Read Sangir ROMA 5 Bible Online

ROMA 5 - Sangir bible

ROMA 5

¹Ini i kitẹ seng saụ nẹ̌sěngkapian Duata, ual᷊ingu i kitẹ nangimang. Kụ ual᷊ingu ene ute i kitẹ nẹ̌biahẹ̌[4] su ral᷊ungu pẹ̌darame ringangu Ruata wọu Mawung kitẹ i Yesus Kristus.

²Ual᷊ingu i kitẹ mạngimang su Mawu Yesus ute i Sie makạdiading kitẹ e makạpěndang kakěndagu Mawu Ruata, kụ kai ual᷊ingu kakěndagẹ̌ ene e i kitẹ biahẹ̌ tempo ini. Ual᷊ingu ene i kitẹ mạhul᷊uasẹ̌[5] ual᷊ingu i kitẹ piạbe pělaharapẹ̌ u i kitẹ e sarung makatemang karal᷊uensang kụ nighěllị u Mawu!

³Dingangu nangělembo wọu ene i kitẹ e kai lumiagẹ̌[6] u su ral᷊ungu kasasigěsạ, batụu i kitẹ masingkạ u kasasigěsạ e makạdiadi taumata maasagẹ̌,

⁴dingangu kal᷊aasagẹ̌ e makạdiadi taumata makạkědang; ini e kai makạděntang pělẹ̌harapẹ̌.

⁵Pẹ̌laharapẹ̌ kere ini e tawe mapakakěllohi kitẹ, batụu naung i kitẹ seng nilohoěng u Mawu Ruata ringangu kakěndagʼE. Mawu Ruata něnganoạ ene ringangu karadiahangu Rohkẹ̌ʼE, kụ seng nighěllị si kitẹ.

⁶Su tempọeng i kitẹ su ral᷊ungu karalome, i Kristus e nate waugi kitẹ kụ su tempone mapia tinantun Mawu Ruata; sěmbal᷊iau i kitẹ taumata e kai marau wọu anun Mawu Ruata.

⁷Baugu pẹ̌sěngkatau taumata adilẹ̌ e mamben masigěsạ taumata mapulu mate. Aramanung baugu sěngkatau mapia, piạ lai taumata wahani mẹ̌tumpate.

⁸Arawe Mawu Ruata nělahẹu kakěndagʼE si kitẹ su tempong i Kristus napohong baugi kitẹ su tempong i kitẹ bědang taumata marosa.

⁹Ini e i kitẹ seng nẹ̌sěngkapian Duata ual᷊ingu kapapohong i Kristus; ual᷊ingu ene těngadẹ̌ i kitẹ e sarung iapakasal᷊amatẹ̌ lai wọu ral᷊angehu Mawu Ruata kahiang Kristus.

¹⁰Kereu su tempong i kitẹ mẹ̌sẹ̌sẹ̌dụ u Mawu Ruata; i kitẹ e iapẹ̌damen Sie ual᷊ingkeng kapapohong u AhusʼE, apa lai ini sarạeng pěkakauhi kitẹ dingangu Mawu Ruata e naul᷊ị kapia, tantu i kitẹ sarung iapakasal᷊amatẹ̌ lai ual᷊ingu pẹ̌bawiahi Kristus.

¹¹Kụ limembo wọu ene tangu i kitẹ mahul᷊uasẹ̌ lai su kapian Duata ual᷊ingu Mawung kitẹ i Yesus Kristus. U kai ual᷊ingu i Yesus Kristus, orasẹ̌ ini i kitẹ makạtemang pẹ̌kakauhi kitẹ mapia e ringangu Mawu Ruata.

¹² Dosa simuẹ̌ su ral᷊ungu dunia ual᷊ingu sěngkatau, kụ bọu rosa ene siměpụe papate. Něnggạe, papate timẹ̌pasẹ̌ su patikụ taumata, batụu kěbị taumata seng nanawo su ral᷊ungu rosa.

¹³Dokeng toratʼu Yahudi e reng tawe nịgaghěllị, dosa e seng ene su ral᷊ungu dunia. Kai tangu rosa e tawe tatuntukang, ual᷊ingu tawẹ apa toratẹ̌ kụ botonge lampaěng.

¹⁴Maning kerene, wọu tempong Adam sarạewen tempom Musa e, papate nangawasa patikụ taumata. Sarangkatewe taumata kụ tawe limawang kere kinoạ i Adam taumata kerene mal᷊aing nipẹ̌kawasaěngu papate. I Adam mal᷊aing tul᷊adang apang bọʼi Sie kụ sarung duměnta samurine.

¹⁵Kai i rẹ̌dua ene e tawe nẹ̌sul᷊ung; batụu laonggọ u Ruata e nangělembong kasěllahe kereu isihing dingangu ral᷊awang kụ kinoạ i Adam. Dal᷊awang u sěngkatau nakawodaị taumata l᷊awọ nihombangengu papate. Nangělembong kasěllahe lai něnggạ u tatal᷊ěntụ u Ruata ringangu laonggọ kasasal᷊amatẹ̌ kụ nịgaghěllị su taumata kereng kakěpal᷊e, ual᷊ingu kapian naungu sěngkatau mangal᷊ene i Yesus Kristus.

¹⁶Laonggọ u Ruata mal᷊aing nangělembong kasěllahe marau wọu rosan sěngkatau ene. Batụu samurin sěngkatau nẹ̌koạ dal᷊awang ute simẹ̌bangke ponesẹ̌, ”Nẹ̌sal᷊a”. Kai sarạeng taumata lawọ e němpẹ̌dosa, narěntạe laonggọ bọu Ruata kụ mělẹ̌lahẹ, ”Tawe nẹ̌sal᷊a”.

¹⁷Ual᷊ingu ral᷊awang u sěngkatau, ute papate nẹ̌darakị su apan tampạ ual᷊ingu sěngkatau ene. Kai nangělembong kasěllahe lai něnggạe wọu apan nịkakoạ u sěngkatau wal᷊ine, mangal᷊ene i Yesus Kristus. Ual᷊ingu i Sie, Mawu Ruata měngkai napẹ̌dal᷊embon tatal᷊ěntụʼE su kakěpal᷊u taumata, kụ dingangu tạ bawaehe nakariadi si sire saụ nipẹ̌sěngkapian Duata; i sire sarung mẹ̌kawasa su dunia ini ual᷊ingu i Kristus.

¹⁸Kụ kereapạewen dal᷊awang u sěngkatau e něnggạe su kěbị taumata nihukung, kerene lai kakanoạ u sěngkatau kụ tụtol᷊e kapulun Mawu Ruata, něnggạe ute kěbị taumata mal᷊iwirẹ̌ bọu pẹ̌sasal᷊a ringangu kaonggotangu pẹ̌bawiahẹ̌.

¹⁹Kụ kereapạewen taumata l᷊awọ e nariadi taumata marosa ual᷊ingu sěngkatau ta tumatuhụ, ute kerene lai lawọ taumata wotonge saụ mẹ̌sěngkapian Mawu Ruata ual᷊ingu sěngkatau matuhụ su Ruata.

²⁰Něgěllịu toratʼu Yahudi e kai Mawu Ruata sẹ̌sane. Kaiso mangkewelain kạpahuntinamban tatuhụe su toratẹ̌ e kaiso i sire mangkewelain kạpahuntinamban dal᷊awang e ringangu němpẹ̌dosa su těngon Duata. Kaiso mangkeng kạpahuntinambane taumata němpẹ̌dosa, Ruata e mangkewelain limembong kakěndage, si sire.

²¹Ho! i kitẹ e harusẹ̌ mate ual᷊ingu i kitẹ e němpẹ̌dosa. Kai Mawu Ruata e kụkěndagi kitẹ dingangu nẹ̌gěllị u ral᷊eng si kitẹ tadeạu saụ mẹ̌sěngkapian Sie. Kụ ual᷊ingu pẹ̌kakauhʼi kitẹ dingangu Mawu Ruata e seng saụ mapia, tangu i Sie mal᷊aing mangonggọu pẹ̌bawiahẹ̌ tutune ringangu kakalẹ̌ si kitẹ su ral᷊ung i Yesus Kristus, Mawung kitẹ.