Read Sangir ROMA 6 Bible Online

ROMA 6 - Sangir bible

ROMA 6

¹Mạeng kerene, apạe ipẹ̌berang kitẹ e? Apa i kitẹ měngkate mẹ̌kẹ̌koạ dosa tadeạu Mawu Ruata měngkai kuměndagʼi kitẹ?

²Tantu tala! Dosa e semben tawe lai mẹ̌kawasa si kitẹ, kụ unụe wue i kitẹ měngkai hanesẹ̌ měbẹ̌biahẹ̌ dingangu kapẹ̌kẹ̌koạe rosa?

³Masingkạ bue i kamene u su tempong i kitẹ nisahani e i kitẹ niapakasěmbaụ dingang i Kristus Yesus? Ini e mangal᷊ene i kitẹ niapakasěmbaụ dingangu papatenʼE.

⁴ Dingangu pananahani ene, i kitẹ e nilẹ̌bing dingang i Kristus dingangu sěngkakapate ringange, tadeạu kereapạewen i Kristus nipẹ̌bangung bọu papate ual᷊ingu kawasang Amang kụ mawantugẹ̌, kerene lai i kitẹ makaral᷊eng su pẹ̌bawiahẹ̌ buhu e.

⁵Kereu i kitẹ seng nasěmbaụ dingang i Kristus batụu i kitẹ sěngkakapate ringang i Sie, i kitẹ sarung masěmbaụ dingang i Sie lai ual᷊ingu i kitẹ niapẹ̌bangung kapia mẹ̌sul᷊ungkewen Sie.

⁶I kitẹ masingkạ u kakakoạ i kitẹ těbe e seng niapakapate sěngkakapate ringang i Kristus su kalu kuruisẹ̌ tadeạu kawasang kakakoạ i kitẹ marosa e seng nipakaghoghahẹ̌; kụ ual᷊ingu ene ute i kitẹ semben tawe ipẹ̌tahuěllangu rosa.

⁷Kereu sěngkatau e kawe nate, ute taumata ene iapakal᷊iwirẹ̌ bọu kawasan dosa.

⁸Kereu i kitẹ seng nate ringang i Kristus, i kitẹ mangimang u i kitẹ lai sarung mẹ̌biahẹ̌ dingangʼE.

⁹U i kitẹ masingkạ u i Kristus seng nẹ̌bangung bọu papatene, dingangu i Sie sembeng lai tawe mate; papate e seng tawẹ kawasane su watangengʼE.

¹⁰Papate kinahombangeng i Kristus e kai papate ual᷊ingu rosa. Ene samatang mariadi sěnsul᷊e waugu sarang marěngụ-děngụ. Dingangu pẹ̌bawiahẹ̌ niral᷊engangʼE ini kai pẹ̌bawiahẹ̌ baugu Ruata.

¹¹I kamene harusẹ̌ lai mangěnna watangeng i kamene nate ual᷊ingu rosa, kaiso pẹ̌bawiahẹ̌ su ral᷊ungu pẹ̌kakauhẹ̌ matoghasẹ̌ dingangu Mawu Ruata e kai su ral᷊ung i Kristus Yesus.

¹²Abe lai mapakawalan dosa měngawasa pẹ̌bawiahu apan mẹ̌tate tadeạu i kamene abe kawe tumuhụ ěnning i kamene raral᷊aị.

¹³Kumbahang lai i kamene měnarakangʼu laesu wadang i kamene su kawasan dosa baugu ipakẹ su manga timona kụ daral᷊aị. Kaiso sarakangke watangeng i kamene su Mawu Ruata kere taumata kụ seng nial᷊ing bọu papate sarang pẹ̌bawiahẹ̌. Sarakangke kạguwạu watangeng i kamene su Mawu Ruata tadeạu ipakẹ baugu mẹ̌koạ kapulun Duata.

¹⁴Dosa tawe wotonge měngawasa si kamene, ual᷊ingu i kamene tawe saụ nẹ̌biahẹ̌ su al᷊ungu toratʼu Yahudi e kaiso kai su ral᷊ungu kakěndagu Mawu Ruata.

¹⁵Orasẹ̌ ini apạ e ghẹ̌sine? Botonge i kitẹ mẹ̌koạ dal᷊akị, batụu i kitẹ seng bal᷊ine su al᷊ungu kawasan toratʼu Yahudi e kaiso kawe su al᷊ungu kawasan tatal᷊ěntụ u Mawu Ruata? Mamben tala!

¹⁶Masingkạ bue i kamene u kereu i kamene měmpanarakang u watangeng su sěngkatau baugu kapulune ute i kamene kai ěllangu tau kụ tẹ̌tuhukang i kamene ene — běgạ e měnsang ěllangu rosa kụ mẹ̌bẹ̌bawa si kamene sarang papate, arau kawe ěllang tutuhụ su Mawu Ruata kụ ual᷊ingu ene saụ mẹ̌sěngkapian Duata.

¹⁷Kai tarimakasẹ su Mawu Ruata! Batụu nạung kal᷊amona i kamene nakoạ ěllangu rosa, kai ini e i kamene ringangu kạguwạu naung tụtuhụ těntirong katěngadẹ̌ kụ seng nighěllị si kamene.

¹⁸I kamene seng niliwirẹ̌ bọu rosa kụ tempo ini nakoạ ěllang baugu kapulun Duata.

¹⁹Ual᷊ingu pěngangěnnang kamene wědang lome ute iạ mẹ̌pakẹu sasihing u pẹ̌tatahuěllang tadeạu nangělembo mal᷊ighạ i kamene makaěnna. Kal᷊amona i kamene němpěnarakangu kạguwạu watangeng i kamene kere ěllang su manga hal᷊ẹ̌ maral᷊amuhụ dingangu ral᷊aị baugu karaki raral᷊aị. Kerene lai orasẹ̌ ini, mal᷊owọko i kamene měmpanarakangu kạguwạu watangeng i kamene kere ěllang baugu kapulun Duata mẹ̌tatal᷊ahinon manga timonan Duata těntani.

²⁰Su tempong i kamene nipẹ̌tahuěllangu rosa, i kamene tawe nipẹ̌kawasaěngu karakin Duata.

²¹Su tempo ene kai apa untune nitarimạ i kamene wọu manga hal᷊ẹ̌ kụ orasẹ̌ ini ikẹ̌kameang kamene měmpẹ̌koạ? Manga kakanoạ ene kětạeng makawawa sarang papate!

²²Arawe orasẹ̌ ini i kamene seng niliwirẹ̌ bọu rosa kụ nariadi ěllang u Ruata. Kal᷊auntungu e ute i kau makapẹ̌biahẹ̌ susi waugu Ruata kụ hal᷊ẹ̌ ene makaual᷊i wiahẹ̌ tutune ringangu kakalẹ̌.

²³Batụu papate e kai wawaehẹ̌ dosa; arawe pẹ̌bawiahẹ̌ tutune ringangu kakalẹ̌ dingangkewen Kristus Yesus Mawung kitẹ e kai laonggọ kụ nionggọ u Mawu Ruata wawaehe.