Read Sangir ROMA 7 Bible Online

ROMA 7 - Sangir bible

ROMA 7

¹Manga anạ u sěmbaụku! I kamene kěbị seng makakiral᷊a toratẹ̌. Kụ, i kamene masingkạ u kawasan toratẹ̌ su pẹ̌sěngkatau, mariadi kětạeng karěngụ u taumata ene wědang biahẹ̌.

²Kere sěngkatau wawine kụ piạ kawinge ute mạl᷊aikị u toratẹ̌ su kawinge kětạeng karěngụu kawinge wědam biahẹ̌. Kereu tau esẹ kawinge seng nairị ute wawine ene mal᷊iwirẹ̌ bọu toratẹ̌ kụ mạngikị i sie su kawinge.

³Kereu wawine ene měbẹ̌biahẹ̌ dingangu esẹ bal᷊ine su tempong kawinge wẹ̌dang biahẹ̌, ute wawine ene ikawerạe nawuang. Kai kereu kawinge seng nairị ute tumuhụ toratẹ̌ ute wawine seng nal᷊iu. Kụ kereu i sie saụ mẹ̌kawingu esẹ bal᷊ine ute i sie tawe nawuang.

⁴Kerene lai kakakoạ e si kamene, manga anạ u sěmbaụku. Tumuhụ toratʼu Yahudi e i kamene seng nate, ual᷊ingu i kamene seng niapakasěmbaụ dingangu wadang i Kristus kụ nakoạ tataghuaneng i Sie kụ seng niapẹ̌biahẹ̌ kapia wọu papate. I Sie nipẹ̌biahẹ̌ bọu papate tadeạu i kitẹ mariadi piạ gunane waugu Mawu Ruata su ral᷊ungu pẹ̌bawiahʼi kitẹ.

⁵Batụu kal᷊amona i kitẹ měbẹ̌biahẹ̌ tụtuhụ kakakoạ u taumata. Su tempo ene manga ěnning u rosa e mạsongkahẹ̌ ual᷊ingu piạ toratẹ̌ měkẹ̌karadiahang su watangeng i kitẹ. Kai ual᷊ingu ene hakịu i kitẹ e mẹ̌kẹ̌koạ manga apa-apa makạkạdiadim papate.

⁶Arawe tempo ini i kitẹ tawe lai naikị su toratʼu Yahudi. I kitẹ seng nate su ral᷊ungu toratẹ̌ kụ nạung kal᷊amona mạngawasa si kitẹ. I kitẹ seng tawe mẹ̌tatahamawu kere kakakoạ u nạung, tuhụ toratẹ̌ kụ mạbawohẹ. Tempo ini i kitẹ e mẹ̌tẹ̌tahamawu tuhụ kakakoạ e wuhu ilẹ̌ahạ u Rohkẹ̌ u Ruata e si kitẹ.

⁷ Mạeng kerene, kai apạe ipẹ̌berang kitẹ? U toratʼu Yahudi e ral᷊aị? Tantu tala! Kai toratẹ̌ ene e mạněntiro si siạ mạanun dosa. Iạ e wẹ̌gawue měnsang anggange kai a, kereu tawẹ toratẹ̌ mẹ̌bẹ̌bera, ”Kumbahang měngkai maanggang.”

⁸Ual᷊ingu toratẹ̌ e dosa makạěbạ loahe waụgu mapasěpụ u kěbị haghing ěnning kụ su ral᷊ungu naungku; batụu kereu tawẹ apa toratẹ̌ ute rosa e mal᷊aing mate.

⁹Iạ nạung kal᷊imona mẹ̌bẹ̌biahẹ̌ tawẹ toratẹ̌. Kai sarạeng piạ toratẹ̌, dosa e nanětạ e nẹ̌biahẹ̌

¹⁰dingangu iạ e nate. Tangu toratẹ̌ ene tětạe ipẹ̌tẹ̌timona waugu makaonggọu pẹ̌bawiahẹ̌, kutẹu kawe nakarěntang papate si siạ.

¹¹ Ual᷊ingu toratẹ̌ ene, dosa e nakaěbạ loahe něngakal᷊ẹ̌ dingangu němate siạ.

¹²Toratẹ̌ asal᷊e kai wọu Mawu Ruata kụ apạewen parenta su ral᷊ungu toratẹ̌ ene e rarěntane wọu Mawu Ruata, kụ kai adilẹ̌ dingangu mapia.

¹³Ho, kiwuạu měnsang ini e piạ mangal᷊ene, u mapia e makạděntam papate si siạ? Tantu tala! Dosa e kai makạděntan papate ene. Dingangu měpakẹʼu mapia e dosa makạděntan papate si siạ, tadeạu kakakoạ u rosa e ikasilo mal᷊ahẹ. Su ral᷊ungu manga parentang Mawu Ruata, nal᷊ahẹ kai apạ e karal᷊aị dosa e nạung!

¹⁴I kitẹ masingkạ u toratʼu Yahudi kai asal᷊e wọu Rohkẹ̌ u Ruata; arawe iạ e kai taumata lome. Iạ seng niwal᷊ụ nakoạ ěllangu rosa.

¹⁵ U iạ sẹ̌saku tawe makaěnna kakanoạku. Apang ilẹ̌ěningku koateng, ene tawe takụ koateng; arawe apang ipẹ̌bẹ̌binsịkue, katewe mundangu ene kẹ̌koatengkue.

¹⁶Ho, kereu iạ kawe mẹ̌koạ manga hal᷊ẹ̌ kere lụlawang dingangu kapuluku e ute ene mangal᷊ene iạ e mạngakung toratʼu Yahudi e mapia.

¹⁷Kụ, bal᷊inewe lai iạ tuhụ dal᷊enge mẹ̌kẹ̌koạ ene, kaiso kawe rosa něngawasa watangengku.

¹⁸Iạ masingkạ u tawẹ manga apạe kụ mapia su ral᷊ungu watangengku, mangal᷊ene su ral᷊ungu kakakoạku mạtaumata. U si siạ kai piạ ěnningu mẹ̌koạ mapia, kutẹu iạ kawe tawe makaumal᷊ẹ̌ měndal᷊eng u ene.

¹⁹Iạ tawe mẹ̌kakoạ mapia apang kụ takụ i lẹ̌ěnning koateng; kaiso kawe mạbal᷊ị mẹ̌kẹ̌koạ apan dal᷊aị kụ bal᷊inewe kapuluku e mẹ̌koạ.

²⁰Kereu iạ mẹ̌koạbe apam bal᷊ine su kapuluku mangal᷊ene ute wal᷊inewe iạ mẹ̌kẹ̌koạ ene e kaiso kawe rosa nẹ̌kawasa watangengku.

²¹Ene, iạ něngal᷊ạe ghěsine ini; u kamạgeng iạ mapulụe mẹ̌koạ mapia ute iral᷊aị e sembengkewe tụtimbul᷊ẹ̌ si siạ.

²²Dal᷊ungu naungku e měngkai lẹ̌lahimpuluangu toratʼu Ruata e,

²³kaiso, iạ e masingkạ u su ral᷊ungu watangengku e piạ lai toratẹ̌ bal᷊ine kụ nakoạ tumanggihe — ute kai toratẹ̌ mẹ̌děndokạ toratẹ̌ ilẹ̌akung laěnnaku e. Kai ene hakịu iạ e kạl᷊aikị su toratʼu rosa lụlambagẹ̌ batangengku e.

²⁴Ho, kai kere ini e kakakoạku: iạ e tụtuhụ toratʼu Mawu Ruata e ringangu laěnnaku, arawe kakakoạku mạtaumata e ute iạ kai mạsěllung su rosa. O kasiang silakạ bue iạ ini! I sai wue tangu mapulu mangambang siạ bọu wadang ini kụ mẹ̌bawa siạ sarang papate? Tarimakasẹ su Mawu Ruata! I Sie mapulu mangambang si siạ ual᷊ingu i Yesus Kristus.