Read Sangir ROMA 16 Bible Online

ROMA 16 - Sangir bible

ROMA 16

¹Iạ e kai mapulu mapakasingkạu wawineng kitẹ i Febe. I sie měnẹ̌nongka mẹ̌tangkuang jamaatẹ̌ su Kengkrea.

²Tarimạko i sie makoạ sěngkatau ral᷊ohon jamạatʼu Mawu. Mambeng kerene kakakoạu taumata mạngimang su Mawu e hinong měnarimạu sěmbaụ su wal᷊ine. Lẹ̌ontol᷊e wue i sie, kereu i sie mẹ̌gẹ̌gausẹ̌ tul᷊umang bọʼi kamene, ual᷊ingu i sie sẹ̌sane seng nẹ̌tul᷊ung lawọ taumata — sul᷊iung iạ.

³ Pěmpaul᷊ịkon tabeạku si Priskila rẹ̌duan Akwila, manga hapịku kụ sěngkahal᷊ěkang baugʼi Kristus Yesus.

⁴I sire maraning mairị ual᷊ingu mapulu měngambang siạ. Iạ makitarimakasẹ si sire — kụ bal᷊inewe kětạeng sẹ̌saku kai kěbị jamaatẹ̌ maning bal᷊ine tau Yahudi e mal᷊aing makịtarimakasẹ si sire.

⁵Pěmpaul᷊ikon lai tabeạku su jamaatẹ̌ apan nakomol᷊ẹ̌ su wal᷊en sire. Tabeạku si Epenetus i kẹ̌kěndagẹ̌ku. Kai i sie tau kahumotongange mạngimang si Kristus su wanuang Asia.

⁶Tabeạku lai si Maria. I sie seng nẹ̌těngkasaghedẹ̌ kahěngang baugʼi kamene.

⁷Pěmpaul᷊ịkon lai tabeạku si Andronikus rẹ̌duang Yunias.[18] I sire e kai wansa sěmbaụ dingangku mase lai nạung sěngkatahungkụ dingangku. Kal᷊imonang iạ mạngimang si Kristus, i sire e sen těbe mạngimang. I sire piạ areng i sire sutal᷊oaram manga rasulẹ̌.

⁸Tabeạ si Ampliatus kụ i kẹ̌kěndagẹ̌ku ual᷊ingu i sie ringangkewen iạ e seng nasěmbaụ dingangu Mawu.

⁹Pěmpaul᷊ịkon tabeạku si Urbanus ringang i kitẹ e kụ němunara ringang i kitẹ baugʼi Kristus. Dingangu tabeạku si Atakhis i kẹ̌kěndagẹ̌ku.

¹⁰Tabeạ si Apeles. Kasatiane si Kristus seng limětạ. Tabeạ lai su ral᷊ohon bal᷊en Aristobulus,

¹¹dingangu si Herodion. Iạ e kai wansa sěmbaụ dingange. Tabeạku lai su manga anạ u sěmbaụ tamba pangangimang sural᷊ohon bal᷊en Narkisus.

¹²Tabeạku si Trifena ringang i Trifosa kụ nẹ̌těngkasaghedẹ̌ nẹ̌tangkiang Mawu, ringangu si Persis i kẹ̌kěndagẹ̌ku e. I sie lai seng nẹ̌těngkasaghedẹ̌ kahěngang baugu Mawu.

¹³ Tabeạ si Rufus dingang i ninange, kụ si siạ e al᷊ingkai i ninangku sẹ̌saku. I Rufus kai tau pinilen Mawu kụ dẹ̌daloěng.

¹⁴Pěmpaul᷊ịkon tabeạku si Asinkritus, Flegon, Hermes, Patrobas, Hermas dingangu kěbị anạ u sěmbaụ tamba pangangimang dingangkewen sire.

¹⁵Tabeạku si Filologus rẹ̌duan Yulia; si Nereus dingangu wawinene si Olimpas dingangu kal᷊awọu taumata mạngimang kụ dingangkewen sire.

¹⁶Pěmpẹ̌papangadatẹ̌ pakapapia, sěmbaụ su wal᷊ine al᷊ingkai anạ u sěmbaụ Sahani. Patikụ jamaatʼi Kristus měmpẹ̌děndingọu tatabeạ i sire su manga anạ u sěmbaụ.

¹⁷Manga anạ u sěmbaụ! Iạ mědẹ̌dorong sěngapang botonge: Pěmpẹ̌teghang ben sire apan makakạděntan pẹ̌sasitori ringangu makapẹ̌gěnggohaeng pangangimang u taumata su Mawu. Hal᷊ẹ̌ ene mẹ̌tẹ̌tatěntang u apan seng nitěntiro si kamene. Pěmpẹ̌tal᷊ikudẹ̌ ben taumata kerene.

¹⁸Batụu taumata kụ mẹ̌kẹ̌koạ kerene wal᷊inewe mẹ̌munara waugʼi Kristus Mawung kitẹ, kaiso mědeạu makawatụ kapulun naung i sire hala. Ual᷊ingken bawodaị dingangkewen manga wawera mal᷊ěnggihẹ̌ e i sire měmpạngakal᷊ẹ̌ apan taumata kụ běgawen manga apa-apa.

¹⁹Kěbị taumata seng masingkạ u i kamene satia su těntirong Injilẹ̌ bọu Ruata. Kụ iạ mal᷊uasẹ̌ su hal᷊ẹ̌ u kakakoạ i kamene. Iạ mapulu tadeạu i kamene mapapelẹesa su manga hal᷊ẹ̌ mapapia, ringangu longong, su manga hal᷊ẹ̌ daral᷊aị.

²⁰Mawu Ruata kụ nangonggọu karal᷊unsemahẹ̌ su taumata, sarung mal᷊ighạ měměllọ u setang su al᷊ungu kawasanu ringangu mapakawinasa. Milombọko manga anạ u sěmbaụ hanesẹ̌ lẹ̌al᷊amateng i Yesus Kristus Mawung kitẹ.[19]

²¹ I Timotius, hapịku, makịpaul᷊ịu tabeạ e si kamene, kerene lai i Lukius, i Yason dingangu i Sosipater, kụ tamba wansaku.

²²Kụ namohẹ suratẹ̌ ini e kai iạ i Tertius. Iạ e měhabaren tabeạu anạ u sěngkatau si kamene.

²³ I Gayus něndohọen tabeạ si kamene. Iạ mạnumpang su wal᷊ene ringangu jamaatʼi kami lai měmpẹ̌tẹ̌tahamawu lai sene. I Erastus těmbonang u urusang u roitu wahageang soa něndohong tabeạ si kamene. Kerene lai anạ u sěmbaụ i kitẹ i Kwartus. [

²⁴Milombọko Mawung kitẹ i Yesus Kristus měngal᷊amatẹ̌ si kamene kěbị. Aming.]

²⁵Daralo su Ruata! I Sie kawasa manoghasẹ̌ pangangimang i kamene mạtuhụ su Injilẹ̌ bọu Mawu Ruata kụ takụ ilẹ̌habarẹ̌ mạanun Yesus Kristus. Iạ mạngekeng habarẹ̌ ene e mạtuhụ kere ilẹ̌lahẹu Ruata e su hal᷊ẹ̌ u karakin Duata kụ seng hakịu ghěnnangu hasụe su taunge karẹ̌ngụe tawe nịkasingkatengu taumata.

²⁶Arawe ini, su parentang Duata kakalẹ̌, karaki ene seng niapakal᷊ahẹ dingangu niapakasingkạ su patikụ bansa, su ral᷊ungu manga winohẹ u nabi, tadeạu i sire kěbị mangimang dingangu matuhụ su Ruata.

²⁷Mang i Sie sẹ̌sane Ruata, i Sie su wowon patikụ tahuěnna. Milombọko i Sie iapakawantugẹ̌ marangẹ sarang marěngụ-děngụ su ral᷊ung i Yesus Kristus! Aming.[20] Adatʼi kami, Paulus, ěllang i Kristus Yesus