Read Sangir 1 KORINTUS 13 Bible Online

1 KORINTUS 13 - Sangir bible

1 KORINTUS 13

¹Manilaing iạ makạberang kal᷊awọu haghim beran taumata, arau ringangu weram malaekatẹ̌ e kai kereu iạ e wẹ̌gaweng kuměndagu taumata wal᷊ine e, ute patikụ baweraku ene e kere tingihu tạgonggong tingihe nụneong kaiso tawẹ mangal᷊ene.

² Dingangu manilaing iạ kinawuakengu kapande měhabaru hengetangu Mawu, ringangu makaěnna patikụ kasingkạ mapapěnisẹ̌, dingangu masingkạu patikụ sạbarang dingangu mạngimang masẹ̌ga-sẹ̌gadẹ̌ su Ruata e hakịu iạ makaal᷊ing bul᷊ude, kaiso kawe tạ kakěndagẹ̌ su taumata wal᷊ine ute angkeěng iạ e apawe tạ mangal᷊ene!

³Maningbe lai patikụ apan tẹ̌taghuanengku e, takụ ipakasuem bal᷊awuhe siạ su tau kasiange ringangu wadangku e takụ ipakitutung,[13] kutẹu kawe tạ kakěndagẹ̌ e, ute kěbị-kěbị ene mambeng tawẹ pul᷊ise apa.

⁴I saing kụkěndagu sěndinganenge i sie kai makẹ̌dang dingangu mapia naunge. I sie tawe sumasingking, tawe mẹ̌bawisara tạ humpạe, tawẹ obote.

⁵I sie tawe měmamantugẹ̌, tawẹ bẹ̌tade, tawe měnanihasa taumata wal᷊ine pạtol᷊e kapulune hala, tawe lumainụ, dingangu wěgawue měngindorẹ

⁶I saing kụkěndagu sěndinganenge tạ karal᷊uase su kararal᷊akisẹ̌, i sie tumbạben mal᷊uasẹ̌ su katěngadẹ̌ e.

⁷I sie makẹ̌dang mẹ̌těngom patikụ sạbarange ringangu makěhagẹ̌ mangimang u apang kapiaěnge su sěngkatau-sěngkatau e; maningbe lai kereapa kakakoạu taumata mạngimange kai tawe kailangengu harapẹ̌ dingangu kakakědang měnal᷊udẹ̌ patikụ.

⁸Tawẹ běke u kai piạ tempong taumata tawe mẹ̌kakakěndagẹ̌ e. Orasẹ̌ ini e piạ masasingkạ měhabaru hengetangu Mawu, kụ sěnsul᷊e tempo e sarung mangirul᷊e měhabaru ene. Orasẹ̌ ini e piạu mapapande mahumbisarang haghim bera, kai sarung měmpangirul᷊e mẹ̌bisara su ral᷊ungu kal᷊awọu haghim bera ene. Orasẹ̌ ini e kai piạu limembong masasingkạu kěbị tamai ene, kaiso kěbị apang kasingkạ i sire e sarungbe kawul᷊enang.

⁹U kasingkạ i kitẹ dingangu kuati kitẹ e kai waugu ipěhabaru hengetangu Mawu e mang matimporọ dingangu wẹ̌dang kurange lawọ.

¹⁰Sarung mịdating tempone Mawu Ruata e mapakariadin patikụ e masukụ dingangu apan ta nasukụ e sarung iapakaghěngging.

¹¹Piạ iạ e nạung dariọ deng tal᷊awuọe, pẹ̌bawisaraku e kerẹewe pẹ̌bawisaran dariọ den tal᷊awuọ e, pěndangku e kerẹewe pěndangu rariọ den tal᷊awuọ e, pěngangěnnaku e kerẹewe pěngangěnnan dariọ deng tal᷊awuọ. Orasẹ̌ inie iạ seng matěllang, ute kakakoạku nạung iạ deng dariọ e semben nasue takụ niwala.

¹²Apang kinasilong kitẹ orasẹ̌ ini e ute tabidạeng kěngkau kụkěngkunawadẹ̌ su kasinaěng. Kai sarungbe i kitẹ makasilom matang badang i kitẹ hala ringangu mal᷊ahẹ. Orasẹ̌ ini iạ e wẹ̌dang bẹ̌gang kěbị e, kaiso sarungbe iạ masingkạ u kěbị kerẹewe Mawu Ruata e masingkạ u patikụ kakakoạu watangengku e.

¹³Kụ tempo ini e kai piạ hal᷊ẹ̌ tatěllu harusẹ̌ hinong dal᷊engang i kitẹ e ute kai: pangangimang, pělaharapẹ̌, dingangu pẹ̌kakakěndagẹ̌. Kai kasěllahengu tatěllu ene ute kai mang kakěndagẹ̌ e.