Read Sangir 1 KORINTUS 5 Bible Online

1 KORINTUS 5 - Sangir bible

1 KORINTUS 5

¹ Tuhụ hinone iạ seng nakahombang habarẹ̌ nasěsahẹ̌ u sutal᷊oarang kamene e kai piạ pẹ̌sasundal᷊ẹ̌ mạhěmpal᷊iu: Piạ u wọi kamene nẹ̌kapapuěng si mamane uatạ. Taumata apam bẹ̌gang Mawu e mal᷊ain tawe mẹ̌kakoạ kerene!

²Maning kerene, kai mang bědang marangẹ naung i kamene e. Sěmbal᷊iau i kamene kawe hinong měngkasusa, ringangu mapasěbang i sire apang měmpẹ̌kẹ̌koạ ene e wọu tal᷊oarang kamene e.

³U iạ e maningbe marau tuhụ badange, kaiso tuhụ dokẹ̌ e ute ene wue sutal᷊oarang kamene. Kụ ene, iạ e kai něnawong putusang al᷊ingkai ene sutal᷊oarang kamene. ”Su arengu Mawu Yesus Kristus iạ maul᷊ịu i saing kụ seng nẹ̌koạ karal᷊amuhụ e ute harusẹ̌ ihukung!” Kereu i kamene měmpẹ̌komol᷊ẹ̌ e ute mẹ̌sul᷊ungu iạ mal᷊aing ene sutal᷊oarang kamene ringangu ual᷊ingu kawasan Mawung kitẹ i Yesus,

⁵ute i kamene e hinong měnarakangken tau ene su setang tadeạu mapakawinasam badange, arawe himukude maambang su tempon Mawu e ruměnta kapia.

⁶ Dal᷊esạ i kamene e mamben ta nẹ̌tatahino. Aramanung i kamene masingkạ u wawera, ”Haesẹ̌ kạdodọ e makạtuwo kěbị tapoěng nikaugẹ̌!”

⁷ Děmmẹko kal᷊amona haesẹ̌ těbe, arau haesu rosa e, tadeạu i kamene mariadiwe kal᷊aukangu tapoěng buhu, wurẹ̌si wọu l᷊ahaesu rosa těbe kụ iạ e masingkạ batụu i kamene mambeng kerene. Batụu, pěmamantugu ěllong Paskaʼng kitẹ e seng nasạdia, watụ u i Kristus seng nakoạ dombang Paskaʼng kitẹ e karạ kawe selaing nihata.

⁸ Kụ mahịe i kitẹ měmantugẹ̌ sal᷊iwang i kitẹ e ringangu borotẹ̌ ta nilẹ̌haesang, mangal᷊ene borotẹ̌eng kasasusi ringangu patikụ apan nẹ̌tatahino su kapulun Mawu Ruata. Kumbahang i kitẹ e měmantugẹ̌ ěllon Paskah e relaing mẹ̌pakẹ u borotẹ̌ piạ kabọ e těbe, kụ kai l᷊ahaesu rosa e ringangu karal᷊amuhụ.

⁹Su ral᷊ungu suratẹ̌ku tamai nal᷊iu, iạ e nẹ̌sěding si kamene tadeạu i kamene abe pěmpẹ̌dalahapị dingangu tahapẹ̌sundal᷊ẹ̌.

¹⁰Kai iạ bal᷊inewe mạanung tahapẹ̌sundal᷊ẹ̌ arau mal᷊aanggang arau tahapěngakal᷊ẹ̌, arau tahapaněmba mahan duata kụ mamben bẹ̌gawen Mawu Ruata mạdihutu. Wal᷊ine! Iạ e wal᷊inewe mạul᷊ịu i sire; u kamageng i kamene kawe harusẹ̌ mẹ̌těngkaraun sire e, nal᷊ahẹ u i kamene e hinong mahunsěbang bọu dunia ini.

¹¹Su timonaku e ute kai, i kamene kumbahang mẹ̌dahapị u taumatan Sahani e kụ mạngakum batangenge tau Sahani e, kaiso kawe tahapẹ̌sundal᷊ẹ̌, arau maanggang, arau tahapaněmba mahan duata, arau puluange měndal᷊akisẹ̌ taumata wal᷊ine, tahawukang, arau l᷊ai tahatako. Kal᷊ingung kumaěng sěngkakaěng dingangu taumata ene e mamben kariẹ!

¹² Těngadẹ̌ bue měhukungu taumata apam bal᷊ine tau Sahani e wal᷊inewe hal᷊ẹ̌ku. Kai Ruata sẹ̌sane e sarung měhukung i sire. Kai arawe mạanun dal᷊ohon jamaatʼi kamene e, wal᷊inewe i kamene hala ngae hinong měhukung i sire? Su ral᷊ungu Winohẹ Susi e kạbawohẹ, ”Tokol᷊e taumata ral᷊akisẹ̌ e wọu anung kamene.”