Read Sangir 1 KORINTUS 7 Bible Online

1 KORINTUS 7 - Sangir bible

1 KORINTUS 7

¹Iạ e reng mahumbisarang apang nịbawohẹ su ral᷊ungu suratʼi kamene. Sěngkatau esẹ kụ tawe nẹ̌kawinge mapia wue.[5]

²Mẹ̌deạu i sie tawe kawinsanaěngu mẹ̌koạ apan tawe mẹ̌tatal᷊ahino, sěngkatau esẹ e mapiawe piạ kawinge, ringangu apam bawine e mapiawe piạ kawinge.

³Kawing esẹ e harusẹ̌ měndal᷊engu patikụ munaran sěngkatau esẹ su kawinge, ringangu marehokange harusẹ̌ měngganapẹ̌ kal᷊awọu munarang sěngkatau wawine su kawinge esẹ e; sěngkatau-sěngkatau e měngganapẹ̌be munarane sěmbaụ su wal᷊ine.

⁴Marehokang e tawe kawasa su wadang e hala; piạ kawasa su wadang e kawe kawing e. Kerene lai esẹ e tawe kawasa su wadang e hala; piạ kawasa su wadang e kawe marehokang e.

⁵Kumbahangbe mẹ̌těngkaghea sěngkatau wọu kawinge, tuhụewe tundung pẹ̌sěngkawingang. Botonge su pẹ̌sěngkakuhuange asal᷊u ruamběka e sěngkanaungbue. Kamạgeng kerene ute makapanuntụbe pẹ̌kakal᷊iomanenge ringangu tawẹ konsange apa. Arawe wọu ene ute, i kamene e harusẹ̌ be pěmpẹ̌sul᷊e pěmpẹ̌tatamba tuhụ tundung pẹ̌sěngkawingang. Kereu wal᷊inewe kerene ute, kạdingạbe i kamene kasal᷊ukatengu setang, ual᷊ingu i kamene tạ pẹ̌tatingkẹ̌dange.

⁶Iạ e mẹ̌bẹ̌bera kere ini e wal᷊inewe kere měpẹ̌parenta, kaiso kawe tabidạu sasal᷊ěntihọ.

⁷Iạ něngalembom puluang kereu kẹ̌bị taumata e makoạ kere iạ. Kaiso sěngkatau-sěngkatau e kawe seng nahiạ u laonggọ u tatal᷊ěntụ si sie tutune wọu Mawu Ruata. Sěngkatau seng nitilakehu kere ini, wal᷊ine e lai kerene.

⁸Su taumata apan tawe někẹ̌kawing dingangu su manga wawine wal᷊u e, ute sasal᷊ěntihọku e kere ini: Mapiawe i kamene kạtatanạ sěsa kere iạ e.

⁹Kai kereu i kamene tawe makapẹ̌tingkẹ̌dang ute i kamene pěmpẹ̌kawingke. U mapiawe i kamene měmpẹ̌kawing sul᷊ungu mẹ̌tatahangu ěnning sụsahoka.

¹⁰ Si sire apan bọu němpẹ̌kawinge ute, parentaku e kai kere ini: (Tuhụ hinone e wal᷊inewe iạ nẹ̌gěllịu parenta ini e, kaiso kawe Mawu). Sěngkatau wawine kụ seng bọu nẹ̌kawinge ute kumbahangbe maněntangu kawinge.

¹¹Kereu i sie kawe seng naněntang ute, kạtatanạbe tawẹ kawinge, arau pẹ̌piang kawinge. Dingangu sěngkatau esẹ e tawe wotonge mapẹ̌tal᷊ein kawinge.

¹²Si sire lai wal᷊ine ute waweraku — ini e kai sasasaku hala wal᷊inewe Mawu e — u kereu sěngkatau taumatan Sahani e piạ kawinge tau wawine kụ ta mangangimang si Kristus, kụ kawinge ene e mapulu mẹ̌dal᷊ahiking u kawinge Sahani e, ute tau esẹ e abe panindo si sie.

¹³Mase lai kereu sěngkatau wawine Sahani e nẹ̌kawingu taumata kụ ta mangangimang si Kristus, kụ kawinge (esẹ) ene e mapulu mẹ̌dal᷊ahiking dingange, ute tau wawine ene kumbahang manindo kawinge ene.

¹⁴U tau esẹ ta mangangimange kawe nitarimạ u Ruata e ual᷊ingu pẹ̌kakawinge ringangu tau wawine kụ seng nakoạ tataghuanengu Ruata. Kerene lai tau wawine ta mangangimange nitarimạ u Ruata e ual᷊ingu pẹ̌kakawinge ringangu tau esẹ kụ seng nakoạ tataghuanengu Ruata. U kereu wal᷊inewe kerene ute, manga anạ i sire e tantu kai manga anạ u tau kapirẹ̌ e, sěmbal᷊iu manga rariọ kawe nakoạ kere ralohon jamaatu Mawu.

¹⁵Kai kamageng u taumata ta mangangimange kai maněntangu kawinge (wawine) arau kawinge (esẹ) Sahani e, ute kumbahang mametọ si sie. U su hal᷊ẹ̌ ini e ute baẹ bawine arau lai esẹ e walawe i sie, u Mawu Ruata e kawe mapulu tadeạu i kamene e apẹ̌biahẹ̌be su pẹ̌darame.

¹⁶U lahạu i kau sěngkatau wawine — kụ seng nangimang su Mawu e — kereapa wue i kau makakasingkạ kahěngang u i kau tawe makaambang[6] kawingu e? Kerene lai i kau sěngkatau esẹ Sahani e kereapa wue i kau makakasingkạ mal᷊ahẹ u i kau tawe makaambang kawingu e?

¹⁷Sěngkatau-sěngkatau pěhingide wiahe tumuhụ ahạu Mawu kerẹewe seng nitilakehu Mawu e si sie su tempon Mawu Ruata e kimui si sie pěmpạngimang si Sie. Kụ ene e takụ ilẹ̌atorẹ̌ kerene su patikụ jamaatẹ̌.

¹⁸Umpamane, kereu piạu nisunatẹ̌ su tempon i sie nakatarimạu kakuin Mawu e, tangu kumbahangbue tau ene makiul᷊ịu ěnạ u pẹ̌sasasunatẹ̌ e. Kerene lai kamageng piạu ta nisẹ̌sunatẹ̌ su tempong i sie kinakuiangu Mawu e ute kumbahang bue i sie makisunatẹ̌.

¹⁹U watụ u tumuhụ atorangu pẹ̌sasunatẹ̌ arau tala e mamben tạ mangal᷊ene apa. Kapiaěnge ute tumbạu tụtuhụ kal᷊awọu titam Mawu e.

²⁰Sěngkatau-sěngkatau e mapiawe kạtatanạ měbẹ̌biahẹ̌ kere nạung kakakoạu i sie seng nakatarimạu kakuin Duata.

²¹Kamageng su tempong i kau nikuiang kawe nạung ěllang, ute abe kasusang ene. Kụ kamageng i kau semben makapẹ̌těngkal᷊iwirẹ̌, ute limemboweng kapiane.[7]

²²U sěngkatau ěllang kụ seng nangimang su Mawu, ute kai taumatang Mawu nipakal᷊iwirẹ̌. Dingangu sěngkatau kụ seng nipakal᷊iwirẹ̌ e seng nangimang su Mawu e, ute kai ěllang i Kristus.

²³Mawu Ruata e kai seng němaehẹ̌ si kamene dingangu kai seng nasueng baehe, kụ ual᷊ingu ene ute, kumbahangbe i kamene mẹ̌těngkakoạ ěllangu taumata.

²⁴Kụ i kamene, manilaing kerea kakakoạ i kamene su tempon nikuiange kai i kamene e měngkate pakatanạ mẹ̌bẹ̌biahẹ̌ kerene kạdaringang su Mawu Ruata.

²⁵Mihinọewe su apan ta někẹ̌kawing. Su hal᷊ẹ̌ ini e, iạ e reng ta něnarimạ u laoro apa wọu Mawu e. Kaiso kere sěngkatau kụ ual᷊ingken tatal᷊ěntụ u Mawu e kụ hinong pangimangeng ute iạ kai mapulu měngonggọu sasal᷊ěntihọku.

²⁶Kereu mẹ̌patehẹ̌ kal᷊awọu susa ramahi kạděntane, ute su pěndangengku e mạpiangbe balạe kạtatanạ kere.

²⁷Kereu i kau e seng nẹ̌kawinge ute abe kawe mẹ̌těngkapěllọ bọu kawing ene e. Kereu i kau e reng tawe nẹ̌kẹ̌kawing ute manịeng tawe mẹ̌kawing.

²⁸Kai kereu i kau kawe nẹ̌kawinge ute wal᷊inewe rosa. Kerene lai kereu sěngkatau mahuala e mẹ̌kawing, ute wal᷊inewe nẹ̌koạ dal᷊awang. Kětạengbeng i sire apan němpẹ̌kawinge kai mẹ̌sombangu haghin sigěsạ. Kụ iạ e kai mapulu tadeạu i kamene kai mal᷊iu wọu kal᷊awọu haghin sigěsạ ene.

²⁹Timonaku e kai kere ini, manga anạ u sěmbaụ: Tempong kitẹ e kai kadodọ. Těntal᷊ang ene ute, manětạ bọu někawinge ute pẹ̌biahẹ̌ko kere sěngkatau ta nẹ̌kẹ̌kawing;

³⁰i sain sụsangị, ute tạbidạu mẹ̌bẹ̌biahẹ̌ tạ susan naunge; i sain rul᷊ẹ̌ge ute tạbidạu tạ karal᷊uase; i sain seng bọu němpamělli e tạbidạu ta mananaghuang apa-apa;

³¹dingangu i sain měngkai kạl᷊ausihẹ̌ su hal᷊ẹ̌ u mạdunia e ute pěmpẹ̌biahẹ̌ko tabidạu tạ tasibung kěbị-kěbị ene. U semben tawẹ kạděngụe dunia ini e, u su ral᷊ungu kakakoạ e kere orasẹ̌ ini e ute sarungbe maparung!

³²Kapuluku e tangu kai tadeạu i kamene mal᷊iu wọu sigěsạ. I saing kụ tạ kawinge ute kai reng makapẹ̌sěmpị u tiněnnane su munaran Mawu e, u i sie mapulu makal᷊uasẹ̌ naungu Mawu.

³³Arawe i saim piạ kawinge ute sarungbe měngkai mẹ̌tẹ̌tiněnnan hal᷊ẹ̌u dunia ini, batụu i sie mapulu mapakal᷊uasu naungu kawinge;

³⁴kụ pul᷊ise ute naunge kai mạpahiạ. Sěngkatau wawine tạ kawinge arau sěngkatau mahuala e, měngkai sarung mẹ̌sẹ̌sěmpị hal᷊ẹ̌ u Mawu e, u i sie měngkai lẹ̌lahimpuluangu wadange ore lai rohkẹ̌ e makoạ tataghuanengu Ruata. Kai arawe sěngkatau wawine kụ seng nẹ̌kawinge, ute kai mạsasuagẹ̌ tiněnnane su hal᷊ẹ̌ u dunia ini, u i sie mapulu mapakal᷊uasu naung u kawinge.

³⁵Iạ namohẹ u patikụ ini e, kai waugu i kamene hala, wal᷊inewe mapulu mẹ̌sẹ̌dingu ini ringangu mẹ̌sẹ̌ding u ene. Ěnningku e tumbạben tadeạu i kamene makapanuntụ mẹ̌koạ apan matatul᷊idẹ̌ e ringangu katěngadẹ̌ e ringangu tadeạu i kamene maamumang dingangu matinalung mẹ̌sěmpị u tiněnnang kamene su Mawu e.

³⁶Kereu piạ u sěngkatau makạpěndangu ta makahino pẹ̌kakoạ e su kaghiange, kereu i sie tawe makapẹ̌tingkědangu kapulune, mase i sie seng makapěndangu hinong mẹ̌kawing dingangu wawine ene, ute walạe pẹ̌kakoạ e apang kinapěndangenge kụ mapia.[8] I sie tawe nẹ̌sal᷊a kereu i sire mariadi mẹ̌kawing.

³⁷Kai kereu pẹ̌sěngkatau e seng nẹ̌koạ putusange su ral᷊ungu naunge kụ semben tawe mẹ̌kawing dingangu putusange wal᷊inewe nisihasa, tangu apang kụ kinoạ ene e mapia, kamageng i sie tawe nẹ̌kawingu kaghiange,[9] asal᷊u i sie natahutěngadẹ̌ bue su naunge.

³⁸Hatede, i sain nẹ̌kawing,[10] mapiang koạ e, ringangu i sain tawe nẹ̌kawing,[11] limembọeweng kapiane lai kakakoạ e.

³⁹Sěngkatau wawine kụ seng nẹ̌kawinge mạkakauhẹ̌ dingangu kawinge karěngụeweng kawinge wiahẹ̌. Kereu kawinge seng nate ute, wawine ene sembeng makapẹ̌kawingu esẹ kẹ̌kapulune, asal᷊u pẹ̌kakawing ene e kai pẹ̌kakawingu Sahani.

⁴⁰Kai limemboweng kapiane kereu i sie semben tawe saụ mẹ̌kawing. Ene e pěndangkuwe sẹ̌saku, kai su naungku ete wue mal᷊aing Rohkẹ̌ u Ruata e mẹ̌ngẹ̌ngahạ si siạ.