Read Sangir ROMA 9 Bible Online

ROMA 9 - Sangir bible

ROMA 9

¹Apan takụ iwera ini e mamben těngadẹ̌ ual᷊ingu iạ e kai tataghuaneng i Kristus. Iạ e tawe mẹ̌konti. Dal᷊ungu naungku e kụ lẹ̌ahakengu Rohkẹ̌ u Ruata e mạnoghasẹ̌ siạ lai u waweraku ini e kahěngang.

²Iạ e mambeng mạsusa naungkue matědụ,

³ual᷊ingu manga anạ u sěmbaụku apang sěnggal᷊ipoho ringangku. Batụu waugʼi sire, iạ sẹ̌saku e něnal᷊udẹ̌ laanen Duata ringangu nipakaghěang bọu anung Kristus.

⁴ I sire kai umatẹ̌ pinile ringangu Mawu Ruata e napakariadin sire nakoạ manga anạʼE sẹ̌sane, dingangkewen nělahẹ u kawasanʼE si sire. I Sie nẹ̌koạ pẹ̌kakakẹ̌do[11] ringang i sire kụ nangonggọ u toratẹ̌ si sire. Mawu Ruata e něhabarẹ̌ si sire kereapa i sire harusẹ̌ mẹ̌tahamawu ringangu i sire seng lai nakatarimạu manga kědonʼE.

⁵I sire kai pal᷊ahiten i upung i kitẹ. I Kristus tinuhụ taumata e asal᷊e kai wọu bansang sire. I Sie l᷊imembom marangẹ bọu kěbị. Dalo su Ruata sarang kakalẹ̌![12] Aming.

⁶Iạ e tawẹ dial᷊u mẹ̌bera u kědon Duata seng nasawehẹ̌; kai wal᷊inewe kěbị tau Israel kai umatẹ̌ pinilen Duata.

⁷ Bal᷊inewe kěbị hěnton Abraham kai manga anạ u Ruata. Batụu Mawu Ruata něhengetang si Abraham, ”Kětạeng hěnton Ishak sẹ̌sane sarung isěbạ hitenu.”

⁸Mangal᷊ene ute hěntong Abraham apan kụ něngkakoạ manga anạ u Ruata, kai kětạeng hěntone apam piněhanạ ual᷊ingu kẹ̌don Duata; kụ bal᷊inewe kěbị hitene.[13]

⁹ Batụu kědon Duata e kai kere ini, ”Su tempo seng nịpapoěng,[14] Iạ e sarung mẹ̌bal᷊ị, kụ i Sara sarung piạ anạ e esẹ sěngkatau.”

¹⁰Dingangu ini lai: i Ribka něhěnding u anạ esẹ duang katau wọʼi amange sěmbaụ kụ kai Ishak i upung i kitẹ e.

¹¹Kal᷊imonan anạ darua ene pinẹ̌hanạ, Mawu Ruata e seng nanilakehu pilenʼE waụgu katěpasenge. Pinilen Mawu Ruata e wal᷊inewe měngumbala suapan ikakoạu taumata kaiso mangumbala su kakuin Duata sẹ̌sane. Batụu su tempon anạ i Ribka i rẹ̌dua esẹ ene e wẹ̌dang ta nakakoạ hal᷊ẹ̌ mapia arau hal᷊ẹ̌ dal᷊aị,

¹² Mawu Ruata e seng něhengetang si Ribka, ”Kụ iakange sarung mẹ̌tangkiang tuari.”

¹³ Su ral᷊ungu Winohẹ Susi kạbawohẹ u Mawu Ruata něhengetang kere ini, ”I Yakub e Takụ kěndageng arawe i Esau e Takụ ipẹ̌binsị.”

¹⁴Apạe ikapul᷊isʼi kitẹ orasẹ̌ ini? U Ruata ene tạ kal᷊aadile ngae? Semben nal᷊ahẹ u Ruata e mambeng adilẹ̌!

¹⁵ Batụu Mawu Ruata něhengetang si Musa, ”Iạ sarung mapakal᷊ahẹu al᷊amatẹ̌ si sain Takụ pělahekangu al᷊amatẹ̌ dingangu Iạ sarung mapakal᷊ahẹu tatal᷊ěntụ si saịewen Takụ pělahekang u tatal᷊ěntụ.”

¹⁶Kụ putusang u Ruata ene wal᷊inewe iumbala su kapulun taumata arau wọu saghedu taumata, kaiso su kapian naungu Ruata sẹ̌sane su těngon taumata pinilenʼE ene.

¹⁷ Batụu su ral᷊ungu Winohẹ Susi e mạbawohẹ, ”Mawu Ruata e něhengetang su ratun Misirẹ̌, ’Iạ e mapakariading kau ratu tumbạu waugu timona sěmbaụ ini, mědeạu ringang i kau, Iạ manodẹu kawasa-Ku mase mapakariading areng-Ku ipẹ̌dal᷊ahabarẹ̌ su kaguwạu dunia e.’ ”

¹⁸Kụ, Mawu Ruata e tụtal᷊ěntụ bue su pẹ̌sěngkatau, kereu Mawu Ruata e mapulu kerene. Dingangu Mawu Ruata e makạkoạbe pěsěngkatau mẹ̌tẹ̌tungkětị u těmbọe kereu Ruata e mapuluwe lai kerene.

¹⁹Ho! I kau sarung mẹ̌bera si siạ, ”Mạeng kerene unụe Mawu Ruata e wědang mapulu mapẹ̌sẹ̌sal᷊an taumata? Bal᷊inewe tawẹ u sarang sěngkatau makakapetọ u kapulun Duata?”

²⁰ Arawe i kau! I kau e kětạeng taumata. Dingangu i kau tawe wotonge wahani sumimbang su Ruata! Botonge ngae potẹ̌ u bungang makiwal᷊o su mẹ̌kakoạe, ”Unụe i kau nẹ̌koạ siạ kere ini?”

²¹Mẹ̌kakoạ potẹ̌ u bungang e wal᷊inewe piạ kawasane mamunara ěntana masurěkạ ene su kapulun naung e? Bọu ěntana sěngkompeng ene tau e makakoạbe potẹ̌ u bungang haghine rarua: Sěmbaụ mal᷊ěnggihẹ̌ arawe wal᷊ine e tawe tumanịe mal᷊ěnggihẹ̌.

²²Kerene lai apang kinoạu Ruata. I Sie měkẹ̌karaki mẹ̌deạu manodẹu ral᷊angehʼE ringangu mělahẹu kawasanʼE. Kaiso i Sie mang mẹ̌sẹ̌sabarʼi sire apang hinong ihukung ual᷊ingu nakakariadin Sie limangehẹ̌.

²³Mawu Ruata e mal᷊aing měkẹ̌karaki mědeạu makapělahẹu ral᷊uasẹ̌ mẹ̌dẹ̌dal᷊embo nionggọ si kitẹ apan nital᷊ěntukangʼE. I kitẹ e seng nisạdiangʼE mẹ̌deạu manarimạ u ral᷊uasẹ̌ ene.

²⁴I kitẹ e seng nikuiangʼE, bal᷊inewe kětạeng bọu tau Yahudi, kaiso mal᷊aing bọu manga wansa wal᷊ine.

²⁵ Batụu su ral᷊ungu bukẹ̌ u Nabi Hosea, Mawu Ruata něhengetang, ”I sai-sain bal᷊ine umatẹ̌-Ku, sarun Takụ isẹ̌bạ, ’Umatẹ̌-Ku’. Bansa kụ bal᷊ine Takụ ikěndagẹ̌, sarun Takụ isẹ̌bạ, ’Ikẹ̌kěndagẹ̌-Ku’.

²⁶ Dingangu su tampạ suapam pinẹbera su taumata, ’I kamene wal᷊ine kawanua-Ku,’ sene i sire e sarung isẹ̌bạ manga anạ u Mawu Ruata kụ biahẹ̌.”

²⁷ Nabi Yesaya nẹ̌bera masěgadẹ̌ mạanun tau Israel u, ”Manilaing tau Israelẹ̌ e kakěpal᷊e kere ěnne su apeng, kaiso tumbạeng mahal᷊i sarung masal᷊amatẹ̌;

²⁸batụu Mawu e sarung mal᷊ighạ měnawong hukumang baụgu ral᷊ohon dunia.”

²⁹ I Yesaya mal᷊aing nẹ̌bera kere ini, ”Mangawe andene Ruata Makawasa e tawe něněntangu hitene si kitẹ e, ute nal᷊ahẹu i kitẹ kěbị e seng nariadi kere Sodom dingangu Gomora.”

³⁰Kụ, nimbụe ute kai ini: Manga kawanuam bansa wal᷊ine kụ bal᷊inewe tau Yahudi e tawe němpẹ̌tatumẹ̌gal᷊ẹ̌, tadeạu pẹ̌kakauhʼi sire ringangu Ruata e saụbe makoạ mapia. Kai ual᷊ingu i sire mạngimang, tangu Mawu Ruata saụewe nangul᷊ị pěral᷊ahěmpukang i sire ringangʼE nipakapia.

³¹Kasueěnge tau Yahudi e měngkate mẹ̌bẹ̌bangkailangu tatuhụ toratẹ̌ tadeạu pẹ̌kakauhi sire ringangu Ruata e saụ maul᷊ị kapia. Kaiso i sire mang tawẹ ual᷊ine apa.

³²Unụe i sire tawe nakaratingu ene? Batụu i sire němpẹ̌koạ ene e wal᷊inewe ual᷊ingu mạngimang su Mawu Ruata, kaiso ual᷊ingu munaran sire hala. Hakịu ene i sire kai mạtangga su, ”Watu katatanggaěng”.

³³ Mạanun batu ene e tangu su ral᷊ungu Winohẹ Susi e mạbawohẹ kere ini: ”Tatingangko ini: Su Sion seng Takụ nipěllokangu watu kụ sarung makakasangkong taumata kụ i sie kai watu ghẹ̌guwạ sěmbaụ kụ sarung makakariadi taumata manawo. Arawe taumata apan mạngimang si Sie tawe sarung mamea.”