Read Sangir 1 KORINTUS 16 Bible Online

1 KORINTUS 16 - Sangir bible

1 KORINTUS 16

¹ Arawe hal᷊ẹ̌ u lahuwụ baụgu sěndinganeng tau Sahani e iạ kai mạul᷊ịu koạko l᷊ai kere takụ niatorẹ̌ su kal᷊awọu jamaatẹ̌ su Galatia e.

²Su ěllo humotong apang kamisae kěnangko i kamene kěbị e pěmpěnělẹ u roitẹ̌ pẹ̌kạdodọ e tuhụ ewe ěbạ e. Komol᷊ẹ̌ko roitẹ̌ ene sarang iạ duměnta, tadeạu su tempo ene e semben tawahal᷊uasu měmpěngomol᷊ẹ̌.

³Hẹ̌dowen iạ e seng marěnta, ute iạ e sarung měndolohu taumata kụ seng kinapulung kamene. Iạ e kai mangonggọu suratu pawawa tatonda kakěndagʼi kamene e sol᷊ong Yerusalem.

⁴Kụ Kereu patehang dembem mapia ute iạ mal᷊aing hinon taraị mahundingang kụ sěngkaral᷊eng dingangi sire.

⁵ Iạ e kai sarung mẹ̌tiwo si kamene, kereu matẹ̌pasu Makedonia, u iạ e mẹ̌kẹ̌karaki sumahe wọu ene.

⁶Botonge mariadi iạ e sarung mẹ̌tanạ kạdodọ tempo ringangi kamene, arau aramanung saral᷊aing pakal᷊iun musungu matěho e. Mal᷊iung ene i kamene wotonge makapẹ̌sumbala si siạ manẹ̌pasu raral᷊eng sol᷊ong tampạ tuhụ e.

⁷Iạ e tawe mapulu mẹ̌tiwo si kamene tumbạu mẹ̌totong mạtarang sẹ̌saheěng. Kereu Mawu e mapakawala ute, iạ deng mapulu mẹ̌tanạ diọ mararěnna ringangi kamene.

⁸ Těntal᷊ang ene e iạ deng matanạ su soa ini, su Efesus, sarang ěllong, ”Katatěntungu Rohkẹ̌ u Ruata.”

⁹Lawọ l᷊oahe sini waụgu munara piạ kěhase, manịeng lawọ l᷊ai rụdokạ.

¹⁰ Kereu i Timotius e marěnta e, ute sěmpike wue pakapia i sie, tadeạu i sie marěpang bue sutal᷊oarang kamene, u i sie kai kere iạ mal᷊aing mẹ̌munara waụgu Mawu.

¹¹Kumbahangbe sarang piạu tawe měndekeng i sie. Sumbalai wue i sie tadeạu i sie makapaněpasu raral᷊enge mẹ̌sul᷊e kapia sol᷊ong anuku tạ kurange apa, watụ u iạ e mạngampal᷊ẹ̌ darěntane ringangu manga anạ u sěmbaụ bal᷊ine.

¹²Arawe anạ u sěmbaụ i kitẹ i Apolos, měngkate seng apa piran sul᷊e mạul᷊ị si sie tadeạu i sie ringangu manga anạ u sěmbaụ bal᷊ine e měmpẹ̌tiwowe si kamene. Kai i sie wẹ̌dawen tawe nakạpěndang maiaking[17] u i sie kai harusẹ̌ lighạ tamai ini. Kai tangu kereu hẹ̌dowe piạ tempone, ute tantu sarungbe ruměnta.

¹³I kamene pakaral᷊ukadẹ̌ bue, ringangu pakatatoghasẹ̌ bue sural᷊engu pẹ̌bawiahʼi kamene mamewẹ u tau Sahani. Pakawawahani wue ringangu měngkai pakakakuatẹ̌.

¹⁴Apạeweng kẹ̌koateng i kamene e, koạbe ringangu pẹ̌kakakěndagẹ̌.

¹⁵ I kamene e masingkạ beng i Stefanus ringangu i sire sěmbal᷊eěng, u kai i sire kakal᷊amonaěngu němpẹ̌sowa Sahani su wanuan Akaya. I sire ringangu kaguwạu naung němpẹ̌těngkasarakang su pẹ̌tatangkiang jamạatʼu Mawu.

¹⁶Iạ e maul᷊ị si kamene ringangu sěngapam botonge tadeạu i kamene tumol᷊ewe pěmamihingu taumata kerene, ringang kewe lai i sire wal᷊ine sěhal᷊ěkang sěngkapẹ̌tangkiang si sire.

¹⁷Iạ e mal᷊uasẹ̌ su rarěntang Stefanus, Fortunatus dingangu i Akhaikus. I sire mẹ̌sul᷊ungkelain gaghanting kamene waụgu iạ.

¹⁸I sire e kai seng nakal᷊uasẹ̌ naungku e, kerẹewe i sire makạl᷊uasẹ̌ naung i kamene. Taumata kerene e harusẹ̌be lẹ̌arẹ̌gai.

¹⁹ Manga jamaatẹ̌ su Asia e něndohom ben tạbeạ i sire si kamene. I Akwila rẹ̌duan Priskila e ringangu jamaatẹ̌ apan němpẹ̌tampung su wal᷊en sire e mal᷊aing němpěndohon tabeạ si kamene, ual᷊ingkem pẹ̌kakauhu tau Sahani e.

²⁰Kěbị manga anạ u sěmbaụ sini e němpěndohon tạbeạ si kamene. Pěmpẹ̌papangadatẹ̌ bue pakakakěndagẹ̌ lawọ tau Sahani.

²¹Takụ l᷊ai takidang sini tabeạku takụ niwohẹ sẹ̌saku: Tabeạ bọu iạ, i Paulus.

²²I sain ta kumakěndagẹ̌ Mawu e kapiangbe i sie mawinasa! Maranatha — Mawung kami e děntạe!

²³Karimạko Mawu Yesus měngal᷊amatẹ̌ si kamene.

²⁴Kakěndagẹ̌ku e pahundingang i kamene kěbị nasěmbaụ dingangi Kristus Yesus e. Adatʼi kami, Paulus