Read Sangir 1 KORINTUS 11 Bible Online

1 KORINTUS 11 - Sangir bible

1 KORINTUS 11

¹ Pěmpẹ̌těnoko sansahẹ̌ku, mẹ̌sul᷊ungkewen iạ mětẹ̌těnno sansahi Kristus e.

²Iạ e mambeng mědẹ̌dalo si kamene u i kamene hanesẹ̌be mětẹ̌tahěndung si siạ e, ringangu tụtuhụ těntiro takụ ipạněntiro si kamene.

³Kai iạ e mapulu tadeạu i kamene makạkasingkạu lai hal᷊ẹ̌ sěmbaụ, kụ kai makoạ těmbonang u manga esẹ u ute kai i Kristus, dingangu makoạ těmbonangu kawinge ute kai esẹ e mase těmbonang i Kristus e kai Mawu Ruata e.

⁴Kereu sěngkatau esẹ e su tempon mẹ̌kal᷊iomaneng arau měhabaru hengetangu Mawu su těngon taumata l᷊awọ e kụ mẹ̌pakẹu tatakạ těmbọ e, ute tau ene makasamedẹ̌ si Kristus.

⁵Dingangu kereu sěngkatau wawine su tempom mẹ̌kal᷊iomaneng arau su tempom měhabaru hengetangu Mawu e su těngon taumata l᷊awọ, kụ tawe nẹ̌pakẹ u tatakạ těmbọe, tangu wawine ene e makasamedẹ̌ kawinge makoạ těmbonangu watangenge. Kerene ute tabidạen těmbọu tau wawine ene ute seng bọu nilungguhẹ̌.

⁶U kamageng sěngkatau wawine mạdiri mẹ̌pakẹu paporonge ute mạpiangbe utạ e pakighunting. Arawe kamagengbe sěngkatau wawine e těmbọe ilungguhẹ̌ arau utạ e ghuntingang, ute ene kai sěmbaụ lahinakang si sie. Kụ ual᷊ingu ene ute mapiawe i sie měnakạ těmbọe.

⁷ Manga esẹ e maniweng tawe měnakạ těmbọe, u i sie kai awẹ dingangu kawawantugu Mawu Ruata e. Arawe wawine e kai kawawantugu esẹ e,

⁸ u esẹ e tawe niriadi wọu wawine, kaiso kawe wawine e niriadi wọu esẹ.

⁹Manga esẹ e tawe lai niriadi waugu kapulun bawine, kaiso kai niriadi waugu kapulung manga esẹ e.

¹⁰Kụ kai ene, tadeạu mapakal᷊uasẹ̌ naungu manga malaekatẹ̌ e, ute wawine harusẹ̌be pẹ̌pakẹ u tatimbuhung su těmbọ makoạ kere tatialan sie kai su al᷊ungu kawasang kawinge.

¹¹Maningbe kerene e su ral᷊ungu pẹ̌bawiahʼi kitẹ tau Sahani e, wawine tawe mahae sẹ̌sane wọu esẹ e, ringangu esẹ e tawe mahae sẹ̌sane wọu wawine.

¹²U maningbe wawine humotonge kai niriadi wọu esẹ, kai wọu ene esẹ e kai piněhanạ bọu wawine; mase kěbị e kai wọu anun Mawu Ruata.

¹³Kěnangko manga anạ u sěmbaụ hala měmpẹ̌timbangu hal᷊ẹ̌ ini e: Měnsang mapia wue sěngkatau wawine mẹ̌kal᷊iomaneng su Ruata su těngon l᷊awọ, kụ tawẹ paporonge?

¹⁴U seng lawọ, mạsingkạ u, i kamene seng kinatěntiroěngu kamageng esẹ utạ e manandu e ute tawe hinone.

¹⁵Kai arawe su wawine ute utạ e kai nionggọ pẹ̌lẹ̌hěmbung těmbọ dingangu utạ manandụ e kawe kawawantugẹ̌ si sie.

¹⁶Ho, kereu piạu mapulu mẹ̌darendehu hal᷊ẹ̌ ini, iạ kětạeng makawerau waẹbe i kitẹ arau manga jamạatʼu Mawu lai wal᷊ine, kěbị e mang sěntunduang su jamaatẹ̌; sul᷊ikudu ene e mamben tala.

¹⁷Su hal᷊ẹ̌ ini e, iạ bal᷊inewe mẹ̌dalo si kamene. Pẹ̌kakakomol᷊u pẹ̌kakal᷊iomaneng i kamene wal᷊inewe mapia něnggạe, kaiso kawe makạdal᷊akị si kamene.

¹⁸Humotong-motong iạ nakaringihẹ̌ u su ral᷊ungu manga komol᷊ang kai piạ u mẹ̌dararendehẹ̌. Kụ su pěndangku e habarẹ̌ ini e mamben těngadẹ̌.

¹⁹U sembeng hinone suměpụ pẹ̌sasasěngkul᷊ẹ̌ sutal᷊oarang kamene, tadeạu lumětạ kahěngang měnsang i sai wue tau Sahani patutune.

²⁰Kai arawe su tempong i kamene mạtatampung ute, kẹ̌koateng i kamene e wal᷊inewe perjamuangu Mawu.

²¹Batụu su tempong kạpahungkaěnge ute i kamene sěngkatau-sěngkatau e měmpẹ̌papul᷊aho měmpangal᷊ạ kaěnge sẹ̌sane, sarangbem piạu tawe makaěbạ apa-apa, kụ sěnggạe niwukangke.

²²Unụe kere? Bal᷊inewe piạ bal᷊eng kamene tangu? Kụ i kamene makapahungkaěng dingangu makapanginung sene! Arau kawe i kamene mapulu měmpěndal᷊akisẹ̌ jamạatʼu Mawu mase mapakamean taumata kasiang? Kụ kai mẹ̌berạeng apa tangu iạ e si kamene? Arau kai harusẹ̌ pẹ̌dalo si kamene iạ e tangu? Tala! Haeng badangku e iạ mang tạ daloku si kamene.

²³U takụ ipạněntiro si kamene ute, apạewen takụ tẹ̌tarimakeng bọu anun Mawu e sẹ̌sane: batụu su hěbi ene piạ e i Yesus, Mawung kitẹ e niakal᷊eng, i Sie tangu něngal᷊ạe borotẹ̌,

²⁴dingangu wọuten i Sie nakitarimakasẹ u borotẹ̌ ene su Mawu e, ute nịkakakempange, mase nẹ̌berau, ”Ini e kai wadangku kụ nisarakang baugi kamene. Koạko ini e tatahěndung si Siạ.”

²⁵ Kerene lai nasuẹeng kaěnge, ute něngal᷊ạe panganginumangu anggorẹ̌ e kụ nẹ̌bera, ”Anggorẹ̌ ini e kai pẹ̌kakakẹ̌doʼn Duata wuhu, su ral᷊ungu raha-Ku e. Suapang i kamene manginung ini e, ute koạko ini e ipẹ̌tahěndung si Siạ.”

²⁶Kụ kasaụeweng i kamene kụkaěng borotẹ̌ dingangu mạnginung anggorẹ̌ ini e ute i kamene mẹ̌lẹ̌habaru kapapohongu Mawu e sarạeweng i Sie ruměnta e.

²⁷Ual᷊ingu ene e, isaing kumaěng borotẹ̌ u Mawu e ringangu manginung anggoru Mawu e kụ tawe nihino, ute i sie nẹ̌sal᷊a su těngom Mawu e kụ seng něnarakangu wadange ringangu rahane.

²⁸Kụ sěngkatau-sěngkatau e harusẹ̌be pamanikạbe watangenge kal᷊amona, buhụewe i sie kaěng bọu borotẹ̌ dingangu panginung anggorẹ̌ su panganginumange.

²⁹U kereu taumata e kumaěng borotẹ̌ dingangu manginung anggorẹ̌ kụ ta mẹ̌tatiaham badangu Mawu e ute i sie makatarimạu papahangu Mawu e waugu watangenge.

³⁰Hakịu ene mal᷊awọ bọu tal᷊oarang kamene apam masasakị dingangu lome sarangbelain mate.

³¹Kai kereu i kitẹ e měmarikěsa watangeng i kitẹ kal᷊amona, i kitẹ tawe ihukungu Ruata.

³²Kai kereu i kitẹ kawe ihukungu Ruata, i Sie sarung měnggeserẹ̌ si kitẹ, tadeạu i kitẹ tawe ihukung sěngkakahukung dingangu dunia ini.

³³Ual᷊ingu ene manga anạ u sěmbaụ kụ kereu i kamene měmpẹ̌komol᷊ẹ̌ kumaěng su perjamuang u Mawu e ute i kamene e pěmpẹ̌papahẹ̌do wue.

³⁴Kereu piạu mahutung, ute i sie harusẹ̌be kaěng bọu wal᷊ene kal᷊amona. Kereu i kamene kawe tawe měngindakangu ini ute komol᷊angu pẹ̌kakal᷊iomaneng i kamene e kai makarěntan hukumangu Mawu e su watangengu e. Arawe suhal᷊ẹ̌ewe lai wal᷊ine e hẹ̌don takụ iatorẹ̌ mạeng iạ marěnta.