Read Sangir 1 KORINTUS 4 Bible Online

1 KORINTUS 4 - Sangir bible

1 KORINTUS 4

¹Koạe i kami kere mẹ̌tatangkiang si Kristus, bahani ringangu mal᷊uasẹ̌ měhabaru manga hingidu Ruata e kụ bẹ̌dang ta nikẹ̌kasingkatengu dunia.

²Kahumotong-motongange ghẹ̌gausang bọu mẹ̌tatangkiang kerene e ute kai kasasatia su mawune.

³Si siạ e, tawe makoạbe apa-apa kụ apạewen tẹ̌tiněnnaěng i kamene dingangu i sai-sai mẹ̌tẹ̌tiněnnang iạ. Limembo katewe apan takụ lẹ̌ěnnaěng mạanum batangengku e tawe mẹ̌kapura wue.

⁴Iạ e tawe nakapěndang sal᷊aku balạewe měnsang suhal᷊ẹ̌ sude, kai ene e wal᷊inewe mạul᷊ịu iạ mamben tạ sal᷊aku. Kětạeng Mawu sẹ̌sane měnanantune měnsangbe iạ něsal᷊a arau tala.

⁵Ual᷊ingu ene, puhinengu wẹ̌dang bal᷊ine tempone, kumbahangbe i kamene mẹ̌sasahawụ měnantu sěngkatau-sěngkatau e piạ sal᷊ane ringangu tala. Pěngampal᷊ẹ̌ko sarang darěntan Mawu e. Kai i Sie hẹ̌dong mělahẹ u kěbị rahasia e mạbawuni su rěndunge. I Sie e kai sarung mělẹ̌ke patikụ ěnning mạdarěpehẹ̌ su ral᷊ungu naungu taumata. Su tempo ene wuhụewe sěngkatau-sěngkatau měnarimạu raralo wọu Mawu e tuhụewe hinong ikatarimạ e.

⁶Manga anạ u sěmbaụ! Baugu pandungang i kamene e, iạ e seng napakatarangu patikụ ene si kanduang Apolos. Timonane e tadeạu wọu ahạ i kandua e ute i kamene makapẹ̌těnno apa mangal᷊em bawera, ”Pěmpěngumbelẹbe suapang kewe pělatorang kụ piạ e.” Mạdiringbe piạ u sěngkatau wọi kamene e mẹ̌tẹ̌těngkarangẹ u naunge kapẹ̌lěhinakange wal᷊ine.

⁷I sai wue tangu mapakariading anạ u sěmbaụ e limembo wọu wal᷊ine? Kụ patikụ sabarange wal᷊inewe nitarimạu wọu anun Duata tangu? Kụ unụe mapulu mẹ̌těngkarangẹ u watangeng, kụ apam piạ si kau ene al᷊ingkai wal᷊inewe sěmbaụ gaghěllị tangu?

⁸Kahěngang bue i kamene semben tawe lai mẹ̌gausẹ̌ apa-apa! U i kamene e seng narotong! I kamene semben naratu! Dingangu i kami e tala wue. Limemboweng kapiaěnge kereu i kamene kahěnga-hěngangbe seng nakoạ datu, tadeạu i kami e makapẹ̌parentawe ringang i kamene.

⁹Kai tuhụewe tingirangkue, i kami manga rarolohange, seng kinoạ u Ruata e wawialaěng su těngon taumata e ringangu manga malaekatẹ̌. I kami e kai tabidạu taumata raral᷊akisẹ̌ kinanawoěngu hukumang papate su těngon l᷊awọ e ringangu wẹ̌bansagheng u dunia.

¹⁰Ual᷊ingʼi Kristus e, ute i kami e kai narekeng taumata wodo, kụ arawe i kamene ute kai tau Sahani pande! I kami e kai lome, arawe i kamene e matoghasẹ̌! I kami e ipělẹ̌heghesẹ̌, dingang u i kamene rẹ̌daloěng.

¹¹Sarang orasẹ̌ ini i kami e nakahombangke karal᷊unusẹ̌ dingangu kararou; pakeang i kami e kate nal᷊ěmbe su wadang; taumata e manịgěsạ si kami, i kami e tawẹ tampạ i kami e tatapẹ̌;

¹² i kami e mạbaụ u munarang kami ual᷊ingu liaghang gati e mědẹ̌deạ biahẹ̌. Kereu i kami ipakawontogẹ̌ e, i kami e mamal᷊isu al᷊amatẹ̌, kereu i kami e tingkaitange ute, i kami mẹ̌těngkasabarẹ̌;

¹³kereu taumata e mapakạdal᷊akisʼi kami e, i kami e mamal᷊isu wisara al᷊usẹ̌. I kami e tawe nangělembo wọu onasu dunia ini e, sarạeng tempo ini e i kami e wẹ̌dang mạdarekeng kere raral᷊indaěng.

¹⁴Iạ e namohẹ u ini e si kamene bal᷊inewe waugu mapakameang kamene, kaiso kawe měnasa si kamene kere manga anạku tutune.

¹⁵Watụ u iạ e kai makoạ i amang i kamene, maningbe aramanung kere tau Sahani i kamene seng piạ mananěntirone mapul᷊o hiwu su kataune. Su pẹ̌bawiahu kere taumata kụ nasěmbaụ dingangi Kristus, iạ e nakoạ i amang si kamene, batụu kawe iạ e nẹ̌bawa Injilẹ̌ mạanung Kristus e si kamene.

¹⁶ Batụu ene iạ e měgẹ̌gausẹ̌ sěngapam botonge tadeạu i kamene e pěmpẹ̌těnoko si siạ e.

¹⁷Baugu ene e iạ e sen něndolohi Timotius si kamene. Mihino tumatol᷊e si Kristus, i sie al᷊ingkai anạku tutune ikẹ̌kěndagẹ̌. I sie anạ botonge kapěngumbalaěng. I sie hědowe sarung mapětahěndung i kamene e suhal᷊ẹ̌ u kakakoạ u pẹ̌bawiahẹ̌ kụ takụ tẹ̌tol᷊eěng sarang sen nangimang si Kristus, kụ kai kakakoạ u pẹ̌bawiahẹ takụ itẹ̌těntiro suapan jamaatẹ̌ walạewe měnsang suapa.

¹⁸Pira-pirang katau woʼi kamene e seng něngkaobotẹ̌, u i sire mạngěnnau iạ e tawe sarung duměnta anung kamene.

¹⁹Kai kereu Mawu e mapakawalang iạ e ruměnta kapia tạ kạděngụ e sol᷊ong anung kamene. Hẹ̌dowen su tempo ene e, iạ sarung l᷊ai makasilo apang kinoạ u taumata naunge marangẹ e; bal᷊inewe kětạu su waweran sire samatang.

²⁰U kamageng Mawu Ruata e mẹ̌parenta su pẹ̌bawiahu sěngkatau e, hal᷊ẹ̌ ene tangu mal᷊ahẹ bue supẹ̌wiahu taumata ene e, wal᷊inewe ual᷊ingu wawerane.

²¹Kụ pěmpěmilẹ e apawue lembong i kẹ̌kapulung kamene! Apa i kamene mapulu iạ e ruměnta maněntiro mahẹ̌gisẹ̌ arau masikome ringangu kakěndagẹ̌?