Read Sangir 1 KORINTUS 12 Bible Online

1 KORINTUS 12 - Sangir bible

1 KORINTUS 12

¹Arawe kal᷊awọu laonggọ mararohkẹ̌ e. Manga anạ u sěmbaụ, iạ mapulu tadeạu i kamene makakasingkạ kahěngang-hěngang.

²Pẹ̌tahěndungke watụ u su tempong i kamene wẹ̌dawen tanakạkiral᷊a Mawu e, i kamene kai kẹ̌kawọdaitangu tumol᷊e mahan duata mou e.

³I kamene harusẹ̌be masingkạ u taumata lẹ̌ahakengu Rohkẹ̌ u Ruata e, tawe makawera u, ”Kai wontogẹ̌ su Mawu Yesus!” Kerene lai tawẹu sarang sěngkatau makawerau, ”i Yesus e kai Mawu!” kereu taumata ene e tawe ahakengu Rohkẹ̌ u Ruata.

⁴Kai mẹ̌dẹ̌dal᷊ahaghi laonggọ Marohkẹ̌ e, kai kěbị e mang laonggọ u Rohkẹ̌ mang sěmbaụ.

⁵Dingangu kai mẹ̌dẹ̌dal᷊ahaghi hal᷊ẹ̌u mẹ̌tangkiang Mawu e, kai Mawu tẹ̌tangkianeng ene e, kai mang Mawu sěmbaụ ene lai!

⁶Kai mẹ̌dẹ̌dal᷊ahaghi kakakoạu měkoạ munaran Mawu e, kai arawe měgaghěllị u katatoghasẹ̌ baugu ene suapan taumata e ute mal᷊aing Mawu mang sěmbaụ.

⁷Rohkẹ̌ u Ruata e nẹ̌karadiahang su pẹ̌sěngkatau tuhụewe kakakoạe.

⁸Su sěngkatau e Rohkẹ̌ e mang mangonggọu kapelesane su hal᷊ẹ̌ u mahumbisara matatahimadẹ̌. Su wal᷊inẹete wue Rohkẹ̌ ene e mal᷊aing mạngonggọu kapelesa mạanun hal᷊ẹ̌u manualagu Ruata.

⁹Rohkẹ̌ ene e mal᷊aing mạngonggọ su pẹ̌sěngkatau e kapělěsawe limembo tawẹ sihinge e waụgu mangimang su Mawu Yesus Kristus; arawe kawe su wal᷊ine ute Rohkẹ̌ e mạngonggọu kawasa mapạkapian taumata wọu sakịe.

¹⁰Su pẹ̌sěngkatau e lẹ̌onggotangu kawasa mẹ̌koạ munara makạdal᷊inaụ dingangu su wal᷊ine ute kẹ̌kawahageaneng u kapelesa měnẹ̌bal᷊u manga haghing karaking Mawu Ruata. Su pẹ̌sěngkataụ ete wal᷊ine e Rohkẹ̌ ene e mạngonggọu kapelesa mapẹ̌dal᷊ahaedu sude laonggọ bọu Rohkẹ̌ u Ruata e ringangu sude wal᷊ine wọu Rohkẹ̌ u Ruata e. Piạbeng kẹ̌kaonggotangu kapelesa mẹ̌bisara su haghim bisara, ringangu piạbeng nionggotangu kapelesa měnanualagu mangal᷊eng haghim manga wisara.

¹¹ Kěbị-kěbị e ikẹ̌karạdiahangu Rohkẹ̌ mal᷊aing sěmbaụ ene; su pẹ̌sěngkatau-sěngkatau e semben nipẹ̌dal᷊ahaedewe timuhụ kapulun Rohkẹ̌ e sẹ̌sane.

¹² I Kristus e kai mẹ̌sul᷊ungu wadangu taumata; badang ene sěmbaụ, kaiso kawe lawọ l᷊aese. Patikụ l᷊aese ene maningbe mal᷊awọ kaiso nakoạ sěmbaụ.

¹³Kerene lai i kitẹ kěbị e, baẹbe tau Yahudi arau lai wal᷊ine Yahudi, manga ěllang arau wal᷊ine ěllang; i kitẹ kěbị e seng nisahaning Rohkẹ̌ sěmbaụ ene tadeạu i kitẹ niapakasěmbaụ su wadang i Kristus e. I kitẹ kěbị e mal᷊aing nakahombang Rohkẹ̌ sěmbaụ ene nasahiangkung.

¹⁴Batụu wadang hětubẹ̌ e tawe tumbạeng nariadi wọu laese sěmbaụ, kaiso kawe wọu l᷊aese mal᷊awọ.

¹⁵Kereu laedẹ̌ e nẹ̌bera, ”Iạ e wal᷊inewe l᷊ima, hakịu ene iạ e wal᷊inewe wahageangu wadang,” kụ ene wal᷊inewe maul᷊ịu laedẹ̌ e wal᷊inewe laesu wadange.

¹⁶Kụ kereu tul᷊i mẹ̌bera, ”U iạ e wal᷊inewe mata, hakịu iạ e wal᷊inewe laesu wadang,” ene wal᷊inewe lai mạul᷊ịu tul᷊i e kai wal᷊inewe laesu wadang.

¹⁷Mangawe andene kạguwạu wadange tumbạeng mata e ute kereapa wue wadange makaringihẹ̌? Arau kereu kạguwạu wadange tumbạeng tul᷊i, ute kereapa wue wadange makaimbu?

¹⁸I kitẹ nakasilo u Mawu Ruata e seng napẹ̌tatal᷊ahinong manga laese ene e su wadang. Sěmbaụ-sěmbaụ pinělọ su pěmamělokange kahian Mawu Ruata e timuhụewe kapulune.

¹⁹Kereu kěbị e kẹ̌tạeweng laese sěmbaụ, ute kai sude isẹ̌sẹ̌ba badang?

²⁰Kụ mambeng mal᷊awọ laese, kai wadange mang sěmbaụ.

²¹Ual᷊ingu ene ute mata e tawe makawera su l᷊ima, ”Iạ e tawe mẹ̌gausẹ̌ si kau!” arau těmbọe mẹ̌bera su l᷊aedẹ̌, ”Iạ e tawe mẹ̌gausẹ̌ si kau!”

²²Su sěmběkane manga laesu wadang kụ lẹ̌ěnnaěng karal᷊omeěnge kawe limembong gẹ̌gausang i kitẹ e,

²³ringangu manga laese lẹ̌ěnnaěng i kitẹ e riọ mal᷊ahina e ute kawe ene limemboweng arẹ̌gaěng. Manga laesu wadang tạ kal᷊aholẹ e kaiso kawe limembong kakěllaěng i kitẹ e.

²⁴Arawe manga laesu wadang kụ seng kẹ̌kasilo mal᷊ěnggihẹ̌ e, semben tawe wahal᷊uasu naungang i kitẹ e. Mawu Ruata e seng něhundugẹ̌ badang i kitẹ e kereng kapiane hakịu manga laesu wadang apan diọ tawe laarẹ̌gaěnge kai sauneng mahuntinambang lẹ̌arěgaěng.

²⁵Ual᷊ingu ene tangu wadange tawe mapapahiạ; apan laese tangu mahang pandaěng sěmbaụ dingangu wal᷊ine.

²⁶Kereu piạ laese sěmbaụ matědu e, tangu kěbị laese wal᷊ine e ute mal᷊aing matědụ; kereu piạ laese sěmbaụ daloěnge ute, kěbị laese lai wal᷊ine e ute mal᷊aing mahul᷊uasẹ̌.

²⁷I kamene kěbị ute kai lawọ badangi Kristus mase i kamene sěngkatau-sěngkatau e mal᷊aing laesu wadang ene.

²⁸ Kerene lai su ral᷊ung u jamaatẹ̌, Mawu Ruata e sen něnilakehu tampạ baugʼu kal᷊awọu haghin taumata: Kahumotongange manga rarolohang; karuane manga nabi, katěllune manga mananěntiro, mase i sire apam měmpẹ̌kẹ̌koạ tanda makạdal᷊inaụ, bọu ene i sire apan nionggotangʼu al᷊amatẹ̌ baugu mapakạpiam masasakị, arau waugʼu mẹ̌tulungʼu taumata wal᷊ine, arau waugʼu měngangahạ e, arau lai waugʼu mẹ̌bisara ringangu kal᷊awọu haghim bawera makạdal᷊inaụ.

²⁹I sire ene wal᷊inewe kěbị manga rarolohange, arau nabi arau lai mananěntiro. Wal᷊inewe kěbị piạ tilakehu mẹ̌koạ munara makạdal᷊inaụ,

³⁰arau waugu mapạkapian masasakị, arau waugu mẹ̌bisara ringangu haghim bera makạdal᷊inaụ, arau waugu měnungkangu kěbị bera e.

³¹Ual᷊ingu ene ute, kěnangko i kamene pẹ̌tawakal᷊i sěngapam botonge tadeạu makahombang laonggọ u tatal᷊ěntụ kasěllahenge. Mase iạ manodẹu ral᷊eng delaing měmal᷊iun ene si kamene.