Read Sangir 1 KORINTUS 10 Bible Online

1 KORINTUS 10 - Sangir bible

1 KORINTUS 10

¹ Manga anạ u sěmbaụ! Kěnnangko i kamene pẹ̌tahěndung měnsang apa wue nariadi su manga i upung-ghaghurang i kitẹ e, su tempọeng i sire tụtuhụ si Musa. I sire kěbị e nitanurangu winawa e kụ nasal᷊amatẹ̌ liměbạ Laudẹ̌ Mahamụ.

²Makoạ tumatuhụ si Musa e, i sire kěbị e nisahani su ral᷊ungu winawa ringangu su ral᷊ungu laudẹ̌ ene.

³ I sire kěbị e sěngkakaěng kaěng marohkẹ̌ e,

⁴ ringangu sěngkapěnginung inumang marohkẹ̌ e gahịe sěmbaụ. I sire kěbị e němpěnginung bọu akẹ u watu hanibẹ̌ marohkẹ̌ e rụděndingang si sire; watu hanibẹ̌ ene e ute kai i Yesus Kristus sẹ̌sane.

⁵ Maningbe kerene, Mawu Ruata e tawe karal᷊uase si sire kal᷊awokange, kụ kai ene hakịu manga kasuang sire měngkai lụl᷊iwatang su wanua l᷊inggi e.

⁶ Patikụ ene nariadị e mẹ̌deạu makoạ tateghang si kitẹ u kumbahang i kitẹ děntaěngu kapulu su hal᷊ẹ̌ dal᷊akisẹ̌ e kere si sire.

⁷ Kerene lai kumbahangbe i kitẹ e mẹ̌suba mahan duata kere kẹ̌koateng u sěngkamonaěng boʼi sire. Su ral᷊ungu Winohẹ Susi e mạbawohẹ, ”U taumata lawọ ene e nanětạe nahungkaěng dingangu němpěnginung, mase němpẹ̌sal᷊aị e mạněmba mahan duata.”

⁸ I kitẹ e abe pěmpěkoạbe pẹ̌sasundal᷊ẹ̌ kere kẹ̌koateng u sěngkamonaěnge woʼi sire. Watụ u, ruam pul᷊o těllu hiwu su kataune něngkate su ral᷊ungu sěhěllo ual᷊ingu pẹ̌kakoạ kerene.

⁹ I kitẹ e tawe wotonge měmpěnal᷊ukạ Mawu[12] e kerẹewe seng kẹ̌koatengu sěngkamonaěng boʼi sire nạung kal᷊amona e kụ i sire něngkateng kiking těmpu maghaghiadẹ̌.

¹⁰ I kitẹ e wue abe pěmpẹ̌kurubụ kere kẹ̌koatengu sěngkamonaěng bọʼi sire kal᷊amona e, hakịu i sire nipate kahian Malaekatu Papate.

¹¹Patikụ ene nariadie si sire makoạ tateghang kụ ikakiral᷊ang taumata wal᷊ine e. Dingangu kěbị ene niwohẹ lai tadeạu makoạ sasal᷊ěntihọ si kitẹ e. U i kitẹ ini e kai mẹ̌bẹ̌biahẹ̌ su ral᷊ungu kasueěngu tempo.

¹²I saim mẹ̌pẹ̌pěndang batangenge rụdarisị matoghasẹ̌ e, pakapia wue mạdirim mawatang.

¹³Apam bawitaugẹ̌ kẹ̌kahombangeng i kamene e měngkai seng milẹ̌hombang su apan taumata e. Kai arawe Mawu Ruata e mang satia su kědonʼE. I Sie ta mapakawalang kamene e sal᷊ukateng limembo wọu kuatʼi kamene. Su tempong i kamene kaẹ̌bakengu wawitaugẹ̌ e, i Sie sarungbe mangonggọu ral᷊enge si kamene, tadeạu i kamene matoghasẹ̌ kụ makakẹ̌dang mẹ̌tatahangu sasal᷊ukạ e.

¹⁴Ual᷊ingu ene ute, manga anạ u sěmbaụ ikẹ̌kěndagẹ̌ e, i kamene kěnangko pěmpẹ̌binsị u pal᷊ahamawu mahan duata e.

¹⁵Iạ e mẹ̌bẹ̌bisaraweng kamene e kere su manga taumata matatahuěnna. Kěnnangko i kamene hala e pěmpẹ̌timbang baweraku ini.

¹⁶ Piạ i kitẹ kạpěnginung e anggorẹ̌ kụ makịtarimakasẹ su Mawu Ruata e, ene wal᷊inewe mělẹ̌lahẹ u i kitẹ e nasěmbaụ dingangʼi Kristus su ral᷊ungu kapapohongʼE tangu? Dingangu piạ e i kitẹ kapẹ̌papahiạem boratẹ̌ mědeạu kanengang sěngkapahungkaěng, ene wal᷊inewe mělẹ̌lahẹ u i kitẹ e nasěmbaụ su ral᷊ungu wadang i Kristus tangu?

¹⁷Ual᷊ingu kawe borotẹ̌ e man sěmbaụ, kụ i kitẹ kěbị e mal᷊aing kimaěng bọu borotẹ̌ ene e, ute i kitẹ mal᷊awọ ini e kai wadang sěmbaụ.

¹⁸ Pẹ̌kakěllạewe tau Yahudi. I sire apang kimaěng kaěng makoạ sasěmbạ e, ute kai i sire apang nakoạ tambang pananěmbaěnge.

¹⁹Apa wue ngae ene? Mahan duata arau lai kaěng sasěmba mahan duata e tawe mangal᷊ene apa-apa.

²⁰ Apang nikoạ sasěmba su panananěmbaěngu mahan duata e tawe ikasěmba su Mawu Ruata, kaiso kawe i sẹ̌sěmban sire su manga setange. Dingangu iạ e mạdiri kụ i kamene masěmbaụ dingangu rohkẹ̌ dal᷊akisẹ̌.

²¹I kamene e tawe makapanginung bọu ral᷊ohon lainumangu Mawu e, mase kol᷊ai manginung bọu ral᷊ohon lainumangu manga setang. I kamene tawe makakaiang mẹ̌tatamba kumaěng su medan Mawu e masekol᷊ai mẹ̌tatamba kumaěng su medang manga setang.

²² Arau kai mapulu apasingkingu Mawu tangu? Arau kai limembong katoghase i kitẹ e wọu Mawu tangu?

²³ Piạu mẹ̌bẹ̌bera u, ”I kitẹ e měngkai wotonge mẹ̌koạ patikụ apang kapulung kitẹ e.” Kahěngang bue! Kaiso wal᷊inewe kěbị kapulung kitẹ e piạ gunane. ”I kitẹ e měngkai wotonge mẹ̌koạ patikụ apang kapulung kitẹ e,” kaiso kawe wal᷊inewe kěbị kapulung kitẹ e makapětị pẹ̌bawiahʼi kitẹ e.

²⁴Kumbahang bue piạu sarang sěngkatau měngkai mẹ̌deạ kapiam batangenge sẹ̌sane. Kai sěngkatau-sěngkatau e kai hinong pasịdeạ gunang kasanggidange.

²⁵I kamene měngkai kẹ̌kinạ apang iwẹ̌bal᷊ụ su pasarẹ̌. Manịeng tawe sẹ̌suiang kal᷊imona, kereu piạ ěbạu ral᷊ungu naungu.

²⁶ Batụu su ral᷊ungu Winohẹ Susi e mạbawohẹ, ”Dunia ini e ringangu patikụ dal᷊ohone kai tataghuanengu Mawu.”

²⁷Kereu i kamene ghausang i sire ta mangangimange kumaěng, kụ i kamene měnarimạ gaghausẹ̌ ene, kụ pempěnarimạ e laidopẹ̌ apạewen nisadia si kamene. Manịeng tawe kiwal᷊oěng měnsang kai wọu apa laidopẹ̌ ene tadeạu tawẹ apawe karal᷊umběhạ su naungu.

²⁸Kai kereu piạu mẹ̌bera si kamene u, ”Laidopẹ̌ ini e kai seng nikoạ sasěmba su mahan duata,” ute kumbahang kumaěng kaěng ene, watụ u mẹ̌panda kakakoạ u taumatane ringangu ral᷊ungu naunge.

²⁹Iạ bal᷊inewe mạul᷊ị u naungu, kaiso kawe ral᷊ungu naungu tau ene. Aramanung piạu makiwal᷊o, ”Kai unụe karal᷊oahu naungku e kawe isukạbe su kasingkạ u naungu wal᷊ine?

³⁰Kereu iạ mẹ̌pakẹ u laidopẹ̌ e ringangu tatarimakasẹ su Mawu Ruata, ute unụe taumata e harusẹ̌be mapẹ̌sal᷊ang iạ e su kakaěng ene e, sěmbal᷊iau iạ kawe seng nakitarimakasẹ u ene su Mawu Ruata?”

³¹Apawue koatengu e i kau kumaěng arau měnginunge — ute koạ e patikụ ene e baugu makaralo arengu Mawu Ruata.

³²Pẹ̌biahẹ̌ko sěngapam botonge tadeạu i kau tawe makoạ katatanggaěng su wal᷊ine; baẹbe i sire tau Yahudi arau wal᷊ine Yahudi e kerene lai jamạatʼu Mawu.

³³Pěmpẹ̌biahẹ̌ko kere iạ. Iạ e mẹ̌tẹ̌tawakal᷊i mạpakal᷊uasu naungu patikụ taumata e su ral᷊ungu patikụ sabarang, tawẹbe timonam baugu kapiam batangeng hala e. Timonaku e kětạewen tạdeakengu i sire kěbị e iapakasal᷊amatẹ̌.