Read Sangir 1 KORINTUS 15 Bible Online

1 KORINTUS 15 - Sangir bible

1 KORINTUS 15

¹Kụ ini e manga anạ u sěmbaụ, iạ mapulu tadeạu i kamene saụbe makatahěndung kapia Injilẹ̌ nạung takụ ilẹ̌habarẹ̌ si kamene. I kamene e němpěnarimạ, dingangu nangimang si Kristus ual᷊ingu Injilẹ̌ ene.

²Kereu i kamene mangumbelẹbe masěgadẹ̌ su apan takụ ilẹ̌habarẹ̌ e ute Injilẹ̌ e kai makasal᷊amatẹ̌ si kamene; tabeạu katewe i kamene mangimang ta makal᷊aěnna.

³ Apan takụ nihabarẹ̌ su manga anạ u sěmbaụ e ute sembem bọu takụ nitarimạ. Kahumotongange ringangu kasariange ute kerẹewe mạbawohẹ su ral᷊ungu Bukẹ̌ Susi e, iạ něhabarẹ̌ si kamene u i Kristus e kawe napohong ual᷊ingu kal᷊awọu rosang kitẹ; nilẹ̌bing;

⁴ kai wọu ene nẹ̌biahẹ̌ kapia su ěllo katěllune. Ene e mal᷊aing kạbawohẹ su ral᷊ungu Bukẹ̌ Susi.

⁵ Iạ e maul᷊ị lai si kamene u i Kristus saụ nẹ̌biahẹ̌ kapia e mal᷊aing nanodẹ u watangenge si Petrus, ringangu l᷊ai su manga rarolohange i sire mapul᷊o dua.

⁶Bọu ene nẹ̌těngkatodẹ u watangenge kapia si sire tumatol᷊ene lima hasụ su kataune sěngkahindọ. Kal᷊awokange woʼi sire e wẹ̌dangbe wiahẹ̌ orasẹ̌ ini, kětạewen manga pirang katau seng nate.

⁷Bọu ene i Kristus nẹ̌těngkasilo l᷊ai si Yakobus bọu ene su kěbị darolohange.

⁸ Su pěngěnsueěnge kahěngang ute nẹ̌tumpasilọ e lai si siạ e — kerẹ e sěngkatau rariọ diměnta reng bal᷊ine tempone![14]

⁹ Iạ e kai rarolohangu Mawu kasanakenge. Iạ e ta hinone ikasěbạ darolohang, batụu iạ e kawe wọu nẹ̌tingkaị jamaatu Mawu.

¹⁰Kai ual᷊ingken tatal᷊ěntụu Ruata e ute iạ nakoạ kere kakakoạku e su orasẹ̌ ini. Ringangu tawe nagholọ bue Ruata e něngampung si siạ. Katewe pundangu iạ e něhal᷊ẹ̌ limembong kasẹ̌gade wọu patikụ darolohange lai wal᷊ine e. Kaiso ene e tumuhụ hinone e wal᷊inewe iạ, kaiso kawe tatal᷊ěntụu Mawu Ruata e nahundingang u iạ.

¹¹Kụ měnsangbe wọi sai-sai i kamene makatarimạu Injilẹ̌ ene — walạewe wọu anuku arau rarolohang bal᷊inẹ e — ene e tawe makoạbe sangkural᷊ange. Kai kahumotongange ringangu kasariange ute i kami e makapěhabaru Injilẹ̌ ene e ringangu i kamene mangimang bue.

¹²Kereu nihabari kami e kawe i Kristus seng saụ nẹ̌biahẹ̌ bọu kapapohonge, unụe wọi kamene piạu mẹ̌bera u tau nate e seng tawe saụ mẹ̌biahẹ̌?

¹³Kamagengbe kahěngang tau nate tawe ipẹ̌biahẹ̌ saụ, ute mangal᷊ene i Kristus e tawe saụ nẹ̌biahẹ̌ bọu kapapohonge.

¹⁴Kụ kereu andene i Kristus tawe saụ nẹ̌biahẹ̌ bọu kapapohonge, ute tawẹ gunane i kami měhabaru apa-apa ringangu tawẹ gunane lai i kamene měmpangimang, u pěngangimangu e tawẹ apa pinamanggilange.

¹⁵Limembo wọu ene ute nal᷊ahẹu i kami e kinarapateng kai sahidi konti mạanun Mawu Ruata e, batụu i kami e něhabaru Mawu Ruata e seng saụ napẹ̌biahi Yesus Kristus bọu kapapohonge, sěmbal᷊iau Ruata e tawe saụ napẹ̌biahi Sie — kereu kahěngang bue taumata nate e tawe saụ nipẹ̌biahẹ̌!

¹⁶U kamageng tau nate e tawe nipẹ̌biahẹ̌ saụ ute i Kristus tawe niapẹ̌biahẹ̌ saụ bọu kapapohonge.

¹⁷Dingangu kamageng i Kristus e tawe nipẹ̌biahẹ̌ saụ ute pěngangimangu e kětạengbeng ipi samatang; kụ ene mangal᷊ene i kamene wẹ̌dang su ral᷊ungu kakakoạu rosa e kụ seng tạu pěharapeng sidutu.

¹⁸Kụ mangal᷊ene lai ute taumatang Sahani apan seng nate ute seng tawẹapa pělaharape.

¹⁹Kereu pělaharapʼi kitẹ si Kristus kẹ̌tabeng nakětạ su pẹ̌bawiahʼi kitẹ su dunia ini e,[15] tangu wọu patikụ umatẹ̌ su ral᷊ungu dunia ini e, ute kai i kitẹ e limembong kạěngkěhang!

²⁰Kaiso karal᷊ahẹe i Kristus seng niapẹ̌biahẹ̌ kapia wọu kapapohonge. Kai ini e wuạu taumata nate e kụ saụ niapẹ̌biahẹ̌ kapia.

²¹Kai watụ u papate e kai suwụu taumata sěngkatau e ute kerene lai mẹ̌biahẹ̌ kapia wọu papate e nionggọ su taumata e mal᷊aing suwụu taumata sěngkatau e.

²²Kerẹewe kal᷊awọu taumata e nate nasowa sěmbaụ dingangʼi Adam kerene lai kal᷊awọu taumata sarung ipẹ̌biahẹ̌ e, ual᷊ingu nasowa sěmbaụ dingangʼi Kristus e.

²³Kai sěngkatau-sěngkatau e sarung ipẹ̌biahẹ̌ tumuhụ bihinge, humotong-motong i Kristus, bọu ene hẹ̌dowen i Sie saụ duměnta kapia, dumol᷊osewe wihingu taumata apan tataghuanengi Kristus.

²⁴Samuring ene ute nahẹ̌puse dunia e. Su tempo ene i Kristus e sarung mamatạ patikụ parenta, patikụ kawasa ringangu patikụ kuatẹ̌, mase i Sie sarungbe měnarakangu kawasane kere sěngkatau ratu e, su Ruata i Amang i kitẹ.

²⁵ I Kristus hinowen tatapẹ̌ mẹ̌pẹ̌parenta sarangbeng Mawu Ruata e mapakariadin patikụ dokạ i Kristus e mẹ̌samal᷊ẹ si Kristus.

²⁶Dokạ pangěnsueěnge sarung ikawatạ, ute kai papate.

²⁷ Su ral᷊ungu Winohẹ Susi e kạbawohẹ kere ini, ”Mawu Ruata e seng napakariadim patikụ sabarang nẹ̌samal᷊ẹ si Sie.” Nal᷊ahẹ kere su pẹ̌sasasěbạ u, ”patikụ sabarang” ute Mawu Ruata e madal᷊iuwe su l᷊ikude, kụ napakariadin patikụ sạbarange nẹ̌samal᷊ẹ si Kristus.

²⁸Kai sarạeng kěbị-kěbị e seng nisěllunge su al᷊ungu parentạeng Kristus, tangú i Sie sẹ̌sane kụ Ahusu Ruata e, sarung mẹ̌těngkasěllungu watangenge su Ruata kụ seng napakariadin patikụ-sạbarange nẹ̌samal᷊ẹ si Sie. Tangu Ruata e mal᷊aing sarung sẹ̌sane mẹ̌parenta kěbị e.

²⁹Kereu taumata nate e tawe iapẹ̌biahẹ̌ kapia, unụe wue piạ taumata nisahani e waugu taumata nate? Kai apạ e ikapěharapẹ̌ bọu kal᷊awọu taumata kerene? Kereu mamben těngadẹ̌ taumata nate e semben tamẹ̌saụ mẹ̌biahẹ̌ e, kai pẹ̌kapura wue tangu taumata isahani waugu taumata nate e?

³⁰Dingangu kai waugʼu a l᷊ai i kami e měngkai tụtatěngo hombang sidutu?

³¹Manga anạ u sěmbaụ! Apang kal᷊aěllo iạ e mang mẹ̌dẹ̌dararagu sigẹ̌sạ e waugʼu iạ rụl᷊uasu pẹ̌bawiahʼi kamene manga anạ u sěmbaụ batụu i kamene kawe seng nangimang si Kristus Yesus, Mawung kitẹ.

³² Kamageng ene e kětạengbeng kawe ual᷊ingu mạtaumata e samatang, apa wue untune si siạ baugʼu mẹ̌tawakal᷊i sěngapam botonge rumokạ kal᷊awọu binatang dul᷊u su soa ini, su Efesus? Kereu mamben těngadẹ̌ taumata nate e tawe saụ ipẹ̌biahẹ̌ kapia, ho, mapiawe i kitẹ tumol᷊e bungangʼu wawera ini: ”Hotede i kitẹ e kumaěngke ringangu měnginungke ringangu mẹ̌daral᷊uase, watụ u rịěllo i kitẹ kawe sarung mate.”

³³Piawe kal᷊itoěng! Kereu i kamene měhapịu taumata ral᷊akisẹ̌ e, kai makạdal᷊akisẹ̌ bahasa mapapia.

³⁴Kụ kuhạko wue mẹ̌koạ dal᷊akị. Kai apa makạmea kereu sutal᷊oarang kamene e kai piạ taumata kụ bẹ̌dang ta nakạkiral᷊a Mawu Ruata.

³⁵Aramanung kai piạu makiwal᷊o, ”Kai kereapạ e taumata nate ipẹ̌biahẹ̌ kapia? Kere apa ngae pẹ̌bawadange ionggọ si sire, sarạeng seng nẹ̌biahẹ̌ kapia?”

³⁶Ei tau longong! Kereu i kau e mẹ̌suang bine su ral᷊ungu ěntana, bine ene e ren tawe tumuwo kereu ren tawe nate kal᷊amona.

³⁷Dingangu wine nisuangu su ěntana ene e — aramanung kai wineng gandung arau wine wal᷊ine — ute kai wakị u wine ene samatang, wal᷊inewe kěbị sasuange kụ sarung tumuwo.

³⁸Hẹ̌dowem Mawu Ruata sẹ̌sane mangonggọu tatuwone tumuhụ ewe kapulune mẹ̌tatahino su sasuange ene. Kụ suapạewen haghim bine seng nahiạ u tatuwone timuhụ ewe sasuange sěmbaụ-sěmbaụ.

³⁹Badangu riạdikang sụsindạe wal᷊inewe kěbị mẹ̌sul᷊ung. Taumata e wadange mẹ̌sẹ̌sul᷊ung arawe binatange piạ gahịu wadange wal᷊ine; manga manụ e mal᷊aing bal᷊ine ghahịu wadange.

⁴⁰Kerene lai manga ral᷊ohon langị dingangu dunia. Dal᷊ohon langị e sěmbaụ-sěmbaụ nahiạ u kal᷊ěnggihe ringangu ral᷊ohon dunia e mal᷊aing kerene.

⁴¹Kal᷊ěnggihu sěnnangu matangěllo e naněntani wọu kal᷊ěnggihu sěnnangu wul᷊ang. Manga wituinge mal᷊aing piạ kal᷊ěnggihe sẹ̌sane. Sal᷊ạanune apam bituinge mẹ̌tẹ̌tatěntani lai kal᷊ěnggihe.

⁴²Kerene lai sarung taumata nate e mẹ̌biahẹ̌ kapia. Badange nilẹ̌bing ene e kai wạdang mạhenẹ, arawe kụ bạdange nipẹ̌biahẹ̌ kapia e ute kai wadang tawe mal᷊ahenẹ.

⁴³Su tempom badang ene nilẹ̌binge ute wadang ene mahenẹ dingangu lome; arawe su tempong iapẹ̌biahẹ̌ kapia e ute kai wadange mal᷊ěnggihẹ̌ dingangu matoghasẹ̌.

⁴⁴Su tempon nilěbinge, ute wadang ene e kai wadang bọu dunia, arawe sarạeng nẹ̌biahẹ̌ kapia e ute wadang ene e, kai wadang nionggọu Rohkẹ̌ u Ruata. Piạ badang asal᷊e wọu dunia, piạbe lai wadang kụ asal᷊e wọu Ruata.

⁴⁵ Su ral᷊ungu Winohẹ Susi kạbawohẹ kere ini, ”Taumata humotonge ute kai i Adam, nakoạ diadikang biahẹ̌,” kai arawe i Adam kasamuriange ute kai Rohkẹ̌ namiahẹ̌.

⁴⁶Diměnta kakal᷊imonaěnge ute kai ghẹ̌si, wal᷊inewe kai rohkẹ̌. Arawe rohkẹ̌ ute kai riměnta samuri.

⁴⁷I Adam humotonge ute kai nikoạ bọu awul᷊u ěntana, arawe i Adam karuane ute kai asal᷊e wọu sorga.

⁴⁸Taumatan dunia ini ute kai mẹ̌sul᷊ungu i Adam kahumotong-motongange nikoạ bọu awul᷊u ěntana, arawe taumatan sorga e ute kai mẹ̌sul᷊ungu i Sie kụ diměnta wọu sorga.

⁴⁹Kerẹewe lai i kitẹ orasẹ̌ ini e mẹ̌sul᷊ung i Adam nikoạ bọu awul᷊u ěntana e ute i kitẹ e lai sarung mariadi[16] kerẹewe i Sie kụ bọu sorga e.

⁵⁰Timonaku e ute manga anạ u sěmbaụ kai: wadang kụ niriadi wọu ghěsi ringangu raha e, tawe makasuẹ̌ su Runian Duata Wuhu; ringangu wadang kụ mahuta e tawe makoạ kakalẹ̌.

⁵¹ Kěnangko patehe rahasia ini: Wal᷊inewe kěbị e i kitẹ sarung mate, kai i kitẹ kěbị e sarung mẹ̌bal᷊ui.

⁵²Watụ u hal᷊ẹ̌ ene e hẹ̌dowen mariadi sěngkělěndịu arau sěngkakondạ, piạ e slompretẹ̌ e ipahěte su pangěnsueěnge. Batụu su tempọeng kinaringihẹ̌ tingihu slompretẹ̌ e, ute apan nate e ipẹ̌biahẹ̌ kapia ringangu wadange kakalẹ̌, kụ i kitẹ kěbị e ipẹ̌bal᷊ui.

⁵³Wadang i kitẹ lụate e harusẹ̌be mẹ̌pakẹu wadang i kitẹ ta lumaate, ringangu wadangi kitẹ bọu dunia e seng nẹ̌pakẹu wadang kụ bọu sorga e.

⁵⁴ Kereu wadang lụate seng něluheng badang ta lumaate, ringangu wadang kụ bọu dunia e seng něluhen kakakoạu wadang kụ bọu sorga e, ute su tempo ene buhụewe naghanapẹ̌ kere mạbawohẹ su ral᷊ungu Winohẹ Susi u, ”Papate seng kinawatạ; kal᷊auntung seng nikahombangeng!”

⁵⁵ ”Ei papate, suapạe watạu e? Ei papate, suapạe wisanu?”

⁵⁶Bisang papate ute kai rosa e, ringangu rosa e mạsẹ̌gadu toratẹ̌ e.

⁵⁷Kai tangu, tarimakasẹ su Mawu Ruata e; u i Sie kai nangonggọu watạ e su Mawung kitẹ i Yesus Kristus.

⁵⁸Ual᷊ingu ene, manga anạ u sěmbaụ kụ ikẹ̌kěndagẹ̌, pakakakuatẹ̌ dingangu pakatatoghasẹ̌ bue i kamene. Pěmpěhal᷊ẹ̌ko turusẹ̌ baugu Mawu e ringangu kạguwạu ral᷊ungu naung, u i kamene masingkạ u patikụ apang kinoạ i kamene waugu Mawu e tawe makoạ tạ gunane.