang sěngkatau wọʼi kitẹ kụ mate waugu watangenge hala.

⁸Kereu i kitẹ biahẹ̌ ute i kitẹ e wiahẹ̌ baugu Mawu. Dingangu kereu i kitẹ e mate, i kitẹ lai mate, waụgu Mawu. Kụ biahẹ̌ arau mate, i kitẹ e tataghuanengu Mawu.

⁹I Kristus seng nate ringangu nẹ̌biahẹ̌ kapia kai ene hakịu i Sie nakoạ Mawum patikụ taumata wiahẹ̌ dingangu waugu patikụ taumata nate.

¹⁰ Kụ manga anạ u sěmbaụ! Baugu apa mapẹ̌sal᷊ang anạ u sěmbaụ kụ tamba pangangimang? Dingangu waugu apa i kau mapakasanạ i sie? I kitẹ kěbị e sarung mẹ̌tẹ̌ngon Duata e mẹ̌deạu ihukung.

¹¹ Su ral᷊ungu Winohẹ Susi e mạbawohẹ, ”Katěngadewen,” angkuěng u Mawu, ”sěngkatau-sěngkatau sarung měmpẹ̌tumpěkuhẹ̌ su těngo-Ku, kụ apan taumata sarung mangaku u Iạ e kai Ruata.”

¹²Kụ i kitẹ sěngkatau-sěngkatau hinong masị simbang u patikụ kakanoạ i kitẹ su Ruata.

¹³Ual᷊ingu ene kuhạe i kitẹ mẹ̌tatokeng sal᷊a. Ěndokangbe pěmpẹ̌tatẹ̌tehẹ̌ tadeạu i kamene tawe mẹ̌koạ apa-apa kụ makakoạ sasal᷊ukạ su anạ u sěmbaụ tamba pangangimang kụ manawo su rosa.

¹⁴Ual᷊ingu iạ nakauhẹ̌ dingangu Mawu Yesus ute iạ mangimang kahěngang u tawẹ kạdiongeng apa kụ nẹ̌buạ bọu lamuhụ, kaiso pẹ̌kakoạ kerene kawe mal᷊amuhụ su pẹ̌sěngkatau kereu tau ene mạngěnna u kawe mal᷊amuhụ.

¹⁵Kai kamageng ual᷊ingu apa ipẹ̌bẹ̌biahu kụ kai makatědụ naungu sěngkatau wọu manga anạ u sěngkataunu tamba pangangimang ute i kau sembeng lai tawe kiměndagẹ̌. Kereu i Kristus seng napohong baugu pẹ̌sěngkatau, ute kumbahang i kau mapakawalan tau ene apakasilakạ u apang kẹ̌kanengangu.

¹⁶Hakịu ene kumbahang měmalang apang mapia si kamene itẹ̌tiněnna ral᷊akị su taumata wal᷊ine.

¹⁷Kai kereu Ruata e měngatorẹ̌ biahu pẹ̌sěngkatau, apang botonge kanengang dingangu inungange, ene wal᷊inewe kahumotongange. Kahumotongange ute kai tau ene tụtuhụ bue kapulun Mawu Ruata, piạ karal᷊enehu naung dingangu makạtarimạu ral᷊uasẹ̌ ilẹ̌onggọu Rohkẹ̌ u Ruata e.

¹⁸I saing mẹ̌tẹ̌tangkiang si Kristus kerene ute tau ene makạl᷊uasẹ̌ naung u Ruata ringangu lẹ̌adateng u taumata wal᷊ine.

¹⁹Batụu ene timonang kitẹ e měngkai sěntiniạ[17] makạkaděntan pẹ̌gaghaghighilẹ̌ dingangu mẹ̌dẹ̌dal᷊ahengkeng.

²⁰Kumbahangbe, kawe ual᷊ingu kakaěng, i kau kawe makaghoghahẹ̌be apan seng kinoạu Ruata. Kěbị kaěnge tawẹ apawe pělline waugu kanengang. Kai kereu apang kanengangu makakariadin taumata wal᷊ine mẹ̌baradosa, ute i kau e mamben nẹ̌sal᷊a.

²¹Mapiawe abe kinạ gẹ̌sin binatang arau měmpanginung anggorẹ̌ arau měmpẹ̌koạ katatanggaěng baugu anạ u sěngkatau tamba pangangimang.

²²Balạe apang lẹ̌imangengu ene, koạ e ene su těngon Duata samatang baugu watangengu. I sain makạpěndang u tawẹ sangkonangu pẹ̌sasal᷊a suapang kụ nihino su naunge ute kariangkamang bue tau ene.

²³Arawe i saing kụ pěndange mẹ̌bẹ̌bimbong baugu kumaěng manga apa, kai samurine kimaěng bue kaěng ene, ute tau ene ipẹ̌sal᷊an Duata; batụu tawe kinoạ e tuhụ pangangimange mạanung apa kụ nihino ringangu nẹ̌sal᷊a. Kụ apạewen nịkakoạ su l᷊ikudu pangangimange ute rosa.